Eldar loga.

 

En mikið vildi ég að bál hefði kviknað vegna neyð heimilanna en ekki mannlegs hégóma.

 

En gæfa þjóðarinnar, í ógæfu hennar, er að Samfylkingin leiðtogalaus, Jóhanna er aðeins fis í höndum manna eins og Hrannars B. sem leggja orð og stefnu í munn.

Getuleysi Jóhönnu er beittasta stjórnarandstaðan í dag.

Og henni tókst að persónugera alla formenn ASÍ í einni persónu, Gylfa Arnbjörnsson.

Og kveikti við það bál hégómans sem brennur heitast allra bála.

 

Verði henni að góðu.

Kveðja að austan.

Eldar loga milli ASÍ og ríkisstjórnar

Hvernig getur nokkur maður kosið böðla sína.

 

Eða sem er með öllu óskiljanlegt, boðið sig fram til böðulsverkanna fyrir hið skítuga fjármagn??

 

Það er eins og gerst hafi í gær, þó það séu núna þrjú ár síðan, að Steingrímur Joð Sigfússon skipulagði beina aðför að tilveru fólks út á landi með því að ráðast á sjúkrahúsþjónustu landsbyggðarinnar en slík þjónusta er nauðsynleg í nútíma samfélagi.

Það tók áratugi að byggja upp þessa þjónustu en það áratuga starf ætlaði hin myrka frjálshyggja að brjóta niður með einu pennastriki undir yfirskyni sparnaðar sem átti sér ekki neina stoð í raunveruleikanum.

Mér er ennþá minnisstæð ræðan sem aldraður höfðingi, gamall sósíalisti og félagshyggjumaður, dyggur stuðningsmaður þeirra félaga, Lúðvíks Jósefssonar og Bjarna Þórðarsonar, hélt á borgarafundi þar sem aðförin að Fjórðungssjúkrahús Neskaupsstaðar var í brennidepli.

Titrandi röddu en í meitluðum orðum lýsti hann ástandinu eins og það var á sjötta áratug síðustu aldar þegar þörfin var mikil en þjónustan engin og hvernig af vanefndum en miklum dugnaði og manndómi Fjórðungssjúkrahúsið hefði verð byggt upp af mönnum sem áttu fátt annað en hugsjónir um betra mannlíf, betra samfélag.

"Það tók langan tíma að byggja upp okkar myndarlega sjúkrahús, en skammsýnir menn geta eyðilagt það með einni ákvörðun".  

 

Þessir skammsýnu menn eru þeir sem tóku við kyndli félagshyggjunnar af þeim Lúðvík og Bjarna og sinna böðulsverkum fyrir kröfuhafa gömlu bankanna.

Fólkið í heimabyggð minni tók höndum saman og myndaði hring um sjúkrahúsið okkar, þannig tókst að verja það.  

En hluti af varnarliðinu hélt svo suður á flokksfund þeirra flokka sem stóðu að aðförinni að grunnþjónustu byggðanna, og klappaði þar fyrir foringjunum.

Það er ekki nóg að það kjósi böðlana, það hjálpar þeim við böðulsverkin.

 

Arfur hinna gömlu félagshyggjumanna sem trúðu því að hinn venjulegi alþýðumaður ætti rétt til sömu þjónustu og betri borgararnir, er flokkur sem afhenti amerískum vogunarsjóðum fjármálakerfi landsins á silfurfati.

Amerískir vogunarsjóðir eru ekki velferðarstofnanir, þeir sjúga fjármagn úr hagkerfum og skeyta engu um þó innviðir samfélag séu rústir einar á eftir.

Það tókst að stöðva ómennskuna haustið 2009 en aðeins í stuttan tíma, óhemju fjármunir eiga eftir að leita úr hagkerfinu í vasa fjármagnseiganda.  

Það er aðeins beðið eftir kosningunum áður en gildran er látin smella.

 

Hvað verður um samfélag okkar þegar þar að kemur er spurning, en það verður ekkert gott.

Fólki sem er sama um framtíðina, um mennskuna, kaus í þessari póstkosningu VG, kaus yfirböðulinn og gaf samborgurum sínum fingurinn.

Það talar um kvenfrelsi á meðan landið er selt.  

Það talar ekki um lífið eða framtíð þess, enda væri það ekki lengur starfandi innan VinstrGrænna eftir aðförina að sjúkrahúsum kjördæmisins ef svo væri.

Það býður sig sjálfviljugt fram í bölastarfið fyrir vogunarsjóðina.

 

Verði því að góðu.

En við verðum ekki að kjósa það.

Því frjáls maður kýs ekki yfir sig helsi, eymd, þjáningar.

 

Eða hvað??

Kveðja að austan.

 

 

 

 

Talið í dag hjá VG í NA-kjördæmi

Faglegt vændi prófessor í félagsvísindadeild.

 

Náði nýjum lægðum í kvöldfréttatíma sjónvarpsins í kvöld. 

