Á Ögurstundu þarf Andstaðan að gera upp við goðsagnir sínar.

Drengirnir mínir, þó 5 ára séu, vilja alltaf að pabbi þeirra hjálpi þeim við að pissa á morgnanna.  Mín hjálp er í því fólgin að ég klappa þeim á bakið á meðan og þurrki svo typpið á eftir.  Þá þarf ég að þvo mér um hendurnar, ekki þeir.  Þess vegna náði ég í morgun að hlusta á smábút af Morgunpistli Láru Hönnu, þeirrar ötulu baráttukonu.  Og þar með sá ég að ég neyddist til að gera smáhlé á bloggfríi mínu.  Og þar sem mér er mikil alvara með það sem ég ætla að segja, þá læt ég ógert að tengja þennan pistil við fréttir, eða skjóta inn einhverju áreitinu til að vekja athygli á honum.  Þar að auki verður hann langur og torlesinn.

En efnislega sagði Lára Hanna að það  að skamma þann sem þurfti að þvo sér um hendurnar en gerði það ekki, væri rangt, sóðaskapurinn væri þeim að kenna sem höfðu pissað.   Maður á sem sagt bara að þvo sér um hendurnar þegar maður pissar sjálfur. 

Eða með öðrum orðum, þú mátt bara vera á móti ICEsave ef þú ert ekki Framsóknarmaður eða Sjálfstæðismaður.   Fyrri gjörðir þeirra eru þannig að eftirleiðis mega þeir ekki benda á sóðaskap annarra, eða berjast gegn ólögum eða rangindum, því þeir sáðu í akurinn sem rangindin spruttu úr.  Bóndinn sem sáði erfðabreyttu korninu, hvort sem það var í góðri trú eða að græðgi einni saman, hann má ekki vara við skaðsemi þess eftir að ljóst varð að neysla þess olli stökkbreytingu hjá neytendum þess.

Svo við höldum áfram með þessa rökfærslu Láru Hönnu, þá máttu  Bretar ekki verja Súesskurðinn því hluti þeirra hersveita sem það gerðu, voru sveitirnar sem höfðu farið með báli og brandi um Burma, þegar uppreisn þar var brotin á bak aftur.  Og Stalín, blóðugur upp af öxlum, mátti ekki verjast illsku Nasismans, og mannréttindaákvæði bandarísku stjórnarskráarinnar eru ómarktæk því Jefferson, höfuðsmiður þeirra var þrælaeigandi.  Og svartir þrælar Suðurríkjanna eiga að skila frelsi sínu, því stór hvati Norðanmanna var vilji verksmiðjueiganda að fá til sín hið ódýra svarta vinnuafl í verksmiðjur sínar.

Goðsögn Láru Hönnu  er sú að aðeins óflekaðar hendur megi berjast gegn illskunni.  Og ansi væri ég hræddur um að heimurinn væri ljótur í dag, ef hún hefði rétt fyrir sér. 

Áður en lengra er haldið, þá vil ég rifja upp orð óháðs fræðimanns sem bendir á eðli ICEsave deilunnar og afleiðingar hennar.  

Ísland hefur orðið fyrir árás - ekki hernaðarárás, heldur fjármálaárás. Afleiðingarnar eru jafn banvænar þrátt fyrir það. Fleiri verða veikir, lifa í örvæntingu og deyja fyrir aldur fram ef þjóðin neitar ekki að greiða til baka megnið af þeim lánum sem prangað hefur verið inn á hana á síðustu átta árum. En leiðin til bjargar er þyrnum stráð. Voldugir skuldunautar á borð við Bandaríkin og Bretland munu siga áróðursmeisturum sínum, sem og Alþjóðagjaldeyrissjóðnum og Alþjóðabankanum á Íslendinga og krefjast þess að þeir verði hnepptir í skuldafangelsi með því að þvinga þá til að greiða skuldir sem þessar þjóðir myndu aldrei greiða sjálfar.

 

Þetta er kjarni minnar Andstöðu, hún er ekki flokkspólitísk, og þó höfundur þessa orða (hér að ofan) sé frjálslyndur hagfræðingur, þá er hann hvorki í Sjálfstæðisflokknum eða Framsóknarflokknum.  Hann er bandarískur hagfræðingur, sem ofbýður siðleysi þess sem er verið að gera íslenskum almenningi. 

Ísland varð fyrir árás, og árásaraðilarnir hafa náð til að kljúfa Andstöðuna.  Fullt að mætu fólki er á mála hjá þeim, bæði fjárhagslega en ekki hvað síst andlegum, vegna pólitískra skoðana sinna eða andúðar á einhverjum öðrum, sem þó margt hafa á sinni samvisku, eru ekki gerendur þessarar árásar. 

Þessi málaliðar skuldunautanna segja að andstaðan á Alþingi sé efnahagslegt hryðjuverk, því með því að berjast gegn ICEsave ríkisábyrgðinni, sé reynt að hindra ríkisstjórn félagshyggjunnar í að endurreisa efnahagslíf landsins, að ICEsave sé lykilatriði þeirrar endurreisnar.  Undir þennan málflutning tekur Lára Hanna, og hún leggst svo lágt að vitna í bloggpistils málaliða, þar hann segir að núverandi forysta Sjálfstæðisflokksins geri það sem geti til að láta hina fyrirhuguðu endurreisn mistakast því annars verði flokkurinn áhrifalaus næstu árin.

