Veruleikafirring eða þaðan af verra??

 

Stórfrétt dagsins er að Selenski sé boðið og við þurfum að flytja inn löggur til að passa upp á hann og aðra leiðtoga á stóru Skál-Skál ráðstefnunni sem verður haldin í vor.

Við erum sko þjóð meðal þjóða, eða þannig.

 

Hvort á maður að hlæja eða gráta??

Við erum nýbúin að fá tilkynningu að þriðja flokks stjórnmálamaður brúki munn við það fólk sem þjóðin treystir til að gæta öryggis síns á hættustundu.

Og í nafni hagræðingar, af öllum þeim ó-orðum sem íslensk tunga býr yfir, í nafni hagræðingar ætlar sá þriðji að hagræða einu flugvél landhelgisgæslunnar úr landi, varanlega í þetta sinn.

Sumir eru jú með forgangsröðina á hreinu.

 

Ekki skal ég gera lítið úr alþjóðlegu samstarfi, en á meðan við segjumst ekki hafa fjármagn til að reka lágmarks öryggisbúnað í okkar stóra víðfeðma landi, með ennþá stærri og víðfeðmari landhelgi, þá eigum við ekki og megum ekki eyða í svona flottræfilshátt sem þessi leiðtogafundur er.

Þetta er eins og að taka matarpeninga frá börnum sínum til að geta skellt sér á næsta ball.

Það er ekki bæði sleppt og haldið, og þegar búið er að sleppa, þá er ekki haldið í svona vitleysu, það er móðgun gegn viti og skynsemi.

 

Síðan má spyrja þeirrar stóru spurningar, hvað er eiginlega að þessu fólki sem opnar varla munninn nema til að tala um kolefnishlutlaust Ísland fyrir árið eitthvað innan ekki svo langs tíma, að það getur aldrei verið heima hjá sér, og ef það er heima hjá sér, þá fær það fólk til sín.

Allt flandrið á eins mengandi hátt og hugsast getur enda flugsamgöngur mesti mengunarvaldur þjóðarinnar.

Hvað fordæmi er þetta á hinum háalvarlegu tímum þegar menn segja að sjálf siðminning sé undir, allavega menn skála fyrir því á einhverjum Skál-Skál ráðstefnum??

Heldur þetta fólk virkilega að syndaaflausn þess sé aukinni skattheimtu á okkur þessa fátæklinga sem höfum ekki á nýjum rafmagnsbílum, eða farartækin sem flytja okkur nauðsynjar eftir þjóðvegum landsins???

 

Það er svo margt æpandi við þessa stórfrétt.

Hún afhjúpar svo mikið um fólkið sem stjórnar okkur.

Og þetta er ótækt á meðan sá þriðji er með frjálsar hendur.

 

Hagræðing.

Svei attan.

Kveðja að austan.

Selenskí boðið og lögreglan leitar liðsinnis

Athugasemdir

[Jón Þór Helgason, 2.2.2023 kl. 08:58]

Er þessi Selenski einhver hetja?

https://www.youtube.com/watch?app=desktop&v=GXOWZnRCc20&feature=youtu.be

[Ingólfur Sigurðsson, 2.2.2023 kl. 09:33]

Vel skrifuð grein. Ég er sammála hverju orði. Farið er að bera á hnignun vegna viðhaldsskorts í mörgum kerfum landsins. Við erum að gera okkur að skotmarki ef árásargirni Rússa fer úr böndunum í náinni framtíð.

Katrín Jakobsdóttir, sem var táknmynd friðar og umhverfisverndar fyrir fáeinum árum er nú orðin táknmynd Nató, ESB, stórgróða og hlýðni við valdaöflin í heiminum. Vinstri grænir þora ekki að mótmæla, (grasrótin) en voru mótmælendaflokkur Íslands NÚMER EITT áður en þeir fóru í þessa ríkisstjórn. 

Yfirborðsmennskan fer í hæstu hæðir á meðan raunverulega fólk hefur engin tök á vandanum! 

Ég verð nú að segja að mér finnst Katrín stundum viðkunnanleg manneskja í sumum viðtölum á RÚV ennþá þrátt fyrir allt þetta sem upp er talið, þetta eru bara hliðar á henni sem þekktust ekki áður en hún fór í þessa stjórn, en þá er líka skylda hinna í flokknum að mótmæla og slíta stjórninni, frekar en að missa trúverðugleikann.

Mér finnst að umræða þurfi að fara fram hvort þjóðin vilji taka svona þátt í heimsatburðum í miðju stríði sem jaðrar við heimsstyrjöld. Það þarf einhver að bera ábyrgð á þessu aðrir en kerfiskarlar og kerfiskerlingar, eins og Sigmundur Davíð segir, og athuga vilja þjóðarinnar, þetta er eins langt frá hlutleysi sem oftast hefur verið talið bezt á stríðstímum.

