Bjarni í sínum heimi.

 

Skilur bara ekki neitt hvað er í gangi.

Allt er eins og blómstrið eina, ráðstöfunartekjur margfaldast og stjórnvöld öll af vilja gerð.

Nema að takast á við vaxtaokrið, þar vantar öll skilyrði, einhver óstöðugleiki og eitthvað kreppuástand sem gerir okkur ekki að hafa sama vaxtastig og aðrar siðmenntaðar þjóðir.

Og í þessu er engin mótsögn, allavega finnst okkur sem sáu Tommy Lee Jones fara á kostum sem Two faces, eða maðurinn með sitthvort andlitið eins og það hét á áskæra ylhýra.

 

En það er verra með þessa óþægilegu tilfinningu Bjarna að það sé sjálfstætt markmið verkalýðsforystunnar að fara í átök.

Þar hvarflar að manni að Bjarni, með öll sín andlit sé ekki tengdur við raunheim okkar hinna.

 

Það er samt ekki sama hver segir hlutina, þyngdarlögmálið var ekki til fyrr en Newton sagði frá því að epli sem félli af tré, félli til jarðar. 

Og þar sem Bjarni er með einhverja áróðurslínu úr Valhöll til að lauma því að eldri borgurunum, sem eru síðasta vígi Sjálfstæðisflokksins, að þá þarf að vitna í eldri borgara, úr innsta hring Sjálfstæðisflokksins löngu áður en Bjarni fékk fyrst bleyjuna, sem segir þetta um störf Bjarna, og af hverju þessi kurr er í verkalýðsforystunni.

Gefum Styrmi orðið;

"Var stöðumat ríkisstjórnar og Samtaka atvinnulífsins kolrangt eða var það bara tal? Héldu þessir aðilar í raun og veru að það væri hægt að tala sig frá þeim veruleika, sem blasað hefur við á þriðja ár? Hver sem skýringin er fer ekki á milli mála að það er komið að vegamótum. Nú þýðir ekki lengur að tala og nú þýðir ekki lengur að bíða. Nú þarf að hefjast handa. En vita þeir hvernig þeir eiga að bregðast við þessari stöðu? Svarið við þeirri spurningu liggur ekki fyrir.".

 

Þetta og margt annað hefur Styrmir sagt.

Athyglisvert er að hann dregur það í efa að stjórnvöld viti hvernig þau eiga að bregðast við þeirri stöðu sem nú er uppi.

Og í þessu viðtali, er Bjarni í sínum heimi ekki að svara þeirri spurningu.

 

Því við lifum þá tíma að núna þurfum við aðgerðir, ekki frasa.

Forystu sem höfðar til fjöldans, ekki örfárra.

Lausnir sem höggva hnúta.

 

Og Bjarni verður að axla þá ábyrgð.

Hann veður að fullorðnast.

 

Tími silfurskeiðarinnar er liðinn.

Kveðja að austan.

 

„Óþægileg tilfinning“ um átök

Er maðurinn með rugluna??

 

Það hvarflar að manni þegar hann skammast útí forystufólk verkalýðshreyfingarinnar vegna fyrirhugaðra verkfallsaðgerða.

 

Hvað vill hann að verkafólk geri í nauðvörn sinni??

Fari heim til hans og þrífi kauplaust??

Sætti sig þegjandi og hljóðalaust við  sjálftöku toppanna og að vegna hennar sé ekkert til skiptanna handa þeim sem vinna störfin.??

 

Þessi orð hans eru vissulega rétt og benda til óbrenglaðar dómgreindar; "„Árás­ir á ferðaþjón­ust­una eru árás­ir á sam­fé­lagið í heild sinni,“ seg­ir Jó­hann­es. „Mik­il­vægi þess­ar­ar grein­ar í efna­hags­líf­inu ger­ir það að verk­um að tjón ferðaþjón­ustu­fyr­ir­tækja er ekki bara tjón fyr­ir­tækja sem slíkra held­ur alls sam­fé­lags­ins.“".

En þá á hann líka að skammast út í þá sem ábyrgðina bera.

Þá sem hækkuðu laun sín margfalt fram yfir það sem verðmætaaukning þjóðarframleiðslunnar leyfir.

