Hafa víddir skarast?

 

Og eru þeir stjórnarþingmenn og ráðherrar sem tjá sig um nýsamþykkta samgönguáætlun meðlimir í ríkisstjórn í einhverri allt annarri vídd þar sem fjárhagurinn er erfiður og aldrei hafi staðið til að gera eitt eða neitt í samgöngumálum í heimahögum þeirra.

En fyrir einhverja gráglettni örlaganna hafi þeir lent hér á Íslandi, talandi sama málið, og lítandi nákvæmlega eins út og þeir stjórnarþingmenn og ráðherrar sem nýbúnir eru að fara í gegnum kosningabaráttu þar sem þeir lofuðu allir sem einn að setja stóraukna fjármuni í uppbyggingu innviða þjóðarinnar.  Og lögðu sérstaklega áherslu á í stjórnarsáttmála núverandi ríkisstjórnar.

Eru svo hundskammaðir fyrir eitthvað sem þeir bera enga ábyrgð á, og sjálfsagt á sama tíma eru tvífarar þeirra sjálfsagt lofandi öllu fögru í hallærisástandi tvífaravíddar okkar.

 

Annað eins hefur nú gerst.

Í vísindaskáldsögum.

 

Og hver segir að það geti ekki líka gerst í þeim raunveruleika sem íslensk stjórnmál eru í?

Þetta skýrir margt.

 

Kannski eru þetta ekki síljúgandi menn eftir allt saman??

Kannski er þetta bara einn stór misskilningur??

 

Vonum það, og að hinn rétti Pawel, hinn rétti Benni frændi og hinn rétti Jón Gunnarsson birtist aftur von bráðar, og taki upp þráðinn þar sem stjórnarsáttmálinn endaði.

Það gæti líka bjargað mögum góðum sjálfstæðismanninum frá köfnun, það er svo auðheyrt hvernig hin vonlausa vörn stendur í þeim.

Og jafnvel bjargað flokknum frá því að þurrkast út á landsbyggðinni.

 

Hver veit.

Sjáum til á föstudaginn.

Kveðja að austan.

 

 

Voru menn að kaupa sér vinsældir?

Örugg­ar sam­göng­ur und­ir­staða hag­sæld­ar

 

Þetta skilur allt sæmilega vel gefið fólk.

Einu sinni meira að segja skildu sjálfstæðismenn þetta, líklegast ekki lengra síðan en þegar Steingrímur stýrði ríkiskassanum í þágu auðmanna og erlendra kröfuhafa þeirra.

Það er ekki velferð og velsæld ef innviðir eru látnir grotna niður.

 

Í dag skilur maður af hverju húfan var fundin upp.

Það er vegna þess að hinum hundstrygga flokksmanni er líffræðilega ómögulegt að dilla skottinu, vegna þess að hann hefur ekkert skott.

En hann getur tekið ofan, og varið hið óverjanlega í þeirri von að sólformaðurinn taki eftir og launi honum með klappi á kollinn.

 

Hann týnir til rök eins og að stjórnarandstaðan hafi samþykkt aðförina að innviðum landsins eða það sem Bjarni Benediktsson þáverandi fjármálaráðherra kallaði frumvarp til fjárlaga 2017.

Hann týnir til rök Jóns Gunnarssonar samgönguráðherra að þjóðin sé svo rík að hún geti ekki átt peninga í að endurnýja vegakerfið.  Þess vegna þurfi að leita til einkaaðila um fjármögnun þess. 

Og hann týnir til kommúnistarök Jóns að þjóðin sé ekki nóg skattlögð, að það þurfi að viðbótarskattleggja notendur vegakerfisins með vegtollum.

 

Ekkert er nógu vitlaust, ekkert er nógu heimskt fyrir hinn flokksholla sjálfstæðismann til eð hann geti ekki étið upp í vörn sinn. 

Í raun er hans eina vandamál að finna húfur til að taka ofan, því þær réttu sem sýna auðmýktina og undirgefnina eru ekki í tísku lengur, og því hin skyndilega eftirspurn eftir þeim langt umfram framboðið.  Sem er slæmt, sólformaðurinn gæti haldið að flokksmenn bæru ekki nægjanlega virðingu fyrir veldi hans.

 

Hins vegar þarf að leiðrétta eitt í þessari frétt, það er ekki íslenska ríkið sem er gullgrafarinn.

