Hvenær verður Tyrklandi vikið úr Nató.

 

Þessari uppsprettu upplausnarinnar í Mið Austurlöndum, afsprengi miðaldarhreyfingarinnar kennda við Múslímska bræðralagsins líkt og ógnarstjórn Hamas á Gasa eða hernaðararmur íslamskra miðaldaöfga, ISIS.

Aðeins einföldustu einfeldningar trúa því að tyrkneski herinn hafi reynt að bylta stjórn miðaldamannsins Erdogans.

Sagan þekkir svo mörg dæmi um svona tilbúning einræðisafla sem nýttur er til að ganga á milli bols og höfuðs á öllum sem ógna völdum þeirra.

 

Tyrkland er einræðisríki.

Tyrkland er ein af fóðurstöðum þess fólks sem hamast gegn vestrænum gildum og vestrænum lífsskoðunum.

Og það á enga samleið í hernaðarbandalagi vestrænna lýðræðisþjóða.

 

Siðmenningin á í stríði við þessa miðaldaöfga.

Þeir eiga ekki að njóta skjóls hjá okkur.

 

Nútímamaðurinn í Tyrklandi á betra skilið.

Kveðja að austan.

Hafa handtekið 20 starfsmenn dagblaðsins Cumhuriyet

Ungliðar harma fjársvelti.

 

En af hverju styðja þeir fram í rauðan dauðann handbendi ræningjakapítalistanna sem leiða flokka þeirra?

Það er jú þeirra framtíð sem er í húfi.

 

Sérstaklega snýr þetta að þeim sem þjóna fjölskyldufyrirtækinu sem gengur undir nafninu ríkisstjórn Íslands, ehf.

Halda þeir að fjölskyldan lesi svona ályktanir eða hún hafi eitthvað annað markmið með fyrirtæki sínu en að fylla á sínar fjárhirslur?

 

Fjölskyldufyrirtækið situr í umboði gamalmenna, masókískra landsbyggðarmanna og ginkeypts fólks sem hélt að það væri að kjósa breytingar með því að kjósa Viðreisn og Bjarta framtíð.

Þetta er fólki sem ber ábyrgð á atlögunni að framtíð þessa unga fólks.

Því þjóð sem fjárfestir ekki í menntun og vísindum, er þjóð sem endar á öskuhaugum framtíðarinnar.

 

Það er aum þjónkun sem vinnur gegn sínum eigin hag.

Og engin ályktun fær því breytt.

 

Aðeins sá manndómur að taka örlögin í sínar hendur.

Og gera það sem þarf að gera.

 

Losa þjóðina úr fjötrum auðránsins.

Kveðja að austan.

 

 

 

 

Harma fjársvelti háskóla

Er Mogginn farinn að draga dár að Trump??

 

Alvarlegi fjölmiðilinn sjálfur.

Allavega myndi hvaða uppistandari sem er vera hreykinn af þessu innskoti;

 

" í viðtali við NBC í gær­kvöldi lýsti Trump allt öðru­vísi kvöld­verðarspjalli þeirra tveggja. Þar hafi aldrei verið rætt um holl­ustu en ekki er vitað hvort Trump sé að tala um sama kvöld­verðarboð og Comey. En heim­ild­ir NYT herma að þetta hafi verið þeirra eini kvöld­verður tveir sam­an."

 

Raunveruleikaskyn valdamesta manns heims dregið sundur og saman í háði.  Því eftir þessu feitletraða kemur fullyrðing um að aðeins sé um einn kvöldverð að ræða, aðrir hljóti þá að hafa átt sér stað í huga Trumps.

 

Nú er spurning hvað Björn Bjarnason gerir, fáum við einn eina greinina á miðopnu Morgunblaðsins þar sem það er ítrekað á hvaða traustum fótum meint utanríkistefna Trumps stendur, að það þurfi að sýna útlagaríkjum járnhnefann svo þau lyppist niður og hlýði.  Eitthvað sem Obama virtist aldrei hafa skilið, enda mistókst honum að starta þriðju heimsstyrjöldinni.

Þó það hafi reyndar ekki verið markmið hans, en Björn sér samt fulla ástæðu til að skamma hann fyrir.

