Var ekki til upptaka af gömlum fundi??

 

Til hvers eru þessir hálaunamenn að eyða dýrmætum tíma sínum og dýrmætum tíma fréttamanna við endurtaka alltaf sömu ræðuna??

Sömu hótanirnar.  

Sama uppklappið hjá Samtökum atvinnulífsins um að aðeins sé svigrúm til að hækka laun forstjóra.

Meira að segja fréttin er kóperuð, fyrir utan þau nýmæli að fíllinn sé fluttur úr postulínsbúðinni og hafi leigt sér herbergi út í bæ.

 

Fatta þessir menn ekki hvað þessi síbylja kjarasamninganna er orðin útslitin plata??

Fatta menn ekki leiðindin þegar Gylfi forseti mætir á næsta blaðamannafund og segist ætla að berjast, og berjast, og að hans félagsmenn munu fá nauðsynlegar leiðréttingar.

Eða þetta leiðinda leikrit þegar þungbúnir samningamenn takast í hendur, syrgjandi sínar eftirgjafir frá hámarkskröfum, eða harmandi hina stórkostlegu eftirgjöf í þágu þjóðarsáttar.

 

Af hverju geta menn ekki bara sleppt þessu leikriti einu sinni og birt næstu kjarasamninga í Peningamálastefnuriti Seðlabankans.

Þetta eru hvort sem er svo lélegir leikara, og hundleiðinlegir í þokkabót.

Það vita allir að þetta er skrípaleikur og blessuð verðtryggingin er þannig innstillt að hún mælir aðeins kauphækkanir láglaunafólks, og því fær það aldrei kauphækkanir.  

Ef það er ósátt getur það bara unnið meira, en vilji það halda húsunum sínum þá skal það gjöra svo vel að sætta sig við það sem því er skammtað.

 

Þannig er kerfið á Íslandi í dag, og algjör óþarfi að láta eins og það sé eitthvað öðruvísi.

Það er það minnsta sem menn geta gert eftir þeir afnámu samningsréttinn.

Skrípaleikurinn í kringum kjarasamninga er eins og afdankaður helgisiður sem er ekki í nokkrum takti við raunveruleikann, líkt og bannið við öllu mannlífi á Föstudaginn langa var hér ekki fyrir svo mörgum áratugum.

 

Laun hækka alltaf eitthvað, og mönnum væri nær að gefa fjáramunina sem fara í  kjarasamningaleikritið, til hjálparsamtaka sem heyja stríð við ebóluna í vestanverðri Afríku.  Barnaþorpunum veitti til dæmis  ekki af þessum fjármunum.

Hina fyrirskipuðu kjarasamninga má hins vegar kynna með fjölritungi sem Pósturinn dreifir fyrir hóflegt gjald.

Hagræðing, gegnsæi, er það ekki krafa nútímans??

 

Og halda sig einu sinni við sannleikann.

Svona til tilbreytingar.

Kveðja að austan.

 

 

 

Kjarasamningar fíllinn í herberginu

Hár standard á fréttadeild Moggans?

 

Vitnar í þekktan bjána þegar stór tíðindi berast úr Vesturheimi.

Þau tíðindi að Bandaríkin, forysturíki hins vestræna heims, verða hálfstjórnlaus næstu 2 árin, í það minnsta.  

Dýpri geta fréttaskýringarnar varla orðið, eða rökstuðningurinn þar að baki.

 

Vissulega má gera ráð fyrir að sá sem skrifaði þessa frétt sé samdauna hugmyndaheimi frjálshyggjunnar, en samt vekur þetta uppi spurningar að mannaúrvalið sé ekki betra hjá hægriöfgamönnum þarna vestur frá.  

Að vitsmunaverum sé því sem næst ókleyft að styðja þá aðför að siðmenningunni sem frjálshyggjan er, og því sé aðeins úr bjánum að velja, og því þurfi að taka þann  illskásta  þegar vitnað er í repúblikana.  

 

Sé svo, má afsaka svona fréttaflutning, því auðvitað er sjálfsagt að vitna í báðar fylkingar í bandarískum stjórnmálum.

