Hvað er maðurinn eigilega að segja???

Var byssu beint að höfði Svavars allan tímann?  Hvað á maður að halda þegar maður les þessi orð Steingríms.

„Þessari lagaóvissu, sem stofan bendir á, var haldið fram af hálfu Íslands allan tímann og það var reynt alveg til hinstu stundar, en fékk aldrei neinar undirtektir,“ segir Steingrímur um skýrslu Mischon.

Þú hefur rökstuddan grun að andstæðingur þinn hafi rangt fyrir sér og kröfur hans stangist á við gildandi lög og reglur, og þá hefur hann, aðilinn sem krefst þess að fá að hirða aleigu þína, sjálfsvald yfir hvort lög gilda eða ekki.  Er við komin í flashback til miðalda þar sem berserkir gengu um og hirtu eigur fólks með þeim orðum að sá sterki hefur alltaf rétt fyrir sér.  Er 1.000 ára réttarþróun öll til einskis.  Til hvers erum við þá að hafa dómstóla eða réttarkerfi yfir höfuð.  Eðli þess er að annaðhvort gildir það alltaf eða ekki.

Steingrími finnst það bara sjálfsagt að á rökstudda lagaóvissu sé ekki reynt.  Og úr henni skorið.  Er hægt að kalla þetta samninganefnd, sem leggur frá sér öll rök, ef andstæðingurinn vill ekki ræða þau.  Jafnvel mútuþegar reyna að breiða yfir glæp sinn með því að þykjast vinna að hagsmunum þess sem þeir sviku. 

En þetta er ekki nóg.  Nú fyrst bætir Steingrímur í eða hvernig á að túlka þessi orð hans????

Hann segir það hafa verið ákvörðun samninganefndar ríkisins í Icesave-málinu, að ekki var keypt frekari þjónusta frá Mischon. Nefndin hafi haft mikið frelsi til að velja og hafna ráðgjöf, en enginn hörgull hafi verið á þeim sem vildu selja ráðgjöf sína dýru verði.

Stærsta klúður Íslandssögunnar og það er í sjálfsvaldi örfárra einstaklinga, svokallaðra samningamanna ríkisins að ákveða hvernig málstað Íslands er framfylgt.  Taki þeir ranga ákvörðun eða geri bara eitthvað, spili golf eða sitji á barnum, þá er valdið þeirra.  Hvað málflutningur er þetta eiginlega?  Hvernig er slík vanhæfni látin viðgangast???  Steiktist allt vit úr fólki í grillveislum lánaveislunnar??? 

Af hverju er Steingrímur ekki kurteislega beðinn að segja af sér fyrst hann líður svona vinnubrögð og réttlætir þau?

Hvernig getur maðurinn komist upp með að það sé bara eins og hver annar kostnaður að leita sér álits þeirra sem eru ekki sammála andstæðingum okkar?  Til dæmis væru svartir í Bandaríkjunum ennþá borðandi á sér veitingahúsum eða sitjandi aftast í strætisvögnum ef talsmenn þeirra hefðu heitið Svavar og Steingrímur.  Nógu margir tóku undir rök hvítra öfgamanna að svona ættu hlutirnir að vera og margar lögsóknir töpuðust í upphafi því ekki var dæmt eftir réttum lögum og farið eftir ákvæðum stjórnarskrá Bandaríkjanna.  En af hverju vannst baráttan að lokum.  Jú vegna þess að talsmenn réttindabaráttu svartra leituðu til þeirra lögmanna sem sögðu að andstæðingarnir höfðu rangt fyrir sér og sjónarmið þeirra stönguðust við lög.  Og lögmennirnir trúðu á málstaðinn, þeir voru ekki sammála andstæðingnum.  Og þeir börðust þar til sigur vannst.

Þetta er sjónamið sigurvegarans að trúa á málstað sinn og gera það sem gera þurfti til að réttlætið sigraði.  Eða gera allt það sem Svavar og Steingrímur gerðu ekki.

