Er þetta undanhald samkvæmt áætlun??

 

Svo ég vitni í frægt kvæði eftir Stein Steinar.

 

"Að endingu sagði ég yfirdrottnunarvaldinu í alvöru stríð á hendur, án nokkurrar vægðar.

Og styrkur minn liggur allur í undanhaldinu, þótt einhverjum sýnist það málstaðnum lítið til þægðar.

Og stríð mitt er nútímastríð, en ekki af því taginu, að standa til lengdar í tvísýnum vopnabrýnum.

Þið vitið að jörðin er líkt og knöttur í laginu. Og loksins kemst maður aftan að fjandmanni sínum.".

 

Það skyldi þó ekki vera, að núna eigi að komast aftan að þjóðinni með því að láta núna að engin þörf sé lengur á samfélagslokunum, því "það eru að verða ákveðnar breytingar á faraldrinum" svo ég vitni í Runólf Pálsson.

Spurningin er þá kannski sú, af hverju var þa´lokað fyrir helgi??

 

En það er svo sem sama hvaðan gott kemur.

Þó menn játi mistök sín með undanbrögðum, þá er það niðurstaðan sem skiptir máli.

 

Og kannski ein afsökunarbeiðni í leiðinn.

Kveðja að austan.

 

Staðan að breytast að mati Runólfs

Faraldur eða feik??

 

Diffinn liggur í bólusetningum sem verja þjóðina.

 

Væri hún ekki bólusett væri hægt að tala um faraldur og einhver alvarleg veikindi í kjölfarið hjá áhættuhópum, hvort þau yrðu skæðari en til dæmis flensan 2016, þar sem margt eldra fólk féll í kjölfar lungnabólgunnar sem fylgdi henni, fólk á besta aldri lá heima hjá sér illa veikt í margar vikur, skal ósagt látið.

En þjóðin er bólusett, þess vegna er þessi faraldur feik, blekkingin ein.

 

Það er verið að fífla þjóðina með vísan í vanfjármagnaða gjörgæsludeild til margra ára, afleiðingin kulnun starfsfólks, starfsmannaflótti, erfiðleikar við að manna þó þær stöður sem fjárlög leifa.

Vanfjármögnun, afleiðing hins flata niðurskurðar ár eftir ár, áratug eftir áratug, skýrir vanda Landspítalans í dag auk þeirra stefnu í feikfaraldrinum að láta heilbrigt bólusett fólk hanga heima hjá sér í nafni sóttvarna.

 

Spurningin er, hvers vegna látum við fífla okkur svona??

Hvers vegna látum við feikfaraldur ræna okkur eðlilegu daglegu lífi??

Hvers vegna lútum við þessari óttastjórnun fólks sem nýtir sér feikfaraldurinn til að breiða yfir sín eigin stjórnunar og fjármögnunarmistök??

 

Ef það er neyðarástand á spítalanum, þá á að leysa það.

Fyrsta skrefið er að hafa heilbrigt bólusett fólk í vinnunni.

Annað skrefið er að fjármagna gjörgæsluna þannig að fólk sé þar ekki stanslaust að vinna í yfirsnúning, það er láta af þeirri forheimsku frjálshyggjustjórnmála nútímans að telja niðurskurð eða vansvelti vera leiðina til að nýta fjármagn á sem bestan hátt.

Stjórnmálafíflin sem aðhyllast stefnu hins flata niðurskurðar, munum að því sem næstum allir flokkar á þingi hafa framfylgt þessari hagfræði andskotans, ættu að prófa á sjálfum sér að neyta þess mataræðis sem föngum útrýmingarbúðanna var boðið uppá, og sjá hve þeir entust lengi í starfi.

Vansvelti gagnvart opinberum stofnunum hefur nákvæmlegu sömu áhrif.

 

En forheimskan er svo rótgróin inní hugsun nútímans, við erum undirseld hugmyndafræði hins frjálsa flæðis og hinna lægstu tilboða, og skiljum svo ekkert í að allt er að fara til andskotans.

Ekkert verið gert í loftslagsmálum í 30 ár annað en að skattleggja tekjulægri þjóðfélagshópa, leggja höft á atvinnulífið heima fyrir en leyfa um leið óheftan innflutning frá mengandi löndum sem engar reglur virða, með þeim afleiðingum að loftslagsmengun á heimsvísu eykst með hverju árinu.

Og heilbrigðiskerfið okkar hefur verið nagað inn fyrir bein svo það ræður ekki til lengdar við það viðbótarálag sem heimsfaraldrar veirusýkinga valda, eitthvað sem er búið að vera fyrirséð í áratugi.

 

Svo hámarka menn heimskuna með því að loka samfélaginu!!

Það er þó eitthvað hámarkað hjá þessum Mammonstilbiðjendum.

Og við hámörkum meðvirkni okkar með því að láta bjóða okkur þetta.

 

Svei attan.

Kveðja að austan.

98% á göngudeild einkennalitlir eða einkennalausir

Óður til sýndarmennskunnar.

 

Orðvar, kurteis maður segir að það sé ólíklegt að nýlegar sóttvarnaraðgerðir stjórnvalda muni skila tilætluðum árangri, enda er faraldurinn mestur meðal barna, unglinga og ungra fullorðinna í mennta og háskóla.

Þýtt yfir á mannamál, þær eru sýndarmennskan ein.

 

Fjölmiðlar hafa upplýst að sóttvarnalæknir lagði til aðgerðir sem duga til að ná niður smiti, aðgerðir í ætt við þær sem náðu niður samfélagssmitinu vorið 2020. 

Ríkisstjórnin samþykkti ekki tillögur hans enda vandséð hvernig hægt væri að réttlæta lokun samfélagsins vegna pestar sem þjóðin er varin gegn með bólusetningum, og flestir vita ekki að því að þeir eru sýktir, aðrir finna fyrir lítilsháttar kvefeinkennum.

Í stað þess samþykkti ríkisstjórnin samkomutakmarkanir á fullbólusett fólk, sem er ekki að veikjast eða sýkja aðra, og jú, bannaði ungum karlmönnum að drekka brennivín á krám og öldurhúsum, broslegt í ljósi þess að brennivínsþorsti finnur sér alltaf sínar leiðir, sérstaklega þegar náttúran spilar inní.