Bágt á ég samt með að trúa því og set því spurningarmerki við þessa frétt.  

Því það er stutt frá svona frétt í stórfyrirsögn um að jörðin sé flöt, og aldur hennar nái ekki 4.500, samkvæmt nákvæmum vísindum sömu bjána og tjá sig hér um meint kynþáttahatur Obama.

 

Hnignun mannsandans í Bandaríkjunum er sorgleg, en það er samt óþarfi að flytja þá sorg hingað til Íslands.

Áhugamenn um hana gefa út sína snepla og sínar bækur, sem vissulega eru keyptar því innvígðir tjá hollustu sína með því að láta þær sjást á bókahillum sínum.  Hollustu sína sem síðar leitar í vasa þeirra.  

En að þetta sé lesið, trúi ég varla.

 

Óþarfi því hjá Mogganum að lepja þetta upp.

Þurfi að þjóna Óskari, þá legg ég frekar til að birt sé ljóð eftir skáldið.

 

En ef ske kynni, þá vil ég taka það fram.

Jörðin er ekki flöt.

Kveðja að austan.

 

 

Obama sagður kynþáttahatari

Eru allir kjósendur íhaldsins yngri en 25 ára??

 

Búandi heima hjá pabba og mömmu, barnlausir, náttúrulausir, hafandi engar áhyggjur af framtíðinni því ekkert kemur fyrir þá sem pabbi og mamma geta ekki reddað??

Er þetta fólkið sem knýr áfram helstríðið gegn heilbrigðiskerfinu??

 

Ekkert annað getur útskýrt stuðnings flokksmanna við flæmingu heilbrigðisstétta úr landi.  

Engin börn, engir aldraðir foreldrar.

 

En jafnvel þessi börn eldast, finna náttúruna, eignast börn.

Og þurfa á læknisaðstoð að halda.

 

Þá er of seint að iðrast þegar síðasti læknirinn í praxís er kominn á eftirlaun.

Í það eru um það bil 10 ár.

Kveðja að austan.

 

 

 

 

108 læknar í verkfalli í dag

Er íhaldinu ekki sjálfrátt??

Hvar eru endamörk atlaga þess gegn mennskunni??

 

Er virkilega svarta bókin, sem skrifuð var í árdaga iðnbyltingarinnar og notuð var sem réttlæting þess helvítis á jörðu sem verksmiðjuborg frjálshyggjunnar var á 19. öld, orðin þeirra eina biblía og trúarrit??

 

Hvað kemur næst??

 

Núna þegar síðasti naglinn hefur verið sleginn í líkkistu hins opinbera heilbrigðiskerfisi og endurmenntun fullorðna vísað á beitarhaga hins frjálsa framtaks Hraðbrautanna.

 

Núna þegar svarið við tækniframförum og aukinni skilvirkni efnahagslífsins er að auka vinnuþrælkun almúgans.  

 

Hvað dettur þeim næst í hug í sínum óendanlega valdahroka eins og völd þeirra séu til eilífðar??? 

 

 

Landið er fagurt og frítt.

 

Jarðir búsældarlegar, gnótt fiskjar í sjónum.

 

Hiti streymir úr jörðu, orkan rennur af fjöllum.

 

Þjóðin er vel menntuð, frjó og framtakssöm.

 

 

Og íhaldið stefnir með þjóðina aftur á 19. öld.

 

Hvað er eiginlega að þessu fólki??

 

Kveðja að austan. 

Lífeyrisaldur hækki í skrefum

Þjóðin rumskar.

Hún er reið.

 

Henni er ekki sama um innviði sína og almannaheill.

 

Hún refsaði ríkisstjórn Alþjóðagjaldeyrissjóðsins í síðustu kosningum, og í dag er hún að tilkynna að þessi muni fá sömu örlög.

 

 

Burgeisar og fjármagnslýður er að falla á tíma með að ná sátt við þjóð sína. 

 

Það dugar ekki að ráða hjörð launaðra manna við að reikna út hagvöxt, kaupmáttaraukningu þegar stór hópur launafólks finnur annað þegar reynt er að fjármagna brýnustu útgjöld.