Hvað á að segja um svona lágkúru?  Rifjum upp þessi orð: "Afleiðingarnar eru jafn banvænar þrátt fyrir það. Fleiri verða veikir, lifa í örvæntingu og deyja fyrir aldur fram ".  Þetta er borðleggjandi afleiðing af ICEsvae og AGS pakkanum.  Ef eina leiðin til að endurreisa efnahagslíf landsmanna er Vúdúhagfræði Nýfrjálshyggjunnar, þá er betra að efnahagslífið sé í rúst, því þú byggir ekki velmegun þína á blóði meðbræða þinna.  Slík sérhyggja er siðleysi og af illsku rótum runnin.

Samt kýs Lára Hanna þessa leið til að ná höggi á Sjálfstæðisflokknum.  Eins og ekki sé hægt að tukta þann ágæta flokk án þess að það sé gert með blóðfórnum.  Og þessi málflutningur er ennþá undarlegri því helstu rökin fyrir ICEsave samningunum er að þannig tryggi þjóðin sér lán til stóriðjuuppbyggingar, uppbyggingar sem á að virkja öll hverasvæðin sem þessi sama Lára Hanna vill vernda.  Og hefur fært fyrir því góð rök. 

En samt, viljinn til að höggva Sjálfstæðisflokkinn er svo sterkur, að engu er hlíft, ekki einu sinni sínum eigin lífsskoðunum. 

Þess vegna þarf Andstaðan að ræða þessi mál.  Hún þarf að höggva á þá goðsögn að ICEsave andstaðan sé flokkspólitísk, að andstaðan við Alþjóðagjaldeyrissjóðinn sé flokkspólitísk.

Hún er það ekki.  Þessi Andstaða snýst um að verjast hinni siðlausu innrás fjármálaafla sem Micahel Hudson bendir svo réttilega á.  Hún snýst um það sem Lilja Mósesdóttir alþingismaður bendir svo réttilega á bæði í ræðu á Alþingi og síðan áréttaði í Morgunblaðsgrein; "Þetta megum við ekki láta gerast hér á landi. Rísum upp sem þjóð gegn innheimtustofnuninni AGS og verndum hagsmuni komandi kynslóða og náttúruauðlindir þjóðarinnar". 

Og ekki er Lilja Mósesdóttir framsóknarmaður eða sjálfstæðismaður, hún er bara skynsöm kona, móðir, og skilur að það eina sem skiptir máli er framtíð barna okkar.  Og hún hefur það siðferði að skilja, að sú framtíð má ekki byggjast á blóði samborgara okkar.

Sumt er þannig eðlis að það má ekki.

Þetta verður Andstaðan að skilja.  Og hún verður að skilja að það er ekki öðrum til að dreifa að verja hagsmuni þjóðarinnar á Alþingi en þingmönnum stjórnarandstöðunnar.  Vissulega er það vonbrigði fyrir mig að þeir flokkar sem ég hafði kosið gegnum tíðina, séu þeir flokkar sem vinna fyrir innrásarliðið. Fyrirfram átti ég von á því að það yrði öfugt.  Ekki vegna mannvonsku sjálfstæðismanna, en hluti hans hefur alltaf átt hugmyndafræðilega samleið með innrásarliðinu. 

En í stríði spyr maður sig ekki um hugmyndafræði þess sem mannar vélbyssuna við hliðina á manni.  Það dugar að vita að hann sé að beina henni í rétta átt.

Í ICEsave stríðinu hafa margir hópar fólks, með mjög ólíkar lífsskoðanir, sameinast gegn hinu erlenda innrásarliði og innlendum málaliðum þeirra. 

En einn hóp vantar í þá baráttu, Félagshyggjuhópinn.  Hatur hans á Sjálfsstæðisflokknum yfirskyggir allt annað.  Öllu er fórnað, lífsskoðunum, hugsjónum, réttlætiskenndinni, bara að Sjálfstæðisflokkurinn fái á baukinn. 

En ég spyr; eru ekki börnin okkar meira virði en Sjálfstæðisflokkurinn. 

Ef svarið er Já, þá berjumst við gegn innrás hins alþjóðlega auðmagns þrælahaldara.

Ef svarið er Nei, þá styðjum við "efnahagslega endurreisn" ríkisstjórnarinnar. 

Í þessu stríði er ekkert val.

Kveðja að austan.

 

 

Athugasemdir

[Kalli Sveinss (IP-tala skráð) 4.12.2009 kl. 12:13]

Snjalli Ómar !

 "Félagshyggjuflokkurinn . Hatur hans á Sjálfstæðisflokknum yfirskyggir allt annað. Öllu er fórnað, lífsskoðunum, hugsjónum, réttlætiskennd, bara að Sjálfstæðisflokkurinn fái á baukinn"

 Sönn og laukrétt skrif!

 Íslenskir socialistar krefjast hefnda - hrunið eingöngu sök íhaldsins !

 En hefndin er heimskunnar fró.

 Menn setja plástur fyrir annað augað. Hvort ?

 Þá kemur í ljós að þá hrunið skall á, var bankamálaráðherrann úr Samfylkingunni

 Þegar hrunið skall á var stjórnarformaður Fjármálaeftirlitsins úr Samfylkingunni !

 Þegar hrunið skall á voru forsætis og utanríkisráðherrar úr Samfylkingunni !

 Hafa landsmenn áttað sig á, að af  ráðherrunum 12 - eru 9 - segi og skrifa níu - fyrrverandi félagar í Alþýðubandalaginu gamla ?? !!

 "Sovét Ísland - óskalandið, hvenær kemur þú" spurði skáld ættað af Austfjörðum .

 Það land er í augsýn. Draumalandið !

 Meðan systurflokkar jafnaðarmanna á vesturlöndum LÆKKA skatta, gera trúbræðir íslenskir hið gagnstæða.

