Er Sigmundur Davíð bilaður??

 

Þegar hann þykist toppa það sem hann fordæmdi áður??

Niðurbrot almannaþjónustu, skuldaþrælkun almennings!!!

Hann þykist gera betur, og þar með sé það nóg.

 

Hafi hann rétt fyrir sér, þá laug hann sig til valda með meintu níði um Jóhönnu Sigurðardóttur.

Hún sagði aldrei að 2008 yrði 2014, hún sagði að 2008 væri forsenda 2014.

Þá átti að toppa 2008, þá átti að auka svo mikið fé til LSH, að áður hefði aldrei sést, það er frá Hruni.

Vaxtastefnan, 200 milljarða árlega meðgjöfin handa fjármagnseigendum, átti sína réttlætingu í fjárlagafrumvarpinu 2014.

 

Þar sem Sigmundur Davíð þykist ekki vera fáviti, þá hlýtur hann að vera bilaður.

Órök hans eru vel þekkt, ef ég læt vera að vitna í hann þegar hann sagði satt í stjórnarandstöðunni, þá er gott að vitna í þekktustu órök 20. aldar.

Þegar yfirmenn í vinnubúðum þriðja ríkisins, mættu réttlátum ábendingum fulltrúa Rauða Krossins (sem flestir voru frá Sviss) um að daglegur matarskammtur vistmanna væri bein ávísun á hungurdauða innan þriggja mánaða, að þá juku þeir skammtinn, svo hann dugði til að treina líf í fjóra mánuði.

Sem að sjálfsögðu breytti ekki hinu óumflýjanlega.

Endinum eina.

 

Og hvaða fávitatal er það að vitna í einhvern topp frá 2008, þegar síðasta neyðarkallið var sent frá LSH???

Er þetta hin keypta Nígeríu doktorsprófgráða forsætisráðherra??

Vissulega þætti þetta djúp vísindi í bréfaskólum þar suður frá.

En að bulla svona þegar síðustu læknarnir, sem þegar eru alltof fáir, fara í verkfall vegna bágra kjara, en ekki hvað síst, vegna lélegra vinnuaðstæðna sem og óhólegs vinnuálags, þá mætti halda að alvarlega hefði slegið út hjá Sigmundi Davíð.

Að hann væri svo illa haldinn að hann héldi að hann væri afturganga Jóhönnu Sigurðardóttur í stóli forsætisráðherra.

Og þess vegna þyrfti hann að bulla út í eitt.

 

Vissulega skoraði Jóhanna stig hjá hinum trúföstu, og vissulega mun Sigmundur Davíð skora stig hjá sínu fólki, jafnt í hans flokki, sem og hjá hinum óbilandi stuðningsmönnum frjálshyggjunnar.

En það segir allt um hið auma sem knýr áfram íslensk stjórnmál.

Að hreint rugl sé tækt í hinni pólitísku umræðu.

 

Á meðan hrynur grunnþjónustan.

Á meðan verður hinn óbætanlegi skaði unninn.

 

Sem er rökrétt út frá sjónarmiðum frjálshyggjunnar, að tómið sem myndaðist við undanhald almannaþjónustu, verði fyllt með Hraðbrautum þessa heims, en ekki alveg miðað við hina trúföstu sem kjósa Sigmund Davíð vegna þess bókstafs sem hann býður sig fram til Alþingis.

Sem aftur vekur spurningu um hvort bilun ráði ríkjum í stjórnarráði Íslands.

 

Eða lygi.

Sem er hið augljósa svar, en þessi orð hér að ofan voru slegin inn til að benda á annan möguleika sem hvorki er trúverðugur, eða líklegur.

En er mannlegur, hver vill játa að lygarar stjórni landinu.

 

Svona eftir að þau Jóhanna og Steingrímur voru hrakin frá völdum???

Og maður sjálfur tók þátt að vega að ósvinnu þeirra.

 

Ég veit að svarið við spurningunni er Nei, en sú bitra staðreynd er fleinn í holdi þeirra sem áttu þá draumsýn að Hrunið myndi leiða til einhverra breytinga.

Þá er mannlegt að spyrja svona spurninga, og láta það eiga sig að svara þeim.

Svona á meðan vonin lifir um að ljós hárkolla og ljótt dress séu ennþá í hávegum höfð í gamla tukthúsinu við Lækjargötu.

Að forheimskan hafi aðeins skipt um andlit, en ekki yfirgefið sjálft valdasetrið.

