Loksins, loksins ratar satt orð af munni.

 

Formanns Félags Múslima á Íslandi.

Það er rangt að kalla þá fasista sem eru ekki fasistar.

Saudar er ekki frekar fasistar en Ivar grimmi, Genghis Kahn, eða Lúðvík 14, svo ég nefni til nokkra stjórnsama samtímamenn þeirra.

 

Fasismi er stjórnmálastefna sem þróaðist á 20. öldinni, út frá ákveðnum straumum í pólitískri gerjun 19. aldar.

Þess  vegna geta miðaldamenn aldrei verið fasistar, þó ákveðin líkindi megi finna með stjórnarháttum þeirra og þess sem einkennir fasismann.

Quinn keisari var ekki kommúnisti, þó alræði hans og ofríki væru mjög í anda Stalíns, enda þó nokkuð margar aldir á milli, og Quinn kom á undan.  Frekar má segja að Stalín hafi verið Quin-isti, og ef menn vilja halda áfram með svona samanburð milli ólíkra tímaskeiða, þá má segja að fasistar hafi verið Islamistar, sökum stjórnarhátta þeirra og ofríkis.

En marklaus samanburður, líkindi eru ekki það sama og að vera eins, við erum ekki fílar þó við séum með fjórar fætur.

 

Prik fyrir formanninn að leiðrétta Salman, en óþarfi í framhaldinu að skítyrðast út í hann, þó hann hafi vogað sér að benda á hið augljósa.

Að enginn siðaður maður kemur nálægt Saudum, eða þiggur af þeim fé.

Það gera menn samseka kúgun og algjörum viðbjóði.

Samsekt sem formaður Félags múslima á Íslandi er svag fyrir.

 

Annað prik fær formaðurinn fyrir að leiðrétta lygar sínar frá því í gær, þegar hann kom ofan af hærri fjöllum en Steingrímur þegar hann afneitaði eftirlaunafrumvarpinu sem hann samdi með Davíð Oddssyni, hann játar núna að þreifingar hafi átt sér stað. 

Að gjöf Sauda hafi ekki komið eins og þruman úr heiðskíru lofti, beðið hafi verið um peninga, og meira að segja búið að fá samþykki fyrir þá innspýtingu í íslenskt efnahagslíf.

Sem aftur vekur upp spurningu, hví í fjandanum kannaðist hann ekki við það í gær.

 

En batnandi manni er best að lifa.

Vonandi verður framhald þar á.

Kveðja að austan.

 

Rangt að kalla menn fasista

Jæja, nú eru Saudarnir alltí einu orðnir ljótu kallarnir.

 

Svo sem löngu tímabært að einhver innvígður kveði upp um það.

Þó það væri ekki nema vegna þess að miðaldamenn eru tímaskekkja í nútíma.

Næsta rökrétta skrefið er að krefjast þess að vestrænum moskum sem reistar hafa verið fyrir Saudískt fjármagn, verði lokað, og kennimenn þeirra séu sendir heim til sín.

 

Það er nefnilega mikill misskilningur að þó tímatal múslima gefi upp einhverja miðaldadagsetningu, að þá sé Islam miðaldatrú og Íslamistar hafi rétt á að endurreisa hinu fornu miðaldir í vestrænum samfélögum.

Islam hefur þróast eins og kristin trú og aðlagast nútímanum ákaflega vel, kannski mega reyndar síðustu tvö orðin vera innan gæsalappa.

Islam glímir hins vegar við öfgastefnur, alveg eins og kristin trú, og líkt og auðmenn fjármagna trúarofstækismenn í Bandaríkjunum, þá fjármagna Saudar öfga innan Islams, og þar sem Saudarnir eru þeir einu sem fjármagna útþenslu Islams, þá er ásýnd hennar öfgafull, forneskjuleg, og í andstöðu við alla nútímahugsun.

 

Og alveg tímabært að horfast í augu við það, og alveg tímabært að orða þau sannindi sem Salmann Tamimi á heiður skilið fyrir að orða.

Nema Saudi Arabia er ekki fasistaríki, því fasisminn er afsprengi nútímans, en Saudar hafa aldrei komist svo langt.  Hjá þeim er nefnilega árið 1436, ekki samkvæmt tímatali múslima heldur eftir gregoríanska tímatalinu.  Þeir hafa ekki þróast í 600 ár.

