Færsluflokkur: Stjórnmál og samfélag
22.9.2021 | 09:49
Já en hvað um loftslagsmálin??
Af hverju komast þau ekki á blað í kappræðum leiðtogana??
Er Þorgerður Katrín búin að gleyma að hún ætlar hvorki meir eða minna lýsa yfir neyðarástandi í lofslagsmálum heimsins, og eitthvað minnir mig að Píratar hafi talað á svipuðum nótum.
Samfylkingin segir að lofslagsmálin verði þungamiðja næstu ríkisstjórnar.
Samt eru loftslagsmálin ekki rædd á þessum síðustu metrum kosningabaráttunnar, það er marka má þessa frétt Morgunblaðsins.
Líklega skýring að hið meinta stríð íslenskra stjórnmálamanna við Útblásturinn felst í skattlagningu á öllu sem viðkemur samgöngum, sem vegna stærðar landsins og dreifbýli, er lífæð, forenda atvinnu og byggðar.
Skatturinn þarf að bíta sagði umhverfisráðherra á góðri stundu, en kveikti ekki á perunni að skattur sem er lagður jafnt á alla, bítur hina tekjuminni en er eins og léttvægt kitl fyrir þá efnameiri.
Hugmyndafræðin er úr ranni Friedmans sem Hannes Hólmsteinn kenndi í stjórnmálaskóla sínum, margreynd og þróuð af Alþjóðagjaldeyrissjóðnum víða um heim. Vandinn við yfirfulla spítala hvarf eins og döggin, ekki vegna dreifinga á vítamína og lyfja, heldur vegna gjaldtökunnar svo fátækt fólk hafði ekki lengur efni á að nýta þjónustu þeirra, jafnvel þó lífshætta væri undir.
Fólk er ekki fífl, þó stjórnmálamenn okkar haldi að það líkist þeim.
Gunnar Smári er ekki fífl, þó það megi efast um einlægnina sem býr að baki, hann þekkti frjálshyggjuna sem hann einu sinni blótaði og benti á hið augljósa;
"Til að draga úr þeirri losun sem á sér stað viljum við betri sátt um orkuskiptin sem eru ósanngjörn í dag og birtast okkur aðallega í formi afsláttar fyrir hátekjuheimili á meðan lágtekjuheimili sem eru ekki vel þjónustuð af almenningssamgöngum þurfa að greiða há gjöld á dælunni".
Það er engin tilviljun að Sósíalistaflokkurinn siglir hraðbyri inní tveggja stafa fylgi, þetta vita hinir flokkarnir sem kenna sig við jafnaðar eða félags eitthvað, þess vegna þegja þeir í dag um skattana sem eiga að bíta, því sá þriðjungur þjóðarinnar sem á að útiloka frá samfélaginu til að ná lofslagsmarkmiðum þjóðarinnar, hann kýs, það gleymdist nefnilega að miða kosningarétt við tekjur eða þjóðfélagsstöðu.
Síðan má spyrja sig svona almennt, hvaða víðáttuvitleysa er á ferðinni gagnvart þeirri vá sem blasir við framtíð barna okkar??
Af hverju geta menn ekki tekið þennan vanda alvarlega og gert það sem þarf að gera svo mannkynið lifi af??
Af hverju látum við sökudólgana stjórna hinni meintu vörn mannsins, vörn sem miðar að því einu að gera þá ríkari, ná heljartökum á framleiðslu heimsins, en snertir í litlu eða engu þann vanda sem við er að glíma.
Til að átta okkur á hve þessi meinta vörn er heimsk þá má rifja upp dæmi af frétt sem birtist undir lok síðustu aldar og fjallaði um mengun í bæjarfélagi einu í Tékkóslóvakíu, þar sem fyrirtæki í efnaiðnaði dældi öllum úrgang í þró sem var útvíkkuð tjörn, vatnasvið hennar náði því í grunnvatn og eitrið seytlaði bæði í drykkjarvatn sem og út í jarðveg í landi bænda svo afurðir þeirra voru mengaðar.
Augljóslega þurfti að hætta þessari dælingu og eyða úrganginum á öruggan hátt án þess að mengun af honum leitaði út í umhverfið. Og um það stóð deilan, fyrst könnuðust menn ekki við mengunina en sögðu svo síðan ekki hafa efni á að tryggja öruggar mengunarvarnir, og það voru náttúrulega störf í húfi.
Gamalkunnugt stef, en í fréttinni kom ekki fram að einhver hefði verið svo víðáttuvitlaus að leggja til þá lausn, að heimilin á svæðinu þyrftu að taka sig á í flokkun á sorpi, batterí og geymar geta alltaf valdið mengun, spurning hvort hvert heimili setti upp hreinsunarbúnað sem fjarlægði þungamálma og annað eitur úr drykkjarvatni, jafnvel að menn flyttu drykkjarvatn á svæðið og allt frárennsli frá, skiptum um jarðveg eða annað sem var verulega íþyngjandi.