 

Ríkisstjórnin taldi sig ekki geta lokað aðalútbreiðslusvæðum veirunnar, skólum landsins enda menntun mikilvæg, og einhvers staðar þurfa blessuð börnin að vera svo fólk geti unnið.

Skynsamt fólk skilur þau rök, en þar með þrýtur ekki skynsemi þess, það spyr sig; Til hvers voruð þið þá að grípa til annarra aðgerða sem engu máli skipta, eru íþyngjandi fyrir samfélagið, loka í raun á allt eðlilegt mannlíf?

Til hvers??

 

Það hlálegast er kannski það að miðað við þá nálgun að nota nútímatækni, PCR prófin, til að greina smit en ekki veikindin sjálf, þá er ekki hægt að halda skólunum opnum þegar allir eru heima í annaðhvort sóttkví eða einangrun.

"Ákvarðanir stjórn­valda í sjálfu sér breyta engu þar um. Skól­ar loka ef ekki er hægt að halda úti mann­skap sem dug­ar til að halda uppi að minnsta kosti ör­ygg­is­sjón­ar­miðum," seg­ir Þor­gerður Lauf­ey Diðriks­dótt­ir, formaður Fé­lags grunn­skóla­kenn­ara".

Og það eru ekki bara skólarnir sem loka, PCR prófin leita út samfélagið, foreldrar og systkini eru send í einangrun eða sóttkví, vinnufélagar, fólk sem hefur hitt viðkomandi á fundum eða í félagsstarfi.

Nýleg saga úr litlum bæ skýrir þessi dómínóáhrif.  Einkennalaus nemandi smitar kennara sem er einkennalaus, hann fer í félagsstarf þar sem allra sóttreglna er gætt, en fyrst hann er með PCR próf, þá þurfa allir sem þar voru að fara í sóttkví eða smitgátt, það raskar víða starfsemi í litlu samfélagi.  Fólk getur ekki sinnt störfum sínum ef þau byggjast á samskiptum við aðra, þar sem margir nemendur dreifðu smitinu, þá eru svona dómínóáhrif mörg út í samfélagið.

Afleiðingin er höktandi mannlíf þar sem fáir eru veikir, en fjöldinn með PCR próf.  Og aðeins tímaspursmál hvenær ekki er hægt að sinna veiðum og vinnslu, sem allt mannlíf byggist á.

 

Þetta er heimskara en það sem heimskt er.

Þjónar engum tilgangi en að skaða samfélagið.

 

Við lifum kannski á tækniöld, en við erum samt lífverur, og við getum ekki yfirgefið hin fornu sannindi að það eru veikindi sem ákveða hvort fólk er veikt, ekki nútímahátæknipróf, sem voru ekki einu sinni til staðar fyrir nokkrum árum síðan.

Var þá bara enginn veikur, spítalar óþarfir því engin voru PCR prófin??

 

En eitt er samt heimskara en þessi Óður til sýndarmennskunnar.

Alþjóða heilbrigðisstofnunin áætlar að um 40% Evrópubúa muni smitast af hinu bráðsmitandi Omikron afbrigði veirunnar.

Sem segir að þessi veira verður ekki hamin með takmörkuðum samfélagslokunum, þær draga aðeins faraldurinn á langinn.

Með öðrum orðum, það er verið að skaða samfélagið án nokkurs ávinnings.

 

Alvarleikinn við þá heimsku er sá að líftími bólu mRN bóluefnanna sem verja okkur, er skammvinnur, 3-5 mánuðir.

Sá tími er næstum liðinn fyrir þá sem eru i áhættuhópum og fengu því bóluefnið fyrst allra, þar með talið þriðju sprautuna.

Það að draga faraldurinn á langinn er því bein aðför að lífi þess og limum, er í raun tilraun til fjöldamorða því það eru bóluefnin sem vernda, ekki núgildandi sóttvarnir.

 

Kurteis maður sagði að það væri ólíklegt að nýlegar aðgerðir stjórnvalda myndu skila tilætluðum árangri.

Vonandi ná orð hans eyrum landsmanna, að skynsamt fólk láti ekki bjóða sér þessa nútímaútgáfu af sögunni um klæðalausa keisarann.

 

Ég er ekki kurteis.

Ég get ekki annað en sagt það hreint út að þetta er sýndarmennska fólks sem hefur bugast af álagi raunveruleikans, haldi það fast við mistök sín, þá er það ekki starfi sínu vaxið.

Ber því að víkja hafi það ekki manndóminn til að gangast við sínum röngum ákvörðunum, aflétti óþarfa samkomutakmörkunum, leyfi mannlífinu að flæða eðlilega á ný.

Og geri það sem það á að gera, efla heilbrigðiskerfið á neyðarstundu með þeim lögum og reglum sem Alþingi hefur sett þar um.

 

Það er búið að lýsa yfir neyðarástandi almannavarna.

Í því felst ekki að menn eigi að grípa til sýndaraðgerða eins og Foringinn í byrginu sem færði til herdeildir sem voru ekki til svo hægt yrði að stöðva stórsókn Rússa.  Varð svo brjálaður þegar sýndarherdeildirnar höfðu ekki sigur á raunverulegum herjum.

Það er orrusta í gangi á Landsspítalanum, heilbrigðu fólki er þar haldið fjarverandi vegna PCR prófa, telji almannavarnir sig ekki hafa styrk til að stöðva þá gjörð, þá ber almannavörnum að koma mannskapi annars staðar úr þjóðfélaginu inná spítalann.

Það er það sem felst í orðinu "Neyðarástand", ekki að þá sé gripið til sýndarráðstafana.

 

Það er ekki fyndið hvernig tíðarandinn hefur skilað af sér leiðtogum sem engan kjark hafa eða snerpu til að takast á við tilfallandi erfiðleika eða eitthvað sem flokkast má sem neyðarástand eða muni leiða til neyðarástands.

Er ekki búið að tala um komandi hamfarahlýnun í um 30 ár (Ríó 1992)?, og nauðsyn orkuskipta, raunveruleikinn eftir allt innlenda málæðið er orkuskortur.

Er ekki kórónúveiran búin að herja frá síðla vetur 2020?, ástandið á gjörgæsludeild Landsspítalans samt mjög svipað og það var fyrir faraldurinn, undirmönnun, of fá rúm, alltof mikið álag á starfsfólk, kulnun, mikil starfsmannavelta

En þetta hættir að vera fyndið þegar á reynir, að þá sé gripið til sýndarráðstafana, hvað þá skaðlegra sýndarráðstafana eins og gripið var til fyrir helgi.