Það mætti jafnvel hugsa sér að skýringin á brottrekstri skúringarkvennanna hafi verið sú að þær hafi séð hina meintu mátun og óttast yrði að þær segðu frá.

 

Reyndar ekki líklegt.

En hugsanlegt ef táknið um hina óendalegu litlu stærð óendaleikans er haft til hliðsjónar.

Og maður gefi sér ekki að eitthvað hafi breyst.

Að lygin hafi vikið fyrir hinum algjöra skorti á raunveruleikaskyni.

 

En jafnvel lopinn geri ekki líklegan.

Sigmundur Davíð er í sambandi, og hann veit alveg hvað hann segir.

 

Hann sagði aðeins ósatt þegar hann sagði ætla að vinna fyrir þjóðina, en það er ekki honum að kenna að einhver skyldi hafa trúað honum.

Hvort hann sé illskárri, mun sagan dæma.

 

En lélegur er sá dómur sem gefur ekki lygi falleinkunn.

Og sagan er ekki þekkt fyrir slíka dóma.

Kveðja að austan.

 

 

 

Mestu fjárframlög til LSH frá 2008

Að þekkja sinn eigin barm.

 

Er talið gagnlegt áður en menn tjá sig um annarra.

Til dæmis er ég alveg hættur að tala um stórar bumbur, þó mér hafi verið tíðrætt um þær á yngri árum.

 

Eins ættu stjórnmálamenn að skilja sína ábyrgð á hinni hatrömmu umræðu, áður en þeir leita uppi sakarefni annarra.

Eins ættu þeir að skilja biturðina hjá fólki sem var  neitað um réttlæti eftir Hrunið mikla 2008.

 

Þjóðin var svívirt, hún var rænd, og skilin eftir í skítnum, meðan þeir sem ábyrgðina báru fengu að bjóða uppí annan Hrunadans.

Menn hafa pirrast af minna tilefni, og það er eðli pirrings að leita útrásar, þó ekki í útlöndum ef þjóðin er fámenn og vopnlítil.

 

Ég efa ekki að lekamálið hefur reynt mikið á Hönnu Birnu, og það hafi verið fjölskyldu hennar erfitt.  

Og ég persónulega tel það ekki rök í málinu að hún hafi sjálf átt sína sök hvernig allt þróaðist á verri veginn í þessu leiðinda máli. 

Það afsakar ekki hið persónulega og hið hatramma.

Í raun afsakar aldrei neitt slíkt.

 

En málið snýst í raun ekki um Hönnu Birnu og lekamálið.

Málið snýst um klofna þjóð í herðar niður, þar fólk greinir á grundvallarmál, og er ekki tilbúið að sína nokkra málamiðlun gagnvart andstæðum skoðunum.

Enda er kannski ekki hægt að sætta sum sjónarmið, ætti best sjálfur að þekkja mína afstöðu í ICEsave málinu.

 

En jafnvel hin stóru grundvallarmál skýra ekki heiftina sem blossar uppá yfirborðið með reglulegu millibili.

Hún er eins og glóandi hraunkvika sem leitar uppá yfirborðið, og líkt og að glóandi hraunkvika verður ekki hamin með því að setja tappa í eldstöðvar, að þá dugar ekki svona orðræða eins og Sigmundur viðhefur, til að hemja hina harkalegu þjóðmálaumræðu.

Meðan eitthvað kyndir stanslaust undir bræði fólks, þá leitar bræðin útrás á einn eða annan hátt.

 

Stjórnmálastéttin rauf griðin við þjóð sína þegar hún tók hagsmuni fjármagns fram yfir hagsmuni fólks.  

Það réttlæti sem fólk þó fékk, var fyrir atbeina dómsstóla, ekki vegna frumkvæðis stjórnmálamanna.

Aurinn í fólkið hefur alltaf verið bjálki, þó mörg önnur útgjöldin hafa verið eins og fis.

Og það eiga svo ofsalega margir um sárt að binda.  Fólk missti ekki bara húsnæðið sitt, fyrirtæki féllu, sparnaður gufaði upp.

 

Samt er látið eins og ekkert sé.

Að þjóðin eigi að halda áfram sínu striti þó ekkert sé réttlætið, þó ekkert sé uppgjörið.

Að enginn sé lærdómurinn annar en sá að fólk eigi ekki að vera svona biturt, það eigi ekki að vera svona reitt.