Vona samt að Salmann fái ekki kárínur fyrir, en ef svo er, þá er hugsanlegt hvort ekki mætti samnýta gæsluna með öðrum Salman, og spara þannig pening skattborgaranna.

 

En þetta var ekki tilefni þessa pistils, þó puttarnir hafi tekið völdin og vilja þakka það sem þakkarvert er hjá hugrökkum manni að slá á höndina sem fæðir, mættu fleiri taka upp þá iðju.

Heldur var ástæðan gárungaskapur því fyrsta hugsun mín var þegar ég las þessi orð, var hvenær verður það sagt um ríki Hamas á Gasasvæðinu.

Miðaldamenn, fjármagnaðir af Saudum, engu skárri en rótin sem nærir þá.

 

Hvenær verður sagt satt um þá líka??

Kallar ekki einn sannleikur á annan?

Kveðja að austan.

Þiggja ekki gjafir „fasistaríkis“

Að leika bjána svo vel sé er ekki öllum gefið.

 

Og sú gjöf hefur ekki verið gefin formanni Félags múslima á Íslandi.

Þekkir greinilega ekki til sagnarinnar um grænu baunirnar, sem er grundvallarsögn sem allir sem stunda bjánafræði þurfa að kunna skil á.

 

Hugsanleg skýring á vankunnáttu formannsins eru þeir silkihanskar sem ESB-fylkingin á Rúv notar þegar formaðurinn afhjúpar þekkingu sína í fréttaviðtölum stofnunarinnar.

"Liðsmenn Ríki Íslams eru að uppstöðu úr röðum fyrrum fylgismanna Saddam Husseins", sem er mjög athyglisverður fróðleikur í ljósi þess að Íslamistar voru aflífaðir hvar sem náðist til þeirra innan landamæra Íraks, og "örfáir geðsjúklingar standa að baki hryðjuverkum gegn almennum borgurum", sem hljóta þá að vera í bullandi yfirvinnu þar sem títuprjónarnir sem tákna hryðjuverk Íslamista þekja heilu landsvæðin á landakortum svo vart má sjá aðrar upplýsingar sem þar koma fram.

Rúv útvarpaði bullinu athugasemdarlaust, í stað þess að kveikja rauð aðvörunarljós hjá formanninum að hann gæti ekki sagt hvað sem er, án þess að rökleysa hans yrði afhjúpuð.

 

Núna er formaðurinn meint hissa, lætur eins og hann þekki ekki til að Saudar og Katar fjármagni útþenslu öfgatrúar sinnar í vestrænum löndum, sem og annars staðar þar sem Íslamsistar hafa skotið rótum.

Viti ekki að fyrst kemur fjármagn frá öfgum, svo kemur moskva, síðan koma öfgar, og lokastigið er stór hópur ungs fólks sem er tilbúið að myrða samborgara sína í nafni trúar sinnar.

Og það sem meira er, það er ekki um aðra utankomandi fjármögnun að ræða.

 

Yfirklórið er síðan algjört þegar formaðurinn játar að hafa rætt við Saudana, en skilji svo ekkert í að þeir hafi skilið það sem hann sagði, að örfáar hræður sem eiga ekki bót fyrir boruna á sér, hafi enga burði til að reisa byggingu sem sæmir trú þeirra.

Fátæklingar reistu ekki dómkirkjur Evrópu eða musteri Hindúa.

Og þeir reisa ekki mosku í Reykjavík, nema til komi utanaðkomandi fjármögnun.

Þegar niðurstaða samtalsins, árangurinn sjálfur, liggur fyrir, þá kannast formaðurinn ekki við eitt eða neitt.  Er steinhissa, og hefur vart haft tíma til að úthugsa upp skilyrðin svo hann náðarsamlega geti veitt hinum meintu óumbeðnu peningum viðtöku.

 

Og trúi því hver sem trúa vill.

Sumar lygar eru best ósagðar.

Kveðja að austan.

 

 

 

 

 

Vissi ekki af fjármagninu

Hver refsar fátæku burðardýri??

 

Annar en sá sem nýtur ávinnings af ofurgróða eiturlyfjaviðskipta.

 

Fáviska og forheimska er sjaldnast genetísk, má oftast rekja til fjárhaglegs ávinnings.

Þess vegna eru frjálshyggjumenn eins og þeir eru.