 

Mig langar að vitna í góða frétt sem ég las áðan á Mbl.is þar sem talað var við menntaskólakrakka um týndu árin, þar sagði einn strákur, örugglega yngri en 20 ára, allt sem segja þarf um þann sorglega raunveruleik sem blasir við eftir tveggja ára faraldur kórónuveirunnar;

 

"Ísak León seg­ir unga fólkið pirrað á ástand­inu og það vilji kom­ast út og njóta ár­anna þar sem það er mitt á milli þess að vera börn og full­orðin. "Það eru nátt­úru­lega kom­in tvö ár," seg­ir Ísak.

Hann gagn­rýn­ir að heil­brigðis­kerfið hafi ekki verið bætt þannig að hægt sé að taka á móti fleiri Covid-sjúk­ling­um á spít­ala en und­an­farna daga hef­ur þeim fjölgað hratt á Land­spít­al­an­um. "Það er eig­in­lega ekk­ert búið að gera þannig að hægt sé að taka á móti fleiri," seg­ir Ísak. Hann seg­ir flesta sem hann þekki hrausta og heil­brigða þótt auðvitað þekki marg­ir fólk í áhættu­hóp­um.

Hann velt­ir því fyr­ir sér hvenær haml­an­ir vegna far­ald­urs­ins hafi meiri áhrif en far­ald­ur­inn sjálf­ur. "Þetta er pirr­andi en á sama tíma erfitt að koma þessu rétt frá sér," seg­ir Ísak sem vill opna sam­fé­lagið meira og einnig passa að "það fari ekki allt í fokk" á spít­al­an­um.".

 

Það er nefnilega eiginlega ekkert búið að gera til að fjölga gjörgæslurúmum og það er hægt að hafa samfélagið opnara án þess að allt fari í fokk á spítalanum.

Þetta sjá unglingarnir.

 

Af hverju ekki stjórnvöld??

Og hví gera ekki almannavarnir ekki skyldu sína??

 

Spyr sá sem ekki veit en grunar margt.

Hefur einhver heyrt getið um silkihúfur??

Kveðja að austan.

 

 

 

Erum á leið út af sporinu

Ríkisstjórnin féll á prófinu.

 

Höfum eitt á hreinu, vilja menn losna við þennan faraldur þá er ekkert annað í boði en mjög stífar samfélagslegar lokanir í nokkrar vikur, á pari sem var á Spáni eða Ítalíu á sínu tíma, sem og lokun landamæranna með sóttkví allra sem koma til landsins.

Allt annað er sýndarmennska, það er ef menn vilja stöðva þessa veiru.

 

Ríkisstjórnin féll á prófi skynseminnar.

Megindrifkraftur faraldursins eru skólar landsins, þar dreifist smitið á milli barnanna, og berst síðan inná heimili fólks.

Vilji menn hemja þennan faraldur, þá verður það ekki gert nema loka skólum landsins.

Samkomutakmarkanir ná vissulega að hamla skemmtanalíf ungra karla, en mikið fá fólk vera einfalt í sinni ef það heldur að náttúran hverfi og ungt fólk hætti að hittast og skemmta sér.

Heimskast af öllu er síðan að ætla sér að draga faraldurinn á langinn núna þegar virkni þriðju bólusetningarinnar er í hámarki og héðan af mun aðeins draga úr vörnum hennar gegn alvarlegum veikindum.

Aðgerðirnar vinna sem sagt gegn þeim markmiðum heilbrigðisyfirvalda að lágmarka alvarleg veikindi og dauðsföll vegna faraldursins.

 

Ríkisstjórnin féll á prófi þess sem kalla má réttlæting samfélagslegra takmarkana í nafni sóttvarna.

Ef PCR prófin væru ekki til þá vissi enginn að faraldur væri í gangi í þjóðfélaginu, aðeins einangruð tilvik veikinda þar sem mjög fáir þurfa að leggjast inná spítala. Stærsti hlutinn af þessum fáu er óbólusett fólk sem fyrirfram hefur neitað þeim vörnum sem eru í boði til að verjast veirunni.

Aðeins farsótt, sem ekki er hægt að lækna og getur valdið alvarlegum veikindum hjá áhættuhópum, réttlætir samfélagslokanir, og þá aðeins í þann tíma sem tekur að þróa bóluefni og finna lyf sem virka gegn veirusýkingunni. 

Eftir það þá ber stjórnvöldum skylda til að hafa heilbrigðiskerfið það öflugt að það ráði við að bólusetja almenning og geti sinnt þeim undantekningum sem veikjast.

Vanhöld á því réttlætir aldrei að úr klúðrinu sé bætt með því að grípa til samfélagslegra lokana sem lama allt eðlilegt mannlíf.

Hvað þá þegar þjóðin er bólusett, varin gegn alvarlegum veikindum, að slíkt klúður sé talið meginforsenda þess að allt þjóðlíf sé drepið í dróma.

 

Og þar með er komið að lokaprófinu sem ríkisstjórnin féll á.

Heimsfaraldur kórónuveirunnar fagnar brátt 2 ára afmæli sínu, strax í upphafi var ljóst að hann myndi reyna mjög á heilbrigðiskerfi þjóðarinnar, það yrði því að efla með öllum ráðum.

Öll þau ráð fram að þessu eru í flugumynd, og núna þegar lýst hefur verið yfir hættustigi almannavarna vegna vanbúnaðar heilbrigðiskerfisins, þá þýðir það að menn gera það sem þarf til að auka mönnun og fjölga leguplássum.

Ekkert í lögum og reglum um almannavarnir segja að menn eigi að yppta öxlum, gera fátt annað en að segjast ekki ráða við ástandið, og því sé bara auðveldast að læsa þjóðina inni.

 

Ef almannavarnir væru virkar þá myndu þær setja þessa ríkisstjórn af ef þetta er svarið.

Hvetja forsetann til að skipa neyðarstjórn sem nýtti sér lög og heimildir til að kalla fólk til starfa og beina fjármunum og aðföngum inní gjörgæslukerfið.