 

Og hann á að fara í Múrbúðina og kaupa sér múrbrjót til að brjóta niður fílabeinsturninn sem þau Katrín og Bjarni dveljast í þessa dagana.

Ríkisstjórnin gat margt gert, en hún gerði ekkert af því sem þurfti að gera.

Hún móðgaði í stað þess að sætta.

 

Taktleysi þeirra sem leiða er vandinn í dag.

Ekki nauðvörn þeirra sem eiga ekki önnur úrræði.

 

Ef framkvæmdarstjóri Samtaka ferðaþjónustunnar skilur það ekki, þá er hann einfaldlega;

Vanhæfur.

 

Og ekkert meir um það að segja.

Kveðja að austan.

 

„Sem mest tjón á sem skemmstum tíma“

Úrkynjun úrkynjaðra.

 

Kristallast í þessari frétt.

Samt er hún ekki glimps frá Sódómu og Gomoru.

 

Að vilja fá allt, án þess að leggja á móti, er sjónarmið út af fyrir sig.

Og kannski er það full harkaleg viðbrögð að breyta fólki sem svona hugsar í saltstólpa.

 

Nær væri að senda dímona sem ala á þessari hugsun sjálfselskra karla beint til baka til húsbónda síns í neðra.

Þá myndi kannski fækka því aumkunarverðu fólki sem játar að það hafi kosið hörmungar yfir samfélög okkar með þeim rökum að það sagðist kjósa með buddunni.

 

Yfirleitt hefur svona úrkynjun samt tengst skattaráðgjöf siðblindingja sem vilja sjúga til sín fjármagn úr samfélögum okkar, án þess að greiða krónu, eða þá mjög fáar, til baka.

Samt greiða blindingjarnir til baka, ekki reyndar til samfélagsins, heldur til stjórnmálamannanna sem gera þessa skattaráðgjöf mögulega.

Munum að þegar allt orðgjálfrið sem sagt er til að láta kjósa sig, er dregið úr ræðum og ritum Bjarna Ben yngri, þá stendur aðeins eitt eftir, og það var sú knýjandi nauðsyn að fjármálamenn gætu flutt óhindrað auð úr landi, en skilið skuldir eftir á innlendum kennitölum.  Kallast frjálst flæði fjármagns.

Sá eldri talaði hins vegar um miðja síðustu öld um nauðsyn að tryggja undirstöður atvinnuveganna, um nauðsyn þess að byggja hafnir og vegi, að öflugt atvinnulíf væri forsenda velferðar og velmegunar fjöldans.

Á milli er ginnungargap.

 

En auðmönnum er vorkunn, gullþorsti tærir upp sálu þeirra.

Hins vegar hef ég aldrei lesið frétt sem vísar svona sterkt í úrkynjun hins venjulega manns.

Og þá gamalmenna sem vilja skilja börnin sín eftir á köldum klaka.

 

Munum að í kjarna hefur líf okkar aðeins einn tilgang, og það er að ala af okkur líf, og sjá til þess að komist á legg.

Þess vegna verndum við afkvæmi okkar, en étum þau ekki.

 

En sú úrkynjun sem þarna er lýst, er varla skömminni skárri.

Aumkunarverði getur mannleg hugsun varla orðið.

 

Og það er eins og fólk varla sjái það eða skilji.

Kveðja að austan.

Njóta skattleysis í Portúgal

Elítan skilur þetta ekki.

 

Láglaunafólk ætlar ekki eitt að bera byrðar stöðugleikans á herðum sér.

Þeir tugþúsundir sem eru á okurmarkaði leigunnar er nákvæmlega sama þó verðtryggð lán hækka, það er seinna tíma vandamál.  Það sem telur er að geta borgað leigu næstu mánaðar.

Fólk sem er með verðtryggð lán ætlar sér ekki að taka á sig aðra stökkbreytingu lána, það veit eins og er að þó Bjarni og hinir auðmennirnir fái alla sína leppa og skreppa til að verja kastala verðtryggingarinnar, að þá er atkvæðafjöldi þeirra aðeins dropi á hafi samstöðunnar.