Í þágu Evrópuáróðurs Samfylkingarinnar og ríkisútvarpsins.

 

Fréttamaður sjónvarpsins, Aðalbjörn Sigurðsson las upp frétt um kaupmáttarþróun launatekna á Íslandi á árabilinu 2007-2010 þar sem kaupmáttur hér hafði rýrnað um rúm 20%.

Vitnað var í Stefán Ólafsson prófessor í félagsvísindum við Háskóla Íslands þar sem hann fullyrti að þessi kaupmáttarrýrnun væri falli krónunnar að kenna og einna helst mátti skilja á honum að þessi meinta fall hefði orðið svo hægt væri að færa fjármuni frá heimilum til útflutningsatvinnuveganna sem högnuðust óheyrilega á sama tíma.

Og þar með höfum við það, þetta er allt krónunni að kenna.  

Ef við höfðum haft evru þá hefðu heimilin haldið kaupmætti sínum.

 

Ég er ekki að tala um eitthvað erkifífl sem fréttastofan dró uppúr áfengisdauða á einhverri búllu í Reykjavík, þetta er prófessor við Háskóla Íslands sem slær þessu fram.

Persónulega hélt ég að kaupmáttarrýrnun hefði orðið vegna hruns fjármálakerfisins sem og hitt að á árunum fyrir Hrun var gengi krónunnar alltof hátt skráð vegna hávaxtastefnu Seðlabankans sem leiddi til mikils viðskiptahalla og þar með falskra lífskjara.  

Hallinn á viðskiptum við útlönd árið 2007 var rétt ríflega 100 milljarðar, en afgangur af vöruskiptum árið 2009 var rúmlega sú upphæð, eða viðsnúningur um 200 milljarðar.  Slíkur viðsnúningur varð vegna kaupmáttarrýrnunar alls hagkerfisins, og hann dugði ekki til, því viðskiptajöfnuðurinn var í mínus það ár.  

 

Fyrir Hrun var kaupmætti haldið uppi með skuldasöfnun í útlöndum, eftir Hrun þurfti að borga skuldir.  Slíkt leiðir alltaf til rýrnunar á kaupmætti ráðstöfunartekna, óháð því hver gjaldmiðillinn er. 

Þetta átti sér til dæmis stað í Finnlandi eftir hrun útflutningsviðskipta landsins sem drógust saman um tæp 40% eftir hrun Sovétríkjanna og Finnar notuðu ekki íslensku krónuna. 

Sama átti sér stað í Svíþjóð eftir bankahrunið þar í landi 1991 sem var ekki nándar eins alvarlegt og hér en samt féll kaupmáttur þar um 20% vegna gengisfalls sænsku krónunnar.  Já, það var vegna gengisfalls sænsku krónunnar en ekki þeirrar íslensku.

 

Ef kenning Stefáns Ólafssonar væri rétt, að kaupmáttarskerðingin hérna væri ekki vegna hrun fjármálakerfisins heldur vegna íslensku krónunnar  

" En ástæðan fyrir áðurnefndri kaupmáttarrýrnun liggur að mestu í gengisfalli krónunnar. „Tekjur heimilanna eru í raun fluttar beint í einni svipan til útflutningsatvinnuveganna. Og þar eykst hagnaður og batnar afkoma,“". (tekið af vef Ruv)

þá  hefði kaupmáttur ekki dregist saman í Svíþjóð og Finnlandi á árunum uppúr 1991 þegar þessi lönd lentu í sínum efnahagsáföllum.

 

Einnig þarf að skrifa hagsögu Íslands upp á nýtt en kaupmáttur drógst mjög saman hér á landi eftir síldarhrunið í lok sjöunda áratugarins síðustu aldar.  Þá lækkuðu útflutningstekjur um  40% með tilheyrandi kaupmáttarrýrnun og sú kaupmáttarrýrnun hefur alltaf verið útskýrð með þessu hruni síldarstofnsins.  Og þá út frá því röksamhengi að ef tekjur dragast saman, þá dregst kaupmáttur líka saman í kjölfarið.  Ef þjóðarbúið gat keypt inn fyrir 100 (tilbúin tala) milljón dollara fyrir síldahrunið, en aðeins fyrir um 60 milljónir dollara árið eftir síldarhrunið, þá töldu hagfræðingar nokkuð ljóst að það keypti inn fyrir 60 milljónir, ekki 100 milljónir og þessi samdráttur væri síldarhruninu að kenna. 

En samkvæmt Stefáni er það rangt, orsökin væri krónan og gengisfalli hennar, líklegast vegna þess að tekjur heimilanna hafi í einni svipan verið fluttar frá heimilunum til útflutningsatvinnuveganna. 

 

Kannski myndi einhver evruvitringurinn segja að Stefáni hafi meint, þó hann segði það ekki í fréttinni, að gengið hafi fallið vegna þess að við vorum með krónu sem væri svo lítil mynt.  Og það hafi fallið í Svíþjóð vegna þess að sænska krónan var svo lítil.  