Af hverju ekki??, örugglega allt þarfaverk því fólk mengar, vissulega, nema það bara kom málinu ekki við.
Sökudólgurinn var verksmiðjan sem mengaði, og mengunin var alltaf sú sama á meðan ekki var tekist á við hana. Að sterilisera heimili og fyrirtæki fólks skipti engu hvað það varðar.
Þetta er kjarni málsins, menn eru ekki að glíma við vandann, menn bara þykjast gera það.
Með íþyngjandi sköttum og íþyngjandi regluverki koma menn menguninni frá sér til annarra, þar sem sama vara er framleidd með margfalt meiri útblæstri en er í dag í þróuðum ríkjum Vesturlanda.
Eftir stendur mengunarlítil framleiðsla, en hún væri hvort sem er, og hefur sem slík ekki áhrif á kolefnisbókhald heimsins.
Ef brennsla jarðefnaeldsneytis hefur sannarleg áhrif á lofslag jarðar, þá drögum við úr brennslu, en aukum hana ekki með tilflutningi framleiðslu til landa þar sem megnið af orkunni kemur úr kolabrennslum.
Ef úrgangur og skítur er að drekkja heimshöfunum, þá finnum við uppsprettu viðkomandi úrgangs og hjálpum viðkomandi þjóðum að ná tökum á sorphirðu og förgun úrgangs.
Hve heimskir þurfa menn að vera til að skilja ekki að það er sýndarmennskan ein að banna einnota plast í landi þar sem sorphirða tekur við megnið af plastinu, á sama tíma þegar sorpið flæðir óhindrað út í náttúruna í ofurvöxnum stórborgum þriðja heimsins.
Aðgerða er þörf en það er ekkert verið að gera í dag annað en að auka vandann.
Skattlagning dregur þrótt úr vestrænum fyrirtækjum til að finna mengunarminni lausnir, og þegar heimurinn er einn markaður, þá tapa þau í samkeppninni við framleiðslu landa þar sem engar eða litlar kröfur eru gerðar.
Í þessu samhengi megum við ekki gleyma að vestræn fyrirtæki borga miklu hærri laun en þrælakistur glóbalsins, þegar fleira íþyngir þá er eðlilegt að þau láti undan, leita með framleiðsluna annað, eða hreinlega hætta rekstri.
Það þarf ekki neitt sem bítur, neytandinn öskrar á grænar lausnir, það er svipan sem stjórnar hinni þrotlausu leit að nýjum lausnum og nýrri tækni.
Ásamt hvötum, grænum hvötum, þar má Viðreisn eiga að hún talar að viti.
Ef fólk vill að börn þess og barnabörn eigi sér framtíð, þá hættir það að hlusta á þessa vitleysu kostaða fólksins í vasa glóbalauðsins.
Það krefst raunhæfra aðgerða, og það sjálft reynir að gera sitt, til dæmis að beina neyslu sinni frá einnota vörum í margnota, ferðast í nærumhverfi frekar en fjær, og svo framvegis.
Raunhæfar aðgerðir eru til dæmis að setja skorður við innflutning á mengunarvörum og einnota vörum, það er vörum sem illa hannaðar að þær endast ekki nema brot af því sem sambærilegar vörur entust áður en græðgimódel glóbalsins tók yfir framleiðslu heimsins.
Alveg eins og tóbaksvörur eru merktar hættulegar, þá má merkja búðir sem sérhæfa sig í að dreifa ódýrum vörum í samkeppni við fyrirtæki sem þó reyna að framleiða eitthvað ennþá á Vesturlöndum, "Varúð, með því að stíga inní þessa verslun, þá tekur þú þátt í glæpsamlegu athæfi". Myndi þetta ekki sóma sér vel hjá Icewear eða HM??
Síðan á að taka úr sambandi alla ferla sem leiða til innkaupa á mengunarvörum, það er vörum sem eru framleiddar í þrælabúðum glóbalsins, ferla eins og skylduna hjá hinu opinbera að taka lægsta tilboði og svo framvegis.
Vandinn er nefnilega kerfislægur og huglægur, að átta sig ekki á því, eða takast ekki á við það, er feigðarflan þess sem vill vel, en er ófær um bjarga sér og sínum.
Tímaglasið er runnið út, það er ekkert flókið við það.
Spurningin er aðeins hvort við ætlum að spyrna á móti, eða gefast upp.
Allar staðreyndir liggja fyrir.