Íslenska ríkið er í ræningjahöndum, stjórnað af glæpaklíku sem laug sig til valda.

Og hún þjónar örfáum auðmönnum og erlendum hrægömmum.

 

Því það er enginn svo vitlaus að skilja ekki mikilvægi samgangna í nútímasamfélagi, eigum við ekki bara að segja að hagsmunir sumra, það er hinna Örfáu, vegi þyngra en almanahagur.

Það er til dæmis vitað að þeir sem rændu og rupluðu borgir í gamla daga, og brenndu þær síðan til ösku, að þeir vissu að það væri ekki efnahagslega skynsamlegt fyrir viðkomandi borg, enda komu þeir ekki strax aftur, heldur fundu þeir sér nýja borg til að ræna og brenna.  En þeim var alveg nákvæmlega sama, þeir höfðu jú ránsfenginn á brott með sér.

Svona er Ísland í dag, skýr endurtekning þekktrar sögu.

 

Þess vegna á ekki að kenna þjóðinni um og stjórnkerfi hennar.

Spjótunum á að beina að þeim sem lugu sig til valda.

Þeirra er sökin.

Og þeir þurfa að víkja.

 

En ekki til þess að aðrir síljúgandi stjórnmálamenn fái aftur völdin.

Einhvern tímann hlýtur að vera komið nóg.

 

Eða hvað?

Kveðja að austan.

Íslenska ríkið helsti gullgrafarinn?

Bændum er ekki vorkunn.

 

Það er jú atkvæðum þeim að þakka að Sjálfstæðisflokkurinn er ennþá afl í íslenskum stjórnmálum.

Það eru þeir sem kjósa sjálfstæða bændur til forystu í sínum samtökum.

 

Gat verið gott og gilt, en ekki í dag þegar Glámur endurborinn í líki frjálshyggjunnar ríður þar röftum.

Markmið hennar er aðeins eitt, að gera hina ríku ofurríka, og hina ofurríku óendanlega ríka.

Afleiðingin verður auðnin ein í innlendri framleiðslu, líkt og engisprettur hafi farið yfir akra.

Allt á að framleiða í þrælabúðum þriðja heimsins, þar sem engar reglur eru virtar, hvorki varðandi aðbúnað fólks, kaup og kjör, mengunarvarnir, umgengni við land og náttúru.

 

Vissulega hafa gamaldags íhaldsmenn haldið aftur af öfgunum, og vissulega hefur flokkurinn þurft að starfa með fólki, en í dag gengur dýrið laust.

Engin bönd halda því.

Wasteland er það sem koma skal.

 

Svo væla menn bara.

Skilja ekkert í að glerið sem þeir köstuðu grjóti í, skuli brotna.

Það gerist bara annars staðar, til dæmis í útlöndum.

 

Nei bændur ættu að vita það manna best að uppskera er alltaf í takt við sáningu.

Að minkur er ekki notaður til að gæta hænsna, og engisprettur til að líta eftir ökrum.

 

Og að væl leysir engan vanda.

Kveðja að austan.

Telur að mjólk muni hækka í verði

Stjórnarliðar tala tungum tveim.

 

Í Evrópumálum neyðist utanríkisráðherra að senda erlendum fjölmiðlum opinbera leiðréttingu vegna ummæla formanns utanríkismálanefndar um að EES samningurinn sé ónýtur og að hagsmunum Íslands sé best borgið innan Evrópusambandsins.

Utanríkisráðherra bendir réttilega á að þessi ummæli formanns utanríkismálanefndar sé ekki opinber stefna íslenskra stjórnvalda.

Og trúnaðarmaður ríkisstjórnarinnar bregst við með þeirri barnalegri yfirlýsingu að hún hafi málfrelsi, eins og að málfundafélag stjórni landinu en ekki alvöru stjórnmálaflokkar.

 

Látum svo vera, barnaskapur er alltaf barnaskapur.

Hins vegar er öllu alvarlegra sá opinberi ágreiningur sem kominn er upp milli samgönguráðherra og formanns fárlaganefndar.

Og þar er munurinn að formaðurinn heldur fram opinberi stefnu ríkisstjórnarinnar um "sókn í samgöngumálum" á meðan samgönguráðherra sagði uppí opið geð á þjóð sinni að ríkisstjórnin meinti ekkert með yfirlýsingu sínum um uppbyggingu samgöngukerfisins. 

