Er slúðrið að fá á sig andlit??

 

Stóðu fleiri að aðförinni að tillögu hæfnisnefndar??

Var leynimakkað gegn ákveðnum umsækjendum sem hinir hægrisinnuðu fulltrúar atvinnurekendavaldsins í Viðreisn gátu ekki sætt sig við??  Höfðu þeir staðið of fast á réttindum launafólks í ströggli sínu við atvinnurekendavaldið??

Hver sagði hvað, hver kjaftaði frá hverju??

 

Farsinn um Landsrétt ætlar að stefna út í hið óendanlega.

Ætti að verða mönnum lærdómur, hafi menn ekki lært af leyndarhyggjunni sem felldi síðustu ríkisstjórn, að hætta að slúðra, og segja rétt og skilmerkilega frá.

Það var ekkert sem bannaði Sigríði Andersen strax í upphafi að segja hverjir stæðu í vegi þess að tillaga hæfnisnefndar yrði tekin til efnislegrar umfjöllunar á Alþingi, og hvað þeir höfðu að baki sér þegar þeir settu sig uppá móti henni.  Voru þeir með nafnalista um þá 33 þingmenn sem myndu greiða atkvæði gegn henni, og þá einnig á hvaða forsendum þessir þingmenn þyrðu ekki að ræða málið opinberlega heldur vildi að um það yrði makkað í leyndarherberginu?

Og allar götur síðan, er ekkert sem bannaði henni að tjá sig í staðreyndum en ekki slúðri.  Það þarf ekki að hringja í Morgunblaðið til þess.

 

Það hefði verið fróðleg umræða að hlusta á Alþingi umræðu þar sem meintur kynjahalli væri ræddur, svona í ljósi þess að hæfnisnefnd átti að meta hæfni og fyrri störf umsækjenda, en ekki meta kynfæri þeirra. 

Það er eins og margir alþingismenn átti sig ekki á því að svona nefndir starfa eftir lögum og reglum, og þings og ráðherra að setja á blað eftir hverju á að fara.

Menn breyta fyrst lögunum ef þeir eru ósáttir við þau, en brjóta þau ekki með þeim orðum að viðkomandi sé ekki sáttur við þau.

 

Alþingi er ekki skrípastofnun þó margir þingmenn telji svo, og kappkosti við að sannfæra þjóðina um það.

Og stjórnmálamenn okkar þurfa að sætta sig við að sá tími þar sem geðþótti þeirra réði öllu er liðinn.

Fólk er búið að fá nóg af þessu, fólk vill ekki svona vinnubrögð.

 

Tími gjörspillingarinnar er liðinn.

Feisið það.

Kveðja að austan.

Viðreisn stöðvaði lista dómnefndarinnar

Athugasemdir

[Símon Jónsson frá Koti (IP-tala skráð) 2.2.2018 kl. 11:10]

Ég þarf ekki að muna neitt, því ég segi alltaf satt, sagði Mark Twain.

Við munum sem okkur hentar, því þannig getum við afbakað sannleikann eins og okkur þykir henta best, segja íslenskir þingmenn, fulltrúar þjóðarinnar á þingi.  Og svo er rifist um hver laug hvar og hvenær og aðeins er hugsað um innkomur og útkomur eins og í farsanum, þjófar, lík og falar konur, naktir menn og aðrir í kjólfötum.

Þetta er sorglegur farsi hálaunaliðs forheimskunarinnar - hálfsannleikans, lygavaðalsins. 

[Pétur D. (IP-tala skráð) 2.2.2018 kl. 11:57]

Simon, þetta er ekki rétt hjá þér.

[Símon Jónsson frá Koti (IP-tala skráð) 2.2.2018 kl. 13:00]

Pétur D., mér væmir við lygum.  Því segi ég alltaf satt, eins og Mark Twain og Prédikarinn ... en aularnir snúast í hringi og draga sjálfa sig á asnaeyrunum.  Ekki þú Pétur D., því þú veist innst inni að orð mín eru sönn.  En þú efast.  En þú munt vakna og sjá.  Engir gráta meira á stund dauðans en þeir sem aldrei vildu sjá.  Þeir efuðust aldrei fyrr en á dauðans stund og grétu þá, sakbitnir yfir að hafa eytt lífinu í að þjóna eigin sjálfsblekkingum, að sannleikann mætti hafa að háði og spotti.  Ekki þú Pétur D., þú efast og munt því sjá, fyrr en síðar.

[Pétur D. (IP-tala skráð) 2.2.2018 kl. 13:11]

Nei, Símon, ég var einungis að tala um farsana eftir Dario Fo. Þeir voru tveir, ekki einn: Þjófar, lík og falar konur annars vegar og hins vegar Nakinn maður og annar í kjólfötum. Auk þess skrifaði hann gamanleikinn Sá sem stelur fæti er heppinn í ástum. 

Að öðru leyti er ég fullkomlega sammála þér. Ég ber nákvæmlega ekkert traust til þingmanna, sama hvar þeir eru staddir pólítískt hverju sinni. Sannleikurinn, heiðarleikinn og skilvirknin eru löngu flúin frá Alþingi og hafa ekki sézt síðan innan opinberrar stjórnsýslu.

[Símon Jónsson frá Koti (IP-tala skráð) 2.2.2018 kl. 13:21]

:)

[Ómar Geirsson, 2.2.2018 kl. 17:41]

Váá, rosalega eruð þið flottir strákar.

Það er meira svona kvöð en skylda að henda inn þessum pistlum, í stærra samhenginu þarf að stöðva geðþóttann, sama hvaða ráðherra í hlut, sama hvaða flokkur á í hlut.

Skyldan er að nýta friðarstólinn til að skammast góðlátlega út í allt það góða og gegna íhaldsfólk sem er hér á Moggablogginu, kvöðin er að ég varla nenni þessu.

Nema einna helst þegar hluti skeytanna hæfa samfylkingarfrjálshyggjuóbermið.

Sem er sjaldgæf nálgun í öllu þessum farsa.

Svo fæ ég þessar athugasemdir, og veit ekki í hvorum ykkar kumrar meir, en mín er ánægjan og gleðin.

Ég get svo staðfest orð ykkar beggja, það er um ástandið á þingi.

Núna er Snorrabúð stekkur.

Og ekki orð um það meir.

Kveðja að austan.