Ef óbólusettir eru skýring þess að það er að springa þá má takast á við þann vanda með því að útvista óbólusettum einstaklingum úr hinu opinbera heilbrigðiskerfi, bjóða hjúkrun þeirra út til einkaaðila á evrópska efnahagssvæðinu eða hvað sem mönnum dettur í hug til að uppfylla skyldur sínar gagnvart þeim, en aðalatriðið er að frelsi þeirra til að hafna bólusetningu á ekki að bitna á samfélaginu, frelsi þeirra er ekki því fólgið að aðrir sitji uppi með ábyrgðina. Hvað þá að þeir séu rök fyrir atlögu að samfélaginu í nafni sóttvarna.

 

Allavega, þetta er ekki líðandi.

Þessu bjargleysi heimskunnar verður að linna.

Þurfi til þess nýtt fólk, þá verður svo að vera.

 

Útbrunnið fólk getur ekki komið okkur út úr þessu heimatilbúnu sjálfsskaparvíti.

Heimsfaraldri veirunnar mun linna fyrr eða síðar.

Á meðan þurfum við fólk sem hefur kjarkinn og getuna að halda lífi í samfélaginu en ekki bara smittölum þess.

 

Hér með óska ég eftir slíku fólki.

Kveðja að austan.

Hertar aðgerðir „millivegur sóttvarnalæknis“

Hinn óbærilegi léttleiki tilverunnar.

 

Það er glatt á hjalla víða á landinu í dag, ungt fólk hittist, jafnt í leik sem starfi, kynin gera hosur sínar grænar fyrir hvort öðru, eða á maður kannski að segja fyrir öllum hinum, og eiga jafnvel í nánum samskiptum.

Á morgnanna sér maður kát og hlæjandi börn fara í skólana, unglingarnir á heimilinu stunda sitt nám, mæta á fótboltaæfingar, og í kvöld á að keppa í  Gettu betur.

Faraldurinn setur vissulega skorður en lífið er samt eins eðlilegt og það getur verið á tímum farsóttarinnar.

 

Þessi léttleiki tilverunnar virðist samt vera sumum óbærilegur í þjóðfélaginu í dag.

Þeir vilja herða sóttvarnir frá því að vera mjög íþyngjandi fyrir daglegt líf æsku þjóðarinnar yfir í að vilja loka á þetta daglega líf.

Rökin er bráðsmitandi pest, sem þjóðin er reyndar bólusett við, pest sem í raun enginn vissi útbreiðsluna á, ef til kæmi ekki sú nútíma tækni að geta greint pestarveiruna með PCR prófum.

Prófum sem voru ekki aðgengileg fyrir nokkrum árum síðan, fyrir nokkrum árum síðan hefði enginn vitað að bráðsmitandi pest léki lausum hala útí samfélaginu.

 

Fyrir nokkrum árum síðan hefðu hótel landsins fengið að vera hótel, ekki sóttvarnarhótel, því fyrir nokkrum árum síðan hefði ekki hvarflað að nokkrum manni að læsa inni fullfrískt fólk í öryggisskyni svo það myndi ekki smita annað fullfrískt fólk.

Fyrir nokkrum árum síðan hefði ekki verið talað um álag á Landsspítala eða gjörgæslu, því fyrir nokkrum árum síðan var ekki búið að skera niður gjörgæsluna þannig að hún réði illa við lágmarks álag, hvað þá aukið álag vegna pestar sem veldur erfiðum veikindum hjá 0,eitthvað prósent þjóðarinnar.

 

Við getum ekki snúið til baka til þess tíma sem var fyrir nokkrum árum síðan, áður en stjórnmálaflokkar þessa lands tóku þá ákvörðun að gjörgæsla væri óþarfi í þeim nútíma þar sem fjármagn og lúxusneysla væri æðra öllu.

Gleymum ekki í því sambandi að þar eru allir flokkar sekir, nema Flokkur fólksins, eðli málsins vegna.

Og sekust erum við sem þjóð að hafa umborið þessa sjálfsmorðstefnu stjórnmálastéttarinnar gagnvart heilbrigðiskerfi þjóðarinnar.

 

En það er sem er, fortíðin er ekki tekin til baka.

Af henni má læra, en fyrst og síðast þarf að axla ábyrgð á henni, eitthvað sem var svo aðdáunarvert í Þýskalandi eftirstríðsárana.

Þar gerði Þýska þjóðin sér grein fyrir að hinar óendanlegu hörmungar sem hún gekk í gegnum á lokaárum stríðsins, voru á hennar ábyrgð, ekki annarra.

Það var hún sem efndi til óvinafagnaðarins.

 

Þá visku ættum við fullorðna fólkið að hafa í huga þegar okkur finnst léttleiki æskunnar vera óbærilegur.

Hvað sem við gerum, þá er ekkert sem réttlætir að loka samfélaginu, að þurrka út æsku og unglingsár heillar kynslóðar.

Og fyrr sem menn átta sig á því, því fyrr fara menn að velta fyrir sér raunhæfum lausnum, eitthvað sem eflir heilbrigðiskerfið og gerir því kleyft að takast á við núveranda vanda þess.

 

Þeir sem sjá einu lausnina að loka og læsa á tímum farsóttar sem bólusetningar verja okkur gegn alvarleik hennar, þeir eiga að víkja.

Þeir eru frosnir í hugsun og eru því ekki starfi sínu vaxnir.

Þeir leita ekki lausna, þeir leita í þekkta flóttaleið vímunnar.

Flóttaleið samfélagslokana er eins og bregðast við falli á prófi með að reykja sig skakkann.

 

Tilveran er nefnilega ekki óbærileg, hún er erfið, það er vandi, en ekkert sem ekki er hægt að takast á við.

Við eigum nóg til af menntuðu fólki, við eigum nóg til að húsnæði, það er aðeins úrlausnarefni að koma þessu saman þannig að heilbrigðiskerfi ráði við aukið álag á meðan farsóttin útrýmir sjálfri sér með myndun hjarðónæmis í samfélaginu.

Munum að til þess fær hún góða hjálp af bólusetningum.

 

Við þurfum aðeins forystufólk sem tekst á við verkefni, en flýr þau ekki með þekktum óbærilegum flóttaleiðum.

Því til lengdar eru samfélagslokanir óbærilegar hverju þjóðfélagi.

Ekki pest sem auðvelt er að ráða við.

 

Höfum það hugfast.

Látum ekki segja okkur annað.

Kveðja að austan.

 

 

Jafnvel von á hertum aðgerðum fyrir helgi

Rödd skynseminnar.

 

Það er ekki skynsamlegt að berjast við veiru sem hægt er að fá bólusetningu við.