Við vitum hverjir menga og af hverju þeir menga.
Við vitum hvaða kerfi knýr áfram síaukna mengun og rányrkju umhverfisins.
Við vitum að lausnir vestrænna stjórnmálamanna eru sýndarlausnir, þær sneyða framhjá kjarna málsins, eru í besta falli skaðlitlar, en oft til tjóns líkt og reglugerðin um íblöndun lífeldsneytis á bifreiðar, fyrir utan að bílar menga meira vegna hennar, þá var þessi reglugerð bein árás á lungu heimsins, regnskógana sem hafa verið höggnir grimmt svo hægt sé að framleiða viðkomandi lífeldsneyti.
Við vitum líka að það er hægt að gera eitthvað.
Við erum jú hinn vitiborni maður.
Það fylgir stríðum sem virðast óvinnandi, að ef menn þrauka, þá leggst eitthvað til, og þau vinnast oft að lokum.
En hingað til hefur ekkert stríð unnist sem ekki hefur verið háð.
Í dag háum við ekki stríð við lofslagsvána.
Við þykjumst það bara.
Það er harmur barna okkar.
Kveðja að austan.
![]() |
Kappræðuþáttur 1: Margt ber í milli þrátt fyrir allt |
Tilkynna um óviðeigandi tengingu við frétt |
Stjórnmál og samfélag | Breytt s.d. kl. 11:34 | Slóð | Facebook | Athugasemdir (10)
21.9.2021 | 17:00
Vá, Svíar líka hluti af þöggun og meðvirkni.
Hluti af hinn margfrægu nauðgunarmenningu sem kennd er við KSÍ.
Eða hvað??
Vitnum í frétt Mbl.is, sem líka Váá, Gróa er í vaktarfríi, og ennþá er til blaðamaður, í það minnsta, sem getur skrifað frétt, sem byggist á staðreyndum, en ekki rógi og níði.
"Stjórn IFK Gautaborg hefur rætt ítarlega við Kolbein Sigþórsson síðustu vikur og niðurstaðan er sú að við setjum upp langtímaplan fyrir hann. Planið er byggt á gildum IFK Gautaborgar, ábyrgð okkar og skyldum sem vinnuveitendum. Það byggir líka á markmiðum Kolbeins um að bæta sig persónulega.".
Já, menn standa með sínu fólki, hvílík nauðgunarmenning.
Hvað skyldi Guðni forseti segja um það, ætlar hann að aflýsa næstu heimsókn sinni til Svíþjóðar.
Og ætla ekki meðvirkar konur að froðufella fyrir utan sænska sendiráðið??
Rúv á staðinn og Gróa skrifar fréttina.
Váá, hvernig voga þeir sér, þessir meðvirku þöggunar og nauðgunarstuðningseittvað, sér að tala um ábyrgð og skyldur gagnvart starfsfólki sínu??
Lásu þeir ekki róginn og níðið sem tröllreið jafnt íslenska fjölmiðla sem og samfélagsmiðla??
Ætla þeir virkilega að neyða þolendur Kolbeins Þórs Sigþórssonar að horfa á enn einn leik með honum??
Þarf ekki að borga þeim hærri miskabætur, er það ekki lágmarkið??
Nú er eins gott að æ fleiri sögur birtist um ætlaðar, meintar, hugsanlegar, fræðilegar nauðganir íslenskra landsliðsmanna í fótbolta.
Núna reynir á Guðna forseta, hann verður allavega að taka af sér buffið, og jafnvel taka af skarið.
Svíakóngur er læs, þarf ekki að senda honum bréf??
Og núna reynir á Gróu.
Á ritstjórn Morgunblaðsins.
Á væntanlegan formann Kennarasambandsins.
Á alla róg og slúðurbera þjóðarinnar.
Þetta gengur ekki.
Maðurinn var tekinn af lífi án dóms og laga.
Þetta er aðför að réttaríkinu.
Upphefur og réttlætir allar nauðganir og allt kynofbeldi liðinna ára, liðinna alda.
Gengur ekki.
Þetta bara gengur ekki.
Eða hvað??
Kveðja að austan.
![]() |
Gautaborg setur upp áætlun fyrir Kolbein |
Tilkynna um óviðeigandi tengingu við frétt |
21.9.2021 | 09:39
Skógareldar hér.
Skógareldar þar, og því miður skógareldar bráðum alls staðar.
Því stóru barrskógarbeltin eru farin að brenna, og ekki víst að siðmenningin lifi þann bruna af.
Jörðin var allavega lítt byggileg á forsögulegum tímum þegar slíkir brunar gengu yfir.
Og hvað gera bændur þá??