 

Því sorglegast, eða réttara sagt það næst sorglegasta í öllu þessu máli, er ekki Trump og vanvit hans, heldur þeir sem reyna að finna heilu brúna í gjörðum hans og málflutningi, þar sem ekki sinni ein spýta er til staðar til að smíða úr.

En það er gott að sjá að Morgunblaðið er ekki í þeim hópi.

 

Það er jú líf okkar allra sem er undir.

Og óþarfi að kóa með eyðingu þess.

Kveðja að austan.

Matarboðið markaði upphafið

They´re coming to take me away hahaaa!

 

Sönglar Trump þessa dagana líkt og Napóleon XIV gerði á árum áður.

Alltaf jafn hissa á að þegar bankað er á hurðina að inn komi þjónar og auðmjúkir ráðherrar en ekki tveir menn með eitthvað hvítt í fanginu.

 

Svo Trump bætir bara í, skellihlær svo á eftir að einhver skuli taka hann alvarlegan.

 

"„Hann er mont­hani. Hann er at­hygl­is­sjúk­ur. FBI hef­ur átt und­ir högg að sækja. Ég ætlaði alltaf að reka Comey. Þetta var mín ákvörðun.“"

 

Hann á fyrirsögnina í dag, og finnst það drepfyndið að þarna úti skuli vera menn sem reyna að bera blak af honum, eða það sem verra er, að reyna að lesa einhverja stefnu eða skynsemi úr orðum og athæfi, þar sem ekkert slíkt er að finna.

 

Svona er valdið, þá komast menn upp með ýmislegt.

Sérstaklega dárarar.

Kveðja að austan.

Trump: Engin rannsókn í gangi

Hýenan er víða.

 

Í Afríku er sagt að ef hýenan þrífst ekki á landinu, þá þrífist ekkert rándýr þar.

Hýenan er dugleg, hún lifir jöfnum höndum á hræjum eða lifandi bráð, og hún er mikill tækifærisinni, öskuhaugar nútímans hafa reynst kjörlendi hennar.

Samt er hýenan það rándýr sem mest er hatað eða fyrirlitið, og ef fólki mislíkar við einhvern sem notar sér bágindi annarra eða veika stöðu, þá er hann oft kenndur við hýenu.

 

Hýenur eru sem sagt víða, og á einhverjum tímapunkti þarf þjóðina að takast á við þær.

Það er þá sem sýna hegðun sem kennd hefur verið við þessi duglegu rándýr.

 

Hlutabréfabraskarar ráða sjávarútvegsfyrirtækjum landsins, með örfáum undantekningum þar sem eigendur eiga ennþá rætur í greininni sjálfri.

Hugsanlega eru til elstu menn sem muna eftir tilviki þar sem sjávarútvegsfyrirtæki sótti sér fjármuni með hlutabréfaútgáfu, en það er langt síðan og slíkt var alltaf mjög fátítt.

Hlutabréfabraskararnir eru því afætur, þeir hafa aldrei styrkt greinina á nokkurn hátt. 

Hins vegar eru fjöldamörg dæmi þar sem sjávarútvegsfyrirtæki eru skuldsett uppí rjáfur til að standa undir hlutabréfakaupum eiganda sinna, hvort sem þeir yfirtóku fyrirtækin, eða þurftu að kaupa aðra eigendur út.

Með öðrum orðum, braskið eða baráttan um eignarhaldið sýgur fjármuni út úr greininni, veikir fyrirtækin og kemur í veg fyrir eðlilega endurnýjun tækja og tóla.

 

Síðan eru það arðgreiðslurnar sem þykja svo sjálfsagðar að enginn hefur orð á þeim lengur.

Rökin eru að hlutabréfabraskararnir eigi að fá arð af fjárfestingu sinni, þeir gætu til dæmis átt peninga sína inná bók og fengið af þeim vexti.

Það seinna er rétt, en hver bað þessa menn um að fjárfesta í sjávarútveginum til þess eins að græða á.  Þeir þurftu þess ekki, þeir þurfa ekki að mjólka þessa undirstöðuatvinnugrein þjóðarinnar.

