Báknið burt.

 

Hefur verið stefna Sjálfstæðisflokksins í áratugi, og miðað við umfang regluverksins og allra þeirra hindrana sem skrifræðið setur almenningi og fyrirtækjum hans, þá mætti halda að Sjálfstæðisflokkurinn hafi verið útlagaflokkur í íslenskum stjórnmálum.

Verið svona síðast í stjórn uppúr miðri síðustu öld.

Báknið burt er samt slagorð hans og þingmenn hans kópera grein eftir grein, ár eftir ár, áratug eftir áratug, og svo er komið að enginn man hver samdi þá fyrstu sem allar hinar byggja á.

 

Sigmundur Davíð kastar sér á þessa hringekju, réttilega, og bendir á hinn bitra raunveruleika sem hamlar og heftir sköpunarkraft þjóðarinnar, er kyrkingaról á alla athafnasemi fólks.

Hann bendir réttilega á "hve íþyngj­andi "báknið" væri orðið fyr­ir lít­il og meðal­stór fyr­ir­tæki í land­inu og sagði að slík fyr­ir­tæki hafi nú þegar verið í vanda stödd áður en heims­far­ald­ur kór­ónu­veiru skall á.".

Regluverkið er svo flókið og krefjandi hvað varðar alla skriffinnsku, enda hannað af útsendurum Evrópskra stórfyrirtækja i Brussel, að það eitt gerir kröfu um ákveðna stærð fyrirtækja og er því samkeppnishamlandi á lítil og jafnvel meðalstór fyrirtæki.

 

En ábendingum þarf að fylgja alvara og lausnir, annars er Sigmundur Davíð að róa á sömu mið líkt og Óli Björn eða Suðurbæingnum sem langar svo aftur á þing og skrifar margar greinar í Morgunblaðið gegn bákninu.

Því sá sem bendir ekki á lausnina, meinar ekki orð af því sem hann segir, miðin sem róið er á er hrekkleysi eldra fólks sem trúir sömu greininni ár eftir ár, finnst hún alltaf jafnvel skrifuð, en spyr sig ekki, bíddu við, erum við ekki búnir að stjórna síðustu 30 árin eða svo??, af hverju breytist ekkert??

Og það er akkúrat það sem Sjálfstæðisflokkurinn gerir, hann þykist vara á móti bákninu, en berst ekki gegn því á þann eina hátt sem þarf að berjast gegn því.

 

Því vandinn liggur í EES samningnum og verður alltaf til staðar á meðan sá hjáleigusamningur við Brussel er æðri íslenskum lögum, og gerir í sífelldu kröfu um innleiðingu nýrra reglna, nýrra kvaða, meiri skriffinnsku, þar til ekkert er eftir.

Hvorki andrými fyrir fólk og fyrirtæki, eða sjálfstæði í lagasetningu og stjórnun landsins.

Þar liggur vandinn og við honum þarf að bregðast.

 

Báknið burt.

Ísland úr EES.

 

Ekkert flókið við þetta.

En sá sem segir þetta ekki, röflar eitthvað um að ábyrgðin á regluverkinu og skriffinnskunni sé viðkomandi stjórnarflokka á hverjum tíma, líkt og mér sýnist að sé sá pyttur sem Sigmundur Davíð ætlar að óhreinka sig á, hann er á atkvæðaveiðum.

Vill stjórna, ekki til að breyta, heldur vegna valdanna, vegna kjötkatlanna.

 

Sigmundur Davíð kom inní íslensk stjórnmál sem rebel.

Hefur síðan marga fjöruna sopið, oft farið gegn samtryggingunni líkt og hann gerði í átökunum við hrægammanna, en líka fetað þrauttroðna slóð íslenskra stjórnmálamanna, að segja eitt til að ná völdum, gera svo eins og allir hinir þegar þeim er náð.

Síðustu misseri hefur hann ekki fundið taktinn, reynt að ná til sín þjóðlegum íhaldsmönnum frá Sjálfstæðisflokknum, í þeirri veiðimennsku hefur hann óþarflega lyktað af Trumpisma og populisma, og árangurinn enginn, hann virkar þreyttur og illa rakaður, líkt og hann sé útbrunninn, fylgi Miðflokksins eftir því, útbrunnið.

 

Aftur í ræturnar hefur bjargað mörgum tónlistamönnum í þessari stöðu, átti ekki Paul McCartney frábæra endurkomuplötu fyrir um 15 árum síðan, sem og Brúsinn og Dillanninn, aftur í rætur rokksins, einfaldleikann, sálina.

Og hví gæti slíkt ekki bjargað stjórnmálamönnum líka??

Ha!, aftur í rebelinn, hljómar það ekki ágætlega??

 

Báknið burt er burt með EES samninginn, burt með Orkupakkana, burt með allan reglugerðafrumskóginn.

Verða sjálfstæð þjóð sem á sjálfstæð viðskipti við aðrar sjálfstæðar þjóðir.

Er það ekki það sem hefur reynst þjóðinni best og heilladrýgst?

 

Stígðu skrefið Sigmundur.

Segðu þetta, báknið burt, burt með EES.

Þú hefur hvort sem er engu að tapa.

 

Þjóðin hins vegar tapar öllu ef enginn spyrnir við fótum.

Sjálfstæði sínu, auðlindum, framtíðinni.

Því það er engin auðlegð hjá hjáleigum, og þær eru fyrstar til að fara í eyði þegar kreppir að, eða höfuðbýlið ákveður að hagræða.

 

Báknið burt.

Ísland úr EES.

 

Fólkið sigraði auðmennina í baráttunni um boltann.

Hví getur það ekki sigrað þá í þessu stríði líka??

 

Ég bara spyr.

Kveðja að austan.

 

 

 

Ósammála um ágæti áherslu stjórnvalda

Rænum og ruplum.