Þess vegna eru burðardýr dæmd á meðan rótin er látin í friði.

 

Vammlausir eru örugglega þeir sem dæma, en þeim er treyst fyrir að snerta ekki fjárflæðið sem fóðrar lögfræðingastéttina ásamt öðrum þeim sem eiga velmegun sína undir að skipulögð glæpastarfsemi njóti friðar og öryggis, hvort sem það eru eiturlyfjahringir, vogunarsjóðir, vændissalar, eða almennir fjárglæpamenn sem hirða gróðann af sýndarviðskiptum sínum en skilja skuldir sínar eftir á gjaldþrota kennitölum.

Og meðvirkir eru þeir sem skrifa og birta svona frétt án þess að spyrja af hverju er vatnsbunan dæmd en ekki þeir sem skrúfuðu frá krananum?  Hvað þá þeir sem höfðu hag af því að skrúfað væri frá vatninu sem eyðilagði innbú og önnur verðmæti.

 

Það er sorglegt að lesa svona frétt, að hið skítuga fjármagn sé ósnertanlegt. 

Ef það aðeins passar sig á að fæða þá sem einu sem voru fengnir til að verja lög og rétt.

Og samdauninn slíkur að allir líta í hina áttina.

 

Skilja svo ekkert í að heimurinn er eins og hann er.

Kveðja að austan.

Eitt ár fyrir kókaínsmygl

Jæja, er Ólafur loksins orðinn elliær??

 

Svona í ljósi þess að hryðjuverkaárásin á Tvíburaturnana var fjármögnuð af Saudum.

Og Saudar fjármagna Ríki Íslams, reyndar ásamt trúbræðrum sínum í Kadar.

Sem og þeir fjármagna allar rætur öfgahyggju vestrænna múslima, öfgahyggju sem á rætur langt aftur í aldir.

Í miðaldahyggju sem er löngu liðin nema í ríki Sauda.

Vissulega eru Saudar ríkir, en þeirra fé er blóðpeningar, svartnætti hins versta sem sagan ein átti að geyma.

 

 

Það er til lítils að gráta hryðjuverkaárásir, en bjóða velkomna rótina sem nærir þær.

Forseti Íslands er létt sama.

Hann hefur ekkert lært af síðasta skriðinu sem hann skreið fyrir aur hinna ofurríku.

 

En það afsakar ekki afskiptaleysi okkar.

The hard way er ekki forsenda lærdómar.

 

Það er ekki sama hver á aurinn.

Kveðja að austan.

Sádi Arabar styrkja byggingu mosku

Er Sjálfstæðisflokkurinn skjólvörn skattaundanskotsmanna??

 

Er flokkurinn í herferð gegn skattrannsóknarstjóra??

Er skattaundanskotslistinn jarðsprengjusvæði fyrir kvótakerfið??

Mun Stóra ferðatöskumáli fella Bjarna.

Mun Brynjar Níelsson þurfa að segja af sér vegna hótana við opinberan embættismann sem reynir að afla gagna um skattalagabrot íslensks auðfólks??

Kemur nafnalistinn sér illa við eigendur Morgunblaðsins??

 

Þessar spurningar og fleiri koma upp í huga manns eftir hina ótrúlegu atburðarrás síðustu daga eftir að Bjarni Benediktsson fjármálaráðherra mætti pirraður í viðtal á Ruv og missti úr sér klaufaleg ummæli um eimbætti skattrannsóknarstjóra, ásamt því að gera gárungum færi á sér með því að myndlíkja vandann við að útvega nafnalistann við stóra ferðatösku, fulla af seðlum.

 

Víkjum fyrst af því sem Bjarni sagði, vitnum í frétt Mbl.is.

 

Mér hef­ur þótt þetta mál vera að þvæl­ast hjá embætt­inu alltof lengi og að ekki hafi allt staðist sem þaðan hef­ur komið,“ seg­ir Bjarni við RÚV. „Eins og til dæm­is þegar embættið fær­ir þær upp­lýs­ing­ar í ráðuneytið að gögn­in standi til boða fyr­ir til­tekna hlut­falls­fjár­hæð af inn­heimt­um skatt­tekj­um sem myndi leiða af upp­lýs­ing­un­um. En eitt­hvað allt annað kem­ur í ljós síðar. Og auðvitað get­ur það ekki komið til greina að við ætl­um að fara að greiða fyr­ir gögn af þess­um toga með ferðatösk­um af seðlum til ein­hverra huldu­manna.“.