Það er ekkert sem segir það nema bábiljan ein, sama eðlis og þegar prestar Azteka byggðu völd sín og auð á þeirri bábilju að mannsfórn væri forsenda sólarupprásar.

Mammonsdýrkun krefst reyndar ekki blóðs, en vílar sér ekki að fórna lífsafkomu fólks ef gróðinn er í húfi, eða sem er enn siðlausara, svo hægt sé að mjólka meira, sjúga meiri fjármuni úr heilbrigðum fyrirtækjum.

 

Grandi er nýbúinn að greiða út háan arð til hluthafa sinna.

Núna rekur hann fólk, sviptir það lífsafkomu sinni.

Rífur einn öxul úr hjóli atvinnulífs Akranes, rótgróins sjávarþorps til áratuga.

 

Grandi hefur fyrirgert rétt sínum til að nýta sameiginlega auðlind þjóðarinnar á meðan núverandi eigendur ráða fyrirtækinu.

Það á að svipta Granda veiðiheimildum sínum og dæma stjórnendur þess til skóggangs.

 

Sólin hélt áfram að koma upp þó blóðfórnir illmenna voru stöðvaðar.

Sjávarútvegur á Íslandi mun lifa áfram góðu lífi þó braskarar hafi hann ekki að féþúfu.

 

Það er mál að linni.

Kveðja að austan.

86 sagt upp störfum á Akranesi

Við sviptum fólk voninni.

 

Við leyfum glæpamönnum að ráðskast með samfélög þeirra, hvort sem það eru löglegir hvítflibbagangster eða ennþá ólöglegir fíknsalar.

Afleiðingarnar gerum við refsiverðar.

Og nú á að ofsækja þá sem verða fíkninni að bráð.

Við skulum ekki halda að það komi ekki fleiri sálarleysingjar á eftir þeim fyrsta.

 

En það er eins og við, góða fólkið sem hefur allt okkar á þurru, að við vitum ekki að þeir sem verða undir, geta snúist til varnar.

Ef kerfið útskúfar fólki, hvað tilgang hefur það þá að virða reglur þess samfélags sem útskúfaði því?

 

Þessi litla frétt er aðeins birtingarmynd þess innanmeins sem er að éta upp vestræn samfélög.

Við höfum leyft sálarlausu fólki að yfirtaka öll völd í samfélögum okkar, líklegast vegna þess að það sagðist geta útvega okkur ódýrari jeppa, meiri lúxus.

Og sálarleysi fylgir sviðin jörð, og fólk á flótta svo ég grípi til líkindamáls.

 

Og við sem höfum ennþá allt okkar á þurru, lítum undan.

Við spáum ekkert í til dæmis hvað varð um fólkið sem flutti frá verðlausum heimilum í kjölfar kvótakerfisins, það eina sem hvarflaði ekki að okkur var að það hlyti einhverjar bætur fyrir það tjón sem kerfi hagræðingarinnar olli þeim.  Við vildum ávinninginn, þau máttu eiga tjónið.

Hvað varð um hinar 10.000 fjölskyldur sem misstu heimilin sín í kjölfar Hrunsins sem þetta fólk bara enga ábyrgð á, sökin er okkar sem leyfðu hina evrópsku reglugerð um frjálst flæði fjármagns? 

Er það þarna ekki einhvers staðar??  Örugglega flest hafa komið undir sig fótunum á ný. 

En það gerðu líka flestir sem komu að heimilum sínum í rúst eftir morðæði seinni heimsstyrjaldar en það réttlætir ekki morðæðið.  Og það er ekkert sem réttlætir að 10.000 fjölskyldur séu hraktar af heimilum sínum svo hrægammapúkinn fari feitur úr landi. 

Ekkert nema sálarleysið.

 

Við heyrum líka fréttir að það sé verið að skera niður krónur hér og þar, til dæmis til Hugarafls eða námsmöguleika fatlaðra einstaklinga, krónur sem margfaldast ef í Exelinn er líka skráð bati, bót meina sinna, tækifæri til lífs, til betra mannlífs, gleði, fegurð.