Einhver hefði til dæmis lagt til að svona helftin af þeim fjármunum sem eru lögð í heri og drápstæki ýmiskonar yrði sett í að kaupa búnað og þróa tækni til að slökkva svona risaelda, sbr. að Tyrkir föttuðu að þeir áttu hundruð nýtísku herþyrlur og herþotur, en ekki eina slökkviþyrlu eða slökkviflugvél, því brann allt sem brunnið gat þar til hjálp barst að utan.
Einhver veit að vandi er til að takast á við, vandi er til að leysa.
En Einhver stjórnar ekki heiminum í dag heldur hópur misviturra stjórnmálamanna í vasa þess fjármagns sem við kennum við glóbal, og það fjármagn var fljótt að sjá viðskiptatækifæri í lofslagsvánni, hana átti að blóðmjólk inn að beinmerg.
Annars vegar var fjármagnaður hópur lofslagsfífla sem afneitar augljósum staðreyndum um hlýnun jarðar, hins vegar voru hinir misvitru látnir telja almenning í trú um að baráttan gegn hlýnun jarðar fælist í því að skattleggja þann sama almenning, skattleggja fyrirtæki hans, þenja út regluverkið í kringum rekstur fyrirtækja, og bingó, framleiðslan öll á leið til mengunarlanda, í verksmiðjur glóbalsins.
Gjörningur sem er kallaður Parísarsamkomulagið, og á að hnykkja á næstu dögum á neyðarneyðarráðsstefnu á Spáni.
Svona er hægt að fífla fólk út í eitt, og vart má milli sjá hverjir eru vitlausari, þeir sem afneita hörmungum sem geta bundið endi á siðmenninguna, eða þeir sem æpa á torgum um lofslagsvána, og eru svo með lausnir sem eru hannaðar af nýfrjálshyggju glóbalauðsins.
Það er fyndið, nei það er grátbroslegt, að stærsta einstaka skrefið sem stigið hefur verið síðustu 5 árin eða svo gegn hlýnun jarðar af mannavöldum skuli hafa verið sú gjörð Trump forseta að neita staðfesta Parísarsamkomulagið.
Samkomulag sem ekki aðeins flytur mengun til, heldur eykur hana stórlega því farið úr umhverfi mengunarvarna í umhverfi mengunarsóða, þar sem fremstir eru Kínverjar með öll sín kolaorkuver.
Forsenda Trump var vissulega röng, en gjörðin rétt.
Ef brennsla jarðefnaeldsneyta ógnar heiminum, þá er svarið ekki að auka hina sömu brennslu undir merkjum baráttu gegn sömu ógn.
Eitthvað sem er svo augljóst, og ætti að vera ennþá augljósara þegar framtíð og jafnvel líf afkomenda okkar er undir.
Við erum fífluð.
Og mestu fíflin eru ekki lofslagsfíflin.
Höfum það hugfast næst þegar við heyrum einhvern misvitringin segjast ætla að lýsa yfir neyðarástandi í lofslagsmálum.
Það þarf jú að gera eitthvað.
Kveðja að austan.
![]() |
Skógareldar 38 kílómetra frá Aþenu |
Tilkynna um óviðeigandi tengingu við frétt |
Stjórnmál og samfélag | Breytt s.d. kl. 11:58 | Slóð | Facebook | Athugasemdir (2)
21.9.2021 | 07:27
Marteinn Mosdal er ekki Panamaprins.
Og það að hann sé mættur aftur til leiks, eftir áratug þögn, í landi alsnægtanna, segir ýmislegt um hvernig Bjarni og hans fólk hefur staðið sig við stjórnun landsins.
Það er hollt að líta í eigin barm, svona áður en fylgi flokksins mælist með einni tölu, af hverju eru hin meintu góð verk Bjarna sem hann tíundar í þessu viðtali, ekki meir metin??
Er það atlagan að innviðum þjóðarinnar??
Eða eru það svikin við fjöregg þjóðarinnar, sjálfstæði hennar??
Spyr sá sem ekki veit en Bjarni ætti að vita það, væntanlegur einn af lúserum þessara kosninga.
Og fyrir hverjum??
Samsafni af vitleysingaframboðum, sem hafa enga snertingu við raunveruleikann, eða boða útslitna plötu ESB aðildar.
Þetta er ekki beint féleg frammistaða Bjarni.
Kveðja að austan.
![]() |
Sósíalistar tali máli Marteins Mosdals |
Tilkynna um óviðeigandi tengingu við frétt |
20.9.2021 | 15:44
Frambjóðandi jafnaðarmanna.
Sem þiggur tugamilljóna við starfslok, til að bjóða sig fram til Alþingis, er ekki trúverðugur frambjóðandi.