 

Mér persónulega fannst þetta fyndið, og fyrst ég blogga alltaf í viku, þegar ég á annað borð byrja að blogga,til að sjá stöðuna á topptíulistanum þá ákvað ég að gera þessi kostulegu ummæli Bjarna um ferðatöskuna að þemaefni vikunnar.  Enda næstum óendanlegir fletir til að velta sér uppúr því.  Eins tók ég eftir því að íhaldsbloggurum var svo lítið skemmt, að þeir þögðu allir sem einn, með einni góðri undantekningu sem fjallaði á málefnalegan hátt um að ekki væri víst að svona gögn kæmi að gagni, og rakti gang mál í sambærilegu dæmi frá Þýskalandi.  Góð grein eins og oft áður hjá þeim bloggara, og maður varð fróðari á eftir.

 

Skattrannsóknarstjóra var hins vegar ekki skemmt, og hún er ekki hrædd við Bjarna, sem er ekki skrýtið eftir Umboðsmaður Alþingis flengdi Hönnu Birnu.

Á þriðjudaginn sendi hún frá sér fréttatilkynningu þar sem skýrt kom fram hverjum tafirnar væri að kenna.  Bjarna og ráðuneytinu hans.

 

Að minnsta kosti annað þeirra tveggja skil­yrða sem fjár­mála- og efna­hags­ráðherra setti fyr­ir kaup­um á gögn­um um meint skattaund­an­skot ís­lenskra fé­laga telst ekki upp­fyllt og end­ur­skoða þarf hitt. Ráðuneytið hef­ur ekki svarað bréfi skatt­rann­sókn­ar­stjóra frá 27. janú­ar um hvort halda eigi áfram með málið.

Skil­yrðin tvö voru ann­ars veg­ar að ekki yrðu gerðir samn­ing­ar við aðra en þá sem „til þess eru bær­ir“ og hins veg­ar að mögu­legt væri að skil­yrða greiðslur til selj­enda gagn­anna við hlut­fall af inn­heimtu.

 

 

Eðli málsins vegna uppfylla þessi gögn ekki þessi skilyrði þar sem þau eru uppljóstrun í ágóðaskyni.

Að setja skilyrði sem ekki er hægt að uppfylla er þekkt aðferð til að svæfa mál, og ef einbeittur vilji er hjá viðkomandi stjórnsýsluembætti að láta ekki málið svæfast, þá er lengi hægt að þæfa málið fram og til baka, á meðan listamenn geta gert ráðstafanir um varnir.  

Skattrannsóknarstjóri á erfitt um vik að fara gegn yfirmanni sínum, en þegar að ráðherra lætur svo lítið að kenna honum um að þófið, þá á skattrannsóknarstjóri aðeins 2 kosti í stöðunni, að svara fyrir sig, eða segja af sér líkt og Lögreglustjórinn í Reykjavík gerði.

 

Vörn Bjarna fólst fyrst í að segja að "þetta aldrei hafa verið ófrá­víkj­an­legt skil­yrði, held­ur ein­fald­lega árétt­ing um að ráðuneytið styddi embættið í því að sækja gögn­in með þess­um hætti" en Bjarni komst fljótt að því að jafnvel auðtrúustu flokksmenn hans gátu ekki fundið flöt á lógíkinni í hundalógíkinni.

Nauðvörn hans fólst því í afdráttarlausri yfirlýsingu; sem sett var fram með stríðsletri í frétt Mbl.is, sem ég næ vonandi að kópera, því fyrirsögin var svo flott; 

Bjarni: Ekk­ert skatta­skjól hjá mér.

Teningunum kastað, hann ætlaði ekki lengur að þvælast fyrir.

 

Þar með átti málið að vera komið í farsælan farveg fyrir Bjarna og flokkinn, og á leið þess um stjórnkerfið var örugglega hægt að finna ýmsa steinana til að hnjóta um.

Ummælin um ferðatöskuna, og hin 8 mánaða töf myndi gleymast ef gögn kæmu heim.  Það yrði bara tuð að minnast á slíkt á sigurstund.

 

En það gerðist eitthvað sem er óskiljanlegt, nema maður fari virkilega að taka mark á því að flokkurinn þoli ekki birtingu nafnalistans.