 

Söng Glanni glæpur, og var fyndinn, enda tók hann enginn bókstaflega, enda persóna í barnaleikriti.

 

En fólkið sem vildi vega að lífi og heilsu um 60 þúsund Íslendinga, þingmenn Sjálfstæðisflokksins, ráðherrar Sjálfstæðisflokksins, dómarar, lögfræðingar, þeir eru ekkert í barnaleikriti.

Þeir hrópa ekki, sýkjum og drepum, en þeir börðust samt fyrir ótímabæru andláti samborgara sinna.

 

Og fara ekkert í jailið frekar en Glanni glæpur, enda hann sögupersóna sem þarf að ganga laus fyrir framvindu leikritsins, en hvert er hlutverk þeirra sem vega að, og leggja sig fram um að valda samborgurum sínum ótta við að sýkjast, þjáningum ef þau veikjast, og ótímabærum dauða ef veiran nær í gegnum varnir líkamans.

Hvert er hlutverk þessa fólks í leikritinu sem við köllum raunveruleiki, og þar sem um líf og dauða er að tefla fyrir um 60 þúsund samlanda okkar?

 

Skiptir það engu, því til er fólk með meiri völd og áhrif í Sjálfstæðisflokknum, sem heldur þessum villidýrum dauðans í skefjum, og að þjóðin hlustar ekki á lögfræðinga og fordæmir dómarann.

Lítur á hann eins og hvert annað viðrini sem þannig séð á að vera á safni innan um vaxstyttur af Axlar Birni, Hannibal Lecter og annað stórskrýtið krípí fólk.

 

Hvað sagði þingmaður Sjálfstæðisflokksins aftur, og lét hundruð fylgjenda sinna fá blæti af æsingi; að sóttvarnir eigi "að höfða til almennrar skynsemi og samstarfsvilja almennings", hve mörg þúsund samlanda okkar væru fallin, ekki lengur meðal vor.

Vinir, ættingjar, jafnvel okkar nánustu fjölskyldumeðlimir, að ekki sé minnst á fólkið allt í kringum okkur, fólkið sem við köllum dagsdaglega samferðafólk okkar.

 

Eða eigum við að tala um Moggann og myrkrið sem yfirtók ritstjórnarherbergi þess og hvatti til þess í Reykjavíkurbréfi að veiran fengi frelsi til að ráðast á þessa 60 þúsund samlanda okkar.

Hefur síðan ötula nagað gegn sóttvörnum þjóðar okkar, og gert rugli og hálfsannleik jafn hátt undir höfuð og alvöru fréttum, sem vissulega hafa fengið sitt pláss á síðum Morgunblaðsins.

Líkt og blaðið teldi sig vera uppfærslu á leikriti um doktor Jekyll og herra Hyde, annar góðmenni, hinn viðbjóðslegur fjöldamorðingi, en báðir deilandi sama líkama.

 

Ef maður hugsar út í þetta, hina fjársterku sérhagsmuni, sem ná inní dýpsta valdakjarna Sjálfstæðisflokksins, þetta kolruglaða lið sem berst fyrir frelsi veirunnar  til að veikla og drepa, í nafni öfugsnúinna mannréttinda og brenglaðs veruleikaskyns á frelsi, þá getur maður ekki annað en tekið ofan hattinn fyrir manninum í brúnni, Bjarna Ben, formanni Sjálfstæðisflokksins, sem allan tímann hefur haldið haus, og aldrei samsinnað sig ruglinu.

Hvað það varðar er hann ekki ættleri Engeyingaættarinnar, heldur í raun ættarlaukur á við þá bestu sem þessa merka sjálfstæðisætt hefur gefið þjóð okkar.

Í raun ætti hattlaus maður eins og ég að kaupa hatt til að taka ofan.

 

Heimsfaraldur kórónuveirunnar er alls ekki búinn, í raun höfum við aðeins séð forstig hans, líkt og svikafriður seinna stríðs sem kenndur var við veturinn 1939-1940, þegar átök voru aðeins forsmekkur þess sem síðar kom, og sterk öfl innan borgarstéttar Vesturlanda hvöttu til friðar, og seinna uppgjafar, fyrir Þýskalandi nasismans, þar væri herfáninn gegn hinum guðlausu kommúnistum Sovétanna.

Blekking sem dró þróttinn úr og seinna eyðilagði varnir Frakklands.

Þá hélt samt kjarni borgarlegra íhaldsmanna haus, og sigur vannst að lokum.

 

Í dag trúum við því að faraldurinn verði brátt að baki, við sjáum birtuna við sjóndeildarhringinn, en lokum svo augum þegar glittir í svartan kólgubakka í fjarskanum.

Veiran er stjórnlaus í fjölmennum löndum eins og Indlandi, hún mallar í Suður Ameríku, á lokametrum bólusetningarinnar opna heimskir stjórnmálamenn Vesturlanda fyrir leiðir hennar inní samfélögin, enginn veit hvenær stökkbreytta afbrigðið sem bólusetningin bítur ekki á, kemur fram, það eina sem er vitað, þegar það gerist, þá er leiðin greið fyrir nýjan faraldur.

Svikafriðurinn verður að grimmu ófriðarbáli sem margir munu ekki lifa af.

Þetta er að gerast, aðeins kraftaverk getur hindrað, og því miður er lífið ekki Hollywood mynd sem endar vel.

 

Borgarlegir íhaldsmenn sem halda haus, eru skjól okkar og skjöldur gegn nagi fjársterkra sérhagsmuna sem láta sig dauðan og djöfulinn varða líf og limi samlanda sinna, enda nokkuð augljóst úr hvaða jarðvegi hugmyndafræði þeirra er ættuð.

Aðrir stjórnmálamenn eru svo sundraðir og auðkeyptir, að þeir eru engin fyrirstaða gegn hinum fjársterku sérhagsmunum.