Þeir sem kjósa að nýta sér ekki bólusetningu, eiga taka fulla ábyrgð á ákvörðun sinni, og hafa ekki tilkall til að þjóðfélagið sé sett á hliðina vegna ætlaðra veikinda í þeirra.

Enda mér til efs að þeir geri það tilkall.

 

Kostnaðurinn við að hindra fullfrískt fólk við að taka þátt í samfélaginu hleypur á milljörðum, milljörðum sem sárvantar í heilbrigðiskerfið.

Það er til fólk sem vill mennta sig en fær ekki menntun vegna fjárskorts kerfisins.  Samt vitum við að álagið á heilbrigðiskerfið vegna kórónuveirunnar er rétt að byrja, og loksins þegar við fáum afbrigði sem er bæði bráðsmitandi eins og omikron, og banvænt eins og Delta afbrigðið, þá er heilbrigðiskerfi okkar mannlaust, hið langvarandi álag hefur sogið allan þrótt úr starfsfólki, það er ekki vélar, annað hvort brennur það út eða forðar sér áður en til þess kemur.

Fyrirsjáanlegur vandi og við setjum ekki fjármuni í að bregðast við honum í tíma.

 

Smitið út i samfélaginu eru raunveruleiki og núverandi sóttvarnir hamla lítt á útbreiðslunni, sýnatökur og fjöldi í sóttkví segir ekkert til um þá útbreiðslu.

Það eru það margir einkennalausir, og fólk er farið að hafa vit á að fara ekki í sýnatöku, bæði vegna þeirra afleiðinga að vera neitt fullfrískt í einangrun, vegna þeirra afleiðinga sem það hefur á aðra fullfríska fjölskyldumeðlimi, að þeir séu þvingaðir í sóttkví, og vegna þeirra afleiðinga sem það hefur á vinnustað þess, þar sem aðrir þurfa að bæta á sig ómældri vinnu til að starfsemi stöðvist ekki.

Þetta er eins og þegar laxveiðimaðurinn gefur endalaust eftir slaka til að þreyta laxinn, nema í þessu tilviki eru það við en ekki veiran sem er bráðin.

Af hverju ætti veiran að hafa á móti því að líftími hennar er lengdur og því nái hún að lokum til fleiri fórnarlamba og nær að valda meiri skaða þegar allt er talið??

 

Nei, þetta eru ógöngur og þær eiga aðeins eftir að magnast, og svo verður það þar til leitað er úr þeim, þær leysast ekki af sjálfu sér ekki frekar sprikl í kviksyndi hjálpar til að losa um tak þess.

Einhver myndi segja, en hvað um hina viðkvæmu, var ekki tilkynnt um 2 dauðsföll síðastliðinn sólarhring??

 

Og það er alveg rétt.

Veiran er staðreynd, hún er banvæn í ákveðnum tilvikum, en það er ekkert sem segir að langvarandi ástand þar sem varnir óhjákvæmilega lýjast, muni ekki valda fleiri dauðsföllum en ef þjóðfélagið yrði sett á hættuástand og allt sem í mannlegum mætti býr yrði lagt í að verja viðkvæma á meðan faraldurinn gengur yfir.

Eitthvað sem hann mun gera hratt og vel því omikron er það bráðsmitandi.

 

Munum líka að aðrir faraldrar geta líka verið banvænir, til dæmis illvíg lungnabólga, að ekki sé minnst á alvarlega flensufaraldra líkt og flensan 2016.

Þá féll fólk, aðallega eldra fólk og fólk með skert ónæmiskerfi, en þá hvarflaði að engum að loka fullfrískt fólk inni til að draga faraldurinn á langinn.

Faraldursfræðingar ræddu hins vegar nauðsyn þess að bólusetja, og sumir töldu jafnvel nauðsynlegt að skylda umönnunarfólk að fara í flensubólusetningar enda sýndu rannsóknir að færri féllu til dæmis á hjúkrunarheimilum (bæði bandarískar og breskar rannsóknir) þar sem bólusetning starfsfólks var almenn. 

 

Það er nefnilega þannig að fátt er nýtt undir sólinni, líklegast var slíkt aðeins í árdaga sólkerfis okkar.

Við höfum tekist á við mildar bráðsmitandi farsóttir áður, mildar í þeirri merkingu að þær eru ekki eins banvænar og fyrstu bylgjur kórónuveirunnar.

Við vitum líka að fólk deyr að völdum sjúkdóma, aðeins eitthvað nýtt sem engin lækning er við, og það nýja er bráðsmitandi svo hægt sé að tala um faraldur, réttlætir stífar samfélagslegar lokanir, annars þarf að feisa vandann með þeim ráðum sem mannsandinn ræður yfir.

 

 

Hvað omikron afbrigðið varðar þá ráðum við yfir vörnum sem virka.

Hvort sem það er bóluefni, veirulyf, tækjabúnaður á gjörgæslu, þekkingu á smitleiðum veirunnar, eða annað sem fyrri bylgjur kórónuveirunnar hafa kennt okkur.

 

Ef það er ekki núna??

Hvenær þá??

 

Ræðum þessa spurningu eins og fólk.

Og munum, heill maður, sem er heill í sinni þekkingu og sínum störfum, hann skiptir um skoðun þegar þess þarf, slíkt er aldrei áfellisdómur á fyrri afstöðu hafi hún verið byggð á heilindum.

 

Við þurfum slík heilindi í dag.

Kveðja að austan.

 

Veltir upp hvort hætta eigi almennri sýnatöku

Í húsi föður míns eru mörg herbergi.

 

En vandséð er hvernig Valhöll rúmar varaþingmann sem hótar fólki með nýjum Nurnbergréttarhöldum.

 

Burtséð frá því, og burtséð frá hinum heitu tilfinningum sem kóvid bóluefni vekja uppi hjá fólki, þá stendur eftir einn alvarleiki sem snýr að heilbrigðisyfirvöldum´og það er algjör skortur á stefnumörkun um hvernig bregðast á við upplýsingaóreiðunni sem ríður röftum á samfélagsmiðlum, og leitar inní opinbera fjölmiðla án þess að sjáanlegt sé að við henni sé brugðist.

Það má vel vera að upplýsingafundir hefðu dugað á árum áður þegar aðgengi fólks að upplýsingum lá í gegnum fjölmiðla, þar sem ríkisfjölmiðlarnir nutu mest trausts, en það var á síðustu öld, og í dag er árið 2021.