Það hefði bara verið kosningadjók, og síðan aftur djók þegar forsætisráðherra ítrekaði stórsóknina.

Svona gert til að fífla fólk, til að draga dár á því.

 

Svarthvítari getur einn málflutningur ekki orðið.

Annar hvor fer rangt með, svo við tölum ómengað mannamál, annar hvor lýgur eins og best hann getur. 

Því svart getur aldrei verið hvítt, og hvítt getur aldrei verið svart.

Spurningin er hvor það er.

 

Túlkar borgaralegi íhaldsmaðurinn stefnu ríkisstjórnarinnar.

Eða túlkar sá sem er í vasanum þá stefnu.

Hvorum hryggjar skyldi stuðningur Bjarna falla??

 

Þar er efinn.

Þar er efinn.

Kveðja að austan.

Hafa málfrelsi í Evrópumálum

Almenningur rís upp gegn síljúgandi stjórnmálamönnum.

 

Allavega hinir meintu niðursetningar á landsbyggðinni sem endalaust var talið að væri hægt að svíkja og blekkja.

Þeir kysu sinn Sjálfstæðisflokk fyrir því og tryggðu honum heljartök á íslenskum almenningi.

 

En jafnvel þó mælirinn sé stór, þá kom loksins sá dropi sem dugði til að fólk segði hingað og ekki lengra.

Nútíma samgöngur eru forsendur nútímasamfélags.

Og það er engin velmegun og velferð ef innviðir eru látnir grotna niður.

 

Og það eru ekki rök í málinu að slá því fram að auðstéttin hafi aldrei haft það betur.

Og núna eigi hún að fá að braska með Arion banka, flytja auð sinn úr landi eftir losun gjaldeyrishaftanna og annað það sem núverandi ríkisstjórn ætlar að gera í hennar þágu.

 

Fólkið í landinu er búið að fá nóg.

Það er búið að átta sig á að það er enginn munur á síljúgandi stjórnmálamanni og sístelandi búðarþjófi.

Nema að þegar stjórnmálamaðurinn lýgur sig til valda, í þágu auðs og auðmanna, að þá er hann hættulegur, gjörspilltur, tilheyrir í raun glæpaklíku.

 

Og fólk er hætt að tjá sig í hljóði, sín á milli heyrir maður æ fleiri nota orðið glæpaklíka.

Hógværu fólki er ofboðið og það er stutt í að það notar þessa skilgreiningu opinberlega.

Líkt og gerðist í Perú á sínum tíma þegar almenningur áttaði sig loks á að gjörspilltir stjórnmálamenn voru búnir að glæpavæða landið.  Og líkt og er að gerast í Suður Kóreu í dag.

Fólk rís upp, fólk mótmælir.  Það nennir ekki endalaust að hlusta á afsakanir fyrir öllum svikunum og blekkingunum.

 

Íslensk þjóð hefur aldrei staðið betur en í dag.

Innviðir hennar hafa aldrei verið eins hrörlegir og í dag.

Og eina sem Alþingi talar um er brennivín.

 

Það er eitthvað mikið að.

Eitthvað rosalega mikið að.

Og þetta á ekki að vera svona.

 

Vér mótmælum öll.

Ekki bara Jón Sigurðsson.

Kveðja að austan.

 

Mótmæla við Hornafjarðarfljót

Hvenær hætti slysaaldan á Reykjanesbrautinni??

 

Það var þegar hún var tvöfölduð.

Það er á þeim hluta hennar sem var tvöfaldaður.

 

Hvar er ennþá slys??

Jú, þar sem kerfið stöðvaði verktakann þó hann hefði getað klárað verkið á nokkrum mánuðum.

 

Og er ekki kominn tími til að tala mannamál, og spyrja, hvort er vísvitandi verið að drepa fólk, eða er má kenna heimsku um og tala um manndráp af gáleysi.

Hverjir svo sem ábyrgðina bera, þeir eru allavega margir, þá getum við ekki lengur látið staðreyndir málsins ráfa um svæðið eins og beiningarkerlingu í leit að líkn.

Það var glæpur að stöðva framkvæmdirnar 2008, og þáverandi ráðamenn eiga sér enga afsökun.

Menn gambla ekki með mannslíf í þágu Mammons.