Talað um " útsvars-fælni" sjálfstæðismanna í borgarstjórn Reykjavíkur !

 Að börnin og barnabörnin okkar eigi að borga um og yfir 700 MILLJARÐA vegna HATURS á hluta samlanda sinna, er sárar en orð fá lýst.

 Enn - það mun einhverntíma í fjarlægri framtíð, koma aftur vor í dal !

 Kveðja af Seltjarnarnesi.

[Kalli Sveinss (IP-tala skráð) 4.12.2009 kl. 13:03]

Snjalli Ómar !

 Átti að stenda.: " Þegar hrunið skall á voru NÚVERANDI forsætis & utanríksráðherra í ríkisstjórn - úr Samfylkingunni " !

 Smá " Grand finale" : Hvergi á byggðu bóli eru skattar hærri en hjá svokölluðum"frændum" vorun á Norðurlöndum.

 Afleiðing?

 Hvergi í heiminum  HLUTFALSLEGA JAFN MARGIR Á  B Ó T U M !!

 Aftur kveðja af Seltjarnarnesi !

[Ómar Geirsson, 4.12.2009 kl. 14:08]

Blessaður Kalli.

Sitt sýnist hverjum um orsakir Hrunsins.  Ég persónulega var nokkuð öruggur á því að hér myndi allt fara í þrot þegar bankamenn okkar komust upp með ofurlaun sín í svona litlu samfélagi.  Fyrir utan siðleysi þeirra þá er eins og fólk átti sig ekki á því að hagnaður og hagvöxtur er langtímaferli. skammtímagróði er annaðhvort rán eða gervihagnaður.  Það er í sjálfu sér enginn munur á vexti fyrirtækja og bústofns, þetta þarf allt sinn tíma, og ef of miklu er slátrað (eða hagnaður tekinn út úr kerfinu) þá er gengið á höfuðstólinn.

Það var ekki að ástæðulausu sem vitrir menn sögðu söguna um Gullkálfinn og dansinn kringum hann.

Og það er dálitið fyndið að einu stjórnmálamennirnir sem höfðu eitthvað við þetta að athuga með rökum voru þeir vopnabræður í anda (báðir íhaldsmenn) Ögmundur og Davíð.  En Davíð lét frjálshyggjustrákana í flokk þínum þagga niður í sér, og Ögmundi var kurteislega bent á af formanni sínum að vera ekki alltaf að æsa upp fjölmiðla og kjaftastéttir, því honum langaði í stjórn með Sjálfstæðisflokknum. (kannski er þessi sögulýsing smá einföldun, en ég gæti alveg skrifað alvöru pistil um hana og varið hann).  

En siðlaus græðgi hefur alltaf leitt til Hruns.  Hún hefur alltaf gert það, jafnt hjá ríkjum, einstaklingum og fyrirtækjum.  Og það er alveg tímabært að þið íhaldsmenn horfist í augun á því að Nýfrjálshyggjan var angi af kapítalismanum sem lenti i blindgötu, alveg eins og Neanderdalsmaðurinn var blindgata í þróun mannsins.  Ragnar Önundarson hefur skrifað margar góðar greinar í Morgunblaðið og bent á afleiðingar þessu blindu auðhyggju sem hann kallar og ekki er hann sósíalisti eða Hriflungur eins og ég.  Og það er þannig séð líka lítill munur á einokun stórfyrirtækja og einokun ríkiskommúnisma Stalíns.

En það sem ég vildi benda á var að við höfum mjög ólíkar lífsskoðanir í ICEsave Andstöðunni.  En við skemmtum skrattanum með því að vera sífellt að rífast um hvað gerðist og af hverju, verðum sjálf sagt seint sammála um það.  

Núna liggur landið undir árásum erlenda skuldunauta bankanna og þeim þarf að verjast.  Um það fjallar þessi pistill.  Árásin er að heppnast vegna þess að þjóðin snýst ekki til varnar.  Og með þessum pistli er ég að reyna að varpa ljósi á þann hugsunarhátt sem að baki býr afstöðu margra til ICEsave málsins.  Þetta fólk er svo heltekið af andstöðu sinni við Sjálfstæðisflokkinn að það telur það sín helstu rök fyrir ICEsave vera þá, að Geir Harde hafi skrifað undir einhverja yfirlýsingu þar um.  Það er í raun farið að framfylgja stefnu andstæðinga sinna til þess að ná sér niður á honum.  Og það hlálega er að hafi það einhvern tímann verið stefna Sjálfstæðisflokksins í ICEsavemálinu að standa ekki á rétti þjóðarinnar, þá er það ekki lengur.  Ef þetta er ekki að skemmta skrattanum, þá veit ég ekki hvernig það er hægt. 

Einhver hefði frekar tekið fagnandi hinum meintu sinnaskiptum flokksins.

Kveðja að austan.

[Kalli Sveinss (IP-tala skráð) 4.12.2009 kl. 16:51]

Snjalli Ómar !

 Í heilagri Ritningu segir.: " Í húsi föður míns eru mörg híbýli" o.s.frv. !

 Nýfrjálshyggja - nýyrði úr smiðju sósialista -er hvergi í stefnuskrá íhaldsmanna !

 Stefna Sjálfstæðisflokksins hefur hinsvegar ávallt verið skýr.: Virðing fyrir einstaklingnum og löglegum réttindum hans - með ábyrgð  til orðs og gjörða. - Setja ávallt einstaklinginn í öndvegi. Enn, krefjast um leið ábyrgðar af hans hendi. Þar brást því miður margur maðurinn  í dansinum kringlum gullkálfinn !

 Allir öfgar skaða. Jafnt siðlaus græðgi sem blind auðhyggja -þótt skelfilegast sé frosinn hrammur sósialismans.