Eins og venjulega er verið að taka stærstu ákvarðanirnar í reykfylltum bakherbergjum, nema hvað allt er reyklaust núna, í staðinn er það dópið sem flæðir og þykir fínt, og á að lögleiða.

Ég tel að þinn gamli félagi, Gunnar Rögnvaldsson sé ekki alveg ósammála þessum pistli. 

Ef Samfylkingin er flokkur alþjóðavæðingar virðast Vinstri grænir nú flokkur alþjóðavæðingar á sterum, sinnum 1ooo. Hvílík svik við kjósendur.

[Merry (IP-tala skráð) 2.2.2023 kl. 10:26]

Zelenskyyi leiðir spillasta ríki Evrópu. Hann er leikari sem leikir hvaða hlutverk sem enn spilltari Biden gefur honum. 10% for the big guy.

[Esja frá Kjalarnesi (IP-tala skráð) 2.2.2023 kl. 10:42]

Þú hefur farið réttu megin fram úr í morgun. Það er gott að sjá. 

[Ómar Geirsson, 2.2.2023 kl. 11:49]

Blessaður félagi Esja.

Ef þú hefðir séð mig ulla, þá biðst ég afsökunar á því, það var alveg óvart fyrstu viðbrögð.

En drengir góðir, þessi pistill minn er ekki um Selenski, leiðtogafundinn eða hvað það er sem er tilefni þess að það á að sækja löggur að utan, fyrir utan alla fjármunina sem þessi Skál-Skál ráðstefna sýgur út úr löggæslu og öryggiskerfi landsins.  Hún væri jafn réttmæt þó sjálfur páfinn hefði komið, eða John heitinn Lennon.

Hún er um brenglaða forgangsröðun, um börn sem vilja leika sér meðal stóra fólksins, en láta á meðan innviði grotna líkt og þú bendir réttilega á Ingólfur, eða það sem er allra verst, vega að öryggi þjóðarinnar.

Ef við getum ekki rekið eina svona flugvél þá höfum við ekkert við sjálfstæði að gera, það er ekki flóknara en það.

Þjóð sem kýs börn til að leiða sig, því þetta er barnaleg ákvörðun, er ekki sjálfstæð þjóð.

Svei attan.

Kveðja að austan.

[Bjarni (IP-tala skráð) 2.2.2023 kl. 15:34]

Djöfull getur þú tuðað

Kveðja úr neðra

[Ómar Geirsson, 2.2.2023 kl. 16:10]

Blessaður Bjarni.

Ég er svo sem aðeins að spá í hvernig þú færð út kveðju til mín úr neðra, þannig séð er ekki hægt að komast austar á byggðu bóli en þar sem ég bý, þar með eru vissulega kveðjur í efra þegar ég þekki Héra, en útilokað að þær séu niður, eða austur, niður er þá líklegast suður.

Ef kveðjan þín er óeiginleg, það er að þú trúir að þú sért handbendi þeirrar hagfræði sem kennd er við andskotann, en vissulega dagsdaglega er kennd við nýfrjálshyggju, að þá met ég mjög hreinskilni þína.

En skil samt ekki af hverju þú ert að verja fíflið, efa að sá í neðra vilji nokkuð hafa með það að gera.  Þó vissulega Bjarni Ben er örugglega að spá í  af hverju hann lenti í þessari klemmu, en þar fyrir utan þá vekur athugasemd þín upp fleiri spurningar en hún svarar.

Kannski ert þú kjósandi í þessu kjördæmi þarna sem ég hef reyndar ekki hugmynd um hvað heitir, held samt að það sé Suður eitthvað,og hafi fallið fyrir handabandi Jóns Gunnarssonar.

Skil samt ekki af hverju það handaband fái þig til að verja afglöp hans, sem þannig séð eru eins og þau eru, en það eru viðbrögð hans sem vöktu upp þessa réttmæta spurningu mína.

Og þú verður að skilja Bjarni, að þessi spurning er grafalvarleg, það er af hverju tala stjórnmálamenn ekki lengur mannamál, og af hverju veigrar trúnaðarmaður almennings sig við að segja það sem öllum er augljóst, líka Varnarmanni Sjálfstæðisflokksins númer 1, Birni Bjarnasyni, að Jón Gunnarsson er erkifífl, og til vansa fyrir kjördæmi sitt í fjöldamörg ár.

En það er eins og maðurinn sagði, ég sagði það ekki, sárreiður var ég sannleikanum þar til ég viðurkenndi framhjáhald mitt.

En þín vegna Bjarni þá vona ég að þú gerir greinarmun á flokkstryggð, og fíflatryggð.

Þér til betrunar vil ég samt segja að nafni þinn virðist eitthvað eiga í erfiðleikum með þau sannindi.