Það sannaði sig í hildarleiknum 1939-1945, og mun sanna sig í komandi stríði við kórónuveiruna.

 

Hvað þetta varðar hefur Íslands ógæfa ekki orði allt að vopni.

Gæfa þjóðarinnar eru menn eins og Bjarni sem hafa haldið haus.

 

Það er það sem skiptir máli.

Ekki hitt.

 

Fögnum því að þessir 60 þúsund samlandar okkar hafa fengið skjól þar til bólusetning handa þeim er tilbúin.

Slíkt er og var ekki sjálfgefið.

 

En þetta tókst, við færðum öll fórnir.

En þetta tókst.

 

Svo er ofurdeildin úr sögunni.

Kveðja að austan.

60 þúsund í áhættuhópi vegna Covid-19

Frá mismunun til sóttvarna.

 

Þó aðeins séu liðnir nokkrir dagar frá því að stjórnvöld kynntu frumvarp sitt um hertar aðgerðir á landamærunum þá hefur mikið vatn runnið til sjávar síðan.

Frá fikti til hækkunar á viðmiði Sóttvarnastofnunar Evrópu um hárauð svæði til kerfis sem má rökstyðja að byggist á viðmiðun hennar, en útfærð út frá markmiðum sóttvarnayfirvalda um að minnka líkur á að smit berist inní landið gegnum landamærin.

Það fyrra var gróf siðlaus mismunun með þeim eina tilgangi að koma pólskum íbúum þessa lands í örugga sóttkví, það seinna er fullkomlega rökrétt og innan ramma almennra sóttvarna.

 

Við sem þjóð, sem hefði setið uppi með smánarblettinn um langa tíð, eigum stjórnarandstöðunni þær breytingar að þakka sem gerði sóttvarnalækni kleyft að skila af sér tillögum sem eru fullkomlega í samræmi við viðmið Sóttvarnastofnunar Evrópu.

Þeir sem koma frá hárrauðum löndum Evrópu eru skyldaðir í örugga sóttkví, þó vissulega sé undanþága fyrir betur stæða landa okkar til að nýta sér sumarhús sín og villur til að þurfa ekki að deila kjörum með publiknum á sóttkvíarhóteli. 

Í raun stórsniðugt því það minnkar álagið á formann Sjálfstæðisflokksins og eykur líkur á að þessi þrándur innlendra sóttvarna, Sjálfstæðisflokkurinn verði til friðs.

 

Stjórnarandstaðan náði að lækka viðmið frumvarpsins þannig að þau urðu siðleg og samræmdust alþjóðlegum viðmiðum.

Þess vegna eru kaldar kveðjur heilbrigðisráðherra til hennar þegar hún greiddi atkvæði með hinu breytta frumvarpi lítt skiljanlegar, einhver hefði jú fagnað fyrir hönd þjóðarinnar en þetta var það sem Svanhvít sagði; "Það hefði verið gott fyrir málið og gott fyrir samstöðu í samfélaginu að við gætum verið sammála um að renna styrkari stoðum undir nauðsynlegar ráðstafanir sóttvarnalæknis. Það hefur greinilega verið freistandi fyrir ýmsa í umræðunni hér í dag að láta þetta mál snúast um eitthvað annað, en það verður bara svo að vera".

Minnihlutinn bjargaði ríkisstjórninni frá smán mismunar, og einmitt styrkti stoðir undir nauðsynlegar sóttvarnir með því að lækka viðmið frumvarpsins, og hún sakaði hann um pólitískan hráskinsleik.

 

Vonandi hefur Svanhvít verið sybbinn þarna og ekki vitað hvað hún sagði, verra var það sem hún sagði í fréttum Ruv í gær þegar hún afsakaði þau viðmið sem lagt var upp með í frumvarpi hennar og minnihlutinn fékk breytt, með því að segja að þessi viðmið hefðu einmitt verið viðmið til að hafa eitthvað til að leggja upp með í frumvarpi sínu.

Eins og hún fattaði það ekki að hún var að setja bindandi lög en ekki leggja fram tillögu á fundi í hinu útdauða Sósíalistafélagi Reykjavíkur.

 

Allt er gott sem endar vel sagði einhver í fyrsta sinn, og öðrum fannst svo merkilegt að úr varð orðtak sem fylgt hefur þjóðinni lengi.

Vissulega lokar þetta frumvarp ekki öllum glufum á landamærunum og á því eru miklir annamarkar, en það er stórt spor í rétta átt.

Sem ber að fagna eftir að útfærsla Þórólfs liggur fyrir.

 

En hvort það endi vel.

Það er önnur saga.

Því nú eru börnin og Sjálfstæðisflokkurinn eftir.

 

Hvaða málamiðlanir þarf Bjarni að gera til að koma þessu í gegnum sinn flokk.

Hvaða hráskinsleikur með fjöregg þjóðarinnar verður leikinn á bak við tjöldin??

 

Það veit tíminn.

En vonum það besta.

 

Svo má ekki gleyma að þeir eru hættir með ofurdeildina.

Kveðja að austan.

Hert á landamærunum á þriðjudag

Sleppa stjórnvöld fyrir horn??

 

Það er eins og hver annar brandari þegar stjórnvöld segjast hafa engin áform um hertar reglur innanlands, enda sjá þau varla um að dreifa veirunni.

Það er lekinn á landamærunum sem ræður og ekki er ennþá útséð hvernig fer með þennan.  Síðan gat ég ekki heyrt betur á fréttum Ruv að eitt nýtt afbrigði af bresku veirunni hefði greinst, sem gæti verið fyrirboði um nýja bylgju ef ekki tekst að stöðva í fæðingu.