Það hefði ekki gerst ef Svíar hefðu haft evruna.

En hvernig gátu Svíar eytt sömu upphæð ef tekjur þjóðarbúsins drógust saman, bara ef þeir hefðu haft evruna.  Og hvernig gat evran unnið upp tekjutap finnska útflutningsatvinnuveganna???

Geta þjóðir sem sagt eytt meir en þær afla ef þær hafa evru???

Gildir sem sagt ekki samhengið milli efnahagsáfalla og kaupmáttarrýrnunar almennings ef viðkomandi hagkerfi nota aðra mynt en þeirra eigin eða eru hluti af stórri mynt??

 

En af hverju drógst kaupmáttur saman í Bandaríkjunum á kreppuárunum þegar framleiðslan minnkaði þar um 25-30%???  Af hverju gátu bandarísk heimili ekki látið eins og ekkert væri fyrst kaupmáttur tengist ekki tekjum og framleiðslu heldur gjaldmiðli??

Kannski mun prófessor Stefán Ólafsson útskýra það í næstu frétt. 

Það er jú alltaf möguleiki fyrir hann að gera sig af meira fífli heldur en honum tókst í dag.  

 

En stóra spurningin er af hverju er svona einhliða áróður, eða hreinlega lygi og blekkingar, því það stóð ekki steinn yfir steini í röksemdarfærslu Stefáns í ýtarlegu viðtali við hann í Speglinum, látinn viðgangast í ríkisfjölmiðli landsins.

Af hverju krefst sá hluti stjórnarandstöðunnar sem þykist vera á móti ESB ekki opinberar rannsóknar á fréttaflutninginum með því markmið að athuga hvort fréttamanninum hafi verið mútað til ljúga svona að landsmönnum.

Það gilda lög í landinu sem banna svona athæfi???

 

Þetta vekur upp þá stóru spurningu hvort það sé nokkur alvara á bak við hina meintu andstöðu viðkomandi þingmanna við ESB.  Hún sé aðeins þægileg leið til að fá atkvæði, en byggist ekki á neinni sannfæringu.

Það er fróðlegt að fá svar við þessari spurningu.

 

Ég hins vegar ef ég hef tíma til, ætla að kafa dýpra í viðtalið við Stefán, í bloggpistli eða pistlum eftir helgi og fjalla frekar um hið faglega vændi hans.

Það skiptir svo sem litlu máli, það nenna fáir að lesa svoleiðis pistla, en núna er framtíð þjóðarinnar í húfi, erlent vald hefur keypt upp akademískan heiður háskóla Íslands og því verður hver að gera það sem hann getur til að verjast yfirgangi þess. 

Mútuféð sigrar ef enginn snýst til varnar.  

 

Munum að það eru svona dæmi sem afhjúpa raunverulegar skoðanir fólks.

Sá sem nöldrar bara og snýst ekki til varnar, honum er alveg sama innst inni.

 

Við sjáum það svo á Alþingi næstu daga hverjum er það ekki.

Ég spái að þeir séu sárafáir ef þá nokkrir.

 

En það kemur í ljós.

Kveðja að austan.

 

 

 

 

 

Hvenær verður ríkisstjórn Ísland sakfelld fyrir þrælahald?

 

Hér tíðkast það í ennþá stærra mæli, heil kynslóð dæmd í ævarandi þrældóm verðtryggingarinnar. 

 

"Ég er enn með túpusjónvarp, þar sem ég fæ samviskubit í hvert sinn sem ég horfi á auglýsingu með mynd af flatskjársjónvarpi. Orð Jóhönnu Sig. um að skuldavanda heimilanna megi rekja til kaupa þeirra á flatskrársjónvörpum glymja alltaf í huga mínum. Ekki verður samviskubitið minna þegar ég horfi á höfuðstólinn á verðtryggða námsláninu og fasteignaláninu mínu. Ákvörðun mín um að ganga menntaveginn og kaupa fasteign með verðtryggðu láni fyrir 65% af söluverðinu hefur hneppt mig í ævilangt skuldafangelsi. Það eru því litlur líkur á að ég muni nokkurn tíma njóta þess að horfa á flatskjársjónvarp." (Lilja Mósesdóttir).

 

Er það bara í útlöndum sem þrælahald er bannað???

Ég bara spyr eins og fávíst barn.

Fávíst barn sem hlustaði á þáverandi biskup Íslands, Sigurbjörn Einarsson segja á aðventunni að maður ætti ekki að gera öðrum það sem maður vildi ekki að sér og sínum væri gert.

 

Hver vill lifa til lífstíðar sem skuldaþræll verðtryggingarinnar??

Jóhanna Sigurðadóttir, Steingrímur J. Sigfússon, Bjarni Benediktsson???  