 

Það einfaldlega gengur ekki, það er ekki einu sinni óskhyggja.

Það límir ekki saman það sem hefir klofnað, það sættir ekki þá sem byrðarnar báru við þá sem höfðu allt sitt á þurru.

Ranglætið getur ekki beðið um sátt við gjörðir sínar.

 

Og fögur orð fá því ekki breytt.

Kveðja að austan.

 

Þjóðin læri af lekamálinu

Hann var svartur.

 

Auðvitað var hann sekur.

Eina furðan í málinu er að dómsstólinn skuli hafa talið sig þurfa að hafa vitni.

Til að réttlæta dauðadóm sinn.

Eins og samviskan væri sáttari ef hún gat notað vitnisburð 12 ára gamals barns til að réttlæta réttarmorðið.

 

En stóra furðan er að fréttin skuli snúast um að barnið hafi logið, og hafi núna iðrast á gamals aldri.

Segir eiginlega allt um sjúkleikann sem hefur lagst sem mara á vestræn samfélög eftir að frjálshyggjan fór að ríða þar röftum.

Fólk greinir ekki lengur villimennskuna sem felst í að dæma mann til dauða út frá vitnisburði barns.

 

Þekkt reyndar á miðöldum, sem voru kallaðar svartar, að fólk var brennt vegna slíkra ábendinga, ef sakarefnið snerti kukl eða villu, en ekki talið til eftirbreytni á síðari tímum.

Nema vera kynni í Norður Kóreu og viðlíka löndum.

En núna á 21. öldinni ekki talið fréttnæmt.

 

Það er af sem áður var.

Kveðja að austan.

 

 

 

Sat inni í 39 ár vegna lygi barns

Texas og Ríki Íslams.

 

Keppa um athygli samfélagsmiðla.

Ríki Íslams hefur ákveðna forgjöf, þeir skammast sín ekki fyrir ódæði sín, þeir myrða fólk á veraldarvefnum, á meðan hægriöfgarnir í USA krefja menn um blaðamannskírteini, ef þeir vilja upplifa viðbjóðinn í beinni.

 

Í mörgu öðru má ekki milli sjá.

Ofsóknir gegn öðruvísi fólki knýr hatrið áfram.

Og í Texas þarf að taka tillit til lýðræðisins.  Samdauna kjósendur öfganna þurfa að mæta á kjörstað, á meðan Ríki Íslams þarf aðeins like á sínar síður.

 

Peningavaldið telur hinum auðtrúuðu í trú um að reginmunur sé að illsku hinna skeggjuðu, og þeirra sem þurfa að raka sig áður en þeir bera út hatursboðskap sinn.

Telur hinum auðtrúuðu í trú um að það sé einhver munur á að skera fólk á háls, eða steikja það lifandi í rafmagnsstól, eða sprauta í það vítiskvölum hins banvæna eiturs.

Telur hinum auðtrúuðu í trú um að hin einsleita skeppna haturs og öfga eigi sér mörg andlit, og aðeins hið skeggjaða sé fordæmanlegt, en það sem gengur um í teinóttum jakkafötum græðginnar sé sauðmeinlaust þó gjörðin sé sú sama, hatursboðskapurinn sá sami.  Vegna þess að teinótt jakkaföt séu friðarins tákn eins og hin hvíta dúfa.

 

Því hinir auðtrúuðu eru forsenda ítaka þess og valda.

Þeirra varðstaða tryggir upplausn og átök nútímans.

Tryggir að fjöldinn snúist ekki gegn kúgun hinna örfáu sem kenndir eru við eitt prósentið.

Að fjöldinn fordæmi dýrið í Sýrlandi, en þegi þegar þjónar þess myrða fólk í vöggu hins vestræna samfélags.

 

En öfgar og hatur eiga sér ekki mörg andlit.

Rót illskunnar er sú sama.

Ásjón hennar er ekki háð skeggi Íslams eða sléttrökuðum vöngum hinna teinóttu jakkafata græðginnar.

Hún er alltaf eins, ljót og ógeðsleg.

 

Og ef við notum önnur orð yfir hana, reynum jafnvel að réttlæta voðann, þá erum við samdauna.

Skítug og illa þefjandi.

Og jafnvel hlutleysi frásagnarinnar er blettur á ásýnd okkar.

 

Því ekkert réttlætir morð Ríki Íslams, ekkert réttlætir morð frjálshyggjunnar í Texas.