Þess vegna eins og Svanhvít segir réttilega, eru stjórnvöld tilbúin að grípa snöggt inní ef þurfa þykir, enda skrýtið ef þau hættu uppúr þurru að standa vaktina á síðustu metrum faraldursins.

 

Höfum það á hreinu, það eru glufur á landamærunum, þó þeim fækki eitthvað þegar krafist verður öruggrar sóttkvíar hjá fólki sem kemur frá Póllandi.

Það er verið að opna í Evrópu, og síðast þegar það var gert, þá fór veiran á flug með einhverjum bráðsmitandi afbrigðum.

Eins eru bólusetningarvottorð engin trygging fyrir smiti, ég var til dæmis að fá þá leiðinda frétt að ung frænka mín út í Svíþjóð, sem vann með skóla á heimili aldraða, hefði fengið kórónuveiruna, þrátt fyrir bólusetningu.

Og hópsmitið í Mýrdalnum tengist manni sem slapp í gegnum landamærin með því að sýna pappíra um fyrra smit.

 

Þetta er aðeins spurning um líkindi sagði Magnús Gottfreðsson sérfræðingur í smitsjúkdómum í viðtali við Ruv þegar hann var spurður um slakanir á landamærunum í viðtali á Ruv.

Því fleiri sem sem fara í gegn án þess að fara í tvöfalda skimun og sóttkví á milli, þá aukast líkindin á smiti út í samfélaginu.

Og það er það sem stjórnvöld eru að gera, hleypa fleirum og fleirum í gegn, tilbúin með þjóðina á höggstökk hertra sóttvarna.

Sem ekki aðeins munu frysta daglegt líf okkar, heldur líka valda fjölda fólki alvarlegum veikindum þar sem eftirköstin ætla ekki að taka enda.

 

Er þetta þess virði að gefast upp á síðustu metrunum eftir allar þær fórnir sem þjóðin hefur lagt á sig??

Nei segir heilbrigðisráðherra, og meinar það alveg örugglega, en hefur ekki styrk fyrir að loka fyrir lekann.

 

Þar er hnífurinn í kúnni og hann gerir ekkert annað en að stækka.

En er samt á meðan það er.

 

Vonandi gengur þetta.

En það er betra að frysta samfélagið en að leyfa veirunni að veikla fólk í stórum stíl.

Því heilsan er ekki metin til fjár, en við lifum hitt af.

 

Svo má ekki gleyma því að það var hætt við ofurdeildina.

Kveðja að austan.

 

 

Engin áform um hertar reglur innanlands

Sér Þórólfur að sér?

 

Það er ekkert að því að fara eftir áhættumati Almannavarna en ekki skilgreiningu Sóttvarnarstofnunar Evrópu á áhættusvæðum.

En þá aðeins ef kröfur Almannavarna eru strangari en hjá Sóttvarnarstofnun.

Annað er óásættanleg vinnubrögð, byggja ekki á vísindum eða mati á staðreyndum, heldur pólitík í anda þess sem þekkjum frá löndum eins og Hvíta Rússlandi.

 

Það er svo augljóst mál að það þarf að skikka þá sem koma frá hárrauðum svæðum í örugga sóttkví, en það er ekki líðandi að slaka á þeirri skilgreiningu, það er að gera kröfu um fleiri smit per íbúa, en Sóttvarnastofnun Evrópu gerir.

Til þess eins að stöðva ferðalög til og frá einu landi í Evrópu, þar sem vill svo til að íbúar þaðan eru fjölmennur minnihluti hér.

Hvað þá að bíta höfuð af skömminni og búa til undanþágu sem Íslendingar séu þeir að koma þeim löndum sem lenda innan hinnar nýju skilgreiningar.

En ákvæðið til að sækja um undanþágu með tveggja daga fyrirvara er til þess eins hugsað, það blasir svo við.

 

Stjórnmálamenn geta hagað sér eins og þeir haga sér, vanvirt sóttvarnir og staðreyndir, beitt sér fyrir mismun milli íbúa, en sóttvarnayfirvöld ekki.

Þá er trúverðugleikinn, grunnstoð sóttvarna, að engu orðinn.

 

Vonandi hefur Þórólfur áttað sig á því í nótt.

Tilgangurinn helgar ekki alltaf meðalið.

Kveðja að austan.

Búinn að skila minnisblaði til ráðherra

Sendum Pólverja í sóttkví.

 

Hefði alveg eins getað verið yfirskrif þessa frumvarps heilbrigðisráðherra sem minnihluta þingmanna samþykkti í nótt.

Líklegast eini sólargeislinn á annars svartri nótt, þar sem ris Alþingis hefur aldrei mælst lægra.

 

Við menntuð þjóð, lýðræðisþjóð, friðsöm þjóð, setjum lög sem sérstaklega er beint að einum minnihlutahóp á þann hátt að einna helst mætti halda að flett hafi verið uppí sagnfræðiritum og lögfræðingar ráðuneytisins lesið sér til um löggjöfina í Suður Afríku sem kennd var við apartheid eða aðskilnaðarstefnu hinnar hvítu yfirstéttar gagnvart hinu vinnandi svörtu íbúum landsins.

Eini munurinn í raun er sá að við innlendir erum ekki minnihluti, Pólverja á Íslandi, hins vegar minnihluti, og þeir vinna fyrir okkur skítverkin.

Kunna menn ekki að skammast sín, hvaða uppeldi er þetta?

 

Vissulega er vitað að síðasti sóttvarnarbrotamaður var Pólverji, og það er vitað að margir samlandar hans hafa gerst sekir um svipað athæfi frá því að reglur um tvöfalda skimun og sóttkví tóku gildi.

En réttlætir það árásirnar á 99,99% samlanda þeirra sem hafa virt sóttvarnareglur í hvívetna, að sérstaklega séu samdar reglur, þar sem menn leggjast meir að segja svo lágt að breyta viðmiðum á hááhættusvæðum, sem eiga skikka þá umfram aðra að fara örugga sóttkví ef þeir koma frá heimalandi sínu??