 Sporin hræða.

 Getum við hinsvegar ekki verið sammála, að hrunið á Íslandi hafi verið einstakt fyrirbrigði ?

 Höfundar EES regluverksins, reiknuðu aldrei með, að bókstaflega  ALLIR bankar í einu ríki, gætu hrunið á EINNI viku !!

 Þarna liggur uppruninn grafinn !

 Það er hinsvegar hreint níðingsverk hjá v-grænum að skuldsetja afkomendur okkar um HUNDRUÐ MILLJARÐA fyrir fjóra fallvalta ráðherrastóla ! -Hvert eitt einasta stefnuatriði svikið.

 Skömm þeirra og Samfylingarinnar mun meitlast óáfmálega á spjöld Íslandssögunnar !

 25 þúsund - tuttugu & fimm þúsund Íslendingar- hafa nú skrifað undir áskorun á útrásar-keisarann á Bessastöðum.

 Sá " skíthæll" mun hafa þá áskorun að engu !Reyndar varð " landhreinsun" þegar hann flutti úr héraði !

 Aftur kveðjur af Seltjarnarnesi

[Ómar Geirsson, 4.12.2009 kl. 18:08]

Blessaður Kalli.

Flestir Íslendingar eru meira sammála en þá grunar.  Og það á að láta reyna á þá samstöðu, ekki kljúfa.

Ég er mikið sammála þér um stefnu Sjálfstæðisflokksins.  Ég hef sjálfur margoft sagt í Netheimum að hörðustu gagnrýnendur þess sem ég veit að við erum sammála um að sé ekki í stefnuskrá Sjálfstæðisflokksins, eru hægrimenn.  Eins var það þegar frjálshyggjan hin fyrri var brotin á bak aftur, hörðustu gagnrýnendur hennar voru í röðum breska íhaldsmanna.  Það vill svo til að einhvern tímann í fyrndinni (þó ekki svo gamall að ég hafi upplifað þessar deilur) þegar ég átti að vera lesa námsbækur, þá fannst mér miklu skemmtilegra að týnast á háskólabókasafninu og lesa enska félagssögu, og þar eru skelfilegar lýsingar á aðbúnaði fólks og hugsanahætti þeirra sem töldu hann vera náttúrlögmál.  Og þar voru líka raddir þeirra sem gagnrýndu þetta ástand, og unnu að útbótum.  Margir báru einhverja lávarðatitla og sira titla.

Ef þú ferð yfir sundið, þá þóttist Bismark vera að vinna gegn uppgangi sósíalista þegar hann kom á fót fyrsta nútímavelferðarkerfinu, en sannleikurinn er sá að kallinn vann út frá siðferðisforsendum.

Og núna þurfa núlifandi íhaldsmenn að rifja upp fallnar raddir, og á Íslandi þarf ekki að fara lengur aftur en til Geirs Hallgrímssonar eða Bjarna Ben til að vita um hvað málið snýst.  Verði það gert, þá verður allt "uppgjör" óþarfi, heldur mun breiðfylking fólks einhenda sér í að gera heiminn  byggilegan öllu fólki.

Því það er ekki sósíalismi, eða jafnaðarmennska eða kristileg íhaldsmennska eða samvinnustefna, það er, fyrir utan að vera heilbrigð skynsemi, Mennska.

En ég er ekki sammála þér að Hrunið hafi verið einstakt, hér á Ísland varð það að vísu harkalegra vegna stærðar fjármálamarkaðarins, en Hrunferlið er í gangi um allan heim, í mismiklum mæli þó.

Og það er verkefni okkar kynslóðar að stilla kúrsinn þannig að þetta endurtaki sig ekki í bráð.

Og angi af þeirri baráttu er réttlæti, líka í ICEsave.

Og Kalli, við erum að tala um sama vandann, nálgumst hann aðeins frá mismunandi sjónarhorni.

Bið að heilsa á Nesið.

Ómar.

[Umrenningur, 4.12.2009 kl. 20:43]

Kæri Ómar

Það er kannski við hæfi eftir þennan snildarpisti að nota ávarp Kalla Sveinss! Snjalli Ómar. Þessi fer langt í Breiðavíkurpistilinn þó á allt öðrum forsendum sé. Torlesinn? Nei, hér er greinilega skrifað frá hjartanu á mannamáli og þarf ekki að vorkenna neinum að lesa og skilja hvað þú ert að fara. Langur? Tja þeir hafa nú oft verið lengri hjá þér, en nei ég fékk alls ekki á tilfinninguna að pistillinn væri langur. Af réttri lengd miðað við boðskap er trúlega rétt greining. En ég kom ekki hér til að vera ritdómari í þínum skrifum heldur til að hæla þér fyrir snildarskrif og þakka þér enn og aftur fyrir þína góðu málsvörn til handa Íslenskri þjóð gegn erlendum fjárkúgurum og þeirra innlenda "þjóðníðingahyski" svo maður vitni í annann en gjörólíkann varnarjaxl, Guðmund Jónas - zumann. Ég er sammála þér með að það er eitthvað að félagshyggjufólki í dag, að vilja frekar klekkja á pólitískum andstæðingum en að vernda eigið fólk gegn erlendri kúgun er eitthvað sem enginn hefði getað hugsað sér fyrir ekki svo löngu síðan. En svona er þetta bara. Ég hef að undanförnu oft leitt hugann að því hvort Lára Hanna og fleira (fyrrverandi) félagshyggjufólk sé haldið fortíðarhyggju og sé enn fast í stúdenta pólitíkinni, það verður bara að afsakast þó ég segi fyrrverandi því atgangurinn að undanförnu hjá þessu vesalings fólki á ekkert skylt við félagshyggju og þá skiptir engu máli þó sjs segi það.