Ef maður að nafni Kári Stefánsson væri ekki bæði málglaður og rökfastur, þá væri margt ruglið fljótandi í umræðunni sem hann náði að sökkva með viðtölum, pistlum á feisbók eða blaðagreinum, á meðan Þórólfur beið á hliðarlínunni eftir því að einhver biði honum í Kastljós.

 

Svo við víkjum að bólusetningu barna þá hafa birst greinar í blöðum eftir lækna, sem mæla gegn þeim, með ágætis rökum þannig séð, vísa til dæmis í varúðarsjónarmið í nokkrum nágrannalöndum okkar, og þessum greinum er ekki svarað.

Af hverju að bólusetja??.

Hvað er rétt og hvað er rangt í umræðunni??

 

Síðan má til dæmis spyrja sig af hverju sóttvarnaryfirvöld sendu ekki inn forlega kvörtun til fréttastofu Ruv þegar Jóhanna Vigdís þaggaði niður í Ingileif Jónsdóttur prófessor þegar hún var að vísa í rannsóknir um áhættuna af bólusetningum versus áhættuna að fá sömu sjúkdóma af völdum kórónuveirunnar.

Hvað var mikilvægara í fréttum þann dag en að upplýsa þjóðina á þessum krossgötum bólusetninga, að eyða upplýsingaóreiðunni, að fá réttar upplýsingar frá fyrstu hendi frá virtasta sérfræðingi þjóðarinnar í ónæmisfræðum??

Hjá alvöru þjóðum hefur fólk verið rekið fyrir minni sakir.

 

Ingileif vitnaði í rannsóknir bóluefnaframleiðanda, að hættan á til dæmis á hjartabólgu hjá börnum og unglingum væri vart mælanleg, og að reynslan frá bólusetningum styddi þau gögn.

Mbl.is tók viðtal við Jón Ívar Einarsson, prófessor við Harvard háskóla þar sem hann varaði við bólusetningum barna.  Í því viðtali vitnaði Jón í rannsókn sem birtist í Nature Medic­ine þar sem hættan af að fá hjartavöðvabólgu eftir bólusetningu var metin.  ´Burt séð frá því hvernig Jón Ívar leggur út frá þeirri rannsókn þá má lesa þetta í niðurstöðum hennar; " The risks are more evenly balanced in younger persons aged up to 40 years, where we estimated the excess in myocarditis events following SARS-CoV-2 infection to be 10 per million with the excess following a second dose of mRNA-1273 vaccine being 15 per million. Further research is required to understand why the risk of myocarditis seems to be higher following mRNA-1273 vaccine. " Og seinna má lesa þetta; "By contrast, SARS-CoV-2 infection was associated with a substantial increase in the risk of hospitalization or death from myocarditis, pericarditis and cardiac arrhythmia (Aftur á móti tengdist SARS-CoV-2 sýking verulega aukinni hættu á sjúkrahúsvist eða dauða vegna hjartavöðvabólgu, gollurshúss og hjartsláttartruflana)".

Tíu til 15 tilvik af milljón er ekki ástæða til að vara við bólusetningum ungra karla, sérstaklega þar sem flest tilvikin eru væg og lagast við hefðbundna meðferð, og eins og Ingileif benti á og rannsakendurnir í Nature Medicine nefna, hættan af kóvid sýkingu varðandi hjartabólgu er margfalt meiri, allt að 40 falt fyrir ungt fólk minnir mig að Ingileif hafi sagt þegar Jóhanna Vigdís þaggaði niður í henni.

Þar að auki hefur Delta afbrigði kórónuveirunnar stráfellt yngra fólk, óbólusett, í þeim samanburði er hættan af vægri hjartabólgu ekki stórvægilegur áhættuþáttur.

 

Þegar tímaritið Forbes birti frétt um að 160.000 óbólusettra Bandaríkjamanna hefðu dáið frá því í júníbyrjun 2021 til 1. desember sama ár, af um 180.000 sem dóu úr kóvid á tímabilinu, þá var líka sagt frá hve algeng kóvid dauðsföll væru af heildardauðsföllum í einstaka aldurshópum í nóvember síðastliðnum.

Þó bylgjan væri undir stjórn í flestum ríkjum Bandaríkjanna, og flest dauðsföll á þeim svæðum þar sem tortryggni gagnvart bólusetningum var útbreidd, þá voru kóvid þriðja algengasta dánarorsökin á eftir hjartaáföllum og krabbameini.

En algengasta dánarorsökin í aldurshópum 45-54 ára og næst algengasta í aldurshópnum 25-44 ára.

Börn og unglingar sluppu betur en samt var kóvid í sjöunda sæti hjá börnum 1-4 ára, sjötta hjá aldurshópnum 5-14 ára og sú fjórða hjá 15-24 ára.

 

Svo ég ítreka að það var enginn faraldur í gangi, smit per 100.000 íbúa í lægri kantinum miðað við fyrstu og aðra bylgju, og bylgjan var í rénum í ríkjum eins og Flórída og Texas, þar sem þriðja bylgjan var mjög öflug síðla sumars og um haustið.

Hvernig skyldi þetta hlutfall hafa verið faraldurinn hafi verið útbreiddur og bólusetningar áhættuhópa hefðu ekki verið eins almennar og þær voru??

 

Vissulega er það rétt að það veit enginn um langtímaáhrif þessara nýju bóluefna, og margir mætir sérfræðingar hafa lýst yfir ótta að þau geti espað upp ónæmiskerfið og valdið ýmsum sjálfsofnæmissjúkdómum í framtíðinni.

Það er hins vegar mikið vitað um tíðni aukaverkana í dag, og þær er margfalt minni en alvarleiki kóvid sýkinga, líka hjá hinu vægari omikron afbrigði.

Og yngra fólk er að deyja úr kóvid, að halda öðru fram er fölsun á staðreyndum.

Sérstaklega hefur Delta afbrigðið reynst skeinuhætt.

 

Þegar ég sló inn leitarorðin, börn og spítalainnlögn, reyndar á útlensku, þá fékk ég upp nokkrar greinar um þá mögnun sem hefur orðið á fjölda innlagna barna vegna kóvid í Bandaríkjunum.