Í eldri tíð, svona fyrir aldamótin síðustu, var þetta kallað mútur, að eiga hönk uppá bakið.
Kristrún er vissulega í góðum félagsskap, Guðlaugur Þór gerði út á bankana á árunum fyrir Hrun, langt kominn með að kaupa sér formannsstól í Sjálfstæðisflokknum.
Þorgerður Katrín var beintengd inní þetta kaupaukakerfi, á lokametrum Hrunadansins sem tók enda haustið 2008, þá var hún betri en engin að miðla innherjaupplýsingum.
En sló Bjarna Ben, núverandi formanni Sjálfstæðisflokksins ekki við hvað það varðar.
Eftir stendur spurningin.
Hvaða djöfulsins kjaftæði er þetta??
Það er vitað að Logi veður ekki í vitunni sem stjórnmálaleiðtogi, jafnvel hans eigin menn gefa honum falleinkunn svo ég vísa í viðtal Moggans við Ásmund Stefánsson, einn af stofnfélögum Samfylkingarinnar.
Loga til tekna má samt taka fram að hann sker sig ekki úr í núverandi forystusveit Samfylkingarinnar.
Samt Logi.
Samt.
Kveðja að austan.
Viðauki. Þessi pistil er unnin úr viðtalinu við Loga, sem líklegast virðist ekki þekkja til efnisatriða málsins. Kristrún segir núna í viðtali við Mbl.is ekki hafa fengið krónu í kaupauka, en hún hafi hins vegar notað sparnað sinn, nýkominn úr námi, til að fjárfesta í Kviku banka.
Bendir réttilega á að fleiri geta nýtt sér samninga um hlutabréfakaup til að verða ríkir, það er fleiri en Sjálfstæðismenn.
Sem er rétt, og örugglega er hún og maður hennar ekkert einsdæmi um að "heldur hafi hún sjálf ásamt eiginmanni sínum nýtt eigin sparnað þegar hún kom heim úr námi og keypt hluti í bankanum." ungt fólk sem kaupir hlutabréf í bönkum, þegar það er nýkomið úr námi.
Persónulega held ég að öll þau dæmi tengist leikreglum þess fjármálamarkaðar sem setti okkur á hausinn haustið 2008, og þjóðin náði því miður ekki að gera upp við, þökk sé ríkisstjórn Jóhönnu og Steingríms, ríkisstjórn Samfylkingarinnar og Vinstrigrænna.
En Páll postuli sá ljósið eftir að hann féll að hestbaki.
Það þarf ekki að vera einsdæmi.
![]() |
Ekki erfitt að verja kaupaukagreiðslur Kristrúnar |
Tilkynna um óviðeigandi tengingu við frétt |
Stjórnmál og samfélag | Breytt s.d. kl. 16:52 | Slóð | Facebook | Athugasemdir (4)
20.9.2021 | 09:47
Væri ríkið ekki farið að borga með sér??
Í stað þess að innheimta skatta, svona í ljósi loforða Bjarna Ben um að lækka skatta fyrir hverjar kosningar, og þess að hann hefur verið fjármálaráðherra frá því að eldri menn muna??
Hvenær verður loforðaplata svo útslitin að í henni heyrist aðeins ískur??
Allavega virðast skoðanakannanir benda til þess að fólk sé búið að fá vóg af loforðum án mikilla efnda.
Af hverju hefur Bjarni ekkert að segja annað en það sem hann hefur alltaf sagt??
Af hverju talar hann ekki við fólk eins og fólk?
Segir hvað er hægt og hvað ekki.
Það væri tilbreyting.
Sem skilaði örugglega atkvæðum.
Sérstaklega í ljósi þess að ekkert framboð talar við almenning eins og hann sé vitiborinn en ekki sundurleitur hópur fífla líkt og flest framboð virka á fólk í dag.
Fólk vill ekki loforð.
Fólk vill efndir.
Kveðja að austan.
![]() |
Lækka þarf skatta frekar |
Tilkynna um óviðeigandi tengingu við frétt |
Stjórnmál og samfélag | Breytt s.d. kl. 10:47 | Slóð | Facebook | Athugasemdir (0)
19.9.2021 | 10:23
Stór og falleg demantssíld
Er lýsing Sturlu skipstjóra á Beiti á þeirri síld sem hann veiddi út af Héraðsflóa og landaði í kjölfarið til matvælavinnslu í fiskiðjuveri Síldarvinnslunnar hér á Neskaupstað.
Demantssíld er tungutak liðinna tíma, þegar lífið var fiskur, og afkoma þjóðarinnar var háð því hvernig aflaðist og hvernig gekk að vinna og selja aflann.