Ágætur íhaldsbloggari, einn sá altraustasti hér á Moggablogginu, fann þann flöt að ríkið gæti ekki verið að kaupa ólögleg gögn með þeim hætti að ekki stæðist lög um útgáfu reikninga og innheimtu virðisaukaskatts.

Og alltí einu var þögnin rofin, hver um annan héldu menn ekki vatni yfir slíkri ósvinnu.  Laga og reglna skyldi gæta, menn styrktu ekki þjófa, og svo framvegis.

Flokkurinn átti sem sagt að vera skattaskjól fyrir vini sína og velunnara.

 

Bjarni fékk ekki að ná stjórn á málinu, koma því út úr hinni neikvæðu umræðu sem klaufaskapur hans bar ábyrgð á, og leiða það farsællega til lykta, bæði fyrir þjóð og flokk.

Og ganga svona gegn formanninum er ekki gert nema miklir hagsmunir máttarstólpa eru í húfi.

 

Ég fékk þá athugasemd við einhvern stríðnispistil minn, að ef það kæmi í ljós að nöfn kvótahandhafa væri á þessu lista, þá væri eðlileg viðbrögð samfélagsins að svipa þá kvótaréttindum sínum.

Veit nú ekki alveg, en ég veit að spjótin myndu standa bæði á viðkomandi kvótaeigendur, sem og kerfið sem gerði þeim fjárbrask sitt kleyft.

Nefni þetta sem dæmi, margir aðrir hagsmunir gætu legið undir.

 

Vissulega aðeins pælingar, en þegar þingmaður hótar til að stöðva skattrannsókn, þá er ljóst að eitthvað mikið, mikið mikið er undir.

Brynjar Níelsson er ekki lengur lögmaður útí bæ að tjá sig, hann er þingmaður stjórnarflokks, og það segir, verður að skoðast í því ljósi.

Hann er hvorki ég eða þú lesandi góður.

Hann er sendiboði, sem hefur vald til að standa við hótanir sínar.

 

Ætla ekki að hafa þetta lengra.

Hef ekki tíma til þess, en það hefði verið gaman að hnykkja á hinni bráðfyndnu málsvörn hinna alheilögu sem vilja ekki að hróflað sé við skattsvikurum ef prinsipp þeirra er í húfi.

Vil aðeins nefna að ríkisvald gerir ýmislegt sem við hin megum ekki.

Það til dæmis skýtur fólk á færi, ef það telur aðstæður krefja svo, það hlerar síma okkar, og svo framvegis.  

Og útí hinum stóra heimi eru sérstakar stofnanir um svona starfsemi, kallaðar leyni eitthvað.  Þar vita menn að þjóðríki þurfa að verja sig gegn ytri sem innri ógnum.

Vissulega má ræða prinsipp rök hinna alheilögu, en þegar prinsipp þeirra dúkka aðeins þegar hagsmunir hins skítuga fjármagns eru í húfi, þá er ekki orðum eyðandi á rökfærslu þeirra.

 

En nóg í bili.

Góða fótboltahelgi.

Orðið er laust, líka fyrir aulahúmora.

Ég verð ekki á vaktinni.

Kveðja að austan.

 

Skálkaskjól glæpamanna.

 

Er sá banki sem stofnar útibú í skattaskjóli.

Það er tilgangur stofnun útibúsins, að varðveita illa fengið fé, að þvo illa fengið fé, að veita illa fengnu fé skattahjálp.

Og það er aðeins glæpafólk sem skiptir við slíka banka.

Skiptir engu þó taglhnýtingar þess í stjórnmálastétt hafi gert marga fjárglæpi þess löglega með Tortillum sínum, aflandsfélögum og svo framvegis.

 

HSBC bankinn er alls ekki undantekning, það er enginn heiðarlegur banki í þessum bransa, ekki frekar en það er til heiðarlegur maður í eiturlyfjasölu.  

Við erum bara svo samdauna hugmyndafræði frjálshyggjunnar í þágu fjárglæpafólks, að teljum orðið hið afbrigðilega vera hið eðlilega, að löggjöfin leyfi allskonar ófélögum, kennd við eignarhald, afland eða ekkert land, að eiga og reka fyrirtæki í þeim eina tilgangi að skjóta fjármunum undan.