Erum við þannig þjóð??, finnst okkur það sjálfssagt?

 

Fyrir utan hvað þetta er heimskt í alla staði.

Það er viðurkennd þekking í veirufræðum, ígildi þeirrar sem við kennum við 2+2, að það þarf aðeins eitt smit til að koma að stað faraldri, rúmar 6 vikur í Wuhan frá fyrsta skráða smiti þar til öllu var skellt í lás.

Til að verjast faraldri er því aðeins tvær leiðir, sú fyrri að loka landamærum, og ef það er ekki gert, stífar samkomutakmarkanir ásamt smitrakningu til að hindra útbreiðslu faraldursins.

Mistakist það þá er neyðarúrræðið að skella öllu í lás.

Það er engin þriðja leið í boði, hvað þá eitthvað sem heitir meðalhóf sóttvarna.

 

Núverandi aðgerðir gera ekkert til að hindra að þetta eina smit sleppi inn fyrir landamærin, þó í fortíðinni séu einhverjar vísbendingar, þá er hegðun veirunnar óútreiknaleg.

Á þetta bendir Læknafélag Íslands réttilega í ályktun sinni sem í raun er einn stór grátur yfir heimsku þings og stjórnar; "LÍ telur vert að nefna að farsóttarfarldrar lúta ekki óskhyggju og eiginleikar sýkils geta breyst skyndilega og því mikilvægt að sóttvarnayfirvöld, þegar um tilfelli alvarlegra farsótta er að ræða, hafi nægjanlega sveigjanlegar og fullnægjandi laga og valdheimildir til að bregðast við aðsteðjandi vanda sem ógnað getur samfélaginu.".

Næsti smitberi getur þess vegna komið frá Færeyjum ef út í það er farið, og veiran er ekki lítill rasisti í sér, hún gerir ekki upp á milli fólks eftir þjóðerni.

 

Auðvitað eykur það öryggið að setja rápið frá Póllandi í örugga sóttkví, en það gildir um allt ráp yfir landamærin.

Hvenær ætla menn að skilja þetta??

 

Hve þarf mörg óþekkt smit sem sóttvarnalæknir stendur á gati yfir, til menn viðurkenni þennan raunveruleika.

Hve oft þurfum við að tapa daglega lífi okkar, hve oft þarf að brjóta niður þann vísir að ferðaþjónustu sem snýr að innlendum, hve oft þarf að loka á listamenn, íþróttir eða annað sem skellt er í lás um leið og þekkta óþekkta smit yfir landamærin verður að samfélagssmiti sem sóttvarnaryfirvöld neyðast til að bregðast við.

 

Fyrir utan heimskuna, hvernig ætla menn að rekja þá sem koma frá Póllandi í gegnum önnur lönd??

Á að merkja Pólverjana með gulum stjörnum??

 

Lágt lagðist Alþingi þegar það samþykkti ICEsave fjárkúgun breta.

Lægra lagðist það þegar það afsalaði Brussel yfirráðin yfir orkuauðlindum þjóðarinnar.

En þessi samþykkt er þess lægsti punktur, og þá ekki vegna heimskunnar sem öskrar af hverri línu frumvarpsins.

 

Því þetta er dagurinn sem Íslendingar gerðust formlega rasistar.

Skammist ykkar.

Kveðja að austan.

Nú er heimilt að skylda ferðamenn í sóttvarnahús

Þegar Bjarni gengur að björgum heimskunnar.

 

Og íhugar, að kasta sér fram af, hvað er þá eftir??

 

Hver getur mótmælt þessum orðum Ingu Snæland, hún vissulega vísar í hagfræðinga, ekki lögfræðinga sem bestu vinir Sjálfstæðisflokksins fjármagna, en samt, gegn orðum hennar þurfa að koma rök.

"Í óund­ir­bún­um fyr­ir­spurna­tíma á Alþingi spurði hún hvernig sé hægt að rétt­læta meðal­hóf þegar stór hluti þjóðar­inn­ar hafi verið hneppt­ur í fjötra síðan far­ald­ur­inn hófst. Nú sé tíma­bært að sjá kostnaðinn af því að standa í landa­mæra­skimun­um og öðrum aðgerðum sem miði við að "taka á móti ör­fá­um ferðamönn­um sem eiga að bjarga 10% hag­kerf­is­ins sem í raun og veru mega og eiga að vera á ís fyr­ir þau tæp­lega 90% sem við höf­um getað haldið gang­andi sjálf".

 

Inga er ekkert að bulla, Gylfi Zöega, virtasti hagfræðingur landsins í dag, sá sem er mest lærður, með bestu prófin, hefur aldrei verið við stjórnmála kenndur, eða tengdur nokkrum hagsmunum, benti á þá staðreynd að innlenda hagkerfið eftir kóvid kæmi ekki svo illa út.

Í raun væri það á svipuðu róli og það var 2016, sem er eitt besta ár hagsögu þjóðarinnar frá því að hagsagan var skráð, hugsanlega var eitthvað betra á 15. öld þegar skreið frá Íslandi var ígildi gulls á matvælamörkuðum Evrópu, öldina áður en danska einokunarverslunin tók yfir, og arðrændi þjóðina.

 

Gylfi sagði, jú við töpum milljörðum vegna hruns ferðaþjónustunnar, en hann benti um leið á, að sú verðmætaaukning fór jafnharðan út úr hagkerfinu með launum erlendra starfsmanna, og ekki hvað síst vegna hágengis krónunnar sem gerði það að verkum að íslenska þjóðin eyddi tugmilljörðum erlendis, bæði vegna ferðalaga hennar, sem og netverslunar.