 

Fátæk þjóð lagði vegi um allt landið.

Rík þjóð þykist ekki geta haldið þeim við.

Það er einhver þversögn í þessu sem gengur ekki upp.

 

Hættum þessari vitleysu.

Hættum að þiggja svæfingadóp kerfisins að kynna endalausar skýrslur og greiningar.

Skýrslur bjarga ekki mannslífum, framkvæmdir gera það.

 

Látum ekki segja okkur annað.

Sættum okkur ekki við annað.

 

Annað gerir okkur samsek.

Kveðja að austan.

Alvarleg slys á vegum á Reykjanesi

Draumurinn eini.

 

Draumur okkar allra sem Mammon blóta og frjálshyggjuna styðja.

Er að hafa almenning að féþúfu.

 

En að þjóðin skuli gefa þessu fólki tækifæri á að láta drauma sína rætast, það er hins vegar illskiljanlegt.

Að fámenn auðklíka skuli hafa öll tögl og haldir í samfélaginu í dag.

Farandi ránshendi um borgir og byggðir líkt og lénsaðallinn gerði á öldum áður.

 

Er svona gaman að vera barinn þræll og arðrændur almúgi??

Að taka ofan og horfa biðjandi á auðinn um örfáa brauðmola??

 

Eitthvað er það.

Eitthvað skýrir þetta glott.

 

Kannski er þrælslundin meðfædd eftir allt saman.

Kveðja að austan.

Vegtollar geti flýtt framkvæmdum

Fjársvelti vegakerfisins kostar.

 

Mannslíf.

 

Faktur sem þarf ekki að ræða.

Eini vafinn er hvort ber meiri ábyrgð, hinn svikuli stjórnmálamaður sem ábyrgðina ber, eða kjósandi hans sem vísvitandi kom hinum svikula til valda.

 

Íhugum það.

Kveðja að austan.

 

16 alvarleg slys frá árinu 2007

Er kominn tími á borgaralega handtöku??

 

Hvað á að gera við mann sem laug sig inná þjóðina, fékk ráðherraembætti undir fölsku yfirskini, og nýtir völd sín til að reyna að eyðileggja vegakerfi þjóðarinnar?

Með þeim aumu rökum að ein ríkasta þjóð heims hefur ekki efni á að endurnýja vegi sína, hún þurfi að treysta á einkafjármögun sem fjármögnuð er með gjaldtöku.

 

Hvernig gátu áar okkar byggt upp innvið landsins, reist brýr, lagt vegi??

Bláfátækir en vissu eins og er að samgöngur voru undirstöður framfara og velmegunar.

 

Svo ætlar eitt stykki glæpaklíka að leggja allt í rúst.

Og kemst upp með það ef enginn grípur inní.

 

Neyðarréttur leyfir inngrip hins almenna borgara.

Hvort sem það er til sjós eða lands.

 

Við ættum að íhuga þann rétt.

Í alvöru.

Kveðja að austan.

Ákvörðun ráðherra stenst ekki lög

Stigmögnun brjálseminnar.

 

Hjá manninum sem ræður rauða hnappinum ætti að vekja heiminum ugg.

Mun meiri ugg en atferli Mini mini hans í Norður Kóreu.

 

Og heimurinn ætti að fara gera sér grein fyrir því hverjir komu honum til valda.

Og þeir sem reyna réttlæta vitfirringuna, ættu að gera sér grein fyrir að svipuð réttlæting, með svipuðum rökfærslum, kom heiminum út í heimsstyrjöld fyrir nokkrum áratugum síðan.

 

En réttlæting réttlætaranna er ekki alslæm.

Það er vitað að djúpstæð óánægja hinna vinnandi stétta í Bandaríkjunum kom Trump til valda, enda þetta fyrrum volduga ríki orðið risi á brauðfótum eftir um þriggja áratuga helför Svörtu pestarinnar þar í landi.

Og þegar réttlætararnir benda á afleiðingar þessarar helstefnu, þá afhjúpa þeir lygina sem hefur knúið áfram pólitíska stefnu þeirra í öll þessi ár.

 

Penninn útí Móum kemur enn einu sinni Trump til varnar í Reykjavíkurbréfi helgarinnar.

Þar má lesa þessi orð um afleiðingar frjálshyggjunnar fyrir bandarískt verkafólk og bandarískan iðnað.