Í einni greininni var spurt, hvað segja sérfræðingarnir sem eru að glíma við afleiðingar kóvidsýkingar í börnum, og ég ætla að enda þennan pistil á tilvitnun í einn sérfræðing vestra;

"The spike in hospitalizations frustrates pediatric infectious disease doctors on the front lines treating children sick with the coronavirus.

"It seems like people have tried to downplay the significance of the disease in children," said Dr. Mark Kline, the physician-in-chief at Childrens Hospital New Orleans. "We have spent two years rebutting myths pertaining to Covid and children, that it is "harmless" for children. Itis not."

As of Monday, Kline said, 14 children were sick enough with Covid-19 to be hospitalized at his facility, and three were in the intensive care unit. The three children are under age 2. The youngest is just 8 weeks old. ".

 

 

Gúgli frændi veit þetta, og ef maður hlustar nógu oft á Þórólf þá veit maður eitthvað um þetta.

En að upplýsingum sé haldið til haga, vísað í nýjustu rannsóknir, vísað í afhjúpanir (fakttékk) á fölskum fullyrðingum ýmissa manna sem ættu að vita betur, svo fólk geti vegi og metið, það vantar algjörlega slíka gátt hér á Íslandi.

Á meðan getur fólk haft réttmætar áhyggjur, því sjónarmiðin eru mörg og varnaðarorðin koma víða að.

 

Sumir geta meir að segja haft það miklar áhyggjur að þeir telji ástæðu að skrifa svona bréf sem er tilefni þeirrar fréttar sem ég pistla við, og skýrir fyrirsögn þessa pistils.

Það má meir að segja að það sé borgarleg skylda að bregðast við ef menn telja stórslys í uppsiglingu.

 

Þess vegna vona ég að heilbrigðisyfirvöld svari þessu bréfi.

Svarið verði málefnalegt.

Upplýsandi.

Hafi einhvern tímann verið þörf á slíku, þá er það núna.

 

Það er sagt að staðreyndir tali sínu máli.

En þær þiggja hjálpina.

Kveðja að austan.

„Óþægilegt“ bréf um bólusetningu barst skólum

Gjaldþrot núverandi sóttvarnarstefnu.

 

Blasir við öllum, spurningin er hvort allt stöðvast áður í samfélaginu áður en menn viðurkenna mistök sín.

Þá er hollt að leit á náðir sögunnar.

 

Það var einu sinni kóngur, stór uppá sig, sem móðgaðist illilega þegar hann gekk eftir fjöruborðinu og alda slettist á fínu silkiklæði hans því það flæddi að.

Í hroka sínum skipaði konungurinn þjónum sínum að ná í barefli og lemja öldurnar, með þeirri skipun að það ætti að hætta að flæða að.

Sem gefur að skilja þá virkuðu ekki þær barsmíðar, vissulega fjaraði út, ekki vegna barsmíða konungsmanna, en það flæddi að aftur.

Og aftur.

 

Ekki fylgir sögunni að konungur hafi þá hvatt út herinn sinn, hvað þá skipað bændum og búaliði að yfirgefa býli sín, taka sér barefli í hönd, og fara niður í fjöru að lemja sjóinn þar til hann léti að vilja konungs og hætt að flæða.

Því dæmisagan var aðeins um hroka og heimsku, að maðurinn teldi sig geta stjórnað náttúrunni.

Ekki þá heimsku að þrjóskast við, fórna öllu í þeirri vonlausu baráttu.

 

Íslensk heilbrigðisyfirvöld, með fullum stuðningi íslenskra stjórnvalda, eru samt í þeirri stöðu að ætla sér að skrifa nýtt blað í sögu heimskunnar, að halda áfram til þrautar að rífast við staðreyndir, í stríði sem ekki er hægt að vinna.

Veiran er það bráðsmitandi að aðeins stífar samfélagslegar lokanir í 8-12 vikur geta útrýmt henni úr samfélaginu, ásamt lokun landamæra nema að undangenginni sóttkví.

Eitthvað sem við höfum reynt, vitum að virkar.

 

Allt annað er vonlaust, dauðadæmt kostnaðarsamt fálm sem engu skilar, nema síauknum kostnaði og erfiðleikumn við að reka þjóðfélagið.

Og því fyrr sem það er viðurkennt, því fyrr náum við okkur út úr þessum vanda.

 

Feisum það.

Eða leyfum veirunni að gossa.

Við erum jú fullbólusett, varin.

Kveðja að austan.

Kvíin kostar milljarða

Hópsýking einkennalausra.

 

Starfsemi raskast, starfsemi stöðvuð, fullfrískt fólk sent í einangrun eða sóttkví.

 

Hve lengi ætlum við að rífast við þann raunveruleik að omikron afbrigði kórónuveirunnar er komið til að vera, að núverandi aðgerðir virka lítt til að hindra útbreiðslu þess og þær valda langtum meiri skaða en hið meinlausa afbrigði veirunnar sem bólusetningar virðast ráða fullkomlega við.

Fyrir utan þá djúpu heimsku að hamla útbreiðslu veirunnar núna á þeim tímapunkti þar sem virkni örvunarbólusetningarinnar er í hámarki, en það er vitað núverandi bóluefni hafa tiltölulega skamman líftíma áður en þörf er á nýrri örvunarbólusetningu.

 

Hversu lengi á að lemja hausnum í stein??
Vita menn ekki að það er hausinn sem skaðast en ekki steinninn??

 

Það er mál að linni.

Kveðja að austan.

Sjúklingar og starfsmenn Vogs smitaðir

Hina óendanlega heimsku þarf að stöðva.

 

Við fáum fréttir frá Frakklandi þar sem forseti landsins notar þarlent orð yfir ekki svo skynsamt fólk, til að ögra þeim hluta þjóðarinnar sem heldur restinni, hinum stóra meirihluta í gíslingu.

Orð hans vöktu hörð viðbrögð. lýðræði nútímans er óvant því að tæpitungan sé notuð.

 

Rúv birti fréttainnskot frá vörn talsmanns forsetans, sem benti á þá einföldu staðreynd að fólkið sem afneitar alvarleik veirunnar, eða trúir upplýsingaróreiðunni um að bólusetningar séu í núinu hættulegri en sjálf veiran, og hann benti á þá augljósu staðreynd að frjáls ákvörðun þess, það er hinna óbólusettu, væri að sjúga lífsþróttinn úr heilbrigðiskerfinu.

Eitthvað svo augljóst, staðreynd sem þarf ekki að rífast við.

