Ljótt að segja.

 

En það er punktur í þessu hjá Trump, sem smækkar ekkert þó Trump sé ábendarinn.

Það er bara þannig í dag, að ef þú ert karl, þá ertu sekur.

Og í huga margra þarf ekki ásakanir til.

 

Við erum í árdaga nýrrar ofsóknaröldu þar sem jafnvel félagi Stalín telst ekki hafa haft snert af ofsóknaræði í samanburðinum.

Og honum tókst næstum því að lama Sovétríkin með ofsóknaræði sínu.

 

Aðeins sá lægsti sleppur við axarhöggin sem höggva alla sem standa uppúr.

Og sá lægsti er aldrei bógur í eitt eða neitt.

Hvernig á hann að takast á við vandamál heims á heljarþröm??

 

Það er mál að linni, og þeir sem æpa að þessir voðalegu glæpir, sem allt sem snýr að kyni er, megi ekki liggja í þagnargildi, þeir ættu að átta sig á að á áður þekktum ofsóknartímum, hvort sem það voru galdraofsóknir nýaldar, múgæsingin í Kína á tímum menningarbyltingarinnar, að ekki sé minnst á geðveiki Stalínstímans, að þá vissi enginn hver var næst ásakaður.

Og hver ásakaði.

Og fyrir hvað.

Það sem var í lagi í gær, var ekki í lagi í dag, og það sem var í lagi í dag, var glæpur morgundagsins.

Og einn daginn er fátt í lagi, og þá mun jafnvel því fækka.

 

Því ofsóknaræði er bálæði, það brennur á meðan einhver er eldsmaturinn.

Og aukinn eldsmatur magnar bálið þar til það lifir sjálfstæðu lífi, líkt og ógnareldurinn sem brenndi tugþúsundir í Dresden á sínum tíma.

 

Og þó þeir sem æpa hæst í dag telji sig óhulta því þeir eru til vinstri, og flestir ljótu karlarnir til hægri, þá kunna hægri menn líka að ásaka.

Og dreifa skít og rógi. 

Eru meira segja nokkuð góðir í því eins og ótal dæmin sanna.

 

Á meðan eigum við aðeins örfá ár þar til siðmenningin hverfur í gin óviðráðanlega loftslagshörmunga.

Og umræðan hverfist um kjaftasögur, margar það gamlar að það er farið að slá í þær.  Aðrar úldnar áður en þær urðu dagsgamlar.

 

Ofbeldi á ekki að þekkjast.

Ofbeldi á ekki að líðast.

En ykkur að segja, þá á almyrkri púrítanismans það ekki heldur.  Leyfum skrattanum að hafa eitthvað í friði, það þarf eitthvað að vera verra í heinsunareldinum er á jörðinni.

 

Og munum að þeir sem hafa hag af þeysireiðinni til Heljar, þeir stýra oftast umræðunni.

Því Örfáir geta grætt mikið af hörmungum hinna.

Af hörmungum okkar allra.

 

Leiksoppar umræðunnar mættu hafa það á bak við eyrað.

Kveðja að austan.

Segir þetta „erfiða“ tíma fyrir unga menn

Athugasemdir

[Símon Pétur frá Hákoti (IP-tala skráð) 2.10.2018 kl. 22:42]

Sammála.  Þetta mítú ofsóknarbrjálæði er komið út í stalínískar öfgar, stýrt af hinum glóbalísku auðdrottnum sem eru djöflarnir hér á jörð, etja öllu saman, skapa glundroða, deila og drottna og hlæja á meðan lymskulegra en andskotinn sjálfur.

[Þorsteinn Siglaugsson, 2.10.2018 kl. 23:02]

Ekki er ég nú alveg sammála þér um þetta Ómar. Staðreyndin er sú að hlutir, sem aldrei hefðu átt að líðast, hafa í mjög mörgum tilfellum legið í þagnargildi, jafnvel áratugum saman, vegna þess að þolendurnir hafa litið á það sem skömm að segja frá reynslu sinni. Þegar þessi þagnarmúr rofnar kemur margt upp á yfirborðið og hittir stundum ýmsa illa fyrir. Við því er ekkert að gera og við því á ekki að vera neitt að gera.