En sálarleysið telur slíkt óþarfa útgjöld, og kemst upp með niðurrif sinn.

Við heyrum líka fréttir að gamalmenni fái ekki að borða ætan mat, nema stundum. því fullt fæði kostar of mikið, og við heyrum fréttir af öryrkjum sem dæmdir eru til viðvarandi fátæktar, þeir geta ekkert, því þeir hafa ekkert milli handanna eins og sagt var hér áður fyrr.

 

Á sama tíma heyrum við fréttir af því hvað við höfum það gott, að kaupmáttur snaraukist milli ára, hagsæld sé í hæstu hæðum, að við höfum aldrei haft það betra.

En þá er samt eins og það hvarfli ekki að neinum að það sé þá birtingarmynd einhvers óeðlis að heyra hinar fréttirnar, af fjárskortinum, af fjársveltinu, af þjáningum þeirra sem ættu ekki að þurfa þjást.

Við getum ekki kennt hinum sálarlausu um, þeir eru í okkar umboði, þeir eru okkar menn eða þannig.

Og það dugar ekki að horfa út um gluggann, og segja, "Djöfull hef ég það gott".

 

Það dugar ekki því það er í eðli fólks að snúast til varnar.

Sérstaklega þegar það hefur misst vonina, misst trúna á samfélagið, misst trúna á kerfið.

Og það dugar ekki heldur að fara háðulegum orðum um andóf þeirra hver svo sem birtingarmynd þess er.

 

Fólk kaus ekki Trump vegna þess að það var lítt menntað eða eitthvað undirmálfólk sem kunni ekki að fóta sig á gósenlendum hins frjálsa flæðis, hinna frjálsu viðskipta.  Og hrakfarir þess væri því að kenna.

Fólk kaus Trump vegna þess að það vissi að hann myndi ráðast gegn kerfinu, kerfinu sem hafði afmennskað það sem einhvern kostnað  í Exel. 

Ekki vegna þess að það batt einhverjar vonir við hann, vonin er löngu flúin til fjalla, þetta fólk er að bíta frá sér.

Og það er rétt að byrja.

 

Einhverjir varnarsigrar elítunnar fá þar engu breytt.

Og ef hinir svo kölluðu popúlistar sigra ekki, þá verður það næst maðurinn með járnhnefann sem ræðst til atlögu.

Því sá sem er útskúfaður, sá sem hefur engu að tapa, hann finnur sér sinn farveg, hann finnur sína rödd.

Og það verður ekki rödd sáttar og samlyndis.

 

Umrót og upplausn verða ekki umflúin.

Það hafa of margir verið dæmdir úr leik.

 

Þess vegna ættum við að íhuga svona fréttir.

Hvort sem þær eru frá Ástralíu eða Breiðholtinu.

Spyrja hvað fór úrskeiðis.

 

Við höfum það vissulega gott, að meðaltali, það er faktur.

Annars hefði hinni fyrstu atlögu popúlistanna ekki verið hrundið.

Annars væri kerfi hinna sálarlausu ekki við völd.

 

En það er eitthvað að, eitthvað mikið.

Það er ekki efnahagslegt, ekki pólitískt, heldur siðferðislegt.

 

Og það snýr að okkur, sem höfum alltaf snúið okkur undan.

Annars lytum við ekki stjórn manna sem telja kærleik vera villu í bókhaldinu.

 

Villu sem þarf að leiðrétta.

Svo hagnaður þeirra aukist.

 

Við höfum tíma.

En hann er að renna út.

 

Og kemur aldrei aftur.

Kveðja að austan.

 

 

 

Atvinnulausir sendir í lyfjapróf

Ríki í ríkinu.

 

Þegar valdamesta embættið í öflugasta ríki heims fer sínu fram án tillits til hinna hefðbundnu leikreglna, þá er eitthvað mikið að hjá viðkomandi ríki.

Ef það kemst upp með einræðistilburði sína, verður ríki í ríkinu, þá er það orðið ógn við lýðræðið.

Og enginn veit hvað gerist næst.

 

Svo má ekki gleyma að svona byrjaði þetta hjá þeim mönnum sem hófust til valda í lýðræðislegum kosningum, en notuðu svo völd sín til að fyrirkoma lýðræði viðkomandi lands, og gerðu sjálfa sig að einræðisherrum.