 

Fólk veit þetta allt saman.

Og það þýðir ekki lengur að hóta því með búgí mann.

Því búgí mann er bara hlægilegur kall á nærbuxunum, afhjúpaði sig í Hruninu sem bullukall.

 

Fólk er einfaldlega búið að fá nóg.

Og gamlir hræðslufrasar bíta ekki lengur.

 

Á þetta bendir Styrmir ítrekað í pistlum sínum.

Ég dreg það ekki í efa að elítan lesi þá, en hún er bara of heimsk til að skilja innihald þeirra.

Áunnin heimska þess sem hefur of lengi komist upp með að skara eldinn að sinni köku, og heldur að slík sjálftaka sé innbyggð í kerfið, einhvers konar náttúrulögmál tekjuskiptingarinnar.

 

Þess vegna eru átök óumflýjanleg.

En ábyrgðin er ekki launþega.

Kveðja að austan.

 

Kjarabaráttan snýst ekki um staðreyndir

Það vantar réttlætiskennd við ríkisstjórnarborðið.

 

Segir fyrrverandi Vinstrigræna manneskjan sem þjónaði Gylfa og ESB armi verkalýðshreyfingarinnar, sem æmti hvorki eða skræmti gegn fjárkúgun breta sem hefði lagt íslenska velferð í rúst og gengið frá sjálfstæði þjóðarinnar ef allir hefðu verið eins og hún í andstöðunni.

Í dag er hún róttæk, og það er vel, en spurningin er hverjum hún þjónar??

Allavega þegar ég opna sögubók, þá kemur upp myndin af Trójuhesti, sama hvað ég opna aftur og aftur.

Stuðningsmaður ríkisstjórnar Jóhönnu Sigurðardóttur, stuðningsmaður breta og hrægamma, stuðningsmaður Gylfa forseta og hún leiðir baráttuna í dag.

 

Það er hvergi skráð í gögnum Hagsmunasamtaka heimilanna að Drífa Snædal hefði lagt inn eitt orð til stuðnings, eða til að styrkja kröfu Hagsmunasamtakanna þegar samtökin lögðu bankamafíuna og fengu gengislánin dæmd ólögleg.

Það finnst hvergi stafkrókur um að hún hafi stutt kröfugerðina um afnám verðtryggingarinnar.

Yfir höfuð finnst ekki eitt eða neitt að hún og hennar stuðningsfólk hafi tekið slaginn við auðræðið og þau djöflatæki sem það notar til að arðræna samfélagið sem áar okkar byggðu upp undir merkjum velferðar og velmegunar.

En hún kann frasana, það vantar ekki.

 

Orð breyta samt aldrei raunveruleikanum.

Herskáar yfirlýsingar hylja aldrei í raun stuðning við tæki auðstéttarinnar sem valda misréttinu og misskiptingunni.

Skógareldar slokkna ekki þó brennuvargurinn pissar á þá.  Ekki að pissið skipti máli til eða frá, en þeir hefðu aldrei kviknað ef brennuvargurinn hefði ekki kveikt.

 

En auðurinn veit sínu viti.

Launafólk mun fylkja sér um frasa Trójuhestsins.

Og ekkert mun breytast.

 

Því ekkert mun breytast fyrr en sjálft efnahagskerfið sem mylur undir Örfáa, sjálft þjófamódelið, er skorað á hólm.

Og það vegið.

 

Ekki til að bylta þjóðfélaginu.

Heldur til að endurheimta það.

 

Slíkt mun ekki gerast á meðan þræðir auðsins vefa frasa sem engin alvara býr að baki.

Auðurinn veit sínu viti.

Kveðja að austan.

Segir stefna í hörðustu átök í áratugi

Endalok græðginnar.

 

Er andmæli náttúrunnar við stóriðju matvælaframleiðslunnar.

Vá vofir yfir mannkyninu.

 

Fréttir berast af stórfelldri fækkun skordýra, hrun vistkerfa blasir við.

Og matvælastóriðjan framleiðir ónæma sýkla á færibandi.

