ICEsave skrípaleikurinn í boði Björgólfs heldur áfram.

 

Keypt fólk fer hamförum þessa daganna í leiksýningu sem hönnuð var af færustu hönnuðum landsins, þeim sömu og hönnuðu ímyndina um fátæka drenginn sem fór út í heim, og kom eftir miklar mannraunir, sem má lesa um í ævisögu Jóakims Aðalandar, með gull í sekkjum og græna skóga til að bjóða.

Þegar á bak við grímuna var harðsvíraður kaupsýslumaður sem varð ríkur af samstarfi við spillingu og glæpamenn.

 

Ímyndasmíðin tókst fullkomlega, þess vegna var þeim falið að hanna atburðarrás sem enda með Já-i þann níunda.  Líklegast fékk auðmaðurinn þá til verksins þegar ljóst var að Ólafur sagði Nei.  Það er eina skýring þess að stofnuð var ný samninganefnd nokkrum dögum eftir synjun Ólafs og mörgum dögum áður en þjóðin sagði sitt Nei.  Og það skýrir veru Lárusar Blöndal í þeirri nefnd, mikill er máttur peninganna.

Og hönnuð var atburðarrás sem átti að takast á við næsta synjun Ólafs því hún var eins örugg eins og að blóm springa út á vori.

Og núna átti að taka þjóðaratkvæðið.

 

Það eru svo mörg brot sem falla inní þessa hönnuðu atburðarrás.

Vel klæddur málaliði mætti brosandi í Silfrið núna áðan og laug.  Hann var ekki að minnast á að þessi besti samningur sem í boði er, má gjaldfella um leið og minnstu vanskil verða á lánum ríkisins eða ríkisfyrirtækja.

Hann var ekki að minnast á að Landsbankinn var með lögbundnar skyldutryggingar í London og því væru bretar að innheimta kostnað sem var þeirra samkvæmt tryggingum Landsbankans þar.

Það eina sem hann sagði var að samningurinn væri 62 milljarðar.  En gat þess ekki að hann samdi ekki um þessa 62 milljarða, heldur skrifaði hann upp á skuldabréf upp á 674 milljarða, og það er ekki í hendi sem kemur á móti. 

Á þessari stundu veit enginn hvað kemur á móti en ljóst er að fordæmalaust ástand ríkir í efnahag Vesturlanda, þau sjá ekki fram úr skuldum sínum, geta ekki endurfjármagnað banka sína eða hallann á ríkissjóðum, ekki þegar Asía dregur sig út úr kaupum á verðlausum pappírsbréfum.

Óvissa er það eina sem lýsir ástandinu.

 

Kjarafarsinn er annar þáttur hinnar skipulögðu atlögu að þjóðinni.

Það eru engar forsendur fyrir kjarasamningum nema þjóðin taki á sig skuldir Björgólfs er sagt.

Til að gera farsann ekki alveg svona augljósan, þá var búið til annað debat, átökin um kvótakerfið.  Eins og það komi kjarasamningum eitthvað við í fyrsta lagi og í öðru lagi þá stendur ekki til að breyta kvótakerfinu.

 

Kvótakerfið er undirstaða bankakerfisins, þar eru innlendu veðin sem greiða, ennþá allavega.  Alþjóðagjaldeyrissjóðurinn, sem fjarstýrir ríkisstjórninni, myndi aldrei taka í mál breytingar í þá átt að færa kvótann í hendurnar á þjóðinni, slíkt er eins og páfinn færi með faðirvorið á afturábak.

Í kvöld eða morgun gufar þessi ásteytingarsteinn upp, og eftir stendur, já skrítið, "Forsendur nýrra kjarasamninga er að þjóðin samþykki ICEsave".

Eins og leikritið hljóðaði upp á allan tímann.

Öll tímasetning og annað, allt miðaði við að áróðursherferðin smylli saman núna vikuna fyrir kosningar.  

