Jóhanna gerðu þjóð þinn og þér sjálfri stóran greiða!!!

Segðu af þér. 

Þú ert gjörsamlega óhæf að takast á við núverandi vanda þjóðarinnar.  Hann er af þeirri stærðargráðu að gömlu hefðbundnu ráðin duga ekki.

Það þarf leiðtoga til að snúa við þróuninni áður en allt verður um seinan.  Og þá er ég að meina um seinan í þeirri merkingu að kreppan fer að krefjast mannfórna.  Bæklað velferðarkerfi mun ekki geta séð um sína.  Örvinglað fólk í skuldakreppu mun gefast upp.  Þjóðin mun missa eigur sína í hendur útlendra fjárböðla.

Ég veit að þú vilt vel og ert öll að vilja gerð.  

En þú ert ekki leiðtoginn sem þjóðin þarfnast.

Ef þú værir sá leiðtogi, þá væru ráðgjafar þínir ekki þeir sem horfðu upp á Hrunið án þess að æmta eða skræmta. 

Þá væru ekki menn hinna hefðbundnu ráða þínir einu stuðningsmenn.

Því þetta er ekki venjuleg Kreppa.  Þetta eru Hamfarir.

Leiðtoginn sem þjóðin þarfnast hefur skýra framtíðarsýn.   Hann til dæmis lýgur ekki að þjóð sinni að ólöglegar fjárkröfur breta séu "skuldbindingar þjóðarinnar".  Svona talar aðeins bugðuð manneskja sem segir allt við böðla sína svo hann hlífi einhverju.

En Jóhanna.  Leiðtogi segir satt.  

Leiðtogi er ekki buguð manneskja sem leiðir hnípna þjóð á borð slátrarans.  Leiðtoginn er stoltur maður sem leiðir stolta þjóð út úr erfiðleikum sínum.  Með þeim ráðum sem þarf.  Með þeim ráðum sem duga.

Og Jóhanna, það er ekkert af því að vera fátæk þjóð, en það er mikið af því að vera aum þjóð.  Og þú talar aumingjaskapinn upp í þjóð þína.  Og þú lýgur að henni að hún sé sek um þá glæpi sem auðmenn hennar frömdu.  En það var ekki íslenska þjóðin sem fann upp græðgikapítalismann og það var ekki íslensk þjó sem fann upp auðmenn.  Hvað þá að hafi verð íslensk þjóð sem setti og útfærði regluverk ESB sem þessir auðmenn störfuðu eftir.  

Jóhanna.  Við erum ekki sek.  Bara það eitt að þú getir ekki sagt það við þjóð þína, gerir þig óhæfa.  Það er nefnilega ekki nóg að vilja vel, það þarf líka að leiða vel.

Þú skilur ekki að hagfræðingar eru eins og hvert annað tæki, eins og til dæmis leiðsögutæki í flugvél.  En það ert þú sem átt að gefa upp áfangastað.  Ekki leiðsögutækið. 

Leiðtogi þjóðarinnar er manneskja sem segir hvað hann vill með sína þjóð og hvert hann vill stefna.  Hann vill velferð og jöfnuð og til þess þarf hann heilbrigt efnahagslíf og heilbrigða stjórnsýslu.  Og hann krefst þess að fólkið í landinu, því það er jú það sem kaus hann, fái lifað í þessu landi, í friði fyrir fjárúlfum og siðblindingjum.  Og það er siðblinda að setja skuldahlekki á unga fólkið, fólkið sem elur upp börnin okkar.  Skuldahlekki sem eiga að tryggja að Ábyrgðarmenn Hrunsins fái sitt að fullu, þeir sem komu okkur í þessi vandræði, þeir eiga enga bagga að bera, heldur þjóðin.

En þetta er svo rangt, og það veit leiðtoginn.

Því spyr leiðtoginn hvað þarf að gera svo markmið okkar náist.  Bara þessi einfalda spurning, útilokar menn hinna hefðbundnu lausna.  Enda er það vel.  Þeir fengu sitt tækifæri í aðdraganda Hrunsins og þeir brugðust algjörlega.  Þeir eru bilað leiðsögutæki, fara annaðhvort í viðgerð sjálfviljugir eða þeim á henda eins og hverju öðru rusli.

Og leiðtoginn fær svör, því svörin eru til staðar.  Gunnar Tómasson, sá mæti hagfræðingur, hefur bent á raunhæfa lausn á skuldavanda þjóðarinnar og hvernig á að tækla gjaldeyrisvandann.  Og Lilja Mós og Jón Dan og fleiri og fleiri.  

Vitið flýtur út um allt, en hagsmunir heimskunnar hafa blint þér sýn Jóhanna, og þú notaðir ekki þitt sögulega tækifæri.  

Því átt þú að víkja og hleypa leiðtoganum að.

Kveðja að austan.

 

 

Jóhanna: Þolinmæðin á þrotum

Athugasemdir

[Guðmundur 2. Gunnarsson (IP-tala skráð) 29.9.2009 kl. 21:53]

Sæll austmann.

Hvað þykist Jóhanna eiginlega vera að uppgvötva eftir allan þennan tíma, sem þjóðin var löngu búin að gera sér grein fyrir varðandi handrukkun og ofbeldi AGS eftir pöntun alþjóðasamfélagsins ESB, Breta og Hollendinga, og hefur haft hátt um þá uppgvötvun?

