Vinir Trump þétta sig.

9.3.2025 | 15:14

Sýna að þeir eru traustir bandamenn friðar og stöðugleika í heiminum.

Og til að greiða strax úr þeirri villu meinstrím fjölmiðlanna, eða heita þeir það ekki?? að þá er ekki verið að æfa vegna einhverrar "ógnar sem ríkin telja að stafi af Bandaríkjunum.", það er falsfrétt, lygi, uppdiktuð, skáldskapur, eitthvað sem allir vita sem lesa frjálsa sjálfstæða fjölmiðla, sem skýra frá en taka ekki þátt í allsherjarsamsæri ófriðarseggja með Evrópu vestan Rússlands í fararbroddi.

Núna þegar þeir félagarnir og vinir, má ekki gleyma því; Trump sagði það, eru á lokametrunum að tukta ófriðarseggina í Úkraínu, þeirra sem skammarlaust réðust inní Rússland 2014, segi svo menn að ég kunni ekki fræðin, með stórauknum friðarloftárásum á borgi og bæi landsins, og ætla svo að semja um réttlátan frið einhvern tímann eftir helgi, eða þar næstu helgi, þá er aðeins Taívan eftir.

Það er í fyrsta fasa friðun heimsins.

Taívanar hafa lengi verið miklir ófriðarseggir, verið með dólg við ríkið sem einu sinni réði yfir þeim, svona líkt og ófriðarseggirnir í Úkraínu við Rússland, en núna á aðeins eftir að dagsetja innrás Taivan í Kína og fljótlega eftir það mun friður aftur ríkja á þeim ófriðarslóðum.

Írönum mistókst að friða Ísrael með þekktum stríðafleiðingum, heræfing þessi er því hugsuð til að auka þeim aftur kjark og þor svo þeir verði aftur nytsamir í að stuðla að friði og stöðugleika í heiminum.

Bandamenn Trumps láta ekki að sér hæða, stöðugir sem fyrr í friðarstarfi sínu.

Vinir hafa skálað af minna tilefni og örugglega er skálin á lofti bæði í Kreml og Hvíta húsinu.

Á meðan eykst stríðsæsingatalið í Evrópu, það er vestan hins friðsama Rússlands, sumir þekkja einfaldlega ekki sinn friðartíma.

Svona er heimurinn í dag í huga margra félaga minna hér á Moggablogginu.

Og reyndar víðar, vitleysan lætur seint að sér hæða.

Þess vegna fór ég bara að horfa á þættina um Churchil á Netflix, alltaf hressandi að horfa á svona stríðsæsingarmann sem vildi vígbúast á meðan aðrir vildu mæta ofbeldisseggnum með því að leggja niður vopn.

Skrýtið hvað sagan endurtekur sig.

Kveðja að austan.

	Íranir, Rússar og Kínverjar saman á heræfingum
Ábyrgðarmaður færslu Tilkynna um óviðeigandi tengingu við frétt

Flokkur: Stjórnmál og samfélag | Facebook

Athugasemdir

Þau lönd sem Rússar hafa lagt undir sig hingað til með hervaldi
hafa þeir yfirleitt spýtt út úr sér aftur eins og eitruðu peði í skák - Tékkóslóvakía, Afganistan

Menn virðast alveg horfa framhjá þeirri staðreynd að þó það takist að leggja undir sig landsvæði þá virðist það vera þrautinni þyngri að halda því - Víetnam, Austur Þýzkaland

Selensky vill ekki frið og tekst að afvegaleiða "leiðtogana" sem virðast algjörlega blindir vegna haturs á Trump

Grímur Kjartansson, 9.3.2025 kl. 17:37

Vonandi, þegar Grænland og Kanada hafa verið innlimuð, þá sér órangútinn hversu frábært það væri að bæta Íslandi á jólagjafalistann. Gætum jafnvel orðið á undan panama-skurðinum og Gaza. Að hugsa sér upphefðina sem í því fælist að verða 53. stjarnan í fána hinna frjálsu og hugprúðu.

Að vísu yrði það endalokin á ókeypis háskólum, en eins og Friedman sagði there is no free lunch. Svo munum við fá frábært heilbrigðiskerfi fyrir þá sem efni hafa á sem getur ekki verið verra en þessi fjársveltu sláturhús sem við búum við í dag. Auk þess sem við verðum með öflugasta her í heimi og getum stutt við málsvara frelsis og réttlætis eins og putin og feita svínið í n-koreu. Það mikilvægasta er að við gætum farið á okkar Ford 150 á innskónum og keypt okkur Big Mac super-size me á næsta götuhorni.

What is there not to love?

Bjarni (IP-tala skráð) 9.3.2025 kl. 18:00