Evrunni blæðir út, hægt og örugglega.

 

Samt er til fólk á Íslandi sem vill ekkert annað ræða en hvort það eigi að taka upp evru eða ekki.

Samt er til fólk á Íslandi sem heldur að hér verði allt í himnalagi ef aðeins þjóðin taki upp evru.

 

Þess vegna styður þetta fólk böðla samfélagsins, böðlana sem hafa einmitt gert þessa evrutrú að hornstein stefnu sinnar.

Það trúir að það birtir aðeins til ef það fær evru.

Það lokar auganu algjörlega fyrir staðreyndum, staðreyndir er eins og hver önnur dulkóðuð talnaruna í þeirra augun.  En það gín við áróðri og lygum evrutrúboðsins.

 

Sem dæmi um það má nefna kostaðan fréttaflutning ríkisútvarpsins af evrusælunni.  Núna síðast var það samanburðurinn af hækkun verðlags á Íslandi frá 1995 í samanburði við önnur Norðurlönd.  

Auðvitað kom Ísland illa út úr þeim samanburði, það varð efnahagshrun á Íslandi og krónan féll í kjölfarið.  

Ef samanburðurinn hefði verið frá 1995 til 2006 þá hefði dæmið horft öðruvísi við, þá hefði línuritið verð ósköp svipað.   Ef línuritið hefði verið frá 1990 til 2004 þá hefði til dæmis Ísland komið mjög vel út í samanburði við Svíþjóð.  Vegna þess að það varð bankahrun í Svíþjóð um 1990 og sænska krónan féll um 20% í kjölfarið. 

Eðlileg afleiðing af minni kaupmætti hagkerfisins.

 

Það sorglega í dæminu er að það þarf svo mikla heimsku eða heilaþvott á sjálfan sig til að halda að kaupmáttur launatekna geti haldist óbreyttur þegar kaupmáttur hagkerfisins sem borgar launin, dregst saman.  Fólk veit að ef laun þess lækka, þá minnkar kaupmátturinn, það er ef verðlag stendur í stað.  

En um leið og er rætt um kaupmátt þjóðarbúsins, þá er eins og allt vit og skynsemi hverfi á braut.  Að þetta einfalda samhengi sé ekki til staðar ef hagkerfið notar evruna.

Sem er algjör fjarstæða.  

 

Hagkerfi þeirra þjóða evrunnar sem ekki einu sinni hafa lent í efnahagsáföllum er að dragast saman, vegna evrunnar og vanda hennar.

En þau hagkerfi sem hafa lent í áföllum dragast hratt saman með tilheyrandi niðurskurði og launalækkun.  Og þau eru föst í vítahring kreppunnar.  Sjá ekki fyrir endann á henni.

Nema í þessum löndum er aðeins skorið niður hjá launafólki og bótaþegum.  Hinir ríku, sjálftökuliðið heldur sínu, evrur þess halda kaupmætti sínum, en aðkeypta vinnuaflið þiggur lægri laun.  Án rýrnunar getur ríka fólkið flutt fjármagn sitt úr landi í öruggt skjól þýska fjármálakerfisins, eftir stendur innlent hagkerfi án fjármagns.  

Sem eykur vandann, sem dýpkar kreppuna.

 

Evran er því draumur fjármagnsins enda er evrutrúboðið kostað af því.  

Hún ætti að vera draumur frjálshyggjunnar, því hún gerir hina ríku ríkari á kostnað almennings, en frjálshyggjustrákarnir verja ekki svívirðuna, þeir verja ekki þetta velferðarkerfi fjármagnsins sem evran og frjálsir fjármagnsflutningar milli evrulanda er.  

Þeir vilja frelsi viðskipta en ekki frelsi Helsis, þeir vita að aðeins hinir dauðu gista Hel.

Það er aðeins Eurokratinn sem ver þetta kerfi, aðeins hann lætur kaupa sig til að styðja þessa aðför að frelsi og velferð almennings í Evrópu.  

 

Draumurinn um frelsi, jafnrétti, bræðralag er einu sinni að snúast uppí andhverfu sína.

Nærður af blóði almennings eins og í fyrri skiptin.

 

Heimska, heilþvottur, skiptir ekki máli.

Fullorðið fólk, vitiborið fólk, grípur ekki sjálfviljugt skófluna til að grafa gröf framtíðar barna sinna.

Það er ekkert sem afsakar það, það á sér enga afsökun.