Enn og aftur, takk fyrir málsvörnina. Varðandi lúðrablásarann þá gengur mér illa að koma auga á einhvern einn hæfan en hinns vegar að koma nokkurum saman í lúðrasveit öldunga ætti ekki að vera stórmál. Lúðrasveit held ég að sé málið, þarf alls ekkert að vera neitt bigband en nógu stór til að vera margtóna og stærsti kosturinn er að einhver spilar falskan tón þá er auðveldara að yfirgnæfa hann. En þetta þurfum við að ræða óopinberlega.

[Ómar Geirsson, 4.12.2009 kl. 23:10]

Blessaður Umrenningur.

Og takk fyrir.  Pistillinn var ágætur, en varla snilld, en umræðuefnið var þarft, en illa lesið.

Sem kemur að kjarna þess máls, annaðhvort erum við steingervingar, eða á undan okkar samtíð.

Allavega erum við ekki í núinu.

En varstu ekki að tala um álfaspilara, kannski gætu smá töfrar komið okkur inn í samtíð okkar.

Og þetta með stúdentapólitíkina, mér er það til efs að margur sé eins brenndur eftir hana og ég.  En þá lærði ég það að maður hatast út í stefnu, ekki fólk.  Slíkt skemmir aðeins mann sjálfan.  En í dag virðist þetta hatur skemma þjóðina.  

Íhaldið er ekki þess virði.  Miklu frekar að ræða málin og fá fram sameiginlegar lausnir.  En sjúkleiki illsku og græðgi yfirtók bandaríska akademíu fyrir  þremur áratugum eða svo, og margur góður drengurinn festist í þeim illskupytti.  Og hann var ranglega kenndur við kapítalismann, alveg eins og jafnaðarmenn þurftu að dragast með Stalín.  

En illska er  illska, sama við hvaða ýldupytt hún kennir sig.

Og vissulega smituðust börnin okkar sem fóru til náms í Bandaríkjunum upp úr 1990 af þessari ýlduslepju, og mörg mannvonskan festi rætur og ýtti burt heiðarlegum kapítalisma og íhaldsmennsku.  En eins og hann Kalli Sveins benti á hér að framan, þá er þessi fýla ekki hluti af stefnuskrá Sjálfsstæðisflokksins, ekki frekar en önnur ýldufýla var á fjórða áratug síðustu aldar.

Og núna þegar þjóð okkar er í ölduróti og einhverjar liðleskjur vilja sökkva bátnum og láta næsta þrælaskip bjarga áhöfninni, hafa áhyggjur að það vanti nýja þræla á galeiðuna, að þá á vitiborið fólk að byggja brýr og finna sameiginlega fleti, en ekki að reisa virki og hrópa ókvæðisorð að hvert öðru.  

Þú getur séð það í anda Umrenningur góður hvað það er fáránlegt að reisa virki um borð í litlu fleygi langt út á rúmsjó, nær væri að allir færu að ausa og vinna hörðum höndum til að koma þjóðarskútunni í var.  Þó það væri ekki til annars en að geta hrópað ókvæðisorð af hvert öðru, þegar í lognið er komið.

Og það sem ég er að segja, kemur ekki flokkum við. Ef síðasta stjórn hefði ekki fallið, þá væri ég að skamma íhaldið, og bloggvinir mínir væru vinstramegin við miðju.  Bara sú staðreynd ætti að fá fólk til að skilja að þetta er ekki flokkspólitík.

Þetta er varnarbarátta, sem bráðum verður að frelsisbaráttu.  Og börnin okkar vilja ekki verða að galeiðuþrælum.  

Ef við berjumst ekki sökum heimsku og sundrungar,  þá gera þau það.

Þess vegna þurfum við lúðraþeytara.  Ég er að reyna að ráða liðsforingjann sem sér um herþjálfunina (gæsagang og kunna að heilsa að hermannasið, það kunni Trosky og þess vegna vann Rauði herinn Rússland), og þá er kominn vísir að her handa þeim sem flytur herhvötina.  

En eftir að Ögmundur gekk úr skaftinu, þá sé ég hann ekki í augnablikinu, en herinn verður þá allavega tilbúinn, það er ef lúðrablásarinn og liðsforinginn mæta.

Heyrumst.

Kveðja, Ómar.

[Júlíus Björnsson, 5.12.2009 kl. 00:29]

Almennt í sögunni eru háð efnahagsstríð milli efnahagseininga. Það heyrir til undantekninga ef gripið er til beinna mannsdrápa.

Algengustu byrjunarvopnin í [efnahags]stríðum eru í mútur, undanróður, viðskiptaþvinganir, útilokanir.

National Sosíalismi var til vinstri í Framsóknarflokki og Sjálfstæðisflokki ef mig minnir Sósíalistar urðu DemoKrat eða Kommar. EU nálgast að vera National Sosial Democratism. Nasty. Hitler ætlað alltaf að halda hefðbundinni Ríkjaskiptingu í EU, þegar hans Þýskaland væri sameinað. Bretar áttu að vera næstu nágrannar. EU byggir á menningararfleið Hæfs meirihluta.