Kveðja að austan.

[Loncexter, 2.2.2023 kl. 16:36]

Rauði krossinn fer létt með að safna milljónum til að halda uppi allskyns flóttafólki, en hafa líklega engann áhuga á því að fjármagna björgunarþyrlur ?

[Bjarni (IP-tala skráð) 2.2.2023 kl. 17:02]

Ómar taktu mig ekki of alvarlega, ástæðn fyrir því að ég les skrifin þín er er sú að mér finnst þau áhugaverð. Líttu því á skrif mín sem hól frekar en hallmæli.

[Ómar Geirsson, 2.2.2023 kl. 17:04]

Blessaður Lone-eitthað, það er líka gott og blessuð, en margt þjáir ríkissjóð, annað en beinn fjárskortur.

Um það er pistill minn, sem og reiði.

Uhh, þetta heitir víst forgangsröðun.

Kveðja að austan.

[Ómar Geirsson, 2.2.2023 kl. 17:23]

Blessaður Bjarni, í guðanna bænum.

Fyrir nokkru tók ég eftir því að það sem þú sagðir við mig í hálfkæring, hefði mátt túlka á verri veginn, án þess að ég gerði eina heiðarlega tilraun til þeirrar túlkunar.  Hins vegar gat ég kannski ekki ætlast til þess að þú fattaðir lókalhúmor minn með  tómu kókflöskuna, það er plastflöskuna, en ég vísa oft i hana., að gefnu tilefni, eða minna gefnu tilefni.

Þar með baðst þú afsökunar á orðum þínum sem ég sannarlega bar til baka, að ég hefði alveg skilið þau eins og átti að skilja og á milli okkar væri allt í góðu, við værum ekki svona eins og við værum, ef við hefðum ekki lúmskt gaman að hvorum öðrum.

Og Bjarni minn, þar sem þú lest mig líklegast nokkuð reglulega, þá átt þú að vita að ég gríp oft svona athugasemdir eins og þína hér að ofan og spinn út frá þeim spuna sem ég vil nota til að hnykkja á eitthvað sem ég hugsa um, en á oft erfitt með að setja í línulagaðan pistil.  Þér að segja þá vita allir sem einhvern tímann hafa skipst á orði við mig, að mér er ekki sérstaklega lagið að tjá mig línulega, en ég sver af mér að orðatiltækið, "að tala út og suður" hafi eitthvað með mig að gera, það varð til áður en ég fékk málið.

Vil aðeins ítreka þetta Bjarni, við vitum báðir að það sem hér er sagt og skrifað, hvort sem það er í pistlum eða athugasemdum, er kannski ekki alveg það sem við sagt vildum hafa, það er þegar við erum rosalega alvarlegir.  Þá í merkingunni að meina hvert orð sem við segjum.

Sammál er gleðiefni, en fyrir mig sem Vaðlvíking, það er ég er af beinu kyni föður míns sem var fæddur og uppalinn í Víkinni minni, þá er ágreiningur ekki síðri, og ég stundum sagt, að ef enginn vill rífast við mig, þá geri ég það sjálfur.  En ég hef samt aldrei komið hér í athugasemdarkerfinu undir dulnefni, þó einhvern tímann það hafi verið borið uppá mig.

Þar set ég mörk ágreiningsins við sjálfan mig.

En í guðanna bænum Bjarni, haltu að vera áfram þú sjálfur, ég mun örugglega gera það líka, þó virkni mín sé eins og hún er, stundum einhver, stundum engin.

En fyrir mig er alltaf gaman að mæta, og finna að ég sé í vinahópi, að fólk taki mér eins og ég er, það er þetta hliðarsjálf mitt hér á Moggablogginu, í raunveruleikanum eru skörp skil þar á milli, og þegar ég slekk á tölvunni þá slekk ég oftast á þessu sjálfi, og er bara rólyndismaður eins og ég á kyn til.

Þetta er bara eins og það er Bjarni, og mér finnst þessi afkimi alnetsins, vera góður kimi, og þér að segja, þó ég láti það ekki alltaf uppi, þá hef ég lært mikið á því að lesa skrif annarra, hvort sem það er í pistlum eða athugasemdum, því ég er sannarlega miðjumaður, og mér hættir til að sjá fleiri en eina hlið málsins.

Það er Ég, en ekki Kveðjan að austan, hún er bara eins og hún er, en núna sá ég ástæðu til að grípa inní.

Kveðjan engu að síður, bæði frá mér sem og að austan.

[Bjarni (IP-tala skráð) 2.2.2023 kl. 18:01]

Eins og ég sagði áður, taktu mig ekki of alvarlega. Ég á það til að efla til illinda en meina ekkert illt með því.

Við getum verið ósammála án þess að vera með leiðindi.