Og hví er þeim leyft að tapa málinu baráttulaust?????  Skilja menn ekki að framtíð barna okkar er í húfi.  Og ekki vitna í nauðungina og það að við verðum útskúfuð úr alþjóðlegu samfélagi ef við leitum réttlætis.  Það búa ekki illmenni og villimenn í Evrópu.  Evrópa er réttarríki og útskúfar ekki þeim þjóðum sem leita réttar síns og krefst þess að alþjóðalög gildi.

Af hverju var ekki Stefán Már Stefánsson lagaprófessor í nefndinni.  Eða flottasti lögfræðingur landsins, Herdís Þorgeirsdóttir lagaprófessor, eða Jón Steinar Gunnarsson, hæstaréttardómari og málafylgjumaður.  Þetta fólk hefði hlegið ef málefnalegum rökum hefði verið svarað á þann veg að þær kæmu málinu ekki við  Svona fólk hefði aldrei látið af skyldu sinni gagnvart þjóðinni með þeim orðum að málflutningur þeirra fékk aldrei neinar undirtektir, og þetta fólk hefði leitað til færustu lagasérfræðinga sem kunna lög og skilja muninn á lögum og tilskipunum og markmiðum þeirra.  Þó það væru markmið tilskipanar ESB um innlánstryggingar að allir fengju alltaf greitt lágmarksábyrgð, þá var þeim markmiðum ekki fylgt eftir í tilskipuninni sjálfri eða öðrum lögum sambandsins.

Það er glæpur gegn þjóðinni að alvöru fólk var ekki fengið til að halda utan um málsvörn Íslands og það er glæpur gegn þjóðinni að framhjá mikilvægum gögnum og upplýsingum var litið, jafnvel stungið undir stól.

Það er glæpur gegn þjóðinni að fjölmiðlar láti það viðgangast að liðleskjur sjái um varnir Íslands.  Fjölmiðlar eru ekki bara ægivald eiganda, á fjölmiðlum vinnur fólk með samvisku, fólk sem á vini og ættingja sem mun þjást ef ICEsave nauðungin verður að veruleika.  Það er tími til kominn að þetta fólk vakni og starfi í þágu íslensku þjóðarinnar, ekki þröngra hagsmuna auðmann og Leppa þeirra í stjórnkerfinu. 

Þegar auðmennirnir settu þjóð sína á hausinn í haust án þess að stjórnkerfið eða fjölmiðlar berðust gegn því að neinum mætti, þá var sagt; Ekki meir, Ekki meir.

Þetta Ekki meir, er að gerast í dag fyrir framan nefið á okkur.  Með þegjandi samþykki ráðanda stétta þjóðfélagsins.  Stétta sem vita eins og er að þær munu ekki bera byrðarnar, heldur breiðu bök þjóðarinnar; aldraðir, sjúkir, barnafólk og lágtekjufólk.  Þunginn lendir alltaf á breiðu bökunum en þar er minnst að taka.  Og ICEsave mun taka of mikið af því litla sem eftir er.  ICesave mun skapa neyð hjá þessum hópum.

Aðeins mannvonska getur látið þetta Ekki meir viðgangast.  Höfum það hugfast að við berum öll ábyrgð, líka á hvort öðru, og þeim sem veikastir eru fyrir. 

Íslenska þjóðin á rétt á sanngjarni málsmeðferð og hún á þann rétt að hún verði ekki dæmd til ánauðar vegna skulda annarra.  Hún á þann rétt að lög og alþjóðasamningar gildi gagnvart henni eins og öðrum þjóðum.  Gleymum því aldrei að réttarríkið er leið mannsins til að hemja villimennskuna. 

Engin niðurstaða í ICEsave deilunni er réttlát nema réttbærir dómstólar fjalli um hana og kveði úr um skyldur og ábyrgð þjóðarinnar.  Og dæmist henni byrðar vegna skulda einkaaðila, þá eiga þær byrðar að vera réttlátar og í samræmi við alþjóðalög.

Ekkert af þessu er til staðar í núverandi ICesave samkomulagi.  Þar ræður villimennskan för.

Og þeir sem mæla slíku bót, eiga ekki að starfa fyrir íslensku þjóðina.

Kveðja að austan.

 

 

 

 

 

 

 

Þingmenn fái að sjá öll Icesave gögn - líka þau hálfkláruðu