Peningurinn er sá sami, þó hinir ginkeyptu sjái aðeins aðra hliðina.

Eins og hliðarnar séu tvær.

 

Sem þær eru ekki.

Kveðja að austan.

 

 

Verður tekinn af lífi

Kjarklaus Páfi.

 

Varar við græðgi og óendalegu arðráni á auðlindum jarðar.

Bendir á hið augljósa eins og hver annar siðapostuli.

Líkt og hann hafi ekki lesið ritin sem eru forsenda stöðu hans.

Eins og hann þekki ekki grundvallarforsendu kristinnar trúar.

 

Og bendir því á umbúðirnar en ekki illskuna sem að baki býr.

Hefur ekki kjark að fara gegn peningavaldinu, og hugmyndafræði þess sem gegnsýrir hinn vestræna heim.

Eins og hann óttist útskúfun hins veraldlega valds sem flærðin hefur öll ráð í hendi sér.

Kjarkleysi sem hrjáði annan páfa, á þeim tímum sem flærðin fann sér farveg í öfgum þjóðernisstefnu 20, aldar.

 

Framtíðin er í húfi.

Framtíð barna okkar.

Lífið sem við ólum af okkur er ekki öruggt um að geta alið af sér líf.

 

Skylda páfa er að segja satt.

Að fordæma hina siðblindu græðgi.

Fordæma frjálshyggjuna sem hefur logið að fólki að það eigi ekki að gæta bróður síns.

Að ekkert annað skiptir máli en þess eigin hagur.

 

Frans páfi veit betur en svo að benda á afleiðingarnar.

Hann veit hvað veldur, en kýs að þegja.

 

Og gefur þar með fordæmi fyrir þögnina einu.

Þögnina sem hjúpar alla umræðu um forsendur lífsins.

Og tekst ekki á við óvininn eina sem ógnar tilveru þess.

 

Mannkynið þarf ekki að óttast dómsdag græðginnar.

Frjálshyggjan mun sjá til þess.

Kveðja að austan.

 

 

 

 

 

 

 

 

 

Páfi varar gráðuga við dómsdegi

Frjálshyggjan setti þjóðina á hausinn.

 

Og flokkurinn sem ábyrgðina bar, kann ekki að skammast sín.

Honum var nóg að senda veislustjórann, sem bauð í veisluna, í útlegð.

 

En lítill strákur, í  Harley Davidson leðurgalla gat lesið skammlaust uppúr Litlu Gulu Hænunni.

Og var valinn til að leiða flokkinn þegar vitiborið fólk þraut erindið að verja Geir Haarde.

 

Og strákurinn í leðurgallanum, fann sinn andstæðing.

Stuðning við óhæfu Framsóknarmanna.

Sigmundur Davíð rak, en Bjarni baby sagði á sínu heimili hefðu allar verið reknar, án samninga, án þess að eitthvað ætti sinn rétt..

 

Konurnar sem þrifu voru konurnar án neinna mannréttinda.

Þessi viðhorf kaus þjóðin til að stjórna.

Úr svörtustu forneskjunni hlaut formaðurinn vera kveðinn.

 

Þegar hann býður uppá viðunandi kjör, þá eru eignir vogunarsjóða undir.

Frjálshyggjan segir ekki satt, nema þegar aur býr undir.

 

Og auka aukaatriði hins daglega lífs býr undir.

Milljarðarnir eiga sína sögu.

 

Þeir settu þjóðina á hausinn.

Þeir vilja sína Útrás.

Kveðja að austan.

 

 

 

Eiga að bjóða upp á viðunandi kjör

Þjóðin skal seljast.

 

Í þrotabú hinna amerísku vogunarsjóða.

Á meðan salan fer fram, er Gísla fórnað.

 

Eins og þjóðin sé blóðþyrst, og þarf blóð í stað framtíðar.

 

Þeir sem trúa, þeir trúa öllu.

Á meðan telur pyngja vogunarsjóðanna.

 

Er ekki kominn tími á efann???

Kveðja að austan.

Lögmaður Gísla vék af fundi

Hálfkák ógnar þrotabúum.

 

En hálfkák ógnar líka þjóðinni.

Vil vísa í Feisbókarfærslu okkar hæfasta hagfræðings, Lilju Mósesdóttur;

"Ég er reyndar sammála Steinunni um að 35% skattur sé fullkomlega óraunhæf skattlagning en ekki vegna þess að slíkur skattur rýrir loftbólueignir hrægammasjóðanna. 35% útgönguskattur er ekki nógu hár til að koma í veg fyrir mikla gengislækkun krónunnar og verri lífskjör almennings á Íslandi.".