Held ekki, en af hverju vilja þau öðrum slíkt hlutskipti, svo ég spyrji aftur eins og fávíst barn, sem einu sinni hlustaði á Sigurbjörn Einarsson segja frá að það það sem þú gerir þínum minnsta bróðir, það gerir þú drottni líka.  

 

Vilja Jóhanna Sigurðardóttir, Steingrímur J. Sigfússon, Bjarni Benediktsson halda Hungurjól???

Held ekki, en hvernig var hægt að tala um fjárlög í skrilljón tíma án þess að minnast einu orði á hlutskipti þeirra sem þurfa að lifa á strípuðum bótum einum saman, í þessu landi vaxtaokurs og dýrtíðar.  

Af hverju fannst þeim sjálfsagt að greiða tugi milljarða í óþarfa vexti vegna risaláns Alþjóðagjaldeyrissjóðsins á sama tíma og fólk heldur Hungurjól???

 

Hvað er að þessu fólki???  Var það aldrei saklaust barn sem hlustaði á biskupinn okkar, Sigurbjörn Einarsson á aðventunni????

Hvað misfórst í uppeldi þess???, af hverju er Ísland þrælanýlenda hins skítuga fjármagns???

Af hverju gerir það ekkert???

Af hverju ver það ekki þjóð sína??

 

Það er engin afsökun fyrir það að þjóðin hafi kosið það og muni kjósa það aftur í næstu kosningum, ég var ekki að spyrja hvað hefði misfarist hjá þjóðinni, ég var að spyrja um þau, sem völdin hafa, af hverju gera þau ekkert.

 

"Lífeyririnn dugar ekki fyrir framfærslu. Á sama tíma og vöruverð hækkar um 50% standa lífeyrisgreiðslur að mestu leyti í stað,“ segir Guðmundur. Hann segir Öryrkjabandalagið hafa orðið vart við að þeim hafi fjölgað mikið sem hafa ekki lengur efni á að borga af húsnæði sínu og segir hann að umsóknum hjá hússjóði bandalagsins hafi fjölgað mikið. „Kreppan er virkilega að koma fram núna,“ segir Guðmundur í Morgunblaðinu í dag en illa staddir lífeyrisþegar skipti sennilega þúsundum. Hann gagnrýnir að á sama tíma og bætur hafi verið skertar".

 

Það eru þau sem bera ábyrgð á Hungurjólunum, ekki aðrir.

 

Það eru ekki rök í málinu að Bjarni Benediktsson sé leiðtogi flokks í stjórnarandstöðu.  Það er ekkert sem hindrar hann í að bera upp breytingartillögur á fjárlögum um hækkun bóta sem serða sárasta hungrið.  

Það var hann sem varði ríkisstjórn Jóhönnu Sigurðardóttir falli haustið 2010 þegar líf stjórnar hennar hékk á bláþræði vegna mótmæla almennings. 

Það var hann sem samþykkti allar tillögur ríkisstjórnarinnar varðandi skuldamál heimilanna og sveik þar heimili landsins á ögurstundu.

Það er hann sem lætur sem vandinn sé ekki til, að það þurfi ekki að gera kerfisbreytingu, heldur dugi í miðri heimskreppunni að framleiða sig út úr honum.

 

En hann ber ekki ábyrgðina, það er rétt.  

Þess vegna sleppur hann við ákæruna um þrælahald heillar kynslóðar.

En það þýðir ekki það sama og að hann sé saklaus.

 

Því hann gat en gerði ekki.

Í því er mikil sekt fólgin.

Kveðja að austan.

 

Fjölskylda sakfelld fyrir þrælahald

Það fjarar hratt undan ríkisstjórninni.

 

Úrsögn Gylfa Arnbjörnssonar er ærleg ákvörðun manns sem fékk einfaldlega nóg af þeirri kaldrifjuðu hægri stefnu sem núverandi ríkisstjórn hefur framfylgt???  Og Íslendingar hafa aldrei upplifað áður á eigin skinni.

Ekki einu sinni þegar Hannes Hólmsteinn var guðfaðir ríkisstjórnarinnar.

 

Ætlar Gylfi Arnbjörnsson ekki að bera ábyrgð á Hungurjólunum, þeim fyrstu í áratugi.

 

""Lífeyririnn dugar ekki fyrir framfærslu. Á sama tíma og vöruverð hækkar um 50% standa lífeyrisgreiðslur að mestu leyti í stað,“ segir Guðmundur. Hann segir Öryrkjabandalagið hafa orðið vart við að þeim hafi fjölgað mikið sem hafa ekki lengur efni á að borga af húsnæði sínu og segir hann að umsóknum hjá hússjóði bandalagsins hafi fjölgað mikið. „Kreppan er virkilega að koma fram núna,“ segir Guðmundur í Morgunblaðinu í dag en illa staddir lífeyrisþegar skipti sennilega þúsundum. Hann gagnrýnir að á sama tíma og bætur hafi verið skertar".".