 

Atvinnuleysið vestra er miklu meira en opinberar tölur sýndu því þeir sem hafa gefist upp á að leita sér að atvinnu eru ekki taldir atvinnulausir. Atvinnuþátttaka í Bandaríkjunum hefur ekki verið minni í áraraðir. Alþjóðavæðingin, sem brýtur niður öll landamæri, felur í sér þann veruleika að einstök ríki geta ekki lengur markað eigin stefnu í mörgum þáttum viðskiptalífsins. Við slíkt kæmi hnútur á alþjóðavæðinguna. Innlendir ráðamenn, sem belgja sig út fyrir kosningar, vita vel að áhrif þeirra eru orðin smávægileg. Og þegar alþjóðvæðingin hefur náð fullkomleika verða kosningar með áþekkt gildi og öskudagur. Stórfyrirtækin fara sínu fram. Þau hasla sér völl þar sem fyrirstaðan er minnst og meðvitund um rétt einstaklinga lítil. Og þau selja afurðir sínar þar sem kaupgetan er mest og borga skatta þar sem þau komast upp með að gera sem minnst af því. 

Bandaríkjamenn í miðríkjunum horfðu upp á byrjunina á þessum veruleika. Yfirgefnar verksmiðjur í þúsundatali og vel þjálfaðir, agaðir og flinkir iðnaðarmenn sem engin eftirspurn var eftir.

 

Undirstrikanirnar eru mínar þar sem hann nær kjarna helstefnunnar mætavel.

 

Sérstaklega athyglisverð orð því Penninn var á sínum tíma meðlimur Eimreiðarhópsins sem var kostaður hópur ungra manna sem var gerður út til að koma á alræði peninganna.  Og á löngum stjórnmálaferli sínum lagði hann drög að því auðræði sem við upplifum í dag.

Ef Penninn sæi síðan samhengið milli þess sem hann trúði á sem ungur maður og þeirrar upplausnar sem hann sér í heiminum í dag, og hann áttaði sig á af hverju Churchill talaði gegn Hitler á sínum tíma, þá gæti hann sannarlega orðið einn af liðsmönnum lífsins.

Nægir eru hægriöfgarnar hjá glæpaklíkunni sem stjórnar landinu í dag.

 

Drottning þeirra, það er hægriöfganna,  sem Bjarni Ben gerði að dómsmálaráðherra því hann vissi mætavel að hún myndi aldrei ógna formannsstóll hans ólíkt þeim hæfa manni, Brynjari Níelssyni, missti út úr sér setningu í helgarblaði Fréttablaðsins sem ætti að kosta hana ráðherrastólinn strax í dag, það er ef einhver döngun er eftir í þessari þjóð.

 

Ef ríkisvaldið hefur á annað borð eitthvað hlutverk þá er það kannski þetta.

 

Hún er ekki að lýsa handriti af enn einni uppvakningamyndinni eða Mad Max 10, hún er að lýsa draumheimi frjálshyggjunnar, að ríkisvaldið, sem er hið sameiginlega vald okkar borgaranna, víki fyrir valdi hinna örfáu, stórfyrirtækjanna og auðmannanna sem eiga þau.

Segir það ekki beint út, því hún þylur upp mítuna um tækin og tólin sem auðstéttin gæti sameinast um að séu nauðsynleg til að halda vinnulýðnum niðri, það er dómsstólar, her og lögregla, en vafinn sem Ef-ið og Kannskið tjáir afhjúpa í raun heimsmynd hægröfganna sem þjóna hinum Örfáum, þeir eiga líka að geta rekið sína eigin dóma, sína eigin heri, sína eigin löggæslu. 

Líkt og var á dögum lénsaðalsins í Evrópu á sínum tíma.

 

Það er komið svo fyrir þessum heimi að stofnunin sem hýsir þetta fólk er við Austurvöll, ekki út við Sundin.

Stórfyrirtækin ráða öllu sem þau vilja ráða, eins og Davíð lýsir svo listavel í Reykjavíkurbréfi sínu, og þau sjá mestu gróðavonina í ólgu og upplausn siðmenningarinnar.

 

Þess vegna stigmagnast brjálsemin.

Þess vegna eru klikkhausar í valdastól.

 

Brjálsemin stigmagnast.

Og við horfum á með hendur í skauti.

Kveðja að austan.

 

 

FBI segir ásakanirnar rangar