 

Þegar stærri hluti öryrkja lifir undir fátækramörkum.

 

Þegar aldraðir finna til öryggisleysis þegar þeir þurfa að treysta  á umönnun og  aðhlynningu samfélagsins.  

 

Þegar ódæðisverk fyrri ríkisstjórnar gagnvart skuldugu barnafólki eru látin liggja óbætt hjá  garði.

 

Þegar langsvelt almannaþjónusta er látin blæða innúr beini á meðan tugir milljarða eru greiddir útúr ríkissjóð í óþarfa vexti vegna heljartaka fjármagns á ákvörðunartöku Seðlabanka og ríkisstjórnar.

 

 

Í auðugu landi þar sem allir geta haft í sig og á, og  lifað mannsæmandi lífi í blómlegu samfélagi.

 

 

Tími sáttar er á þrotum.

 

Tími átaka er framundan.

 

 

Aðeins gálgafresturinn einn er eftir. 

 

Kveðja að austan. 

 

 

 

„Gyrðið upp buxurnar“

Hreppaflutningar hinir síðari.

Í boði formanns nýstofnaðra samtaka fyrirtækja í sjávarútveginum.

 

Eins og það sé eitthvað skrýtið að fleira sé hagrætt en kvótinn.

 

 

Það er ekki skrýtið, það er rökrétt.

 

Það skrýtna í málinu er að fólk sem hefur til valda Snata fjármagnsins, skuli vera hissa þegar þeirra meðöl hittir það sjálft fyrir. 

 

Hvort sú hissa leiði til frekari mótmæla á eftir að koma í ljós, til dæmis gætu aðrir byggðakjarnar áttað sig á að hið beiska meðal hagræðingarinnar stendur öllum til boða, og er í raun eina meðalið sem í boði er.

 

 

Skrýtnara er samt takleysi forframaðra manna að bögga fleiri en eitt byggðarlag í einu.

 

Hefði það minnsta verið skorið, þá hefðu íbúar stærri byggðakjarna samsinnað sig hagræðingarrökum  frjálshyggjunnar.  

 

Hún er þannig séð skynsamleg þegar hún bitnar á öðrum.

 

Er það til dæmis ekki ósköp notalegt að lifa góðu lífi á arðráni þrælavinnuafls í bláfátækum löndum Fjarskaistan???   Eða fylltust ekki fjárhirslur af gulli þegar þúsundir eigna á landsbyggðinni urðu verðlausar í kjölfar kvótahagræðingu sægreifanna???

 

Grímurnar tvær birtast aðeins þegar Mammon er fóðraður á manns eigin blóði, þá birtist efinn, og jafnvel mótmælin í kjölfarið.

 

 

Í árdaga frjálshyggjunnar var víða reitt til höggs, vissulega með góðum árangri, en lýðræðið sú skrýtna skeppna var illa taminn og vildi refsa frjálshyggjunni með skóggangi.

 

Síðan þá hefur lýðræðið verið tamið og í dag er í flestum vestrænum löndum aðeins einn flokkur í framboði.  Reyndar í mörgum deildum, sem bera mismunandi nöfn, en með sömu hugmyndafræði, lúta sama valdinu.

 

Samt þarf að sýna vissa aðgát,  hin skrýtna skepna er ennþá óútreiknaleg.  

 

Offors og yfirgangur vilja oft vekja upp andspyrnu, mótspyrnu.

 

Mótmæli og jafnvel refsingu.

 

 

Og þetta  veit flokkurinn, þetta veit flokksforystan.

 

Hægt og hljótt er hennar söngur.

 

 

Þess vegna er gönuhlaup hins nýja formanns dálítið skrýtið því þingmaðurinn sem hann gengur með í maganum átti að fæðast 2017.

 

Einörð mótmæli fórnarlambanna, og hugsanlegur stuðningur verðandi fórnarlamba, gæti gert þá fæðingu mun erfiðari.

 

Og jafnvel komið í veg fyrir hana, því á meðan kokgleyping þjóðarinnar stendur yfir, þá hefur valdið ekki efni á taktlausum krökkum.