 

Það er til svo illa innrætt fólk að það heldur að formaður Öryrkjabandalagsins sé að ýkja ástandið en það gildir sama um og hann og aðra félagshyggjumenn, hann trúði á að harðræðið væri afleiðing af Hruninu, en ekki stefnu Alþjóðagjaldeyrissjóðsins, og að hans menn væru vörnin.

Vörn fólks en ekki fjármagns.

Þegar hann dregur upp svona dökka mynd, þá er það vegna þess að hann hefur ekki lengur fundið í sannfæringu sinni liti til að lýsa hana.

Hann eins og Gylfi Arnbjörnsson sá, að það er ekki lengur hægt að verja óskapnaðinn.

Skrímslið við Austurvöll á sér ekki lengur talsmenn.  Það getur ekki lengur falið ásýnd sína.

 

Meira að  segja borgarskæruliðarnir í Dögun geta ekki lengur talið fólki í trú um að allt sé Sjálfstæðisflokknum eða Framsókn að kenna. 

Allt kjaftæði þeirra um stjórnarskránna getur ekki lengur kæft hungurhljóðin sem berast úr tómum mögum öryrkja og aldraða sem hafa ekkert annað en bætur sínar til að lifa af.  

Atlaga þeirra af kvótakerfinu getur ekki lengur dulið neyð skuldugra heimila.  

Og það er ríkisstjórn Samfylkingar og VinstriGrænna sem ábyrgðina ber.

 

Aðeins Dögun og Gummi litli Steingríms styðja þetta ógæfufólk, og jú Tómið sjálft, Gnarrinn og félagar, en enginn sem veit hvað er að gerast út í þjóðfélaginu, enginn sem veit hverjir eru gerendur dagsins í dag.

Því þegar besti og tryggasti vinur ríkisstjórnarinnar gefst upp á henni þá eiga menn að gefa orðum hans gaum.

 

"Nú er hins vegar svo komið að ég get ekki lengur varið það gagnvart samvisku minni og þeim hagsmunum sem ég hef helgað starfsferil minn að vera flokksbundin í Samfylkingunni. Það afskiptaleysi, áhugaleysi, skilningsleysi og á stundum bein andstaða flokksforystunnar við mikilvæga hagsmuni almenns launafólks hefur fyllt mælinn.

Hér á m.a. í hlut hik og aðgerðaleysi í atvinnusköpun, endurteknar skerðingar á réttindum elli- og örorkulífeyrisþega og atvinnuleitenda og nú síðast skattlagning á lífeyrisréttindi almenns launafólks á sama tíma og réttindi ráðherra, þingmanna, æðstu embættismanna og þeirra opinberu starfsmanna sem eiga aðild að opinberu lífeyrissjóðunum eru varin með ábyrgð ríkis og sveitarfélaga.

Í öllum þessum málum tel ég að forysta og þingflokkur Samfylkingarinnar hafi snúið baki við hagsmunum launafólks á almennum vinnumarkaði, þess fólks sem treyst hefur verkalýðshreyfingunni fyrir mikilvægum hagsmunum sínum. Tel ég þetta svo alvarlegt að ég vil ekki lengur sem forustumaður innan verkalýðshreyfingarinnar og sem jafnaðarmaður bera á þessari stefnu þá ábyrgð sem felst í aðild minni að flokknum.".

 

Grafarskriftin hefur verið samin.

Núna á aðeins eftir að meitla hana í stein.

Þann stein munu aðrir verklýðsleiðtogar vinstri flokkanna leggja til.

 

Ef ekki þá er ljóst að hungurjólin eru í þeirra boði.

Kveðja að austan.

 

 

 

Gylfi segir sig úr Samfylkingunni

Hvert á að skila lyklunum???

 

Spurði Jóhanna Sigurðardóttir Bjarna Benediktsson, formann Sjálfstæðisflokksins, á Alþingi núna áðan.

Svarið er ákaflega einfalt.

 

Sá á að fá lyklana að stjórnarráðinu sem ætlar að aflétta skuldaánauð Hrunsins af almenningi.

Í eitt skipti fyrir öll.

 

Því miður er Bjarni ekki sá maður, ekki á meðan flokkur hans býður fram menn eins og Vilhjálm Bjarnason, Brynjar Nielsen og Pétur Blöndal.  

Allt menn sem taka hagsmuni skuldaeiganda fram yfir velferð almennings, og þar með velferð þjóðfélagsins, því það er ekkert þjóðfélag ef það vantar þjóðina.

 

Vissulega eru menn í Sjálfstæðisflokknum sem vilja takast á við skuldavandamál heimilanna á heiðarlegan og sanngjarnan hátt, en þeir ráð engu í flokknum í dag.

Þessu þarf Bjarni að breyta, áður en hann biður um lyklavöldin.  

 

Vandi heimilanna þolir enga bið, og það er ekkert val.