Ófélög, sem eiga heima í skúffum og eru ekkert annað en kennitalan.

.

HSBC bankinn var aðeins óheppinn, það eina sem fjárglæframenn geta ekki keypt, það eina sem þeir geta ekki varist, er græðgin sem sér fjárvon í að koma uppum þá.

Forsenda rannsóknar rannsóknarblaðamannanna sem afhjúpuðu HSBC bankann voru illa fengin gögn í auðgunarskyni svo ég vitni orðrétt í Brynjar Níelsson, þingmann Sjálfstæðisflokksins, sem notaði þessi orð til að hóta skattrannsóknarstjóra fangelsisvist ef hún vogaði sér að koma upp um velunnar og fjárhagslega bakhjarla flokksins.

Og blaðamaður Morgunblaðsins setti af smekkvísi sinni sem fyrsta link við þessa frétt.

 

Hótanir um fangelsisvist er síðasta úrræði fjárglæpamanna, að stjórnmálamenn í vasa þeirra séu nógu öflugir til að geta beitt réttarkerfinu til að þagga niður í þeim sem nýta sér illa fengin gögn í auðgunarskyni til að koma upp um fjárglæpi og fjárglæpamenn.

Þekkt er dæmið þegar Þorsteinn Pálsson, þáverandi sjávarútvegsráðherra hótaði þeim sjómönnum sem segðu frá brottkasti, málssókn og fangelsisvist, er þeir segðu frá.

Hótun sem stöðvaði ekki brottkast, en stöðvaði opinberar frásagnir af því athæfi.

 

Íslenskir stjórnmálamenn hafa ekki nýtt eignarhald sitt á bönkum eftir Hrun til að rannsaka íslensku skálkaskjólin.

Íslenskir rannsóknarblaðamenn hafa ekki reynt að svipta hulunni af þeirri starfsemi.

Enda fara menn ekki gegn hendinni sem fæðir þá.

 

En Stóra ferðatöskumálið hefur gjörbreytt landsslaginu á örfáum dögum.

Einstaklega klaufaleg ummæli fjármálaráðherra hafa séð til þess að allt í einu fann stjórnarandstaðan rýtinginn sem nær inní valdahjarta Sjálfstæðisflokksins.

Eina spurningin hvort valdaþráin nái að yfirvinna sælutilfinningu fóðurgjafarinnar, því ekki er víst að höndin sem fæðir, haldi áfram að fóðra.

 

Í næsta pistli, sem ég ætla að slá inn áður en ég held á vit knattspyrnuævintýra, mun ég fjalla nánar um kviksyndið sem fjármálaráðherra kom flokk sínum í.

Því ef ekki tekst að þagga niður í skattrannsóknarstjóra, með hótuninni um að láta ríkislögreglustjóra handtaka hana, og ef á listanum séu raunverulega nöfn sem koma flokknum illa (af hverju annars þessi grímulausa hagsmunagæsla??), og vegna forsögu málsins, þá er fullt tilefni fyrir rannsakendur, eins og ríkissaksóknara og umboðsmann Alþingis, að rannsaka afskipti flokksins af eðlilegri stjórnsýslu.

Fordæmið er komið, set-uppið með Hönnu Birnu gæti orðið að búmmerang sem að lokum felldi Bjarna.

 

Og þá, og þá, verður allavega ekki gaman að vera íhaldsbloggari á Moggablogginu.

Skítugur upp að öxl að verja hið óverjanlega.

 

Hver skyldu þolmörkin annars vera?

Kveðja að austan.

Glæpamenn fundu skjól hjá HSBC

Verður hann ekki bara með fjármálaráðgjöf á Hrauninu?

 

Vanur maður, fúsir nemendur.

 

En án djóks, eðlilega bregður mönnum í brún að þurfa að taka ábyrgð á gjörðum sínum.

En þegar menn leggja allt undir í lífróðri sínum, og tapa, þá er ekki við öðru að búast.

Og fátt annað um málið að segjan.

 

Annað en að réttarkerfið virkar.

Sem sannast endanlegar þegar verðtryggingin verður dæmd ólögleg.

 

Sá dagur kemur.

Kveðja að austan.

Dómurinn kom Sigurði á óvart

Taglhnýtingur skattaskjólsmanna tjáir sig.