Síðgræðgin hefur svo lagt undir sig lyfjaiðnaðinn, þar er orkunni eytt í að þróa lyf við lífsstílssjúkdómum, en varla brotabrot er notuð til að þróa ný sýklalyf.

 

Svar spilltra stjórnmálamanna í vasanum á sígræðginni er að opna landamærin fyrir sýklum.

Að eyðileggja það þó góða sem við eigum sem þjóð.

Ómenguð matvæli.

 

Á hvaða leið erum við??

Þekkir mannleg heimska engin endamörk??

 

Þarf fólk að standa yfir líkum barna sinna til að kveikja?

Eða vaknar það fyrr.

Kveðja að austan.

Hætta af óþoli gegn sýklalyfjum

Frelsi fylgir ábyrgð.

 

Og enginn hefur rétt á að valda öðrum skaða.

 

Milliríkjasamningur sem hafnar þessari grundvallarreglu ábyrgðarinnar, er ekki samningur heldur ánauð.

Og undir ánauð á enginn að gangast sjálfviljugur.

 

Líti hins vegar íslenskir stjórnmálamenn á þjóðina sem þræla, þá er lágmarkið að þeir tryggi hana gegn sannarlegu tjóni sem aðeins er tímaspursmál að hún verði fyrir.

Og láti þá borga sem ábyrgðina bera.

 

Búfjárstofn okkar er þekkt verðmæti.

Síðan er hægt að áætla óbeint virði hans sem snýr að þáttum eins og heilsu og matvælaöryggi.

 

Sá sem flytur inn, á að leggja fram tryggingu um að hann sé borgunarmaður fyrir þann skaða sem hann vitandi vits er tilbúinn að valda öðrum.

Sem ætti að vera einfalt mál þeim sem trúa því að engin áhætta fylgi óheftum innflutningi sýkla.

 

Stjórnvöldum ber skylda til að krefjast þessarar tryggingar áður en innflutningur er leyfður.

Bankatryggingu uppá x marga milljarða.

 

Þar með er málið dautt.

Kveðja að austan.

Mæðiveiki gæti fylgt mjólkinni

Ekki hægt að taka út innistæðu.

 

Þegar hún er ekki til staðar segir hinn margríki Bjarni Ben, sem alltaf getur hlaupið til pabba síns í mörg hundruð króna villuna í Flórída, að ekki sé minnst á alla reikningana í skattaskjólum.

Rökin vissulega rétt, en hvaða veruleikafirring er hér á ferð??

 

Við erum næst ríkasta þjóð í heimi og það er engin innistæða fyrir sanngjörnum kröfum verkalýðshreyfingarinnar segir Bjarni, og endurvarpar sjónarmiðum þeirra sem eiga allt.

Engin innistæða fyrir þeirri kröfu að vinnandi fólk geti lifað af launum sínum.

Samt getur krafan ekki sanngjarnari verið, og ekki getur þjóðfélagið þrifist án vinnuframlags þessa fólks.

 

Af hverju er ekki til þessi innistæða??

Skýringanna er varla að leita í sumarvillu Engeyjarættarinnar, þó þær séu 4 eða 5, og varla er til sú digra bankabók í skattaskjóli sem rúmar allan þjóðarauð næst ríkustu þjóðar í heimi.

Svo fleiri hljóta sumarhúsin að vera, og fleiri bankabækurnar í skattaskjólum.

Eða hvaða skýring önnur er nærtæk??

 

Síldarhrunið var nærtækt hjá nafna Bjarna á sínum tíma.

Skortur á þjóðartekjum var nærtæk skýring á kreppuárum fjórða áratugar síðustu aldar.

En hver er hún í dag??

 

Hvaða svör er Bjarni að veita þjóðinni eða flokknum sínum??

Allavega ekki sömu svör og  ritstjóri Morgunblaðsins, það er þegar Morgunblaðið endurvarpaði skoðanir hins venjulega flokksmanns, Styrmi Gunnarssyni.

Manninn sem spilar sig ekki bjána eins og Davíð Oddsson, kennir ekki Gunnari Smára um ólguna, enda vandséð hvernig hægt er að hengja kröfur ólíkra verkalýðsleiðtoga eins og framsóknarmannsins Vilhjálms eða sjálfstæðismannsins Ragnars á hatt gervisósíalistans sem síðast var skráður í vinnu hjá Jóni Ásgeiri.