En það er vissulega slæmt, þótt líklega sé það óhjákvæmilegt, að ýmsir noti sér þetta á óheiðarlegan hátt til að koma höggi á andstæðinga sína. Hvort um það er að ræða í þessu tilfelli veit ég ekki. En ég efast satt að segja um að þessi kona sé á slíkri vegferð, þótt vitanlega sé margt gruggugt í bandarískum stjórnmálum.

[Hilmar (IP-tala skráð) 2.10.2018 kl. 23:31]

Prófessor við Georgetown háskólann í Washingtonborg, Cristine Fair, tvítaði eftirfarandi:

"Lítið á kór hvítra forréttindakarla sem réttlæta raðnauðgara sem telur sig hafa forréttindi. Allir eiga þeir skilið kvalarfullan dauðdaga á meðan femínistar hlægja þegar þegar draga síðasta andardráttinn.
Bónus: Við skerum undan þeim og fóðrum svínin? Já"

Hér skrifar bandaríski femínistinn um Brett Kavanaugh verðandi hæstarréttardómara, og hvíta karlmenn í Republikanaflokknum.
Svona er umræðan í Bandaríkjunumm og þykir eðlileg á meðal vinstrimanna.

Georgetown háskólinn sér ekkert athugavert við skrif prófessorsins, og ver rétt hennar til að tjá sig á þennan hátt.

Þetta er veruleikinn sem blasir við karlmönnum í Bandaríkjunum, ungum sem öldnum, og þetta bíður okkar líka, ef Bandaríkjamenn ná ekki tökum á þessum últrafasistum og viðbjóðum. 
Við eigum okkar útgáfur af svona ógeði, og flestar þeirra eru verðlaunaðar með launuðum stöðum á kostnað skattborgara í Reykjavík.

Nú er kominn tími til að karlmenn girði sig í brók, og berjist af heift og krafti gegn þessum fasisma.

[Jón Valur Jensson, 3.10.2018 kl. 03:04]

Þakka þér pistilinn, Ómar, og athyglisverð er umræðan hér.

Það er merkilegt hvernig ekki einungis Rúv fjallar á mjög einhliða og hlutdrægan hátt um þessi mál (eins og nánast mátti búast við fyrir fram, vitandi af Trumphatrinu í Efstaleiti), heldur einnig Mbl.is í einhliða "frétt" eftir aðra slíka. Þannig er um þá meintu frétt, sem þú tengir þennan pistil við. Þar er 4-5 setninga lýsing á ásökunum frú Ford, en þrátt fyrir langar og rökstuddar varnarræður Kvanaughs er látið nægja að segja hér í "fréttinni": "Kavan­augh kom einnig fyr­ir nefnd­ina og sagði ásak­an­irn­ar ekki sann­ar." EINHLIÐA, já, þannig er þessi makalausa blaðamennska á Mbl.is.

En svo er sagt af viðbrögðum Trumps, og hann er þó nógu heiðarlegur til að segja þetta: „Það er eitt­hvað mikið að ef maður get­ur verið fyr­ir­mynd­ar ein­stak­ling­ur í 35 ár en svo kem­ur ein­hver og seg­ir mann hafa gert hitt eða þetta og til­tek­ur þrjú vitni sem ekki staðfesta það sem sagt er.“

Kæra Ford-frúarinnar styðst nefnilega ekki við neinar sannanir né vitni. Bezta vinkona hennar, sem Ford kallaði til sem vitni, segist ekki geta staðfest orð hennar, þetta hafi bara ekki gerzt!

Eins er með gagnvitnisburði gegn því, sem nokkrir einstaklingar bera gegn Kavanaugh, einkum um meintan drykkjuskap hans, að Rúv hirðir ekki um að segja frá málunum hlutdrægnislaust, sleppir bara vitnisburðum vel kunnugra manna um Kavanaugh á hans Yale-árum. Út frá öllu þessu er ekkert hægt að sanna upp á Kavanaugh af fram komnum ásökunum.

Svo er hvorki frú Ford né konurnar tvær í lyftunni, sem þrengdu að Repúblikana-senatornum Flake, lausar við tengsl við demókrata eða róttæka vinstrimennsku.

Merkilegt er líka hvernig Rúv og Mbl.is sleppa því alveg að hafa eftir lítt dulbúna hótun annarrar lyftukonunnar ganvart Flake: "Það eru börn í fjölskyldu þinni. Hugsaðu um þau!" 