 

Sem þýðir að öllu er tjaldað til, jafnvel trúverðugleiki Brynjars Níelssonar er fórnað svo að skattaþjófar þurfi ekki að standa skil gjörða sinna.

Eitt hvað það er aumkunarvert að lesa pistla mætra íhaldsbloggara sem telja það ósvinnu að skattaundanskotsmenn séu felldir á sínu eigin bragði, með inside upplýsingum sem eðli málsins vegna geta aldrei verið löglegar fengnar.

Því stjórnmálamenn í vasa skattaglæpamanna, sem og annarra fjárglæpamanna setja lögin.

Frjálshyggjan varð ekki til úr engu, hún fjármagnaði sig ekki sjálf, ekki frekar en voðamennirnir í Ríki Íslams.

Aur og króna er þar alltaf að baki.

 

Brynjar naut þess þó að hafa koma nýr inn, líkt og sálufélagi hans Vilhjálmur Bjarnason, og þeir gegndu því hlutverki að láta svo líta út að Sjálfstæðisflokkurinn hefði lært af Hruninu, að tengsl hans við fjárglæframenn væru ekki normið, heldur væri pláss fyrir gagnrýna menn.

En þegar mikið liggur við, líkt og þekkt er úr glæpasögum Colins Forbes, þá afhjúpa sofandi eigentar sig þegar húsbóndinn sendir inn lykilorð.  Þekkt dæmi úr sögu sovéskrar árásarstefnu.

Og Brynjar kom í ljós.

 

Sagði að skattrannsóknarstjóri færi í fangelsi ef hann keypti gögnin um húsbændur sína.

Vissulega er aumt að vera stuðningsmaður Sjálfstæðisflokksins, þegar fjárglæpamenn stýra þingmönnum og ráherrum flokksins líkt og leikbrúður væru.

En samt, að kaupa þessi rök, það gerir aumingjagreyin í VinstriGrænum að englum í þessum samburði.

Illt er að vera hálfviti til að geta kosið valdaflokk.

 

Skattaglæpamenn, fjárglæpamenn eiga stjórnmálamenn, og ekki neitt sérstakt leyndarmál að þeir eiga þingmenn Sjálfstæðisflokksins, en þessir sömu þingmenn geta ekki hótað embættismönnum þjóðarinnar, að þeir verði ákærðir ef þeir ganga gegn glæpnum.

Hinir keyptu stjórnmálamenn geta sett lögin, þeir geta reynt að hindra framgang réttvísarinnar líkt og frægt var í lekamálinu, en þeir geta ekki keypt lýðræðið, allavega ekki ennþá.

Þegar lögin eru hliðholl fjárglæpamönnum, þegar endurskoðendur og lögfræðingar eru keyptir, þá ógnar ekkert starfsemi þeirra, nema eitt.

Það eitt að einhver sjái sér fjárvon í að koma upp um þá.

 

Sem er aldrei löglegt, þarf ekki að ræða það.

En virkar, bæði sem forvörn, sem og að láta fjárþjófa sæta ábyrgð gjörða sinna.

 

En virkar ekki til fulls, nema hinir keyptu þurfi líka að svara til saka.

Bjarni bar að sér sakir.

 

En aðrir tóku upp keflið.

Og Mogginn spilar með.

 

Sem aftur vekur upp spurningar um listann sem er til kaups.

Skyldi kvóti hafa slysast í skattaskjól??  

 

Veit ekki, en viðbrögð Moggans eru furðuleg.

Það stóð ekki í hausnum að hann væri blað undanskotsmanna og skattaþjófa.

 

En samt, fréttin talar.

Kveðja að austan.

Sætir það fangelsi að kaupa gögnin?

Réttur glæpamanna til réttlátrar málsmeðferðar.

 

Er grundvallarhornsteinn málflutnings glæpamannalögfræðinga þegar þeir hindra dóma yfir skjólstæðingum sínum.

Þess vegna eru aðeins leigumorðingjar mafíunnar dæmdir, þess vegna er aðeins skúringarkonan ákærð þegar fjármálaglæpir eru annars vegar.

Þess vegna þrífst ekki skipulögð glæpastarfsemi, hvort sem það er eiturlyfjasala, mansal og vændi, eða fjárglæfrar hvítflibbanna, nema að glæpahyskið fjárfesti í lögfræðingum og dómurum sem túlka lögin, og stjórnmálamönnum sem glæpaviðmiða alla löggjöf.