Þeir tóku alltaf fyrsta skrefið.

Og svo næsta.

Og svo koll að kolli.

Einræði hefur aldrei orðið til á einni nóttu.

 

Við þekkjum þetta ferli í Tyrklandi, þar sem íslamskur öfgamaður er langt kominn með að hrifsa til sín öll völd.

Og ef við sleppum að minnast á manninn sem má ekki nefna, eða þann sem kom aðeins á undan honum, að þá er gott að rifja upp hvernig ferill Napóleons þriðja Frakkakeisara hófst.

Og það var nákvæmlega svona, fyrst var hann kosinn fyrsti forseti annars franska lýðveldisins, 1848, og um leið sá síðasti, því hann lét krýna sig keisara 4 árum seinna, eða 1852. 

Hann komst upp með fyrstu einræðistilburði sína, svo leiddi eitt af öðru.

 

Hvort Trump forseti muni enda sem Trump fyrsti, skal ósagt látið.

Ef hann kemst upp með gerræði sitt í dag, þá verður eitthvað annað á morgun.

Því sjálfhverfir menn eins og Trump sjá aðeins einn tilgang í lýðræði, og það er að nota það sem tæki til að fá æðstu völd. 

Síðan er þeirra höfuðmarkmið að fyrirkoma því.

 

Ekkert að óttast segja margir.

Bandarískt lýðræði virkar.

En ef svo væri, þá hefði Trump aldrei orðið forseti.

 

Fólk gleymir því nefnilega.

Frumbresturinn, sá sem sprungurnar dreifast út frá á síauknum hraða, hefur þegar orðið.

 

Og ef sterk hagsmunaöfl sjá sér hag í að bakka hann upp, þá fer Trump alla leið.

Þar er efinn.

 

En hann er sá eini.

Kveðja að austan.

Enginn sérstakur saksóknari

Vandræðagangur í Washington

 

Það er óhætt að segja að það vanti hænur í dag í hinum fornfræga höfuðstað bandarísku frelsisbyltingarinnar þar sem grunnur var lagður af nútíma lýðræði.

Slíkt er fjaðrafokið að ekki finnst óreitt hæna inna 10 mílna radíus.

Sérstaklega er gaman að lesa um viðbrögð Repúblikana sem bera þann kross að hafa lyft þessum manni til valda.  Því aldrei má gleyma að það er kjörmenn sem bera hina endanlegu ábyrgð, og þeir voru hugsaðir sem öryggisventill ef lýðræðinu yrði það á að kjósa algjörlega óhæfan mann í þetta æðsta embætti þjóðarinnar.

 

En núna skilur maður fyrst viðbrögð öldungaráðsins þegar Calíkúla skipaði uppáhaldsgæðing sinn sem ræðismann sem var mikil virðingarstaða innan rómverska öldungaráðsins.

Gæðingurinn var nota bene hestur.

Hvort arftaki Comeys verði úr dýraríkinu skal ósagt látið, keisarinn hafði meiri völd í þá daga.

En þeir sem vilja spá fyrir um næstu útspil Trumps, ættu að kynna sér sögu þeirra frænda, Neró og Calíkúla, þeir höfðu æðstu völd, og voru hvatvísir og sjálfhverfir með afbrigðum.

 

Hvað gerir maður sem hugsar ekki eina rökrétta hugsun??

Fær hann vopnabúr til að leika sér að?

Fær hann að flýta feigðarstund mannkyns með því að berjast gegn aðgerðum gegn lofslagsvánni??

Fær hann endalaust að ögra öðrum þjóðum í hvatvísi sinni og flumbrugangi??

Eða mun hann ráðast frekar gegn sínu eigin stjórnkerfi??

 

Síðan er það spurning um verjendur hans?

Hvað langt ganga þeir?

Myndu þeir sætta sig við hest í forsæti öldungadeildarinnar, með þeim rökum að hann væri gæðingur, og hnýtt væri svo við frumrökum Trumps; "ég má".

Eða eru mörkin nær raunveruleikanum?