Því uppreisn heimilanna, uppreisn almennings er stutt undan.

 

Og þá má guð svo sannarlega blessa þjóðina.

Kveðja að austan.

Jóhanna og Bjarni tókust hart á

Er Össur að boða stefnubreytingu???

 

Íslendingar láta ekki berja sig.

Stórtíðindi það.

Ætlar ríkisstjórnin, sem lá kylliflöt fyrir ESB í ICEsave málinu, að segja af sér.

Ætlar hún að gefa þjóðinni tækifæri???

Fékk Samfylkingin endanlega nóg af stjórnarsamstarfinu eftir framkomu Steingríms Joð í Kastljósi í gær??

 

Ef Össur meinar einu sinni orð af því sem hann segir þá er tíðinda að vænta í næstu viku.

Kannski er þjóðin búin að afplána sína refsingu.

Kannski eru allir búnir að fá nóg.

 

Ekki bara heimili landsins.

Kveðja að austan.

„Íslendingar láta ekki berja sig“

Væri staðan öðruvísi í dag ef ???

 

Það eina sem mun bjarga okkur út úr kreppunni erum við sjálf.  

Það þarf að hlúa að fólkinu í landinu, senda Hrunskuldirnar til  þeirra sem þær eiga.  Bæði þarf að leiðrétta skuldir almennt á þann level sem eðlilegt ástand hefði haft í för með sér, verðtrygginguna til 1/1/08 og aðlaga gengislán að þeim grunni.  

Síðan þarf að gefa út opinberlega yfirlýsingu að enginn verði látinn yfirgefa hús sitt næstu 5 árin.  Ekki vegna þess að uppboð verði fryst, heldur verði skuldir fólks aðlagaðar að greiðslugetu, og það sem umfram er komi til greiðslu þá og þegar fólk selur hús sín með hagnaði.  

Ákaflega einfalt í framkvæmd, sé til þess vilji.

 

Og þegar fólk er öruggt heima hjá sér, þá tekur það þátt í endurreisn landsins.  

 

Það þarf að hlúa að innlendu atvinnulífi, taka allar skattahækkanir til baka og jafnvel lækka þar sem slíkt myndi auka veltu og hækka þar með tekjur ríkisins.  Vegna þess að það er heildartekjur sem notast til að borga útgjöld, ekki há Exel skattprósenta sem engu skilar nema samdrætti.

Það þarf að endursemja um erlendar skuldir og banna allar nýjar þar til menn sjá fram á að geta greitt þær til baka.  Það er nóg að vera einu sinni vanskilaþjóð, það má aldrei gerast aftur.

Það þarf að hætta þessu rugli að keyra atvinnulífið áfram á skuldsettum stórframkvæmdum, vilji menn virkja og reisa verksmiðjur, þá er það gert fyrir eigið fé, ekki fé almennings.  

Það þarf að skera niður hjá hinu opinbera en í sátt og samlyndi.  Slík sátt myndast alltaf á neyðartímum þegar allir eru í sama báti, og allir eiga sitt undir réttum aðgerðum.  Víðtæk samstaða mun myndast um nauðsynlegan niðurskurð ef fólk fær fyrst réttlæti í skuldamálum og réttlátt stjórnkerfi þar sem við ráðum, ekki Leppar Alþjóðagjaldeyrissjóðsins.

Við  eigum fullt af hæfu fólki sem lítur ekki á þrældóm sem nauðsynlega forsendu endurreisnarinnar.

 

Hvernig fjármagnar ríkissjóður nauðsynlegar skuldaleiðréttingar???

 

Svarið er mjög einfalt, stór hluti þeirra er þegar kominn fram gagnvart erlendum kröfuhöfum.  En það sem upp á vantar, og snýr að lífeyrissjóðum og Íbúðalánasjóði, það er fjármagnað eins og alltaf er gert hjá þjóðum á stríðstímum.

Það eru gefin út langtímaskuldabréf á lágum vöxtum sem mynda eiginfjárgrunn og greiðast svo upp hægt og rólega.  Í Bandaríkjunum eru ennþá í umferð ríkisskuldabréf sem gefin voru út í fyrra stríði.

Vissulega eru þetta útgjöld sem falla í rólegheitum á komandi árum og áratugum, en það er kostnaðurinn við frelsið.  Hver heldur að börn okkar vilji frekar taka við blómlegu búi þar sem þau hafa notið örugga æsku, og jú stríðskostnaður þjóðarinnar ennþá lítt greiddur, eða upplifa hörmungar æskunnar, útburð og skuldaþrældóm foreldra sinna.

Aðeins hreinræktaður hálfviti segir að það megi ekki velta kostnaði á framtíðina.  

Og hreinræktaðir hálfvitar eru mjög sjaldgæfir, ef ekki þá væri töluð þýska um allan hinn vestræna heim.  