Allir leggjast á árarnar, háskólinn, fjölmiðlarnir, ESB trúboðið, ásamt atvinnurekendum og launþegasamtökunum.

 

Og rökin, að tíu milljarða króna lánsloforð frá ESB, sem stendur til boða að einni ástæðu og hún er sú að fá þjóðina til að samþykkja ICEsave, á að starta þvílíkri gósentíð að annað hefur ekki sést.

Þetta eru rökin.

Hrunið, þúsundir milljarðar tapaðar hjá erlendum fjármálastofnunum, neyðarlögin sem brutu gegn rétti þeirra við gjaldþrot, hálf galdþrota innlend fyrirtæki sem ekki hræða lánar miðað við núverandi fjárhag, allt þetta skiptir engu máli.

Lánamarkaðir opnast ef við samþykkjum ICEsave.  Sönnunin eru þessir tíu milljarðar sem ESB lofar okkur.

 

Þetta er svo ömurleg aðför að heilbrigðri skynsemi fólks, að það hálfa væri nóg.  En með nógu miklum moðreyk og öfugmælarökum er treyst á að blekkingarnar haldi fram yfir þann níunda.

Samt blasa mótsagnirnar alls staðar við.  Ekki bara með fáráð þess að þjóð sem fór á hausinn, og lét þúsundir milljarða falla á kröfuhafa sína, fái lánað ef hún bætir á sig lánum.  Heldur má nefna fullyrðingarnar um að ICEsave sé forsenda þess að hægt sé að afnema gjaldeyrishöftin.

Samt er búið að festa þessi höft í sessi næstu 4 árin, og þau eru forsenda þess að ICEsave endi ekki í hundruðum milljörðum.

Annað er öfugmælin um að kjarabætur fáist ekki nema ef ICEsave verði samþykkt.  Til að það sé minnsti möguleiki á að halda genginu stöðugu, þá má einmitt ekki hækka launin til að mæta hækkandi verðlagi.  Eltingarleikur launa og verðlags kallast gengissig eða gengisfall og mun verða notuð sem svipa á meðan ICEsave skuldabréfið tifar.

Þriðja eru grátandi sveitarstjórnarmenn sem rétt náðu að verja sjúkrahúsaþjónustu sína, við síðustu fjárlagagerð.  Hvernig halda þeir að ICEsave verði greitt???

Með fjallagrösum????

Eða niðurskurði á grunnþjónustu, þar sem landsbyggðinni verður misþyrmt fyrst, því þar er minnsta mótstaðan.  

Svik, svik, svik eru orðin sem ná yfir framgöngu þessa fólks.  Mér er til efs að einhver hafi keypt það, flokksblindan er þvílík að hún dregur þetta fólk út svikaforaðið.

 

Já Ísland í dag, er landið þar sem auðmaður keypti sér leiksýningu, aðalleikararnir kosta að vísu skildinginn, en ávinningurinn er mikill á móti.  Um það má lesa í pistli mínum frá því í morgun. Björgólfsfeðgar eru ekki skúrkar málsins.

Við verðum að fara að kveikja á perunni hvað öfl standa að baki ICEsave, og hvað rekur þau áfram.

Við vorum seld sem þjóð af fólkinu sem við treystum. 

Sú sala verður fullnustuð þann níunda næstkomandi ef skoðanakannanir ganga eftir.

Því við verjum ekki hendur okkar.  

Það eru ekki gæði leiksýningarinnar sem skýra Já-ið.  Það er kraftleysi okkar sem þjóðar að stíga fram og verja okkur.

Við erum eins og dýrin í Litlu gulu hænunni, við treystum á að aðrir sjái um vörnina fyrir okkur, við látum okkar nægja að nöldra, mörg ætla að segja Nei.  

En það er engin stemming fyrir Nei-inu, þar sem er stemming, þar er hún kostuð af auðmönnum.

 

Mönnunum sem rændu okkur, og ætla núna að gera okkur að þrælum sínum með aðstoð keyptra manna.