 

En þá hvar??

Þeir hafa varið algjörlega órökrétta hegðun forsetans, reynt að finna eitthvað vitrænt úr ruglinu sem kemur daglega frá honum, skautað framhjá algjöri vanþekkingu hans á alþjóðamálum, og látið eins og það sé  alltí lagi með manninn.

Hvar er endastöð vitleysunnar hjá manninum sem gegnir valdamesta embætti heims, og hefur hið formlega vald til að eyða mannkyninu í einni svipan.

 

Og við hin eigum að spyrja einnar grundvallarspurningar;

Hvor er vitfirrtari, hinn sjálfhverfi lýðskrumari eða maðurinn sem ver hann??

Því menn eins og Trump eru gæfumenn að einu leiti, að þeir segja okkur mikið um aðra sem áhrif hafa.

 

Ég er ekki að tala um fólkið á götunni, hvorki það sem kaus Trump eða styður stefnu hans, Trump er þar hlekkur, en hann kom á réttum tíma inní samfélög á suðupunkti eftir áratuga ránsskap frjálshyggjunnar, og gat nýtt sér þá óánægju til að ná völdum. 

Stuðningsmenn sjá í honum vopn til að berjast við hina gjörspilltu valdaelítu sem þjónar auðnum í einu og öllu.  Trump er ekki orsök óánægju þeirra, og hún grassera áfram þó hann bregðist vonum þeirra.

 

Ég er að tala um fólkið sem á að vita betur.

Og hefur til dæmis þá stöðu að móta umræðuna á hægri væng stjórnmálanna.

Fólið í áhrifastöðum sem lætur eins og ekkert sé, og myndi örugglega taka í hófana á hesti, ef það teldi það henta hagsmunum sínum, eða til dæmis þeirra ríkja sem það leiðir.

 

Af hverju sendir alheimurinn ekki þau skýru skilaboð til Bandaríkjanna að það gangi ekki að þetta öflugasta ríki heims skipi algjörlega óhæfan mann í sitt æðsta embætti.

Sameinuðu þjóðirnar gætu til dæmis samþykkt það og það myndu örugglega allar þjóðir styðja þá ályktun nema hugsanlega Norður Kórea því þar sjá menn ekkert óeðlilegt við stjórnarhætti Trumps, enda ekki vanir öðru.  Og þar tækju menn í hendurnar á hesti eða geit, ef þess þyrfti til að lifa af daginn.

En aðrir sjá ógnina af þessum manni, eða ættu að sjá hana.

 

Samt gerir enginn neitt.

Allflestir reyna að kóa með.

 

Sem aftur vekur upp aðra grundvallarspurningu, hvor er vitfirrtari, sjá sjálfhverfi sem skilur ekki gjörðir sínar, eða sá með fullu viti sem kóar með hinum sjálfhverfa.

Og þar liggur meinið.

Mein heimsins í dag.

 

Við gerum ekkert.

Við kóum bara með vitleysunni.

Kveðja að austan.

 

Er Watergate að endurtaka sig?

Mitt er valdið segir Trump.

 

Og rak þann sem rannsakaði hann.

Hvað hann ekki nógu skilvirkan, enda  þegar þú veist uppá þig sekt, þá er augljóst að þér finnst rannsakandi ekki nógu skilvirkur sem ekki treystir sér til að staðfesta sökina.

Eða er einhver önnur ástæða fyrir þessari nýjustu sprengjuherferð Trump gegn stjórnkerfi landsins??

 

Það efast enginn um vald Trump.

Og eftir að hafa horft á hina stórgóðu þætti um Versali, þá tel ég líklegt að Lúðvík sólkóngur 14. hefði farið eins að, enda var hann sannfærður um að ríkið væri hann.

Síðan bendir fréttaflutningurinn frá Nató ríkinu Tyrklandi, að þar í landi sé mjög ákveðinn forseti ef hann efast um trúmennsku þarlendra kerfiskarla, en hann reyndar lætur sér sjaldnast duga að reka menn, hann fangelsar þá líka.

Slíkt athæfi verður ekki borið uppá Trump.