 

Styrmir skilur og skynjar, og bullar ekki.

Hann myndi aldrei segja, að "það hafi lengi verið ljóst að það væri alvarleg staða, langt á milli aðila í langan tíma og það er erfitt að segja að það komi á óvart að við höfum ratað á þennan stað", því svona segja aðeins fábjánar.

 

Styrmir segir margt, alltaf af viti, en þetta sagði hann í síðasta pistli sínum hér á Moggablogginu;

"Forysta ríkisstjórnar hefur verið ötul við að útskýra fyrir fólki, að kjaradeilur standi á milli verkalýðshreyfingar og Samtaka atvinnulífsins en ekki á milli hinna fyrrnefndu og ríkisstjórnarinnar. Það er að sjálfsögðu rétt í grundvallaratriðum en einn þáttur málsins sem skýrir þá athygli, sem beinist að ríkisstjórninni er gjarnan látinn ónefndur. Það eru ákvarðanir Kjararáðs um launahækkanir æðstu embættismanna, þingmanna og ráðherra, sumarið og haustið 2016. Þá þegar var á það bent úr mörgum áttum, að með þeim ákvörðunum hefði ríkisvaldið tekið að sér það hlutverk að verða leiðandi í mótun kröfugerðar verkalýðssamtaka í næstu lotu kjarasamninga. Það væri ekkert vit í því og á það bent að í tveimur sambærilegum tilvikum á síðustu tæpum þremur áratugum, hefði Alþingi afnumið ákvarðanir svokallaðs Kjaradóms. Samstaða stjórnmálastéttarinnar um að hafa þær ábendingar að engu var augljós.".

Í þessi orð vitnar vitiborið íhaldsfólk til dæmis hér á Moggablogginu, bjánarnir tuða hins vegar um byltingu Smárans, eða að hinar sanngjörnu kröfur séu frekja og yfirgangur.

 

Hinir vitibornu spyrja, hví er þjóðfélagið látið sundrast svona vegna sjálftöku og græðgi elítunnar.

Eða af hverju geta ekki allir lifað mannsæmandi lífi af launum sínum??

Við erum jú rík þjóð.

 

Og réttlæti og sá jöfnuður að allir hafi í sig og á, er ekki kommúnismi, heldur kjarni siðmenningar okkar.

"Verðugur er verkamaður launa sinna".

Stendur í helgri bók.

 

Og aðeins vinnumenn andskotans mótmæla því.

Kveðja að austan.

Öll skilyrði fyrir góðri niðurstöðu

Aumingjavæl þeirra sem sviku sín helgustu vé.

 

Er ámátlegra en breim fressa í kvöldkyrrðinni.

Og ég hélt að ekkert tæki því fram.

 

Haraldur naut stuðnings.

Hann naut trausts.

Og hann sveik.

 

Afsakar aumingjaskap sinn með einhverju sem aðrir gerðu, eða gerðu ekki, líklegast áður en hann fæddist.

Svo aumur að það mætti halda að það væri Abel að kenna að hann skyldi láta bróður sinn Kane myrða sig.

"Ég trúi ekki þeim aumingjaskap uppá þjóðina að hún verndi ekki það sem hún á", eða þannig voru orð okkar fremsta vísindamanns, Margrétar Guðnadóttur, prófessor, þegar hún andmælti þeirri græðgi og heimsku að láta undan kröfu hins frjálsa flæðis að flytja inn hrátt kjöt til lands sem átti bústofna sem fáa sýkla þekktu.

Margrét sagði þá vanþekkingu auðlegð á tímum hins frjálsa flæði sjúkdóma sem tröllríða heiminum í kjölfar græðgivæðingar glóbalismans.

 

Hver er skömm fólksins sem treysti Haraldi til að gæta hagsmuna þjóðarinnar?

Hvernig getur það horft framaní náunga sinn eftir þessi sögulegu svik??

Það var ekki þannig að heiðarlegt heilsteypt fólk hafði uppi sömu rök, og sama andóf, en var ekki kosið því Haraldi var treyst.