[Elle_, 5.12.2009 kl. 16:52]

Andstaðan gegn Icesave er EKKI málþóf og ég las pisltilinn þinn að ofan um skrif Láru Hönnu fyrir Icesave og gegn andstöðu Alþingismanna stjórnarandstöðunnar  í forundrun, Ómar.  Og ég setti link inn í þennan pistil þinn í pistil Láru Hönnu þar sem hún talar enn um málþóf og skrifaði þetta þar:

____________

Andófið í Alþingi af hálfu stjórnarandstöðunnar er ekki málþóf, heldur eina vörnin sem við höfum gegn Icesave fjárkúguninni og kannski fátækt og gjalþroti.   Mig langar að benda á pistil Ómars Geirssonar (og alla fyrri pistla hans um Icesave) um andóf gegn Icesave fjárkúguninni og langar að minna fólk á orð Michael Hudson um að við getum engan veginn staðið undir Icesave.  Pistill Ómars:  http://omargeirsson.blog.is/blog/omargeirsson/entry/988431/

____________

Og bæti við:

Andstaðan gegn Icesave er EKKI málþóf og ég las pisltil Ómars að ofan um fullyrðingar þínar þar um í forundrun.  Hélt þú værir ein þeirra síðustu til að standa gegn vörn þjóðarinnar gegn fjárkúgun.  Og var jafn hissa að lesa að þú vildir að við tækjum á okkur Icesave.   Og það að gangast undir hundraða milljarða og kannski þúsunda milljarða skuld sem við skuldum ekki muni hjálpa okkur að fá lán og hjálpa okkur yfirleitt er fjarstæða.   Óviðráðanlegar skuldir gera það öfuga að verkum.  Og Icesave er óviðráðnalegt og fyrir utan það að við skuldum það EKKI.      

Andstaðan gegn Icesave er heldur ekki flokkspólitik og hvað sem þér kann að finnast um gamla Framsóknarflokkinn og Sjálfstæðisflokkinn.  Og bendi á að fjöldinn allur af nýjum og færum og rökföstum Alþingismönnum koma nú úr þessum 2 flokkum og eru að berjast gegn Icesave fjárkúguninni.   Með baráttu þinni gegn öllum rökum stjórnarandtöðunnar gegn Icesave geturðu valdið okkur skaða.  

Þú sjálf settir John Perkins og Michael Hudson upp á stall og birtir pistla um þessa menn og viðtöl við þá.   Mannstu ekki hvað þeir sögðu um að við gætum ekki og ættum ekki að taka á okkur ofurskuldir sem við réðum ekki við og gætu gert okkur fátæk og kannski gjaldþrota???   Hefur þú ekki verið að nota þeirra orð og berjast gegn kúgun og óréttlæti???   Ekki vinna gegn orðum þeirra.  

Gamli Framsóknarflokkurinn og gamli Sjálfstæðisflokkurinn eru sekir um að valda okkur miklum skaða, já.  Og Samfylkingin, hefur líka valdið okkur ómældum skaða og er enn að skaða okkur.   Gerspilltur og spilltastur allra flokka og ef við ætlum að ræða flokkaspillingu getum við síst sleppt þeim.  John Perkins sem þú vitnaðir í framdi einu sinni glæpi gegn heilum þjóðum með dyggum stuðningi AGS.   Af hverju má hlusta á hann núna en ekki nýja menn í Framsókn og Sjálfstæðisflokknum???  

Mannstu eftir orðum John Perkins og Michael Hudson?   

IMF, ICELAND, LATVIA: Michael Hudson: Can Iceland and Latvia pay the foreign debts run up by a fairly narrow layer of their population? The European Union and International Monetary Fund have told them to replace private debts with public obligations, and to pay by raising taxes, slashing public spending and obliging citizens to deplete their savings:
http://www.counterpunch.org/hudson08182009.html

http://michael-hudson.com/articles/countries/090816Icelandspread.html

MIchael Hudson: Þróunarlönd hafi verið knúin til erfiðra aðhaldsaðgerða í ríkisfjármálum til að endurgreiða skuldir
http://mbl.is/mm/frettir/innlent/2009/08/16/fleiri_fari_ad_daemi_islands/

http://www.ft.com/cms/s/0/f3a6cf22-8a8b-11de-ad08-00144feabdc0.html

Confessions of an economic hitman, John Perkins:
1 OF 3:
http://www.youtube.com/watch?v=yTbdnNgqfs8  +

http://www.youtube.com/watch?v=yTbdnNgqfs8&feature=related

2 OF 3:
http://www.youtube.com/watch?v=29GhXsx7-Rs&feature=related

3 OF 3:
http://www.youtube.com/watch?v=ZKa9QYY1OUE&feature=related


IMF: Nathan Lewis: IMF destroys Iceland and Latvia; The IMF should be abolished:
http://www.huffingtonpost.com/nathan-lewis/the-imf-destroys-iceland_b_276193.html

[Ómar Geirsson, 5.12.2009 kl. 17:02]

Blessaður Júlíus.

Já menn hafa slegist með ýmsu í gegnum tíðina.  Og eitthvað finnst mér líklegt að þessum vopnum sem þú minnist á, hafi þegar verið beitt með góðum árangri víða, hvernig er hægt til dæmis á annan hátt að útskýra Nautheimsku Ruv í þessu máli????????  Jafnvel fréttamenn á ríkisútvarpi Norður Kóreu, hefðu skammast sín fyrir viðtalið við áróðurskonu Samfylkingarinnar sem sagði svo hneyksluð að það væri bara alvega að fara með taugakerfi Hollendinga og Belga (minnir mig) að á Alþingi Íslendinga væri sagt að  landsmenn ættu að "hlaupast undan ábyrgð sinni" á innlánstryggingum sínum vegna ICEsave.

Það hvarflaði ekki að fréttamanninum að spyrja þessa aumkunarverða konu hvað ábyrgð hún væri að tala um, vissi hún eitthvað meira en við hin????  Og síðan í framhaldi, hvað skiptir það þjóðina hvað kúgarar okkar hugsa?????