 

Frétt Mbl.is spáir skjálfta í Bandaríkjunum, og það má vel vera.

Það hefur allavega legið lengi ljóst fyrir að Trump á meira sameiginlegt með stjórnarháttum Lúðvíks 14, en því lýðræðiskerfi sem hefur þróast síðustu 250 árin í Bandaríkjunum.  

En það má vel vera að sá skjálfti styrki Trump frekar en hitt.

Allavega hjá stuðningsmönnum sínum sem líklegast upplifa geðþóttann sem styrk hjá sínum manni enda lítt hrifnir af kerfinu og kerfisköllum.

 

Það sem mér finnst meira spennandi er hvað þeir fóstbræður, Davíð og Björn Bjarna skrifa um Trump vin sinn.  

Miðað við fyrri skrif kæmi mér ekki á óvart að þeir eigi eftir að finna einhvern snertipunkt við stjórnvisku og atferli hins sterka stjórnmálamanns.  

Og rökin eiga eftir að vera spúgí, það er ég viss um. 

 

Spurning hvort Björn eigi eftir að toppa sig frá því að hann lýsti aðdáun sinni í Morgunblaðsgrein á árás Trump á sjálfstætt ríki, og taldi þá árás sýna að styrkur sterkra manna væri vænlegastur til friðar. Gæti til dæmis virkað vel til að hræða Norður Kóreu menn.

Davíð á örugglega eftir að benda á þann skrítna ávana Trump að vilja standa við kosningaloforð sín jafnvel þó hann hafi ekki lofað að reka forstjóra FBI, en hann hefði getað lofað því.  Og einhver píla á Evrópusambandið á eftir að fljóta með.

 

Ekki að það skipti einhverju máli, það er bara svo gaman að lesa það. 

Heimurinn er hvort sem er á heljarþröm, og stefnir að feigðarósi, en það er óþarfi að fljóta  með fýlusvipnum ef skemmtun má fá úr fáránleikanum.

 

Maður segir bara.

Dario who??

 

Þegar við höfum Trump og aðdáendur hans.

Kveðja að austan.

 

Trump víkur Comey frá störfum

Mærðin endalausa.

 

Þar sem fagurgali um faglega nálgun er endalaust látinn eftirá réttlæta á einhvern hátt fyrirfram tekna ákvörðun út frá hagsmunum vildarvina flokksins, eða jafnvel vildarvini Engeyjarfjölskyldunnar svo vitnað sé í opið bréf Kára Stefánssonar um eignarhaldið á Klíníkunni, er að verða eins stærsta ástæða þess að ákvæði þarf að setja í stjórnarskrá landsins að frjálshyggjan verði bönnuð næstu aldirnar eða svo.

Einhvern tímann hlýtur mælirinn að vera fullur.

Einhvern tímann hljóta þessir stjórnmálamenn að þurfa að segja satt en ekki bulla sig endalaust frá hinu augljósa.

 

Þegar upp komst um strákinn Tuma, menntamálaráðherra var staðinn að verki í einhverjum leyndarviðræðum um að afhenda einkaskóla styrktarstoð undir rekstur sinn, og skýringar hans á leynimakkinu þótti það lítt trúverðugar að félag grunnskólakennara þótti ástæða til að álykta um handabakavinnubrögð ráðuneytisins, að þá er Bjarni fenginn í ræðustól til að kasta umræðunni á dreif.

Hugsum um útkomuna, hugsum um krakkana, gleymum því að vildarvinir eigi í hlut.

Hættum að tala um það sem þoldi ekki dagsljósið.

Eins og um einkafyrirtæki hans sé að ræða, það er stjórnarráðið.

 

Það er örugglega margt sem getur mælt með sameiningu Tækniskólans og Ármúlaskólans, og líklegast mælir margt á móti líka.

Og það er alltí lagi að kasta upp hugmyndum um rekstrarform, það býr kraftur í einkaframtakinu ef það er nýtt á réttan hátt.  Og sá arður sem eigendurnir eru að leita að í þessu tilgangi, ætti að vera ef fégráðugir menn ráða ekki för, góður skóli sem skilar hæfu fólki út í atvinnulífið. 