 

Og á meðan er gildra hins skítuga fjármagns að smella, hinir þúsund milljarðar eru að skuldfærast á þjóðina.

Aðeins er beðið eftir kosningum til að staðfesta evruskuldabréfið. 

Sú bið er lærdómur ICEsave ósigursins. 

 

Til að hindra að þjóðin verji framtíð sína, reynir fjármagnið að skapa tilbúin ómál eins og aðförina að stjórnarskránni eða landsbyggðinni í formi arðránsskattsins kenndan við veiðileyfagjald.

Og þegar allt annað þrýtur, þá er evruumræðan ræst á nýjan leik, á að sækja, á ekki að sækja, eins og það skipti nokkru máli í dag hvort örfáir menn séu að drekka kaffi í Brussel á kostnað þjóðarinnar.

Eins og eitthvað annað skipti máli í dag en að verjast þessum 1.000 milljörðum.

 

Ógæfu þjóðarinnar hefur orðið allt að vopni frá Hruni, nema í ICESave, þar reis þjóðin milliliðalaust og lét ekki hið skítuga fjármagn afvegleiða sig.  

En í dag sefur þjóðin og Leppar og Skreppar eiga svið þjóðmálaumræðunnar.

Talandi um allt nema það sem varðar líf og limi þjóðarinnar, aðstoða þannig hið skítuga fjármagn að grafa framtíð barna okkar.

 

Eins og við séum þjóð án afkomenda.

Eins og við eigum ekki líf sem þarf að verja.

Eins og við séum ekki lifandi.

 

Aðeins Tómið eitt.

Kveðja að austan.

 

 

 

 

 

Varar við langvarandi samdrætti

Athugasemdir

[Eggert Guðmundsson, 11.12.2012 kl. 16:17]

Gott hjá þér að benda á samanburðinn á árum- Gaman hefði verið að sjá samanburð frá 1978-2005 við Evrópu  hjá þessum fréttamönnum eða taka einungis valdatíma Davíðs Oddssonar og bera kaupmátt íslendinga saman við norðurlöndin á því tímabili.

[Ólafur Ingi Brandsson, 11.12.2012 kl. 16:20]

jæja þessu fer að ljúka vonandi 137 dagar til kostninga og þá hlýtur einhver flokkanna að slá þetta helv... bull útaf borðinu og í þjóðaratkvæði.

Það skelfilegasta sem ég er að sjá er að fólk sem vill ESB og vill Evruna vita í raun ekkert um málið, hvernig inngöngu í ESB er háttað og halda það að ´KÍKJA Í PAKKANN´ sé í raun einhver alvöru valkostur,  ´Kíkja í pakkan´ er orðaleikur til þess fallinn að halda hinum almenna Íslendingi frá þessarri umræðu með von um að eitthvað stórkostlega gott ´DEAL´ komi frá samninganefndinni og þá sé hægt að taka upplýsta ákvörðun, ekki  fyrr.

Það þarf aðeins að skoða ESB samninginn til að sjá hvað er í boði, enda er ísland að sækja um aðild en ekki ESB.

Og þegar rökin eru rekin niður í kok á svokölluðum  ESB-sinnum með vísan í ESB samninginn þá er í flest öllum tilfellum svarið ´Já, En við erum að semja svo við fáum betri kjör frá samningnum, þetta verður ekki svona hjá okkur´sem er þvílíkt bull, en þessu trúir fólkið sem vil ´Kíkja í pakkann´.

Á meðan verið er að troða svona vitleysu í almenning þá er ESB að liðast í sundur vegna miðstýringar frá brussel sem heftir völd landanna til að setja eigin lög og taka eigin ákvarðanir, Evrulöndin eru í sífellt meiri vanda og verða í um ókomin ár, á meðan ESB er að lána pening á milli landa hingað og þangað til að viðhalda evrudraumnum, millifæra skuldir á milli landa ESB....  og þetta er útópían sem ESB-sinnar vilja..

Hérna er video sem sínir á skemmtilegan hátt þessa helv.. bull sem ESB-sinnar vilja taka þátt í.

https://www.youtube.com/watch?v=NOzR3UAyXao

[Rafn Guðmundsson, 11.12.2012 kl. 20:16]

ég skil þig ekki - skv. þinni spá verður engin evra til og ekkert ESB þegar kemur að því að við fáum að kjósa. skv. þinn spá ættir þú (og aðrir NEI menn) bara að bíða rólegir eftir að evran og ESB hverfi.