 

En þessi sama forheimska er undirstaða þessa spálíkans frá Landspítalanum.

Að fjöldi óbólusettra á gjörgæslu fari úr 9 af 10, í 27 af 30.

 

Sem á að réttlæta viðvarandi samfélagslegar lokanir, að allt eðlilegt mannlíf sé fryst, vegna afbrigðis kóvid veirunnar sem í versta falli veldur kvefeinkennum hjá bólusettu fólki.

Þetta er eins og við eigum að stöðva alla umferð vegna þess að heimskt fólk kasti sér fyrir umferð bíla eftir að hafa séð slíka áskorun á Tik Tok.

 

Staðreyndir liggja fyrir.

Omikron afbrigði kóvid veirunnar ógnar ekki bólusettu fólki.

Þorri þjóðarinnar mun ekki leggjast inná gjörgæslu vegna hennar.

 

Samt á allt að vera í höftum.

Samt er kynnt undir ofsahræðslu meðal þjóðarinnar.

 

Fólk bendir hvort á annað og spyr; Ert þú smitaður??

Eins og það fatti ekki að sá sem bendir getur verið einkennalaus smitberi, og það þurfi virkilega að leita í minni sínu að leita að kvefi sem gerði það jafn illa veikt og smit omikron veirunnar er hjá bólusettum.

 

Uppskeran er múgæsing.

Grunsemdaraugu er augntillitið sem fólk beinir að næsta manni.

 

Sem reyndar er bólusettur.

Faraldurinn er enginn.

Aðeins hræðsluáróðurinn að vísa í það prómil sem kaus að þiggja ekki bólusetningu.

 

Munurinn á okkur og Frökkum er kannski sá, að þar talar forsetinn mannmál.

Hér er aðeins mjálmað.

Það er þegar hlustað er á ráðafólk þjóðarinnar, því miður kunna fleiri að mjálma en Guðni forseti.

 

Sjúkleikinn er valdabaráttan, kjarabaráttan sem lesa má um í þessari frétt.

Örprómil hinna óbólusetta veldur uppnámi, jafnvel neyðarástandi á Landsspítalanum.

Og hjúkrunarfræðingar vilja hærri grunnlaun, svo þeir standi hinar tvöföldu vaktir kórónuálagsins.

Neyðin er ekki stærri en það að hún er liður í kjarabaráttu.

 

Læknar eru ofurlaunastétt.

Við viljum það líka segja hjúkrunarfræðingar.

Og hinir óbólusettu eru vopn þeirra, án þeirra væri lítið að gera, en tvöföldun launa vegna álags af þeirra völdum, er ekki nóg.

 

Ekki nóg.

Ekki nóg sögðu fjármálasnillingar útrásarhagkerfisins.

Ekki nóg, ekki nóg.

 

Einhvern veginn finnst mér að við séum á rangri leið í dag.

Alveg eins og mér fannst og finnst að almennur hagvöxtur eigi ekki að vera röksemd til að hækka laun æðstu stjórnenda fjármálafyrirtækja, sem og annarra fyrirtækja.

Hvað þá þegar fjármálagambl sé röksemd fyrir ofurbónusum, ofurlaunum eða öðru sem engin forsenda er fyrir miðað við vöxt og grósku hins almanna efnahagskerfis.

 

Svo kom veiran.

Svo kom bólusetning.

Sem virkar, um það er ekki deilt.

 

Samt hlustum við á sönginn, ekki nóg, ekki nóg.

Og við trúum honum.

 

Eins og við vitum ekki að Ekki nóg er aldrei nóg.

Jafnvel heimsfaraldur fær því ekki breytt.

 

Veiran ógnar okkur ekki.

Landsspítalinn er undirfjármagnaður.

Afleiðingin er starfsumhverfi sem fælir fólk frá störfum.

 

Samt á allt að vera í hershöndum.

Þjóðfélagið lamað vegna sóttkvíar eða einangrun fólks sem getur ekki rifjað upp meint veikindi sín þó því væri borgað fyrir það.

Flöskuhálsinn er Landsspítalinn, sem hefur sogið til sín allt fjármagn niðurskurðar frjálshyggju undanfarinna ára, niðurskurðar og miðstýringar sem Steingrímur Joð Sigfússon tók að sér í þágu erlendra hrægamma, skorinn inn að beini ræður hann ekki við álag meðal ára, aukning þar um er neyðarástand.

 

Eitthvað sem gengur ekki upp á tímum heimsfaraldurs.

Og reyndar gengur aldrei upp, því að baki meðaltali er eitthvað óvænt sem reynir á kerfi sem er hannað til að sinna ekki toppum eða álagi.

 

En guð minn góður, er það skýring þess að meinlaust kvef megi ekki ganga yfir þjóðfélagið án þess að fólk sé tekið í gíslingu, að ótti sé látinn stjórna daglegum samskiptum fólks, að starfsemi fyrirtækja hökti, og ef heimskan nær að bólgna út, að það sem hökti stöðvist vegna sóttkvíar eða einangrun starfsfólks.

Einkennalaust, eða í besta falli kvefað.

Og lúðrablásarar heimskunnar er krafan um aukið fjármagn í botnlaust hít miðstýringar Landsspítalans, eða rökin um hjúkrunarfólk sem segist vera þreytt eða jafnvel útbrunnið vegna álags, finni samt ekki til þreytu eða kulnunareinkenna ef það fái aðeins sömu laun og ofurlaunastétt lækna.

 

Þetta er eitthvað svo sjúkt.

Og sýkin er ekki vírus sem kenndur er við kórónu.

Hvað þá að blóraböggullinn sé fólkið sem tók þá meðvituðu frjálsu ákvörðun að láta ekki bólusetja sig.

 

Vísindin gáfu okkur lausn sem við köllum bólusetningu.

Lausn sem virkar.

Sem þýðir að veiran er ekki lengur skálkaskjól.

Ekki lengur skálkaskjól þess að þjóðin sé í höftum á meðan hagsmunaöfl nýta hana sem tæki í þágu markmiða sinna.

Og í þágu hafta og hagsmuna er heimskan aldrei rök.

 

Þjóðin lét bólusetja sig.

Hún á því að uppskera afnám hafta, sóttkvía og einangrunar.

 

Aðeins annarlegir hagsmunir mæla gegn því.

Kveðja að austan.

Búast við hátt í 30 sjúklingum á gjörgæslu