Ég held að það rífist enginn um það að Verslunarskólinn, og síðan HR sem þróaðist út frá þeim skóla, sé ágætis hluti af flóru menntakerfisins.

 

Þess vegna þolir þetta mál opna umræðum

Það þarf ekki að draga tjöldin fyrir hana, fela hana í bakherbergjum vildarvina.

Nema að tilgangurinn er einhver annar en upp er gefið.

 

Það er grunsamlegt að fráfarandi menntamálaráðherra Sjálfstæðisflokksins þorði ekki í þessa umræðu á síðasta kjörtímabili, og það hafi þurft handbendi í ríkisstjórn til þess að lagt var af stað í leynimakk, sem miðað við orð menntamálaráðherra, átti að klárast með þegar ákveðinni niðurstöðu, áður en sagt var frá hinni fyrirhugaðri yfirtöku Tækniskólans opinberlega.

Og sporin hræða.

Frjálshyggjumenn svelta alla opinbera þjónustu svo þeir geti réttlætt vildarvinavæðingu hennar.

Þeir nota frasa sem jafnvel maður með vottorð um að vera vitgrannur, gleypir ekki einu sinni við; "Ef einkaaðilar geta veitt fólkinu í þessu landi jafngóða eða betri þjónustu fyrir sama verð fyrir skattgreiðandann og skilað einhverjum afgangi þá er það ekki vandamál fyrir mig. Ef að ríkið getur ekki sinnt þjónustunni fyrir sama verð og sama kostnað þá finnst mér ekkert að því að einkaaðilar geri það, jafnvel þótt þeir hafi eitthvað upp úr því,".

 

Það er leitun af lægri kostnaði á aðgerðum en í hinu opinbera kerfi á Íslandi.  Samt eiga vera til einhver ofurmenni, kallaðir einkaaðilar, sem eiga að geta gert hlutina á mun hagkvæmari hátt, og samt haft af því hagnað.

Og ef satt væri, hvað væri þá að stjórnkerfinu, af hverju léti það hæfileikalausa stjórnendur valsa uppi, vinnandi allt fyrir aftan rassgatið á sér?

 

En þessi frasi forheimsku frjálshyggjunnar er staðleysa, nema gögn sýni fram á annað.  Og þau er auðvelt að leggja fram.  En aldrei gert, aðeins bullað, og bullið endurtekið í síbylju.

Og sjá síðan menn ekki hvað það er sjúkt að neita hinu opinbera kerfi um fjármagn, en á sama tíma getur einkaaðilinn sent inn reikninga á færibandi, því maðurinn sem stimplar er hluti af vildarvinakerfinu, og með fulla vasa af fjármunum almennings í vasanum því vildarvinarráðherrann skilur ekki sín eigin rök um niðurskurð og hagræðingu þegar fjármögnun vildarvinakerfisins er annars vegar.

 

Sporin hræða.

Og raðlygin heldur áfram endalaust.

 

Þjóðin á betur skilið.

Og ef það er ekki hægt að setja það í stjórnarskrá að banna frjálshyggjuna, að þá á allavega gera kröfu um að sett verði lög sem banna beina lygi í opinberri umræðu stjórnmálanna.

Sem og að setja lög sem banna málflutning sem byggist á augljósri heimsku og staðleysu.

Þá ætti frjálshyggjuóværan að leysast að sjálfu sér.

 

Eitthvað þarf að gera.

Þjóðin hefur ítrekað hafnað Sjálfstæðisflokknum eftir að hans helsta markmið var að uppfylla skilyrði Kauphallarinnar um skráningu sem einkahlutafélag.

Með beinum lygum í kosningabaráttunni skreið flokkurinn í 30% fylgi, sem þýðir að 7 af hverjum 10 landsmanna vill ekki þessa stjórnarhætti.

Vill ekki þessa frjálshyggju.

 

Áframhald þeirra er vanvirðing við þjóðina.

Vanvirðing við lýðræðið.

 

Það er tími til kominn að einhver taki í taumana.

Til dæmis borgaralegt fólk.

 

Þessu verður að linna.

Kveðja að austan.

 

 

Endanleg ákvörðun ekki verið tekin