Íslenzk kona, eldri en ég, sendi mér netbréf um þetta og bætti við, vegna umræðu minnar um Kavanaugh-málið:

"Ég er 100% sammála þér um þetta mál alltsaman, en þegar ég las þessi orð, sem höfð voru eftir þessari konu, fór hrollur um mig. Ég velti líka fyrir mér hvort Flake hefði orðið fyrir fleiri svona hótunum, sem gæti skýrt hversvegna hann virðist vera svo tvístígandi varðandi Brett Kavanaugh."

Önnur lyftukonan starfar fyrir mjög róttæk vinstrisamtök og ætlaðist til þess, að það sem hún sjálf hefur upplifað, áratugum eftir meint atvik sem Ford heldur fram, geti talizt einhver sönnun um mál Ford og Kavanaughs!! Og svo er beitt hótun til að fá þingmann til að gefa sig í atkvæðagreiðslunni!

Þetta ásækjendalið hefur ekkert til síns máls sem dugar til neins nema þess eins, að málflutningur þess úrskurðist einskis nýtur.

[Ómar Geirsson, 3.10.2018 kl. 10:47]

Takk fyrir innlitið félagar og góða umræðu.

Mig langar aðeins að hnykkja á að ég er ekki að fjalla sérstaklega um málið sem er efst á baugi vestra í dag, nema ég skal játa að ég hristi hausinn þegar sögur að meintum drykkjuskap og fyllerí á háskólaárum kom til umræðu.  Eins og enginn hafi horft á Animal Farm eða er fólk orðið svo viti firrt að telja æskubrek vera forsenda einhvers sem menn standa fyrir í dag. 

Hverjir standa eftir, jafnt konur sem karlar, ef mótunarskeiðið frá hormónum unglingsáranna í að vera fullþroska manneskja, er ásteytingarsteinn þegar hæfni fólks til ábyrgðarstarfa er metið í dag??  Ég efa að það sé jafnvel ávísun á meðalmennsku.

Og þó hin dýrslegu peningaöfl fjármagni grimmt afsiðun mannsins, þá ætti samt ennþá vera til fólk sem skilur hvað býr að baki fordæmingunni á grýtingarþörf hinna skinheilögu hræsnara, í þessari setningu sem höfð var eftir merkum manni og skráð í merka bók; "Sá yðar sem syndlaus er, kasti fyrsta steininum".  Og varðandi þroskaferli, það að verða að góðri manneskju, þá er öllum hollt að lesa Vesalingana eftir Hugo, en þar er nokkrum góðum manneskjum lýst, öll eiga sér fortíð.

En þeir sem fordæmdu, grýtt, bentu og bentu, þeir voru ekki góðar manneskjur.

Höfum það bak við eyrað, en félagi Trump var aldrei þessu vant glöggur á hið víðara samhengi, og út frá því spann ég pistil minn.

Ég annars vegar benti á hvar þetta endar, og ég benti á að sá endir er það sísta sem við þurfum til að takast á við vanda heimsins í dag.  Og ég minnti á að það er gróði í glundroða og hörmungum, og að það er ekki orðið einleikið hvað vitræn umræða er afvegleidd frá kjarna yfir í hismi.

Og þegar gróði er annars vegar er slíkt ekki tilviljun, eða svo segir sagan, og ekki lýgur hún.

Svo vil ég taka það fram að þöggun er ekki að hinu góða, en stjórnlausar ásakanir eru það ekki heldur.  Það á ekki að fara úr einu ófremdarástandi í annað.

Slæmir hlutir réttlæta ekki slúður.

Og slæmir hlutir í fortíðinni eru lærdómur, árétting þess að takast á við þá í núinu, og reyna að koma í veg fyrir þá í framtíðinni.  Orkuveitumálið er gott dæmi um slíkt, þegar tekist er á við brenglaðan vinnustaðamóral og skýr skilaboð send, bæði innan fyrirtækisins, og út á við að slíkt sé ekki liðið lengur.

