Vá, var hann að lesa bloggið mitt???

Og blogg hundruð annarra sem hafa bent á heimskuna frá  því að hún var boðin velkomin til landsins síðasta haust???

Þá voru öfl í Seðlabankanum og í Sjálfstæðisflokknum á móti aðkomu Alþjóðagjaldeyrissjóðsins.  Voru sjálfsagt ekki nógu heimskir til að gera slæmt óviðráðanlegt.  Og VinstriGrænir voru á móti ásamt framsóknarmönnunum í Framsóknarflokknum.  En Samfylkingin taldi lag til að koma landinu með illu inn í ESB og einhver sagði þeim frá því að fyrst þyrfti að beygja landsmenn í duftið. 

Gott og vel, Samfylkingin réði þá ekki Íslandi.  En í pattstöðu, þá fá oft minni spámenn gildi, og síamstvíburarnir, Villi og Gylfi, beittu samtökum sínum í þágu ESB draums síns, gjaldið var Alþjóðagjaldeyrissjóðurinn.  Og heimska hans. 

Mér er ennþá minnisstætt þegar Egill Helgason sýndi sjálfstæði og fékk Lilju Mósesdóttir í þátt sinn.  Lilja hafði þá sýnt frumkvæði og skynsemi og kom með mótaðar tillögur til lausnar á gjaldeyrisvanda þjóðarinnar.  En Lilja fékk ekki að mæta, án þess að Villi kæmi líka, og hann eyðilagði, annars mjög þarft viðtal.  Og hver trúði ekki Villa, maðurinn hlaut að vita sínu viti þegar hann mærði tillögur Alþjóðagjaldeyrissjóðsins, tillögur sem voru hreint tilræði við félagsmenn hans.

En Villi vissi ekki sínu viti.

Og hann er maður að meiri að viðurkenna það.  Beri honum gæfa til að segja af sér og ganga í klaustur til að bæta fyrir sínar syndir, þá sínir hann iðrun sína í verki.  

En ef ekki, þá er þetta innantómt hjal manns sem hangir á völdum  sínum hvað sem það kostar.  Þúsundir fyrirtækja verða gjaldþrota vegna stefnu Alþjóðagjaldeyrissjóðsins.  Í því samhengi skiptir ekki máli hvort þau fái nýja endurfjármögnun, framtíð þeirra er í höndum bankamanna og ríkisstjórnarinnar, ekki eiganda þeirra.  

Leið Lilju hefði gefið þessum sömu fyrirtækjum von um lífvænlega framtíð.  

Atvinnurekendur ættu kannski að fá Lilju til að stýra samtökunum, hún hefur sömu menntun og Villi, en tíminn hefur sannað að hún hafði jafn rétt fyrir sér og Villi rangt á sínum tíma.  Maður að nafni Vilhjálmur Egilsson staðfesti það á aðalfundi Samtaka fiskvinnslustöðva.

Fjölmiðlamenn sem birta þessa frétt verða að spyrja sig af hverju þeir hlustuðu á heimskuna og gáfu henni eftir forsíðuna, en Lilja fékk aðeins lítið pláss á innsíðum, innan um fréttir af fundum sóknarnefnda. 

Fjölmiðlar verða að spyrja sig af hverju þeir hafa án undantekninga tekið undir malflutning þeirra sem höfðu rangt fyrir sér.

Það er tími til kominn að menn líti í eigin barm, í stað þess að sífellt benda á aðra.  Það er tími til kominn að menn átti sig á því, að þó fortíðin sé sár, þá er það nútíðin og framtíðin sem skipta máli.  

Það er ekki of seint að hafna ICEsave.  Sú lygi er prófsteinn á fagmennsku fjölmiðlamanna. 

Stundum er of seint að iðrast eftir dauðann.

Kveðja að austan.

 

 

 

Fjandsamleg áætlun AGS

Athugasemdir

[Umrenningur, 25.9.2009 kl. 17:54]

Þó að ég viti af fyrri reynslu að þér finnist fátt verra en að fá ekki andmæli á orð þín þá verður bara að hafa það. Hárrétt hjá þér og tek undir hvert orð.

Íslandi allt.

[Ómar Geirsson, 25.9.2009 kl. 18:35]

Blessaður Umrenningur.

Ég er farinn að hafa þig sterklega grunaðan að skilja Vaðlvísku!!!!

En hvað um það, ég kann líka alveg ágætlega að meta jákvæðar undirtektar, fer líka létt með að skapa ágreining við sjálfan mig í athugasemdarkerfinu, þegar þannig liggur á mér.

Kveðja að austan.