[Ómar Geirsson, 11.12.2012 kl. 20:29]

Blessaður Eggert.

Slíkur samanburður væri fróðlegur en ESB kaupir ekki fréttamenn til slíkra verka, hugsanlegt að Gunnar Rögnvalds myndi gera það ef svona bull heldur áfram að vaða uppi á Ruv.  

En málið er að allar þjóðir eiga sínar hæðir og lægðir, við vorum rænd og efnahagslífið beið skaða af.  

Krónan bjargaði okkur og um það er ekki hægt að deila, með rökum.

En trúin flytur fjöll og hagsæld í evru, og við slíka trú deilir maður ekki.

Ég tek aðeins ofan og býð eftir að fjallið fari að rölta, þó ekki til Brussel, þangað fer enginn óneyddur, ekki með fullu viti.

Kveðja að austan.

[Ómar Geirsson, 11.12.2012 kl. 20:42]

Takk fyrir að deila þessu video Ólafur, var að horfa og er ennþá glottandi. 

En það er þetta með kosningarnar, fjórflokkurinn mun halda og það virðist vera að hann vilji ekki uppgjör við ESB, þá á ég við að það eru ESB öfl í öllum flokkum, ekki kannski fjölmenn, en hávær, og eru studd af fjármagninu.

Þess vegna er aðildarbullið snilldarlausn, helst að tefja þetta um heila eilífð, og þiggja mútur ESB á meðan.

Eða sem mig grunar reyndar sterklega, að hið falda vald flokkanna, fjármagnstengslin, vilji ESB og menn þori ekki gegn því.  Og tíminn eigi svo að vinna með aðildinni, eða réttara sagt mútuféð.

En upplausnin í Evrópu kemst á nýtt og alvarlegri stig á næsta ári, og þá munu aðstæður gjörbreytast, en hvernig veit ég ekki.  Aukin miðstýring og valdbeiting er alltaf möguleiki, en þá verða þeir að auka fjárveitingu í her og lögreglu, hafa þeir efni á því???

Jú, ef evrópski seðlabankinn prentar evrur í þeim tilgangi.

Hinsvegar er ógn evrunnar ekki málið í dag, heldur evruskuldabréfið, það skilur milli feigs og ófeigs.

Og hrjótandi þjóð uppsker feigð.

Kveðja að austan.

[Ómar Geirsson, 11.12.2012 kl. 20:55]

Það er alltí lagi að þú skilur mig ekki Rafn, ég skil þig ekki heldur.

Las meira að segja pistil minn aftur sem ég geri helst ekki ótilneyddur, og ég sá las hvergi út úr honum þetta samhengi sem þú talar um.

Líklegast ert þú að slá mér og Ólafi saman, og taka sitt lítið af hverju frá okkur báðum.

En þér að segja, mér er algjörlega sama um þessar ESB viðræður eins og málin standa í dag, það vill enginn óvitlaus maður inn.  

Hinir eru kjarklausar gungur sem þora ekki að segja stakt orð satt um áhrif aðildar að ESB.  Þora ekki einu sinni að kynna eitt samningsmarkmið, ekki einu sinni eitt.

Það segir allt sem segja þarf um hinn meinta samning.  

Það eru engin samningsmarkmið því það er ekkert til að semja um.  Enda ríkti lögleysa í Evrópu ef hægt væri að semja sig frá lögum og reglum sambandsins.

En þessi umræða um ekki neitt er stórhættuleg, því hún styrkir bullið á kostnað vitrænnar umræðu um vandamál þjóðarinnar.

Þar ber hæst 1.000 milljarða snjóhengjuna sem mun gera út af við þjóðina ef gildra vogunarsjóðanna smellur um framtíðar gjaldeyristekjur hennar.

Bullumræðan er því ígildi landráðs af svæsnustu gerð, ICEsave landráðin blikna í samanburðinum.

Mikil er ábyrgð þeirra sem hefja hana og eða taka þátt í henni.

Og ef evruskuldabréfið fellur á þjóðina þá verður  þeim ekki fyrirgefið, landráðar verður þeirra nafngift um aldur og ævi, á meðan einhver afkomandi hinnar gjaldþrota þjóðar hefur mátt til að mæla fordæmingu sína.

Og það verður ekki við ykkur Já-sinna að sakast.

Kveðja að austan.

[Kristinn J (IP-tala skráð) 11.12.2012 kl. 22:34]

:)