 

Þeirra tími er liðinn, árdagar frjálshyggjunnar eru löngu liðnir.

 

 

Þess vegna munu mótmæli skila árangri, það er ef einhver nennir að mótmæla.

 

Og þessi mótmæli gætu seinna meir verið talin tímamótamótmæli, þau síðustu gegn hagræðingunni sem valdið hlustaði á.

 

 

Hver veit,  hver veit?

 

Þau gætu líka orðið þau fyrstu af mörgum gegn hinni dauðu hönd frjálshyggjunnar.

 

Þess vegna er taktleysið svo skrýtið, vekur upp spurninguna um dómgreind þeirra sem eiga og stýra sjávarútveginum.

 

 

Þar syngja menn ekki hægt og hljótt.

 

Kveðja að austan. 

 

 

 

 

 

 

 

 

Vilja ekki flytja nemendurna

Þegar söngurinn er falskur, þá er ótíðinda að vænta.

Gjaldeyrishöft eiga vissulega ekki að lifa á sínum eigin forsendum, og enda sem afturganga sem enginn man hvernig til er komin.

 

Um það ættu allir að geta verið sammála.

 

 

En þegar frjálshyggjumaður ýkir umfang þeirra, gerir lítið úr vandanum sem fylgir afnám þeirra, og þar að auki lætur sem vandinn sem skóp þau, hafi verið viðráðanlegur án þeirra, án þess að benda á aðrar nærtækar ráðstafanir;

 

Þá þýðir það aðeins eitt.

 

Ótíðindi fyrir íslensk heimili, og þau tiltölulegu fáu fyrirtæki sem venjulegt fólk á og stjórnar í dag.

 

 

Þessar falsettur Vilhjálms, er hluti af margradda ískri sem mektarmenn íhaldsins dæla út í umhverfið líkt og þeir vilji ekki vera eftirbátar Surts gamla uppá fjöllum.   

 

Formaðurinn sjálfur talaði um eiturgufur sem hrjáðu hinn venjulega mann, eins og hinn venjulegi maður stundaði gjaldeyrisbrask og fjármagnsflutninga.

 

Eða hafi keypt eignir hinna föllnu banka á hrakvirði.

 

 

Í ljósi þess að helstu ráðgjafar ríkistjórnarinnar um hið fyrirhugaða afnám gjaldeyrishaftanna eru fyrrum verkamenn vogunarsjóðanna að þá  er nokkuð ljóst hvað þjóðin á í vændum.

 

Hún verður rænd að sínum þolmörkum, en afslátturinn þar fram yfir kallaður sigur.

 

 

Frjálshyggjan kann sitt fag, og þjónar húsbændum sínum vel.

 

En hví þetta skelfilega ískur, hví má ekki halda áfram að vinna hægt og hljótt???

 

Kveðja að austan. 

Höftin jafndýr og hrunið

Ofsalega ljótt að segja það.

En Árni Páll fer rétt með staðreyndir.

 

Meginmarkmið frjálshyggjuflokka er ætíð að grafa undan almannaþjónustu,  útvista henni eða veikja innviði, allt eftir því sem styrkur þeirra leyfir..  Ekki ósvipað eðli og er hjá termítum, þeir missa sig alltaf þegar þeim er sleppt lausum í virðuleg timburhús.

 

Sjálfstæðisflokkurinn  er ekki ættleri hvað það varðar og ekki það illa mannaður að hann geti ekki skipulagt aðför sína.

 

Árni Páll gat því eiginlega ekki farið rangt með fyrst að hann á annað borð ákvað að fjalla um almannaþjónustu og ríkisstjórnina í sömu ræðunni.

 

 

Sannleiksást Árna gæti hins vegar verið ættuð úr ranni öfundsýkinnar, að hann sé ennþá svekktur yfir að fá ekki að halda utan um kúbein eyðileggingaraflanna, telji sig jafnvel hæfari til þeirra óþurftarverka.

 

Er jú með reynsluna frá síðustu ríkisstjórn.