Glæpaviðmiðuð löggjöf er löggjöf þar sem glæpamenn, það er ef þeir eru skipulagðir og stórtækir, komast upp með glæpi sína og misgjörðir.

 

Þessi frétt Mbl.is er síðasta nauðvörn góðvina fjármálaráðherra, að vitna í glæpaviðmiðaðan hollenskan dóm þar sem skattaglæpamenn sluppu því þeir höfðu ekki skrifað fyrirfram uppá leyfi að upp um þá yrði komið.

Klassískur dómur glæpaviðmiðaðs réttarkerfis þar sem réttur glæpamanna er algjör, en samfélagsins sem þeir mergsjúga, enginn.

 

Og eitthvað lektor grey er fengið til að kvitta uppá viskuna.

Að samfélagið megi ekki takast á við skipulagða glæpastarfsemi.

Og keyrir sjálfsagt heim á nýjum bíl fyrir greiðvikið.

 

Afhverju gat Morgunblaðið ekki tekið fjármálaráðherra trúanlegan þegar hann sagði að embætti hans væri ekki skattaskjól fyrir góðvini hans?

Og leyft síðan Bjarna að svæfa málið í friði.

Af hverju þarf að toppa dæmisöguna um ferðatösku fulla af seðlum?

Var ekki aulahátturinn nægur fyrir??

 

Sjá menn ekki að ef glæpamannalögfræðingar geta frýjað skjólstæðinga sína refsiábyrgð, með tilvísun í einhverja ólöglega öflun gagna, formsatriði, liti á réttarskjölum, eða öðru því sem glæpamannalögfræðingar komast upp með í glæpamannaviðmiðuðu réttarkerfi, þá só bíí it.

Þá er eitthvað alvarlega mikið af löggjöfinni, hagsmunaaðilar glæpa og fjársvika hafa þá of lengið komið að samningu hennar, og því er mjög einfalt að kippa í liðinn.

Með því að afglæpamannavæða löggjöfina, og gera atferli glæpamannalögfræðinga refsiverða.

Lögsækja skattsvikarana aftur, og það afturvirkt.

Keyptir lögfræðingar, keyptir stjórnmálamenn, keypt löggjöf á ekki að vera þeirra skjól.

 

Þar fyrir utan má leita fordæma hjá Sámi frænda fyrir vestan.

Morð, eiturlyfjasala, melludólgsháttur, fjárhættuspilasvindl, allt þetta hefðbundna sem mafían gerir, máttu glæpamannalögfræðingarnir nýta alla sína lagakróka til að fá glæpahundaskjólstæðinga sína sýknaða.

En þegar tekjur ríkisins voru annarsvegar, þá var eins gott að bókhaldið væri í lagi, og skattsvikarinn naut ekki vafans.

Þess vegna var Al Capone dæmdur fyrir skattsvik, ekki þau ótal morð og aðra glæpi sem hann bar ábyrgð á, og gjörspillt réttarkerfi lét hann komast upp með.

Og sama má segja um aðra þá mafíuforkólfa sem hafa hlotið dóm þar vestra, skattsvik urðu þeim flestum að falli.

Þar nutu þeir ekki réttlátrar glæpamannamálsmeðferðar.

 

Frjálshyggjustjórnmálamenn okkar dýrka vestrið.

Það væri stílbrot er þeir hundsuðu þetta fordæmi þess.

 

Nauðvörn góðvina Bjarna, þó keypt væri inní Morgunblaðið, er því prump eitt.

Mogganum til skammar, hinu akademísku húsi sem hýsir lektorinn til vansæmdar.

Og Bjarna til óþurftar.

 

Því Bjarni lýsti því yfir að hjá honum ætti góðvinir ekkert skattaskjól.

Og hvað sem sagt verður um þennan ættarlauk Engeyjarættarinnar, þá er hann maður orða sinna.

 

Það mætti halda að Mogginn væri kominn í stjórnarandstöðu.

Líkt og kvótagróðinn væri á listanum illræmda.

Það er illræmda fyrir þá sem hafa eitthvað að fela.

 

En ég trúi því ekki.

Það er þetta með Moggann.

 

Næsta frétt verður í þágu þjóðarinnar.

Og Bjarna.

 

Sanniði til.

Kveðja að austan.

 

 

Tvöfalt siðgæði skattyfirvalda