Í stríði er það gert sem þarf að gera. Menn gefast ekki upp fyrir óvininum, menn selja ekki samborgara sína í þrældóm, menn selja ekki land sitt erlendum óargadýrum sem koma með sauðarkápu á herðum og kalla sig aðstoð Alþjóðagjaldeyrissjóðsins.

Og ég dreg þetta til baka með hreinræktuðu hálfvitanna, ekki einu sinni þeir myndu gera slíkt.

 

Eftir stendur þá stóra spurningin, hvað er AGS að gera hér.  Af hverju er fólki ekki hjálpað.  Af hverju er aðeins til peningur til að borga bretum, ekki íslensku barnafólki.

Býr hér á meðal okkar fólk sem kýs núverandi þrælkunarstefnu stjórnvalda ótilneytt????

Af hvaða flokki manna er það fólk?????

Þætti gaman að vita svo ég hætti að móðga þá sem eru með hálfu viti.

 

Já, væri staða heimila og atvinnulífs öðruvísi ef einhver hefði lesið svona pistla og stutt það fólk sem barðist fyrir þeim sjónarmiðum sem þar kom fram.

Var endurreisn efnahagslífsins ekki möguleg nema með þeim óráðum sem samið var um við Alþjóðagjaldeyrissjóðinn???

Eða var þetta spurning um aðra Sýn á vandann.

Þá Sýn sem hagfræðingar lífsins hafa, að þú leysir ekki vanda, sama hversu brýnn hann er, ef það er gert á kostnað eins til hagsældar fyrir aðra.  

Þetta spurning sem við fáum aldrei tækifæri til að svar, skuldaþrældómurinn er það hlutskipti sem þjóðin kaus yfir sig vorið 2009 og ekkert bendir til annars en að hún muni endurnýja umboð þeirra flokka sem sömdu við Alþjóðagjaldeyrissjóðinn um þessa skuldaþrælkun.  

En það skaðar samt ekki að spyrja.

Kveðja að austan.

 

 

 

 

 

 

 

Vík milli vina.

 

Alþýðusamband Íslands er einn af fáum traustum vinum sem þessi ríkisstjórn fjármagns og auðmanna hefur átt þetta kjörtímabil.

Sama hvað lítið hefur verið gert, alltaf hefur Vöggur verið feginn.

Svo þegar lítið hefur gengið að efna fyrirheitin þá hefur ASÍ bent á af mikilli hógværð að það hafi nú einhverju verið lofað.  

Yfirleitt hefur það endað með því að menn hafa sest niður, rætt málin, jafnvel skipts á neftóbaksdósum, og síðan undirritað einhverja pappíra um stöðugleika, atvinnu eða úrræði handa grenjandi skuldurum landsins.

Það er alveg óhætt að segja að miðað við gjána á milli efnda og fyrirheita þá hefur þolinmæði ASÍ verið aðdáunarverð.  

 

Svo gerðist eitthvað, og það mjög nýlega, það er eins og menn séu ekki vinir lengur.  

 

ASÍ auglýsti eitthvað, svona í tilefni jólanna, líklegast til að slá á sultargrátinn sem var farinn að heyrast inná kontór skriffinnanna og þeir hafa fundið sig knúna til að slá á hávaðann svo hann truflaði ekki um of anda friðar og hátíðleika sem hjarta hvers góðborgara þráir svo mjög á þessum tíma árs.

Og maður hefði  haldið að ríkisstjórnin hefði umborið ASÍ þessa auglýsingu, bæði er sambandið kennt við alþýðu sem og hitt  að ráðherrar ríkisstjórnarinnar hefðu líka viljað losna við þessi óþægindi á aðventunni.

 

En í stað þess var boðað til blaðamannafundar þar sem ríkisstjórnin bar af sér allar sakir, sem var kannski skiljanlegt út af fyrir sig, en í kjölfarið hófust einhverjar þær svæsnustu árásir á persónu Gylfa forseta í manna minnum, jafnvel svo að það hefði mátt halda að árið væri 1936 og það væri verið að gera upp við gagnbyltingarmenn í flokki alþýðunnar.

Og þegar mátti sjá Steingrím grilla Gylfa í beinni útsendingu í gær eins og Kastljós væri orðinn þáttur með Grillmeistaranum þá varð manni hugsað til kafla í sögu Alþjóðahreyfingar kommúnista, Komintern, þar sem ævisaga flesta vestrænna kommúnistaleiðtoga endaði þannig, "hvarf í Moskvu, ekki vitað um afdrif hans".  Ekki það að maður bara vonkenndi Gylfa heldur hugsaði maður líka til léttis að núna væri árið 2012 en ekki 1936, því ekki er víst að þá  hefði aðeins orðum verið skotið.

 

Hvað Steingrímur telur sig uppskera með að aflífa helsta stuðningsmann ríkisstjórnarinnar er spurning sem ég reikna með aðeins menn sérfróðir í sögu "sterkra" leiðtoga geta svarað.  Spurning hvort Morgunblaðið ætti að tala við Þór Whitehead sem þekkir vel sögu bóndans í Kreml. 