Tími sem aðeins gamlir og gráir muna eftir, tungutak sem er óðum að deyja út líkt og til dæmis mörg frumbyggjamál í Ástralíu þar sem aðeins er beðið eftir að síðasti öldungurinn fari á vit feðra sinna, þar sem hann mun aftur komast í heim þar sem tungumál bernsku hans er talað og skilið.
Sjávarútvegurinn í dag er hátækniatvinnugrein, aðeins prómil þjóðarinnar vinnur við hann, landvinnslan að mestu mönnuð erlendu starfsfólki, fiskur er ekki veiddur nema til staðar sé skrifleg þinglýst heimild sem má ganga kaupum og sölum.
En hann skaffar, og skaffar mikið.
Það sást gleggst í kóvid faraldrinum þegar ferðamenn hurfu hraðar en fína fólkið sem plagaði landsliðið í knattspyrnu á góðum stundum með uppáþrengjandi nærveru sinni, þá hélt sjávarútvegurinn hlut sínum, og varð aftur mikilvægasta gjaldeyrisuppspretta þjóðarinnar.
Og hann skilar hagnaði, góðum hagnaði.
Er bæði mjólkurkú þjóðarinnar og gullgæs fyrir þann fámenna hóp kvótaeiganda sem á góðri stundu þjóðmálaumræðunnar eru kallaðir sægreifar.
Þessi góði hagnaður hefur framkallað faraldur í stjórnmálum landsins sem má einna helst líkja saman við fjöldaofsjónir hjá deyjandi sveit franskra hermanna í útlendingahersveitinni, síðasti vatnsdropinn teygaður, ennþá dagleiðir í næstu vin.
Allt sem er á hverfandi hveli í okkar meinta bláfátæka þjóðfélagi, heilbrigðiskerfið, vegirnir, sultarkjör öryrkja, allt á að laga með að ná í þennan hagnað.
Jafnvel hillingar Steinríks (þegar hann var að deyja úr þorsta í útlendingahersveitinni) þegar hann sá dansandi villtar meyjar án þess að vera sjálfsmorðsíslamisti, blikna í samanburði við allt sem lýðskrum kosningabaráttunnar bíður kjósendum uppá þessa dagana.
Eftir stendur heimskan sem er skráð í visku kynslóðanna.
Þú slátrar ekki gullgæsinni, þú blóðmjólkar ekki mjólkukúna.
Í slíku atferli er fólgin feigð, aðeins vitstola græðgi hugsar ekki lengra en um ávinning morgundagsins.
Að ekki sé minnst á mannvonskuna sem að baki býr, því sægreifinn flýtur ofaná en hinar dreifðu byggðir sem ennþá eiga alla afkomu sína undir sjávarútveginum, þurfa að þola enn eina hringekju hagræðingarinnar með tilheyrandi röskun á atvinnu, eignaupptöku því þar sem enga vinnu er að fá, þar eru eignir verðlausar, líkt og sannaðist svo illilega í í kjölfar hins frjálsa framsals á kvóta.
Svona er græðgin.
Svona er öfundsýkin.
Heimskar fólk.
Vekur upp allt það versta í fólki.
Ljósi punkturinn er að það er aðeins kosið á fjögurra ára fresti.
Og þrátt fyrir að fólk spili sig fífl í aðdraganda kosninga, hvað skyldi það annars segja um okkur kjósendur??, þá er það svo þau eru miklu færri en fleiri sem komast á þing.
Ef ekki, þá mun fjara fljótt undan lífskjörum þjóðarinnar.
Óhjákvæmilegt líkt og að pissa uppí vindinn endar alltaf með bleytu á buxum.
Því þó það sé hægt að rífast við raunveruleikann.
Þá rífst raunveruleikinn ekki á móti.
Hann ræður, hann er.
Kveðja að austan.
![]() |
Stór og falleg demantssíld |
Tilkynna um óviðeigandi tengingu við frétt |
18.9.2021 | 18:58
Ljótir þessir Talibanar.
Banna stúlkum að mennta sig.
Eins og einhver hafi átt von á öðru.
En á öðrum tíma, liðnum tíma, hefðu þeir ekki skorið sig mjög úr.
Menntun stúlkna er tiltölulega nýlegt fyrirbrygði í mannkynssögunni.
Samt bendum við fingri, köllum þá miðaldafólk.
Sem er rétt, en var fólk eitthvað verra fyrir það??
Spurning sem stjórnvöld á Vesturlöndum hafa svarað fyrir sitt leiti.
Miðaldafólkið í Saudi Arabíu, sem fjármagnar öfga og öll hryðjuverk íslamista, eru helstu bandamenn þeirra.
