Þegar ekki er bent á rót vandans.

 

Það er auðvelt að gaspra á þeim eina degi sem forysta launþega sannarlega þarf að mæta í vinnuna sína á meðan verkafólk á frí, það er auðvelt að slá um sig með frösum.

"Það verður held­ur eng­in sátt á meðan þeir rík­ustu kom­ast hjá því að greiða í sam­eig­in­lega sjóði, hvort sem er með skattaund­an­skot­um, skattaí­viln­un­um eða af­l­ands­fé­lög­um.".

En það krefst styrks að taka slaginn, að benda á rót vandans, sem er regluverk Evrópusambandsins um hið frjálsa flæði, sem samviskusamlega hannað til að arðræna verkafólk og gera arðræningjunum kleyft að skjóta fé sínu í skattaskjól.

 

Öll tilvitnuð orð forseta ASÍ hér að ofan eru bein lýsing á regluverkinu um hið frjálsa flæði fjármagns, og skattaskjólin eru ekki einhverjar eyjar í Karabíska hafinu, þau eru innan sambandsins og lifa þar góðu afætulífi á kostnað þorra þjóða sambandsins.

Þetta eru ekki bara lönd eins Írland, Lúxemborg eða útbúi rússnesku mafíunnar á Kýpur, heldur virðist bankakerfið umhverfast um að koma skítugu fjármagni í dagsljósið og þegar eitthvað kemst upp, þá eru viðbrögðin alltaf eins; úps þarna komst upp um okkur, pössum okkur betur næst.

En regluverkið er geirneglt og við því er ekki hróflað.

Og sá sem berst ekki gegn því, getur ekki fárast yfir afleiðingum þess.

 

Eins er það með vinnumarkaðinn, í Evrópu er hann fyrir og eftir hið frjálsa flæði á fólki og þjónustu.

Atvinnugrein eftir atvinnugrein, sem krefst ekki sérmenntunar, hefur orðið fórnalamb félagslegra undirboða, kjör eru markvisst brotin niður með því að sækja hluta vinnuaflsins frá fátækustu löndum sambandsins eða úr hópi ólöglegra innflytjenda sem eru að verða hin nýja engisprettuplága álfunnar.

Bætum síðan við regluverkinu um kvöð opinbera aðila um að taka lægsta tilboði innan evrópska efnahagssvæðisins, og kominn er vítahringur þar sem laun ófaglærðs, og í seinni tíð faglærða líka, eru miskunnarlaust keyrð niður í það lágmark sem þarf til að skrimta.

 

Eftir samfelda þróun tækni og vísinda frá seinna stríði, margföldun framleiðslunnar, sem er forsenda velmegunar og velferðar fjöldans, er svo komið í Evrópu að fátæktarhverfin þenjast út, atvinnuleysi á áður velmegandi framleiðslusvæðum er gífurlegt, launum er haldið niðri með kerfislægum félagslegum undirboðum og fólkið sem vinnur hin illa borguðu störf framleiðslu eða þjónustu, er orðið framandi í augun heimamanna.

Sem sést best á því að tungutak hinna hálaunuðu forkólfa verkafólks, er soðið uppúr gömlum ræðum kreppukommanna sem sannarlega börðust fyrir bættum kjörum fólks sem hafði vart í sig og á.

Eins gatan hafi ekki verið gengin til góðs í áratugi í Evrópu, eða allt frá því að hið frjálsa flæði frjálshyggjunnar varð leiðarstef hins innra markaðar álfunnar.

 

Þetta blasir við og sá sem segir annað, berst við vindmyllur með innantómu gaspri, er í raun ekki að berjast fyrir verkafólk, heldur fyrir kerfið sem sökina ber.

Hann er því hluti af vandanum.

Ekki lausnin.

 

Þess vegna á verkafólk að hlusta gaumgæfilega í dag.

Ef einn, þó ekki nema einn, beinir spjótinu sínu að kerfinu, gegn hinu frjálsa flæði frjálshyggjunnar á félagslegum undirboðum og láglaunastefnu, þá er von í verkalýðshreyfingunni.

Því það þarf ekki nema einn til að taka slaginn, til að bylta.

 

Sá sem krefst þess að EES samningnum sé sagt upp á morgun.

Hann er maður framtíðarinnar.

 

Hinir, hinir eru bara á launum.

Og ekki hjá verkafólki þó það kannski borgi reikninginn.

 

Það er kannski nóg til en því verður aldrei dreift sanngjarnt á meðan þjóðin er hluti af hinu evrópska efnahagssvæði.

Það er bara svo.

Kveðja að austan.

„Það er nóg til“

Athugasemdir

[Grímur Kjartansson, 1.5.2021 kl. 11:42]

Síðast þegar ég skoðaði launatöflur þá vakti það furðu mína að þar voru í töflunum laun sem voru mjög svo lág

og einu sem virðast vilja vinna eftir þessum töxtum er aðflutt vinnuafl eins og þú bendir réttilega á.