Áttu sem sagt Norðmenn ekki að skjóta á þýska hermenn því mæður þeirra gætu orðið sárar?????

Það hljóta alltaf að vera ákveðinn takmörk á þeim hálfvitahætti sem þjóðinni er boðið upp á.  Þegar þau takmörk eru brotin, þá er útilokað að svona yfirgengileg heimska þrífist, mútur eða hreinlega flugumenn, eru einu rökréttu skýringarinnar á svona fréttaflutningi á ríkisfjölmiðli þjóðar, sem hefur orðið fyrir árás sem er ígildi þess að "sprengju hefði verið kastað á Reykjavík" eins og Þórunn Sigurðardóttir sagði á Alþingi nýverið.

Þetta er álíka mikið út í hött eins og dæmdir nauðgarar yrðu ekki látnir afplána, heldur settir daglega í fréttatíma Ruv til að ræða um næstu fyrirhugaða nauðgun.  Og aðeins aumingjaþjóð sættir sig við svona vinnubrögð.

Kveðja að austan.

[Ómar Geirsson, 5.12.2009 kl. 17:29]

Blessuð Elle, kjarnakona.

Þú gast alveg sleppt að vitna í mig greyið, það gat einfaldlega skemmt fyrir þínum góða málflutningi.  Fólk kýs ekki svona að öllu jöfnu, blóðugar skammir á bloggi sínu.  Það þarf vissan manndóm að láta hann standa, sérstaklega þegar fólk finnst gróflega að sér vegið.

En þú ert orðinn skriðdreki í rökræðum og innslag þitt til Láru er mjög sterkt.  

Ég hef dálítið gert að þessu að skamma menn fyrir linkind í ICEsave vegna alls óskyldra mála.  Og ansi margir í Andstöðunni eru samdauna röksemdafærslu óvina okkar.  Sérstaklega virðast margir trúa því að þjóðin sé siðferðislega ábyrg vegna þess að íslenskir bankar fengu starfsleyfi erlendis og frömdu þann höfuðglæp að taka við innlánum.  Svona þar fyrir utan þá að það var ekki mikil gæfuákvörðun að hleypa Landsbankanum til Hollands þegar ljóst var hvert stefndi, þá virðist fólk alveg gleyma eðli EES samningsins og eðli bankaviðskipta. 

Bankar taka við innlánum, EES samningurinn gerir ráð fyrir starfsemi þeirra á öllu efnahagssvæðinu.  Ef þú hafðir leyfi til að starfa á Íslandi, þá hafði þú leyfi til að starfa annars staðar, svo einfalt var það.  

Og ekki man ég til þess að þeir sem vilja láta þjóð sína borga vegna hinnar meintu siðferðislegu ábyrgðar, hafi staðið með spjöld niðri á Austurvelli og beðið um lokun íslensku bankanna, frekar að margir af þeim hafi staðið í biðröð fyrir utan skrifstofu bankastjóranna og reynt að kría út styrki.

Á góðu máli heitir þessi málflutningur hringavitleysa, og hefur gert marga mætan manninn ringlaðan.

En gaman að heyra í þér Elle.

Kveðja að austan.

[Elle_, 5.12.2009 kl. 18:17]

Ómar, ég hafði minn vafa um að orðum mínum yrði leyft að standa og þess vegna setti ég bara nokkrar línur þar, innan strikanna að ofan, og vísaði svo í pistilinn þinn.  Og nei, það getur ekki skemmt að vísa í sterkan pistilinn þinn og jafnóðum í síðuna þína í heild sinni.  

"Núna liggur landið undir árásum erlenda skuldunauta bankanna og þeim þarf að verjast.  Um það fjallar þessi pistill.  Árásin er að heppnast vegna þess að þjóðin snýst ekki til varnar.  Og með þessum pistli er ég að reyna að varpa ljósi á þann hugsunarhátt sem að baki býr afstöðu margra til ICEsave málsins.  Þetta fólk er svo heltekið af andstöðu sinni við Sjálfstæðisflokkinn að það telur það sín helstu rök fyrir ICEsave vera þá, að Geir Harde hafi skrifað undir einhverja yfirlýsingu þar um.  Það er í raun farið að framfylgja stefnu andstæðinga sinna til þess að ná sér niður á honum.  Og það hlálega er að hafi það einhvern tímann verið stefna Sjálfstæðisflokksins í ICEsavemálinu að standa ekki á rétti þjóðarinnar, þá er það ekki lengur.  Ef þetta er ekki að skemmta skrattanum, þá veit ég ekki hvernig það er hægt. 

Einhver hefði frekar tekið fagnandi hinum meintu sinnaskiptum flokksins."

Vildi að fólk í heild sæi hvað þetta þýðir.  Það er akkúrat málið að þetta snýst ekki um neina fjandans gamla pólitík.  

"Og vissulega smituðust börnin okkar sem fóru til náms í Bandaríkjunum upp úr 1990 af þessari ýlduslepju, og mörg mannvonskan festi rætur og ýtti burt heiðarlegum kapítalisma og íhaldsmennsku."

Já, lærði þar sjálf 1990 + og -  -_-   Og þó er ég nú enginn krakki.  -_-

"Algengustu byrjunarvopnin í [efnahags]stríðum eru í mútur, undanróður, viðskiptaþvinganir, útilokanir."

"Það hvarflaði ekki að fréttamanninum að spyrja þessa aumkunarverða konu hvað ábyrgð hún væri að tala um, vissi hún eitthvað meira en við hin????  Og síðan í framhaldi, hvað skiptir það þjóðina hvað kúgarar okkar hugsa?????