Milljarðarnir sem sparast sagði Gylfi, eru milljarðarnir sem drífa áfram innlenda hagkerfið.

Og Inga Sæland, næstum því blindur öryrki skilur þetta og fattar, og bendir á að lekinn á landamærunum hefur skaðað þetta hagkerfi, vaxtarsprota þess, og mótvægi við hrun þeirrar ferðaþjónustu sem treysti á erlenda ferðamenn.

 

Bjarni Ben, vel menntaður lögfræðingur, formaður Sjálfstæðisflokksins, fattar þetta hins vegar ekki miðað við andsvör hans.

"Bjarni sagði að nær væri að tala um hversu mikla vernd yf­ir­völd hafi náð að byggja upp fyr­ir líf og heilsu fólks með aðgerðunum sem gripið hafi verið til. Eft­ir því hafi verið tekið hvernig til hef­ur tek­ist hér á landi.

.. Árang­ur­inn tali sínu máli. Inn­lögn­um á gjör­gæslu hafi verið haldið í al­gjöru lág­marki í lang­an tíma og einka­neysla hafi verið um­fram spár. Bjart­sýni ríki jafn­framt í at­vinnu­líf­inu. "Það er að fara að birta til og eng­in ástæða til að fara á taug­um á loka­metr­un­um," sagði hann.".

 

Með öðrum orðum, efnisleg rök hans voru engin nema vísa í að erlendis væri tekið eftir að þrátt fyrir allt væri ástandið betra á Íslandi en í mörgum öðrum löndum.

Sem er alveg rétt, en eftir stendur að spurt var um skaðann sem opnun landamæranna síðastliðið sumar olli, og síðan þann skaða síendurtekinn leki á landamærunum hefur valdið hinu innlenda hagkerfi.

 

Munum enn og aftur að Inga vitnar í besta hagfræðing þjóðarinnar, og þannig sé hafa miklu fleiri tekið undir orð Gylfa, en Bjarni, hann vitnar í að þrátt fyrir allt hefði tekist vel til að bjarga mannslífum.

Sem er rétt, en ef landamærin hefðu verið varin með öruggri sóttkví, að ekki sé minnst að fávitahátturinn að opna þau fyrir smiti og ferðamönnum síðasta sumar hefði ekki átt sér stað, þá hefði í fyrsta lagi fólk ekki dáið í seinni bylgjunni, og í öðru lagi, þá hefði efnahagslegi samdrátturinn verið miklu minni.

Inga vitna í staðreyndir, Bjarni bara í réttlætingu þess sem á engin rök önnur að þrátt fyrir allt hefði stjórn hans getað verið verri.

Sem er rétt, í heildina litið hefur Bjarni Benediktsson staðið sig afburða vel.

 

En hann lét undan þrýstingi að opna landamærin.

Og hann var tregur til að tryggja þjóðinni það öryggi sem felst í tvöfaldri skimun og sóttkví þar á milli.

Og þegar ljóst var að landamærin láku engu að síður, þá hafði Bjarni ekki styrk til að láta loka fyrir þann leka.

 

Af hverju getur hann ekki sýnt auðmýkt og viðurkennt það?? Samviska hans verður hreinni á eftir, og út frá lærdómi mistakanna, sem hann er ekki einn um, getur hann lagt til það sem þarf að gera. Að tryggja þjóðinni eðlilegt daglegt líf, að vörn hennar sé örugg á landamærunum.

Mér varð á, en ég mun gera betur.

Og Bjarni væri stoltur meðlimur á ættartré Engeyinga sem hafa staðið vörð um sjálfstæði þjóðarinnar og velmegun.

 

Í stað þess að rífa kjaft við raunveruleikann og spila sig heimskan.

Já, vissulega hans val.

En vonandi fer Bjarni ekki alla leið, og reynir að sameinast Sigríði og hinum vitleysingunum í þingflokki Sjálfstæðisflokksins, með því að kasta sér fyrir björg heimskunnar.

 

Því þar fer góður biti í hundskjaft.

Kveðja að austan.

 

 

Stór hluti þjóðarinnar hnepptur í fjötra

Að spila sig heimskan.

 

Fyrirvarar þess benda á fyrst að sóttvarnir virka, þá séu þær óþarfar.

Þessa forheimsku geirneglir Sigríður Andersen í viðtali við Ruv;

""Ég gerði fyrirvara við málið," segir Sigríður. "Ég hef bent á það að okkur hefur gengið langbest með því að höfða til almennrar skynsemi og samstarfsvilja almennings um að halda veirunni niðri. Staðan núna er miklu mun betri en oft áður hérna innanlands, sérstaklega með tilliti til þess að við höfum verið að bólusetja hópinn af viðkvæmum. Þetta er ástæða þess fyrirvara sem ég set við málið.".

 

Þegar sóttvarnir okkar hafa fryst samfélagið með fjöldatakmörkunum sínum, mannfagnaðir bannaðir, hrinur árása á þær atvinnugreinar sem þjóna mannfagnaði, þann hluta ferðamannaiðnaðarins sem ætlaði að ná í tekjur með að halda viðburði og annað fyrir innlenda, þá segir Sigríður að árangurinn sé ekki því að þakka heldur að yfirvöld hafi höfðað til almennrar skynsemi og samstarfsvilja almennings.

Og maður getur ekki annað en spurt sig, er alltí lagi með manneskjuna??

 

Síðan skautar hún algjörlega framhjá því að það birti ekki til í mannlífinu, sóttvörnum fór ekki að linna, fyrr en stjórnvöld tóku upp tvöfalda skimun á landamærum, og lekinn á landamærunum skýrir núverandi bylgju, þá síðustu og hve langan tíma tók að aflétta sóttvörnum haustsins.

Nei, nei, nei nei, það er almenn skynsemi og samstarfsvilji almennings sem skýrir hið góða ástand. 