Held að það væri ágætis byrjun ef ekki væru til launataxtar sem ekki eru ásættanlegar - því ólöglegt er að greiða undir taxta fyrir venjulega vinnu

Held þó verktakar geti flutt inn vinnuafl og borgað eftir taxta í þeirra heimalandi þegar um útboð er að ræða - því miður.

[Ómar Geirsson, 1.5.2021 kl. 12:23]

Blessaður Grímur og takk fyrir lestur og innlit.

Núna þegar allt er í friðnum, vorið komið með snjókomu og boltinn farinn að rúlla, þá er ágætt að setja vissan punkt yfir þessa törn með því að koma að áhugamáli mínu um uppsögn EES samningsins, þessi vélráð úr ranni frjálshyggjunnar er fjötrið sem hamlar öllu mannlífi, nýsköpun og grósku, ásamt því að vera hjáleigusambandi við erlent yfirþjóðvald sem hefur gerst sjálfstæði þjóðarinnar að skelinni einni.

Ef það er eitthvað eitt sem má skamma kóvidfaraldurinn fyrir þá er það að með honum hvarf allur botninn úr þjóðmálaumræðunni, og það eina mál sem næstu kosningar eiga að snúast um, sjálfstæði þjóðarinnar, er ekki rætt.

Því ég hygg að eftir 4 ár þurfi ekki að taka þá umræðu, því þú ræðir ekki það sem ekki er til staðar.

Varðandi þetta með taxtana þá er það rétt að lágir taxtar hafa alltaf verið plága á Íslandi, og þeir réttir af með yfirborgunum ýmiskonar, en það er liðið í svo mörgum greinum, því ódýrt erlent vinnuafl lítur ekki á sig sem sérstaklega ódýrt því það miðar kjörin við kaupmáttinn í heimalandi sínu.

Verra er samt falsið sem þú lýsir, að hægt sé að flytja inn vinnuafl í skamman tíma og kalla það þjónustu, þó verkalýðshreyfingin reyni að berjast gegn því óeðli, þá er hún vanmáttug því regluverk hins frjálsa flæðis hefur sama sess í lögum og steintaflan með boðorðunum hafði hjá forngyðingum á sínum tíma.

Hvorutveggja talið skrifað beint af guði.

En þetta sér fólk ekki því við erum eins og froskurinn sem er soðinn lifandi, friðsemi hans er tryggð með að setja hann í kalt vatn, og svo er hitinn aukinn hægt og hljótt og froskurinn alltaf jafn friðsamur því hann nemur ekki hitabreytinguna.

Eða þar til hann er soðinn og þá er hann étinn.

Kveðja að austan.

[Grímur Kjartansson, 1.5.2021 kl. 18:14]

Hugsanlega verður samt fullveldið í umræðunni í haust

Fréttir í dag af Ástralíu og fleiri löndum sem hafa lokað á komu fólks frá Indlandi

og ýmis "alþjóðleg" samtök rísa upp á afturlappirnar og segja að fullvalda þjóð megi ekki gera svona því til séu hinar og þessar alþjóðlegar ályktanir

[Ómar Geirsson, 1.5.2021 kl. 22:36]

Kannski Grímur.

Ég held samt ekki á þessum forsendum.

Og örugglega ekki á þeim forsendum sem ég rakti hér að ofan.

Kannski ellideildin nái að halda lífi í umræðunni, en Björn Bjarna er genginn af sjálfstæðistrúnni, Styrmir er veikur og Jón Baldvin upptekinn á heimaslóðum.

Davíð og hans menn frömdu svo Hari Kari á kóvid umræðunni, þeir veðjuðu á að þetta væri meinlítil pest sem væri að ganga yfir á liðnu hausti, sem ekki gekk eftir og þeir sitja uppi með þann Svarta Pétur að hafa lagt til að veiran fengi frelsi til að drepa þúsundir Íslendinga á meðan hjarðónæmi næðist.

Ef þeir ætla að reisa grunnfána sjálfstæðisbaráttunnar varðandi afsals Alþingis á fullveldi þjóðarinnar til Brussel, þá verður þetta rifjað upp og fólk sem kemur nálægt þeim á það á hættu að fá rugludallastimpilinn yfirfluttan frá kóvidumræðunni yfir á kröfuna um sjálfstæði þjóðarinnar gagnvart Brussel, nógu var þetta nú sérviturt samt.

Bjargræðið gæti samt falist í kóvid faraldrinum, ef forsvarsmenn ESB verða virkilega svo vitlausir að skuldsetja þjóðarinnar vegna peningaprentunarinnar sem fólst í björgunarpökkum sambandsins, þá gliðnar sambandið í frumeindir sínar.  Næg er skuldsetningin fyrir eftir fjármálahrunið 2008, bætist kóvid þar ofaná, þá er það endanlegur fjárhagslegur dauði fyrir fátækari ríki sambandsins í suðri.

En hér innanlands er baráttan búin.

Kveðja að austan.