Starfsmenn Ruv eru farnir að hafa miklar áhyggjur af ICEsave reikningnum.

Og þeir eru logandi hræddir um að fá ekki að borga hann.

Ögmundur Jónasson er ekki lengur vinur Ruvara.  Þeir eru farnir að tala illa um hann og fá liðsinni, sem aldrei bregst, ofanúr Háskóla Íslands.  Ögmund og hans fólk á að rægja með öllum ráðum, "þetta er fólkið sem er alltaf á móti" og það ætti því að vera í sér flokki "Mótstöðu flokknum."  Líklegast er besta dæmi um þennan dæmalausa mótþróaþrá, hin stöðuga gagnrýni sem Ögmundur hélt uppi í ræðu og riti gegn grunnstöðum þjóðfélagsins og þeim miklum tekjum sem þær sköpuðu í efnahagslífinu.  Og í dag er það mótþrói hans gegn ICEsave, maðurinn er jafnvel að sprengja ríkisstjórnina með sínu sífellda tali um  "þingræði", og orð hans um vini okkar og velgjörðarmenn hjá Alþjóðagjaldeyrissjóðnum eru ekki eftir hafandi.

Og við þessu þarf að bregðast og við þessu brást Ruv.  Þeir fundu norskan prófessor, sem hafði miklar áhyggjur af ICEsave mótþróa Ögmundar.  Og sá maður talaði bæði af þekkingu og röggsemi um ICEsave samninginn, taldi hann bæði hagfelldan og sanngjarnan.  Ég ætla ekki að gera athugasemd um hvað mér komi álit þessa norska prófessors við, hugsanlega hefur fréttastofa Ruv talið að Þórólfur prófessor vekti ekki lengur þann tiltrúnað sem nauðsynlegur væri ef fréttin ætti að gagnast Borgunarsinnum í ICEsave deilunni, né eða þá að Þórólfur væri kvefaður, og því fullhás til að skiljast.

En til hvers að orðlengja þetta, orð hins norska sérfræðings standa fyrir sínu.

Hann segir Icesave samninginn vera eins sanngjarnan og hægt hafi verið að búast við. Hann segir ákvæði um að Íslendingar byrji ekki að greiða af láninu fyrr en eftir sjö ár vera lykilatriði og svo geti farið að verðbólga éti upp hluta af láninu.

 Já  þetta er sanngjarn samningur og því ótrúlegt að Ögmundur skuli sí og æ sína sitt algjöra dómgreindarleysi.  Og við skulum líka íhuga siðferðilegu hlið ICEsave deilunnar eins og norski sérfræðingurinn  gerir réttilega.

Chand segir Íslendinga verða að reyna að skilja afstöðu Breta og Hollendinga. Eðlilegt sé að þjóðir gæti eigin hagsmuna og við hefðum gert slíkt hið sama.

 Já, þetta er alveg rétt.  Það er tímabært að hin háværa andstað skilji afstöðu Breta og Hollendinga, enda þessar þjóðir mikið misskildar í gegnum tíðina.

En, ég get ekki að því gert að ef ég á einhvern tímann eftir að upplifa nágrannadeilu Íslendinga gagnvart smærri nágrannaþjóðum okkar, að þá virði íslensk stjórnvöld þau lög og reglur sem gilda í samskiptum þjóða en noti ekki grímulausa kúgun og ofríki til að knýja smærri nágranna til hlýðni, og jafnvel myndi ég vonast til að auk laga og réttar yrði líka sanngirni látin ráða för ef deilumálið væri lífshagsmunamál okkar nágranna en minniháttarmál hjá okkur.  Það veit enginn hvurs er neyðin næst.

En  hvað veit ég um hið kalda hagsmunamat stórmennanna, ég er ekki ofbeldismaður í samskiptum og trúi á gildi laga og rétta.  Einnig tel ég rangt að láta undan kúgun og ofríki.  Þyki einnig vænt um þjóð mína og fengi því líklegast aldrei tækifæri að vinna hjá Ruv og þyrfti þar að leiðandi aldrei að velta fyrir mér hinum dýpri rökum (ofbeldis) tilverunnar. 

En ég styð Ögmund í þessu máli og finnst það ekki erfitt.

Kveðja að austan.