Miðaldafólkið sem stjórnar Tyrklandi, er í Nató, ósnertanlegt þó það hafi verið mikilvægasti bandamaður morðingjanna í Ríki Íslams og veitt þeim skjól þegar ríki þeira hrundi.
En Talibanar, sem engin hergögn kaupa, sem engum vestrænum stjórnmálamönnum múta, þá má skamma.
Vissulega réttilega, en samt.
Væri ekki nær að líta sér nær??
Kveðja að austan.
![]() |
Talíbanar banna stúlkum að mennta sig |
Tilkynna um óviðeigandi tengingu við frétt |
18.9.2021 | 11:41
Er ekki allt gúddí??
Bæði til sjávar og sveita, fólk hafi það almennt gott, leiðindi veirunnar að baki.
Það mætti halda miðað við niðurstöður þessarar skoðunarkönnunar, það er aðeins á góðæristímum sem fólk kýs yfir sig glundroða og vitleysisgang.
Gleymd er staðfestan sem kom okkur í gegnum kóvid fárviðrið, styrk stjórn Katrínar og félaga, gleymdir eru þeir stjórnmálaflokkar sem ráku rýting í bak þjóðarinnar í kjölfar fjármálahrunsins 2008, gleymd er sú hugmyndafræði sem kom þjóðinni á hausinn.
Og gleymd er sú reynsla kynslóðanna að ekki er ráðlegt að láta fífl í brú ráða för.
Nema þetta segir það sem segja þarf um styrk framboða til hægri og miðju, að menn uppskeri eins og þeir sái.
Venjulegt jarðbundið fólk sér til dæmis æpandi mun á frambjóðendum Viðreisnar og Sjálfstæðisflokksins, fyrir utan Bjarna Ben þá er eins og listar flokksins séu soðnir saman af ímyndunarteymi einhvers almannatengslafyrirtækis á meðan frambjóðendur Viðreisnar eru eins og fólk, tala eins og fólk, eru venjulegt fólk, með reynslu og þekkingu sem fylgja starfi og aldri.
Sigmundur Davíð lúkkar ekki vel, eins og það séu brestir í honum, og í stað þess að eiga í samræður við þjóðina, þá er kosningabarátta flokks hans lítt skiljanlegt lýðskrum og bullgangur sem venjulegt fólk kaupir ekki.
Framsókn flýtur alltaf á svona tímum, og eins og áður sagði þá er skiljanlegt að Viðreisn fái fylgi hægrisinnaðs fólks, frambjóðendur flokksins eru traustir og koma vel fyrir.
En hvað með málefnin, hvað með aðildina að ESB, hvað með sjálfstæði þjóðarinnar, gæti einhver þá spurt??
Og svarið er einfalt, þegar á reynir er enginn munur á stefnu Viðreisnar og Sjálfstæðisflokksins hvað það varðar, eini munurinn í raun er sá að annar kannast við stefnu sína en hinn ekki.
Varðandi fylgi VG þá er það ljóst, hefur alltaf verið ljóst, að flokkur sem gerir út á andstöðu við ríkjandi kerfi, gamaldagsróttækni eða upphrópanir í umhverfismálum, að slíkur flokkur tapar alltaf á stjórnarsetu þar sem hann gengst við ábyrgð raunveruleikans.
Þú getur ekki verið í andstöðu við það sem þú ert hluti af.
Fylgi flokksins hlaut því að fara til sósíalista, þeir hafa tekið yfir rótæknina, og fíflaframboðin fá svo óánægjuna í umhverfismálum.
Það er allt gúddí í dag og niðurstöður kosninganna virðast ætla að styðja þá skoðun.
En eftir kosningar, hvað þá??
Kveðja að austan.
![]() |
Vinstri sveifla þegar vika er eftir |
Tilkynna um óviðeigandi tengingu við frétt |
Stjórnmál og samfélag | Breytt s.d. kl. 11:48 | Slóð | Facebook | Athugasemdir (6)
17.9.2021 | 17:45
Var Gróa send í ótímabært leyfi??
Eða var hún ekki á vakt þegar þessi frétt var skrifuð??
Aðeins rógberar, fólk sem er virkilega veikt á sinni, eða það hefur ekki andleg veikindi sér til afsökunar, er hreinlega illt eða í besta falli illgjarnt, þekkir ekki muninn á þessari frétt; svo ég vitni í hana; "Það að hann sé stórstjarna, einn besti knattspyrnumaður sögunnar og að þetta átti sér stað fyrir rúmum 12 árum, breytir því ekki að Ronaldo þarf að fá samþykki eins og allir aðrir.".
Eða frétt í stíl Gróu; "Það að stórstjarna, einn besti knattspyrnumaður sögunnar og að þetta átti sér stað fyrir rúmum 12 árum, breytir því ekki að hann þarf að fá samþykki eins og allir aðrir".