 

Aumasti af þeim aumum.

Þá er ekki annarrar afsökunar að vænta.

Nema þá þeirri að þetta hafi allt verið Evu að kenna, hún lét nöðruna fleka sig.

 

Jafnvel sá næst aumasti hefði vælt svipað.

En sá þriðji, hann hefði einfaldlega sagt, að sá sem flytur inn sjúkdóma, að hann ber ábyrgðina.

Og kostnaðinn

 

Að flytja inn sjúkdóma er ekkert mál ef þú ert tilbúinn að borga kostnað þeirra sem tapa á innflutningi þínum.

Og tryggingar hljóta að keppast um að selja þér slíka tryggingu, eftir að hafa lesið fjölfaldaðar greinar sígræðginnar sem Stephensen ættin skrifar undir, sú fræga þjóðræknisætt.

 

Er þá málið ekki dautt??

Trygging uppá nokkra tugi milljarða, sem engar líkur eru á að komi til útborgunar, að sögn Stephensenættarinnar, hlýtur að kosta aðeins nokkra þúsundakalla, og þá til málamynda.

Þar með engin fórnarlömb, nema þá kannski þjóðin, sem fær hormóna og sýklalyf í stað matar og hollustu.

 

En þjóðin getur líka lagt fram sína skaðabótarkröfu.

Og þingmenn sem samþykkja hið frjálsa flæði sjúkdóma, hljóta að tryggja sig fyrir þeirri kröfu.

Í beinhörðum krónum, ekki lygaþvættinginum að það sé hægt að kjósa þá burt, það hefur þjóðin gert lengi, en alltaf er hið frjálsa flæði hið sama.

Úr vasa almennings í vasa auðs og auðmanna.

og alltaf stjórnar Bjarni í umboði Engeyjar.

 

Það er nefnilega svo, Haraldur Benediktsson, að aumingjaskapur er valkostur.

Þeirra sem kjósa að svíkja sín helgu vé.

 

Og mundu, að þú ert ekki einn.

Fáðu þér kaffi með þingforseta, og hann getur sagt þér sögur um að svik við hin helgu vé, geta skilað metorðum og auðlegð, því slíkt kann auðurinn að meta til fjár.

Og borgar vel.

 

En kenndu ekki öðrum um.

Skammastu þín fyrir það.

 

Jafnvel lágkúran forðast botninn.

Kveðja að austan.

Hagsmuna Íslands ekki gætt

Skynsemi versus róttækni.

 

Þeirra sem játa að verkafólk hefur gefist upp fyrir auði og frjálshyggju, eða hinna sem segja hingað og ekki lengra.

Annar aðilinn íhugar að slíta viðræðum, hinn hefur þegar gert það.

 

Hvor er líklegri til að ná árangri?

Sá sem buktar sig og beygir, enda í kjarna sammála hinu frjálsa flæði Evrópusambandsins sem miskunnarlaust keyrir niður kjör verkafólks, sammála verðtryggingu og okurvöxtum því það ku tryggja áreynslulausa ávöxtun pappírspeninga lífeyrissjóðanna, sá sem laut forystu Gylfa forseta og vildi borga fjárkúgun breta, sá sem hefur alltaf lyppast niður.

Sá sem ....

Eða sá sem rífur kjaft og segir hingað og ekki lengra.

 

Persónulega veðja ég á þann fyrri.

Sá seinni virðist ekki hafa grænan grun um að vandinn er ekki fólginn í tregðu atvinnurekanda, heldur er hann kerfislægur, innbyggður í hið frjálsa flæði frjálshyggjunnar sem við höfum innleitt úr regluveldi ESB.

Slæst því við vindmyllur.

Og heldur að hann sé að slást við tröll.

 

Stundum þarf fólk að líta í eigin barm til að skilja af hverju það breytir engu.

Af hverju það vill vel en skilar engu.

 

Skynsemin skilar hins vegar ekki einu sinni engu.

Hún skilar afturför, hægfara dauða hinna vinnandi stétta.

 

Best væri samt að fólk hefði vit til að skila árangri.

Kveðja að austan.

SGS vísar deilu til ríkissáttasemjara