 

Froðukrónurnar urðu til við fjármálabrask, og eiga ekki nokkra skírskotun í verðmætasköpun þjóðarinnar.

Eru í raun Matadorpeningar og verða því aðeins verðmæti ef þeim er skipt í erlenda mynt, þar sem annað hvort er undir, útflutningstekjur þjóðarinnar, eða stórt erlent gjaldeyrislán, sem lendir að lokum á skattgreiðendum.

 

Fyrsti kafli leikritsins er hafinn, þrotabúin mótmæla hástöfum þessari málamyndaskattlagningu, en skellihlæja bak við tjöldin yfir trúgirni þjóðarinnar.

Þeirra menn í ráðgjafanefnd ríkisstjórnarinnar hafa unnið gott starf, sigurinn er algjör.

Og gjaldþrot þjóðarinnar líka.

 

Tími hinna stóru leikara er framundan.

Kveðja að austan.

 

 

Fullkomlega óraunhæf skattlagning

Ríki Íslams veit sínu viti.

 

Á meðan liðsmenn þeirra nauðga, myrða, pynta, aflífa vantrúaða, selja konur og börn í þrældóm, þá þegir hinn mótmælandi velviljaði vestræni heimur.

Vegna þess að þeir passa sig á tvennu.

 

Að sprengja ekki upp Palestínu Araba, sem eru einu Arabar nútímans sem njóta mannhelgi, það er í augum hinna velviljuðu mótmælenda.

Og þeir teikna ekki skegg á spámanninn.

 

Og fyrir það ber að þakka, fyrir það fyrra erum við laus við að Sveinn Rúnar þurfi að yfirgefa fréttir af berjasprettu, í það seinna losnum við slæma íslensku Alims einhvers sem leiðir félagsskap íslenskra múslima.

Og þeirra líka í hinni velviljuðu mótmælendahreyfingu Evrópu.

 

Og vakni upp efasemdir, hinna rétthugsunda velviljuðu, þá panta þeir aðeins eitt, tvö stykki morð á Vesturbakkanum, og hinir traustu bandamenn öfganna í ríkisstjórn Ísraels munu sjá til þess að Sveinn Rúnar og allir hinir velviljuðu mótmæla drápum á þeim sem má ekki drepa.

Já, sem og allir hinir rétthugsandi í Vestur Evrópu.

 

Vinir Íslams vita sínu viti.

Þegar við forheimskuna er að etja, þá gildir aðeins að halda friði við hana.

Á þessu pössuðu ICEsave þjófarnir sig á, enda er sniðmengi stuðningsmanna þeirra, með yfir 90% samsvörun við stuðningsmenn Hamas á Íslandi.

Fóðraðu heimskuna, og þú munt uppskera frið.

 

Frið við þjóðernishreinsanir, fjöldaaftökur, morð, misþyrmingar.

Þrælasölu kvenna og barna.

 

Þeir vita sínu viti.

Kveðja að austan.

Þögn okkar gjöf til Ríkis íslams

Ærlegur maður, samt ríkur.

 

Í heimi þar sem svínið er orðið eitt helsta tákn auðsins.

Í landi þar sem siðmenningin er að hrynja í frumeindir sínar.

Finnst ríkur maður sem kyrjar Traustur Vinur á kvöldin, eftir farsælan gróðaferil á daginn.

 

Er hann undantekning, jafnvel kraftaverk??

Hinn beitti skurðarhnífur tímans mun kryfja þá spurningu áður en langt um líður.

Þegar lokakallið um mönnun varnarvirkja mennskunnar verður sent út.

 

Hverjir munu verja lífið?

Gegn hatursboðskap heiftarinnar sem vellur úr fúlum pyttum frjálshyggjunnar.

Gegn illviljanum sem ætlar sér að þurrka út alla framþróun nýaldar og færa mannkynið aftur á tíma hina myrku miðalda.

 

Í stríði sem kennt verður við forsetakosningarnar 2016.

Í stríði sem enginn getur verið hlutlaus í.

Í stríði sem markar upphaf.

 

Upphaf sem aðeins tíminn veit.

En snertir okkur öll.

Til góðs eða ills.

Kveðja að austan.

Einn ríkasti maðurinn hefur búið í sama húsinu síðan 1958