En það er ljóst að það er ekki lífvænlegt að vera fyrrum vinur ríkisstjórnarinnar, fallinn í ónáð.  Menn þurfa ekki annað en að skoða vígi stuðningsmanna hennar á netinu, jafnvel orðbragðið um þá Búkharín og félaga sem viðhaft var í Þjóðviljanum á sínum tíma er líkt og sunnudagsskólaræða séra Friðriks miðað við orðaleppana sem þessir fyrrum samherja Gylfa velja honum.

Það er af sem áður var.

 

Og hvernig skyldi Gylfi hafa brugðist við???

Blásaklaus maðurinn að slá á sultargrátinn.  Ekki var hann að tala um hungurjól eða neyð bótaþega eins og formaður Öryrkjabandalagsins, aðeins í góðri trú að kaupa sér frið fram yfir jól áður en  umræðan um stjórnarskrána kæfði öll neyðaróp heimilanna.

Og hann gæti aftur farið að láta sig dreyma um ráðherrastól.

 

"Það er engin ríkisstjórn í landinu" sagði Gylfi, Alþýðusamband Íslands býður eftir kosningunum, í þeirri von að þá verði mynduð ný ríkisstjórn með fólki sem svíkur ekki allt sem það lofar.

Alþýðusambandið hefur fengið nóg.

 

Ég held að víkin sem er á milli vina sé breiðari en víkin sem er á milli Shanghai og San Fransiskó.

Ekki það að ég gráti vinaleysi þessa ríkisstjórnar Alþjóðagjaldeyrissjóðsins, hef aldrei skilið stuðning félagshyggjunnar við hina svörtu frjálshyggju.  

En að það skuli endalaust hægt að setja ný met neðan frá í klaufagangi og rugli það slær mann, hvers á þjóðin eiginlega að gjalda, þó hún hafi fjárfest í nokkrum flatskjáum og keypt nokkra Cruisera. Ætla landvættirnir aldrei að fyrirgefa okkur, höfum við ekki afplánað nóg??

 

En maður getur huggað sig við að núna er fátt orðið um vini hjá þeim Jóhönnu og Steingrími.

Líklegast er aðeins fyrrum borgaraskæruliðarnir í Dögun eftir, og vandséð hvort þeir duga fram að kosningum.  

Samt er langur vetur framundan, fyrstu hungurjólin frá hafísárunum miklu á níunda áratug þarsíðustu aldar,  og mörg heimili landsins munu lenda í kjaftinum á innheimtulögfræðingnum.  

Ríkisstjórnin hefur ennþá mörg tækifæri til að vega að þjóðinni, að atvinnuvegunum, að heimilum landsins.  

Tækifæri sem hún mun nota sér svikalaust.

 

En það mun birta til, það birtir alltaf til.

Að lokum.

Kveðja að austan.

 

 

„Þingið var vísvitandi blekkt“

Ég vildi ykkur svo vel.

 

Sagði hún Elenóra Sjálfselska mínútu áður en hún mætti örlögum sínum.

Sem var örugglega satt, en þegar hún bætti við, "þið höfðuð það svo gott", þá var ljóst að hún var ekki í sambandi við raunveruleikann og dó alveg steinhissa.

Ríkisstjórn Jóhönnu er ekki síður veruleikafirrt þegar hún ræðst að sínum eina bandamanni út í samfélaginu.  

Forystu ASÍ.

 

Spurningin er hvort Gylfi forseti er að flýja sökkvandi skip yfir í Bjarta framtíð eða er ekki hægt að réttlæta allt.

Skuldaþrælkun, hungrið, örbirgðina.

 

Það er spurning en það er engin spurning að þau Jóhanna og Steingrímur eru í engu sambandi við fyrri orð sín og yfirlýsingar, og halda að þau geti endalaust fullyrt að allir fari með rangt mál nema þau.

Ég spurði fyrr í dag hvernig þau Guðfríður Lilja og Ögmundur Jónasson gæti réttlætt stuðning sinn við hungurjólin og nú bæti ég við spurningu mína, hvernig geta þau lotið forystu fólks sem er ekki í þessum heimi.

Meira að segja einvaldskonungar voru settir af í gamla daga þegar ljóst var að þeir voru ekki í sambandi við umheiminn, heldur voru alfarið í sínum heimi.

 

Hví er haldið hlífðarskyldi yfir þessu fólki??

Á hið skítuga fjármagn sem á stjórnmálin á Íslandi ekki betri fulltrúa en þessi tvö??

Allavega svo við sleppum við svona neyðarlegar uppákomur eins og þennan blaðamannafund.

 

Er ekki komið nóg???

Herra vogunarsjóður???

Kveðja að austan.

 

 

 

Kannast ekki við vanefndir