 

 

Hvað um það, hver sem hvötin er, þá fór Árni rétt með.

 

Því ber að fagna, ekki svo oft sem formaður Samfylkingarinnar nær í sömu ræðunni að segja eitthvað sem er áþreifanlegt og líka satt.

 

Ef sá Dagur skyldi síðan renna upp að  heilindi fylgdu með í ræðu formannsins, að gagnrýnin byggðist á réttlætiskennd og almennum viðbjóði á Helför frjálshyggjunnar, en ekki kaldrifjun valdasjúklingsins, þá væri full ástæða til að losa tappa úr flösku og skála fyrir endurreisn íslensku félagshyggjunnar.

 

Jafnvel tala um nýja tíma, nýja von.

 

 

 

En höndin sem fæðir, er líka með Árna á fóðrum, sem og flesta  í hans flokki. ´

 

Hafi verið efi eftir 2007, þá hvarf sá efi á vordögum 2009.

 

 

Íslensk stjórnmál eru í gíslinga manna sem engu eyra þegar fólk eða fénaður í hlut.  

 

Þeir skruma allir það sama í stjórnarandstöðu, þjóna auð og fjármagni í valdastólum.

 

Þeir eru aðeins mishlægilegir, og það mat fer eftir húmor fólks, sem og styrk flokkshollustunnar.

 

 

Tappinn mun því áfram í stútnum dvelja sem er eins gott því flaskan er ekki til.

 

 

En hrós fær Árni fyrir að hafa kjark til að gagnrýna það sem hann reyndi svo ötullega sjálfur.  Munur á svona tali eða mjálminu sem barst úr fundasölum VinstriGrænna.

 

Árni Páll er kominn til að vera sem formaður Samfylkingarinnar, og hjörð hans mun stækka eftir því sem ríkisstjórnarþátttakan sígur blóðið úr Framsóknarflokknum.

 

Jafnvel mun Björt Framtíð koma heim þegar reikningar hennar fást ekki lengur greiddir af þeim sem vilja sjá krónur sínar breytast í evrur á kostnað skattpeninga almennings.

 

 

Ég spái að hann verði næsti forsætisráðherra.

 

Það er hin rökrétta niðurstaða hringavitleysunnar.

 

 

Kveðja að austan. 

 

 

 

 

Markmiðið er að skemma

The Final Countdown.

Hægt og hljótt telur ríkisstjórnin niður að sínum eigin endalokum.

 

Afnám gjaldeyrishaftanna verður hennar  banabiti því höftin er ekki hægt að afnema án þess að annað af tvennu gerist, gengið hrynur eða það krónan verður varin með ofurvöxtum og skuldsettum gjaldeyrisvarasjóð.

 

Verðtryggingin leyfir ekki gengishrunið, þjóðin er þegar of skuldsett.

 

 

Vissulega er  til þriðja leiðin, en hún gengur gegn hagsmunum vogunarsjóðanna, kostunaraðilum lykilmanna í Sjálfstæðisflokknum.

 

Menn skera ekki í höndina sem fæðir þá. 

 

Kveðja að austan. 

Bjartsýnn um afnám gjaldeyrishafta

Forgangsmál ríkisstjórnarinnar er ekki!!

Að koma í veg fyrir að heilbrigðiskerfið hrynji í kjölfar þess að síðasti "eldri" læknirinn fari á eftirlaun.

 

Að koma í veg fyrir hrun grunnmenntunar með einkavæðingarillvilja Sjálfstæðisflokksins.

 

Að koma í veg fyrir  að lifandi menning deyi í kjölfar hungurdauða tónlistarkennara.

 

Að þagga niður í Vigdísi Hauksdóttir.

 

Forgangsmálið er að útvega Kínverjum höfn í kjölfar óafturkræfilegra náttúruhamfara loftlagsbreytinga.

Eins og sögnin um ofurgróða fjárfestanna sem fjárfestu í framleiðslu kjarnorkuflauga.  

 

 

Bjáni??  

Nei, nei.

 

Bara Framsóknarmaður.

 

Kveðja að austan. 

Sigmundur: „Mikið í húfi“