Líklegast er þá hið alvarlega ástand í mest allri Evrópu þá vegna þess að þar hefur almenningur ekki sýnt þennan fræga íslenska samstarfsvilja, en ekki vegna þess að þar var veirunni leyft að malla þar til ekkert annað var í stöðunni annað en að skella öllu í lás, eitthvað sem þó þurfti aldrei að gera hérna.

 

Hvernig ætli fólki sem jafnvel ítrekað neyðst til að fara í sóttkví vegna hópsmita og varna við þeim, líði að lesa svona þvælu?

Eða hvernig skyldi þeim líða sem hafa illa veikst eða eru í dag að sjá börnin sín veikjast, af illvígum sjúkdómi þar sem eina er vitað að það veit enginn hvenær eftirköstin taka enda.

Hvílík vanvirða við allt þetta fólk.

 

Það liggur við að maður vorkenni Bjarna að þurfa að glíma við svona víðáttuvitleysu öfga, hans er þó heiðurinn að taka slaginn við það.

Og því miður er málamiðlunin við það ein af skýringum þess að ríkisstjórnin heykist við að stoppa uppí öll göt á landamærunum.

 

Núna reynir á stjórnarandstöðuna.

Logi, hvar er frumvarpið þitt??

Kveðja að austan.

Fyrirvarar við sóttvarnalög hjá Sjálfstæðisflokki

Maður að meiri.

 

Viðurkennir mistök, biðst afsökunar.

Sem er virðingarvert og málið í raun útrætt hvað félag hans varðar.

 

Eftir stendur lærdómurinn, hvað þarf til að fólk snúist sem eitt til varnar, gegn græðgi og yfirgangi örfárra auðjöfra sem eiga því sem næst allan heiminn.

Þeir eiga fjölmiðlanna, þeir eiga stjórnmálin, jafnt til hægri og vinstri, nema kannski fyrir utan hægri populista.

Og þeir hafa hannað efnahagskerfi heimsins upp á nýtt, hvort sem það er hin grímulausa markaðsvæðing Evrópusambandsins kennt við hið frjálsa flæði Hayek og Friedmans, eða alþjóðavæðingin þar sem þrælabú þriðja heimsins hafa markvisst brotið niður framleiðslu Vesturlanda.

 

En þeir eiga ekki sálina.

Þar setti almenningur mörkin, og sagði, hingað og ekki lengra, "Við höfum fengið nóg"

Alls staðar tengdu stuðningsmenn þetta við græðgi, sjálftöku hins sálaralausa auðs, sem hefur unnið samfélögum þess svo mikið tjón, og ætlaði núna að markaðasvæða sálina í fótboltanum, eyðileggja allt það sem fótboltinn stóð fyrir, peningarnir höfðu vissulega skaðað og brenglað öll gildi í íþróttinni, en hann var samt ennþá allra, allir áttu möguleika, allir gátu keppt við alla.

 

Viðbrögð sem maður hefði talið eðlileg í aðdraganda hrunsins 2008 þegar tilbúinn auður innbyrðis pappírsviðskipta fjármálakerfisins lagði undir sig raunhagkerfið, og flutti helminginn af því til Kína.

Urðu ekki þá, urðu núna, fótboltinn var hin heilaga kú sem fólk var ekki tilbúið að láta ræna og aflífa.

 

Þessi mikla reiði, þessi mikla samstaða, og jafnfram sú auðmýkt sem allavega eigandi Liverpool sýndi þegar hann viðurkenndi mistök sín, er ljós í myrkri þeirra hörmunga sem núna dynja yfir heimsbyggðina, og engan endi sér á.

Það eru svipuð öfl sem berjast gegn frelsi veirunnar, kosta andófið gegn henni í gegnum falsfréttir og borgaða sérfræðinga sem tala gegn betri vitund.

 

Eitt af vopnum þeirra er að beita fyrir sig dómstólum líkt og talsmenn ofurdeildarinnar ætluðu að gera til að tækla viðbrögð fótboltaheimsins.  Þessi deila verður leyst fyrir dómsstólum sagði einn fjármálaguttinn í viðtali á Ruv. Sá ekki fyrir viðbrögð hins venjulega, að hann myndi rísa upp, og segja hingað og ekki lengra.

Dómsstólar hafa hins vegar virkað vel í baráttunni fyrir frelsi veirunnar, mannréttindi einstaklingsins vega sterkar segja þjónar þessara afla en mannréttindi fjöldans, rétturinn til að smita er meiri en réttur samfélagsins til að verjast smiti.

Kaos, sundrung, veiran fær að grafa um sig, ný og hættulegri afbrigði hennar fá að þróast, vonin um að bólusetning nái að breyta öllu í fyrra horfs, er fjarlægri, jafnvel að verða að ætt glópa.

 

Samstaða fjöldans, auðmýkt og afsökunarbeiðni þess sem varð á, og málið afgreitt.

Munum við upplifa það á Íslandi,núna þegar Þórólfur hótar þjóð sinni nýjum sóttvarnaraðgerðum, að hún taki afleiðingum þess vegna þess að hann hefur ekki haft döngun til leggja til lokunar landamæranna, ekki fyrir fólki, því er velkomið að ferðast, heldur fyrir smiti.

Mun ríkisstjórnin biðjast afsökunar á tregðu sinni við skipa fyrir um örugga sóttkví við landamærin, lofa síðan bót og betrun.

Ekki að fyrra bragði, ekki frekar en eigandi Liverpool, heldur eftir samstöðu fjöldans.

 

Samstöðu fjöldans sem krefst þess að fá hið daglega líf sitt aftur, og nennir ekki lengur að hlusta á lygar og undanbrögð.