Fréttamaðurinn hér að ofan fjallar um nafngreindan einstakling og þær alvarlegu ásakanir sem á hann eru bornar, Gróa fjallar nafnlausan einstakling, tekur fram hvaða hóp hann tilheyrir, skilur eftir hópsekt þar sem allir liggja undir grun.
Gróa er rógberi, um það er ekki deilt, en hvort hún sé sinnisveik eða ill manneskja má svo endalaust velta fyrir sér, hvað er það sem drífur rógberann áfram.
Gróa hefur hins vegar komist upp með vinnu sinni hjá Morgunblaðinu að klína sök á hóp landsliðsmanna í knattspyrnu, og hún er svo ósvífin í rógburði sínum að hún þykist þess umkomin að taka fram að þessi eða hinn í viðkomandi hópi sé ekki sekur.
Fækkar þar með þeim einstaklingum sem sitja uppi með skítinn, ekki af góðmennsku heldur af hreinni illmennsku, þegar fækkar í hópnum þá stækkar bitinn sem slúðurkellingar hafa á milli tannanna.
Gleymum svo aldrei eðlismuninum á því þegar fólk rís upp og segir frá, kærir eins og lög gera kröfu um þegar glæpur er framinn, og því þegar fólk segir frá löngu seinna, aumingjavæðir sig með því að segja að einhverjir óskilgreindir hópar eða einstaklingar hafi ráðlagt viðkomandi að kæra ekki, en núna, og bítur svo höfuð af skömminni með því að nafngreina ekki meinta gerendur, heldur kastar skítnum á hóp fólks.
Gróa eða aðrir rógberar þekkja ekki muninn, en venjulegt fólk gerir það.
Það áttar sig á því að glæpur, hversu viðbjóðslegur sem hann er, réttlætir ekki annan glæp, að kasta alvarlegri sök á saklaust fólk.
Síðan felst það í því að vera Homo, hinn vitiborni, að hafa þá skynsemi að vita að það er ekki allt satt sem sagt er.
Meir að segja Stasi, eins paranoi þeir voru hjá þeirri ágætu leynisþjónustustofnun Austur Þýskalands, áttuðu sig á því.
Margir lifa líka í dag vegna þess að formæður þeirra voru ekki brenndar á báli vegna nafnlausra ásakana um kukl viðkomandi, lifa vegna þess að þó hátta fari í sögum um að á þeim voðatímum væri ásökun sama og sekt, að þá var það svo ekki í mörgum tilvikum, til voru dómarar sem fóru eftir staðreyndum, sönnuðum staðreyndum.
"Mér var nauðgað fyrir 11 árum af þekktum blaðamanni, ritstjórn Morgunblaðsins gerði ekkert í því, sjálfsagt vegna þess að mér var ráðlagt að kæra ekki svo hún vissi ekki af nauðguninni.
Síðan þurfti ég að sjá viðkomandi skrifa frétt eftir frétt, rífandi upp sárin, þar til ég gat ekki meir, og skila nú skömminni.
Meiri meðvirknin hjá ritstjórn Morgunblaðsins að reka ekki manninn strax eftir að mér var nauðgað, alveg dæmigert, ég veit um fullt af svona málum.
Blaðið er sekt um þöggun og gerendameðvirkni.
Fyrir að styðja nauðgunarmenningu".
Þessa frétt hefði Gróa getað birt, hún virðist alltaf vera eftirsótt hjá ritstjórnum fjölmiðla þessa dagana.
Spurningin er, hefði Morgunblaðið birt hana??
Þar liggur efinn.
Að vega aðra er eitt, en að vega sjálfan sig með rógi er annað.
En reynir ekki á því Gróa á Morgunblaðinu hefur vit á eins og fálkinn að virða friðinn við sitt nánasta umhverfi.
En hversu lengi??
Þar er líka efi.
Kveðja að austan.
![]() |
Hún sagði nei og hættu nokkrum sinnum |
Tilkynna um óviðeigandi tengingu við frétt |
Stjórnmál og samfélag | Breytt s.d. kl. 17:46 | Slóð | Facebook | Athugasemdir (0)
Um bloggið
Ómar Geirsson
Færsluflokkar
Bloggvinir
Heimsóknir
Flettingar
- Í dag (31.7.): 6
- Sl. sólarhring: 9
- Sl. viku: 535
- Frá upphafi: 1469939
Annað
- Innlit í dag: 5
- Innlit sl. viku: 460
- Gestir í dag: 5
- IP-tölur í dag: 5
Uppfært á 3 mín. fresti.
Skýringar