Núna er haft eftir íslenska forsætisráðherranum:

“Það er hins vegar ljóst að AGS vill sjá lausn á Icesave-málinu áður en endurskoðun fer fram.”

Við þessi orð vakna ýmsar spurningar um það sem Jóhanna hefur áður sagt um tenginguna milli Icesave og AGS - eða öllu heldur þrætt fyrir slíka tengingu:

Jóhanna Sigurðardóttir sagði á Alþingi 10. ágúst:

“Hæstv. forseti. Ég held að það sé alveg skýrt og klárt að norrænu lánin eru ekki tengd Icesave-samningnum að neinu leyti öðru en því að norrænu lánin eru liður í þeirri áætlun sem við höfum gert með Alþjóðagjaldeyrissjóðnum. Það er ekkert annað sem þar býr að baki að mínu viti.“

Jóhanna Sigurðardóttir sagði á Alþingi 13. júlí:

“Virðulegi forseti. Að því er varðar það sem hv. þingmaður spyr um, hvort Alþjóðagjaldeyrissjóðurinn hafi gert einhverjar kröfur eða tengingar á milli Icesave-samninganna og þeirrar endurskoðunar sem nú fer fram á því samkomulagi sem við höfum gert við AGS hafa þeir ekki verið með neinar hótanir uppi í þessu sambandi eða gert einhverjar kröfur um að við gengjum frá Icesave-samningunum fyrst. Að vísu hefur það komið upp í umræðum og viðræðum sem ég átti við fulltrúa Alþjóðagjaldeyrissjóðsins fyrr í sumar. Þeir hafa rætt það mál og sagt á þá leið að það mundi alla vega ekki greiða fyrir málum — ég man ekki hvernig það var orðað, en að það væri betra ef þetta mál væri leyst en ef það væri óleyst.“

Og síðar í sömu umræðu:

“Virðulegi forseti. Það er nauðsynlegt að það komi fram að það var alls ekki þannig að Alþjóðagjaldeyrissjóðurinn eða fulltrúar hans hafi sett þetta sem eitthvert skilyrði, eins og mér fannst hv. þingmaður setja það upp, það er bara langt í frá að þeir hafi gert það. Það var meira að segja undirstrikað að þeir væru ekki að setja fram neitt skilyrði í því efni þó að þeir segðu að það væri betra að búið væri að ganga frá Icesave-samningunum áður en endurskoðunin færi fram. Það er alveg ljóst.“

Jóhanna Sigurðardóttir sagði á Alþingi 25. maí:

“Varðandi það að sett séu skilyrði í tengslum við áætlun Alþjóðagjaldeyrissjóðsins, að við höfum samið um Icesave og gengið að því sem þeir óska eftir, þá er það ekki rétt. Við göngum ekki að einhverju sem Icesave (er átt við Breta og Hollendinga- innsk. smáfugla) leggur fram. Um er að ræða samninga milli tveggja aðila og báðir þurfa að komast að ásættanlegri niðurstöðu.“

Spurt er: Vissi Jóhanna Sigurðardóttir ekkert um afstöðu AGS? - Skildi hún ekki fulltrúa sjóðsins - eða var hún vísvitandi að gefa þinginu rangar upplýsingar?

Hvert á við, - Sælir eru fattlausir því þeir fatta ekki hvað þeir eru vitlausir, - eða - Betra er seint en aldrei, - eða - Það er ljótt að ljúga?

Kveðja að sunnan.

[Jón V. Þorsteinsson, 29.9.2009 kl. 22:26]

Þvílíkt sammála þessu Ómar, vel mælt! .. og Þetta er því miður staðreynd, Jóhanna fékk sitt tækifæri en hún er alveg útbrunnin konugreyið, hér þarf ferskan anda, kraftmikinn og djarfan (óhræddan) karakter, hver gæti nú það verið? einhver alþingismanna?

kveðja, Nonni

[Ómar Geirsson, 29.9.2009 kl. 23:34]

Blessaður Guðmundur.

Ennþá mikið takk fyrir linkinn á Sigurð.  Hann leysti mig endanlega undan ICEsave áþjáninni.  Hvílík snilld hjá manninum.  En kannski of satt til að hinu vitgrönnu fatti.  Það hefði kannski þurft að einfalda grein hans niður í tvær málsgreinar, og setja upp með stóru letri, svo hún hefði fengið umfjöllun fjölmiðla, til dæmis Kastljós.  En þá hefði Sigmar greyið kannski brunnið yfir um, þannig að sjálfsagt er best að láta kjurt liggja.

En góð samantekt hjá þér.  Ég vona að hún fari sem víðast.  Og ég vona að í tíma uppgötvi Jóhanna sæluna við það að hætta að ljúga að þjóð sinni.

Kveðja að austan.

[Ómar Geirsson, 29.9.2009 kl. 23:37]

Blessaður Jón.

Veit ekki hver það er sem ég er að lýsa.  En hann er til.  Það veit ég þó.

Vandamálið er að ég held að viðkomandi viti það ekki sjálfur.

Kveðja að austan.