Og án stemmingar er vonlaust að sigra þessa baráttu, það eru það margir óákveðnir því það er svo ríkt í okkur að fylgja valdinu.  Fólk hreinlega trúir því ekki að það sé verið að plata það með lygum og fjarstæðum.

Það heyrir ekki í Nei-inu því Nei-ið heyrir ekki í sjálfum sér.

Á ögurstundu verður fólk að stíga fram og láta Nei-ið sitt hljóma sem víðast, allsstaðar þar sem við er komið.

Mæta á feisið, mæta á bloggið, mæta á fundi, skamma fjölmiðlamenn og stjórnmálamenn hvar sem því verður við komið.

Því það er of seint að mótmæla eftir níunda.

 

Eftir þann örlagadag er aðeins þrælauppreisn að hætti Spartakusar í boði.

Og hún vinnst ekki úr hægindastól letinnar.

Kveðja að austan. 

 

 

 

 

 

 

 

Boðaðir á fund sjávarútvegsráðherra

Athugasemdir

[Anna Sigríður Guðmundsdóttir, 4.4.2011 kl. 08:27]

Ómar. Takk fyrir skýra og góða samantekt á leikriti fáránleikans sem fjármagnað er með ránspeningum embættis-toppa og bankaræningja.

 Sem betur fer hafa skrautfjaðrir spillingarinnar stigið fram í rándýrum auglýsingum í dagblöðum og netheimum og afhjúpað þar með óheilindin sem þau standa fyrir í auglýsingunum. Skattgreiðendur t.d. sveltandi, atvinnulaust, sjúkt og gamalt fólk sem hefur verið rænt, fær að sjálfsögðu að borga áróðurinn!

 Hafi ég verið í vafa hvað ég ætti að kjósa fyrir þennan skrípaleik auðmanna-mútuleikaranna, þá er sá vafi farinn veg allrar veraldar.

 Það kórónaði svo bullið þegar Lee B. reyndi á mjög hikandi hátt (skiljanlega) að færa rök fyrir sinni vinnu í gær hjá Agli Helgasyni. Hann reyndi að snúa sannleikanum á haus í gær á þann hátt að höfða til þess að við værum að greiða almenningi þessa Icesave-peninga, sem er auðvitað bara lélegur brandari í ljósi reynslunnar af svikastarfsemi og ráni vestrænnar banka-mafíu ræningjastarfsemi.

 Það væri nær hjá honum Lee B. að kynna fyrir okkur nýjar og árangursríkara aðgerðir í átt að því að bjarga almenningi í Evrópu frá bankamafíunni? Það verður að sjálfsögðu að núlla allar peningaupphæðir sem byggðar voru á engu öðru en falsi og ráni misviturra manna innan bankakerfis Evrópu og vestrinu öllu! Og skaðabætur eiga bankarnir eftir að borga fólki sem var blekkt og rænt!

 Almenningur og heiðarlegir skattgreiðendur eiga ekki að borga fyrir bankaræningjana og embættismanna-klíkurnar víðsvegar í Evrópu og USA. Það er þjóðaratkvæðagreiðsla þjóðarinnar 9 apríl en ekki þjóðaratkvæðagreiðsla yfirborgaðra auðmanna og áhangendur bankaræningjanna. Þeir geta sparað almenningi að borga áróðurs-auglýsingarnar í viðbót við annað svika-svindl!

 Svo mörg eru mín orð um þennan fáránleikaraskap!!!

 M.b.kv.

[Ómar Geirsson, 4.4.2011 kl. 18:50]

Úff Anna, ég á sterka pistla á góðri stundu, en þessi lesning þín var mögnuð.

Sönn, heiðarleg, réttlát.

Hef engu við að bæta og bíð þig velkomna í okkar raðir.

Nei-ið mitt er á sömu forsendum og þú nefnir svo vel.

Kveðja að austan.

[Anna Sigríður Guðmundsdóttir, 6.4.2011 kl. 09:48]

Takk fyrir Ómar.

 M.b.kv.