Hér í Fjarðabyggð eru krakkar úr elstu bekkjum grunnskólans að hittast í Klakahöllinni eina helgi undir merkjum félagsmiðstöðva, ætlunin að gera eitthvað skemmtilegt saman.  Að gefnu tilefni er tekið fram að óvirðing og óviðeigandi talsmáti verði ekki liðinn, en það er ekki tekið fram hverjum varð það á fyrrum Kuldabolum að láta svoleiðis, það kom málinu ekkert við, markmiðið er að stöðva ákveðna hegðun, en ekki að fóðra slúðrið.

Það er margt í þessum heimi sem má breytast, og margt hefur breyst til batnaðar.

En slúður og stjórnlausar ásakanir eru ekki leiðin til þess, það mun alltaf gera vont verra.

Þegar lögbrot eru annars vegar þá er það borgarleg skylda fólks að kæra slíkt, hafi það ekki gert það, þá á það að líta í eigin barm og spyrja af hverju það hafi ekki gert slíkt.  Það er vissulega rétt að margur hefur verið krossfestur fyrir að kæra, en ef enginn kærir, þá er enginn sakfeldur, og það sem slíkt er hin endalega þöggun.

Og fólkið sem reis upp og kærði, eða tókst á við ranglætið, það er hetjurnar, það var það sem opnaði umræðuna og neyddi samfélagið til að horfast í augu við sínar myrku hliðar.  Hún Rósa sem neitaði að sitja í sérstökum sætum svartra, er hetja, fyrirmynd annarra til að segja Nei við kúgun og rangindum.  En sá sem slær sig til riddara með því að segja, ég var líka beittur rangindum, en ég þorði bara ekki að rísa upp, hann er engum fordæmi.

Nýti maður sér ekki réttinn til að kæra þegar atburðurinn átti sér stað, þá hefur maður fyrirgert réttinum til að ásaka áratugum seinna.  En maður hefur réttinn til að segja frá, bæði sjálfs sín vegna, og til að styðja aðra.  Lýsa ástandinu eins og það var, og ef það er ennþá svo, að taka þátt í að breyta og bæta.

Á því og stjórnlausum ásökunum er reginmunur.

Meetoo byltingin er frábær, en ekki hafin yfir gagnrýni.

Og hún á að bæta heiminn, en ekki að vera upphaf nýrra miðalda og galdraofsókna.

Hvað þá leiksoppur þeirra sem sjá sér gróða í glundroðanum.

Börnin okkar eiga skilið betri heim, lífvænlegan heim.

Ekki verri heim, ekki heim á heljarþröm.

Það er úrkynjun að átta sig ekki á því.

Og úrkynjað samfélag er alltaf dauðadæmt.

Kveðja að austan.

[Jón Valur Jensson, 3.10.2018 kl. 18:36]

Svo er komið í ljós, að þessi Christine Blasey Ford á von á því, að gríðarlegt fé, sem safnazt hefur henni til stuðnings, renni allt til hennar, en það er nú komið í meira en 530.000 dollara, um 60 milljónir króna, og gæti leikandi tvöfaldazt. Það sama gerðist þegar barizt var gegn því að Clarence Thomas yrði skipaður hæstaréttardómari. Þess vegna eru menn nú áhyggjufullir yfir því, að slíkar söfnunarherferðir geti gefið ýmsum færi á því með fölskum vitnisburði til að verða í raun milljónamæringar með tiltækinu. Sjá nánar hér:

https://www.youtube.com/watch?v=GSHHAMDyjp0&feature=share

[Jón Valur Jensson, 3.10.2018 kl. 19:18]

Svo er með eindæmum hvernig myndir og myndskeið Rúvarar kjósa að birta af Kavanaugh -- þar er eins og hann sé hann sé alltaf reiður og æstur og jafnvel ófrýnilegur!! En það er fjarri öllum sannleika, eins og sjá mátti á hinni löngu sjónvarpsútsendingu frá fundi hans með þingnefndinni.

Svei ykkur, Rúvarar, fyrir misnotkun þjóðareignarinnar!

[Ómar Geirsson, 3.10.2018 kl. 19:58]

Blessaður Jón Valur.

Ítreka það sem ég sagði hér að ofan, að fólk sem uppfyllir ekki þá borgaralegu skyldu sína að kæra ólöglegt athæfi þegar það hefur orðið fyrir því, það hefur fyrirgert rétti sínu til að koma fram með ásakanir áratugum seinna.

Það hlýtur allt skynsamt fólk að sjá það.

Kveðja að austan.