Við fengum brauð og leika í gær, aðgerðir sérhannaðar til að koma Pólskum íbúum landsins í örugga sóttkví við landamærin, þeir eru ógnin eins og svarti maðurinn sem sást labba um aðalgötu bæjarins í suðrinu, og var snarlega handtekinn og dæmdur fyrir alla óleysta glæpi síðasta ár, og til vara, alla þá sem voru óframdir á næsta ári.

Treyst er á fordóma okkar gegn þessum ágætu sambýlingum okkar sem vinna fyrir okkur svo mörg skítastörf, dugi til að róa fjöldann, svo áfram megi láta landamærin leka í þágu fjársterkra aðila í ferðaþjónustunni, sem og þess fólks sem getur ekki tekið tillit til neins en sjálfs síns og síns rekstrar eins og Fornleifur lýsti svo vel í gær.

 

Dugar þessi hráskinnsleikur til að sundra samstöðu fjöldans, á eftir að koma í ljós.

Fer eftir því hvað fólk metur mikils sitt daglega líf og heilsu barna sinna og sinna nánustu.

Hættan fyrir ríkisstjórnina og sóttvarnayfirvöld er náttúrulega nýr leki, og þá framlenging á hörðum sóttvörnum, eða blásið til nýrra um leið og það léttir til á ný.

 

Ég held að það sé enginn Liverpool andi í stjórnvöldum, og til efs meðal þjóðarinnar.

Við virðumst dálítið valka ein.

 

En ég er ánægður með endinn á ofurdeildarklúðrinu.

En ég sé ekki fyrir endann á atlögunni að mínu daglega lífi.

 

Því miður.

Kveðja að austan.

Eigandi Liverpool biðst afsökunar

Þórólfur er alltaf sáttur.

 

Minnir svona óþarflega á minnisblaðaperra, það er mann sem þráir athygli út á minnisblöð sín.

 

Frá fyrsta degi frá því að landamærin voru opnuð síðasta sumar, og hann fékk tækifæri á að koma aftur og aftur með ný minnisblöð um hinar og þessar sóttvarnaráðstafanir, sem auk þess að skemma þann innlenda ferðamannaiðnað sem var að vaxa og dafna, eyðilagði allar bæjarhátíðir auk Þjóðhátíðarinnar í Vestmannaeyjum, þá hefur hann alltaf verið tregur til að þétta lekann á landamærum.

Það þurftu ítrekuð viðtöl við Kára í júlímánuði til að hann ljáði máls á tvöfaldri skimun við landamærin, í margar margar vikur þráaðist Þórólfur við með þeim rökum að ekki væri hægt að banna fólki að koma til landsins.

Þessi þrái kostaði okkur frönsku bylgjuna og frosið mannlíf í haust.

 

Þegar ljóst var að almenningur stóð sig, og útlit var fyrir að hægt yrði að aflétta samkomutakmörkunum að mestu í byrjun desember, þá kom babbið í bátinn sem kennt var við síleka á landamærum, þaðan kom nýsmit inní landið og hvað gerði Þórólfur??

Hann ítrekaði að þjóðin yrði að standa sig, að passa uppá sóttvarnir, og bla bla bla, engar afléttingar fyrir jól, en að þétta lekann á landamærunum, á þá heilögu kú mátti ekki minnast.

Ha, það er ekki hægt að loka landinu fyrir umheiminum, eins og eitthvað slíkt fælist í kröfunni um örugga sóttkví þeirra sem kæmu til landsins.

 

Svona hefur raunasaga Þórólfs verið.

Hann hamast á þjóðinni, en er furðu hljóður um landamærin.

 

Allar tillögur hans hafa komið eftir augljósan leka á landamærunum, og eftir þrýsting opinberar umræðu sem Kári Stefánsson hefur hafið.

Hann hefur alltaf staðið með hálfkáki ríkisstjórnarinnar líkt og hlýðinn embættismaður, en aldrei með þjóðinni sem þráir það eitt að fá að lifa í þokkalegum friði fyrir minnisblöðum hans.

 

Þess vegna er Þórólfur sáttur í dag.

Hinn meinti rasismi að loka á Pólverjana tókst, en hvað með allan annan leka?

Það var Íslendingur sem smitaði í Mýrdalnum, það var Íslendingur sem smitaði í fjölbýlinu, það var franskur ferðamaður sem kom með frönsku veiruna, smit nefnilega spyrja ekki um þjóðerni, þau spyrja um glufur.

Og á síðustu metrunum á að svíkja þjóðina, svo hún verði í fjötrum sóttvarna langt fram á sumar.

 

Því það kemur leki á eftir þessum leka.

Það kemur alltaf leki á meðan landamærin eru ekki örugg.

 

Hvað er svona flókið við það að ferðalangar fari í tvöfalda skimun og örugga sóttkví þar á milli??

Slíkt er enginn skaði fyrir efnahagslífið, en skaðinn er mikill af hinum eilífu minnisblöðum Þórólfs.  Svo nemur milljörðum á milljörðum ofan.

Það skaðar heldur ekki heilsu þeirra sem ferðast, en smit inn fyrir landamærin sem verður að samfélagssmiti, skaðar fólk, meiðir það, skemmir jafnvel heilsu þess til langframa.

 

Það er svo miklu miklu minni hagsmunum bjargað fyrir meiri, og slíkt er ekki einleikið.

Og manni er jafnvel farið að gruna að Þórólfur sé ekki heill í vörnum sínum.

Þetta er óþarflega farið að minna á heilkennið sem kennt er við móðurina sem skaðar börnin sín til að fá athygli.

 

Þú ert sáttur Þórólfur.

En það eru margir sem eru ekki sáttir við þig.

 

Þú ert trúnaðarmaður almennings, ekki stjórnvalda.

Það er eins og þú hafir gleymt því.

Kveðja að austan.

Þórólfur sáttur við aðgerðir stjórnvalda