Það hljóta alltaf að vera ákveðinn takmörk á þeim hálfvitahætti sem þjóðinni er boðið upp á.  Þegar þau takmörk eru brotin, þá er útilokað að svona yfirgengileg heimska þrífist, mútur eða hreinlega flugumenn"

Já, maður er farinn að halda ýmsa hluti um flugumenn og mútur og undanróður og útilokanir og þvinganir.  Hrollvekjandi og ógnvekjandi.  Já, hvað í veröldinni skiptir það okkur hvað kúgurum okkar finnst og hvað kúgarar okkar hugsa???

[Ómar Geirsson, 5.12.2009 kl. 19:39]

Já, blessuð Elle, nennti ekki í uppvaskið og athugaði hvort einhver hefði sagt eitthvað um baráttufundinn, og sá þá póstinn þinn.

Ég hefði látið allt þetta innslag þitt að ofan koma fram hjá Láru, sérstaklega fannst mér vinkill þinn á Perkins góður, og sannur.

En ég vona að þú sért ekki að stríða mér með því að taka út þessar setningar hér að ofan, þær eiga að skoðast í samhengi, það er þessi innslög hafa ákveðin tengsl við innslög þeirra sem ég er að svara, eða spjalla réttara sagt, því ekkert "óvinainnslag" kom á þennan pistil.  Ég er ekki mjög fallegur þegar ég tala um Nýfrjálshyggjuna, en í staðinn held ég friðinn við íhaldið, áður fyrr á árum taldi ég það gott ráð við leiðindum að finna mér íhaldsmenn til að argast í.  En það breytir því ekki að í ICEsave/AGS málinu á ég samleið með Frjálshyggjufélaginu og því hefði ég aldrei getað trúað fyrir fram, og er reyndar sammála mörgu sem þeir segja þessa dagana.  En það þyrfti að senda þessa stráka í kirkju til að læra um siðaboðskap kristinnar og gildi hennar fyrir frið og stöðugleika.   En ég er ekki að argast almennt í fólki sem hefur lært í Bandaríkjunum, en siðferði í Bandarísku viðskiptalífi tók U-beygju upp úr 1980, og það versta í mannsandanum var gert að höfuðdygðum "framsækinna" stórfyrirtækja.  Dálítið sorglegt því siðfræði þess besta var líka þróað í Bandarískum viðskiptaháskólum og mörg góð bók um stjórnun hefur komið þaðan, allavega las ég nokkrar á mínum yngri árum, en þekki það ekki svo vel í dag.

En þú gast alveg vitað hvert stefndi hérna þegar Jack Welc, forstjóra GE var boðið til landsins, og það var fullt út úr dyrum.  Þegar þú þekkir prédikarana, þá veistu um hegðun hjarðarinnar, til dæmis þurfti engin að vera hissa á gjörðum Mansons gengisins, allar orsakir eiga sér sínar afleiðingar.

En ég veit það þetta er vindmyllustríð, en þetta er gjaldið sem íhaldsmenn þurfa að greiða ef þeir vilja lesa skrif mín.  

Og kvislingarnir hjá Ruv fegnu sinn skammt því mér ofbauð svo að hlusta á hana Sigurbjörg í gær.  Gott að eiga gremjuna á blaði, ef ég skyldi vilja vinna úr því seinna.

En við heyrumst við tækifæri, næsta vika verður fróðleg í ICEsave málinu.

Kveðja að austan.

[Júlíus Björnsson, 5.12.2009 kl. 21:34]

Almenningur í hernaðarmenningar Ríkjum EU, telur Íslendinga eigi að refsa þeim sem  fóru glæpsamlega með þjóðarhagsmuni.

Nú liggur ljóst fyrir að EU fjárfestar fjármögnuðu 90% af lánum Íslensku einkabankanna til fjárfestingar í EU að mestu leyti, sömu fjárfestar mata krókinn á refsivöxtum og hirða svo allt sitt gott í betur ef ekki strax þá fram í sækir, enda gjörsamlega ómerkilega lygilegt að Banki eins og Deutche Bank hafi lánaði af glæpsamlegu kæruleysi. Í ljósi fullvissu um hvað gæti gerst ef einkabankakerfið hér myndi hrynja.

EU er súrefnisgjafinn sem kveikti í græðgisglóðum einokunar samsteypanna sem komið var hér á í skjóli EES regluverks.

Bretar beittu efnahagshryðjuverkalöggjöf EU fyrir sig, sem ekki má bitna á almenningi viðkomandi ríkis nema stjórnvöld lýsi ábyrgð á glæpnum og frýi meinta einstaklinga undan ábyrgð. 

Þeir sem blésu upp bóluna bera mestu ábyrgðina að mínu mati: lánadrottnar Íslensku einkabankanna.

Almenningur Íslenskur alls enga. Athafnir einka aðila stofnuðu ekki Breska ríki í hættu heldur því Íslenska án nokkurs vafa.

Spursmálið er hvort þeir hafi verið höfundarnir þegar litið er á allt efnahagssvæði EU  og hagsmuni hæfs meirihluta EU.

[Umrenningur, 6.12.2009 kl. 09:52]

Þetta er mjög áhugaverður vinkill Júlíus, ég man ekki eftir að hafa séð þetta tekið svona saman í samhengi áður.

[Ómar Geirsson, 6.12.2009 kl. 13:55]

Takk fyrir innlitið félagar.

Tek undir með Umrenningi, það er alltof lítið rætt um ábyrgð þeirra sem lánuðu í okkar ofvaxna bankakerfi.  

Og svo á hengja þann eina aðila sem ekkert hafði um málið að segja, íslenskan almenning.

Kveðja að austan.