Brothættu hættir til að brotna.

9.3.2012 | 10:35

Frá fyrsta degi var ljóst að Borgarahreyfingin virtist ekki gera sér grein fyrir hlutverki sínu og tilgangi á Alþingi. Þingflokkur hennar var ósamstæður og hann hafði undarlegar hugmyndir um mikilvægi sitt.

Borgarahreyfingin var kosin vegna vilyrða sinna um að berjast gegn spilltu kerfi og vegna þess að hún hafði raunhæfar hugmyndir í skuldamálum heimilanna sem hefðu lagað stöðu þeirra ásamt að flýta fyrir efnahagsbata og skapa einingu í þjóðfélaginu.

En þingmenn hennar héldu að þeir væru kosnir út á hugmyndir sínar um endurskoðun stjórnarskráarinnar og til að ná því markmiði sínu yrðu þeir að kóa með ríkjandi öflum, semja við þau á grundvelli þeirrar spillingar sem Hreyfingin voru kosin gegn.

Strax á fyrstu vikum þingsins fara þingmenn Borgarahreyfingarinnar að makka með foringjaræði ríkisstjórnarinnar þegar ljóst er að bæði ICESave samningurinn og aðildarumsóknin að ESB nýtur ekki næginlegs stuðnings innan þingflokka ríkisstjórnarinnar.

Hún er að makka við ríkisstjórn kerfisins, sem lýtur boðvaldi AGS, ríkisstjórn sem var mynduð beint um að láta fjármuni almennings renna í vasa fjármagns og fjármagnseiganda, aðallega erlendra, og undir var sjálfstæði landsins.

Jafnvel heimskt barn veit að þegar var búið að borga ICEsave og krónubraskaralán AGS þá var ekki króna eftir til að aðstoða heimili landsins eða reka innviði samfélagsins, og það dygði ekki til, eigur hennar hefðu verið einkavæddar til hins alþjóðlegs fjármagns.

Andófshreyfing makkaði við ríkisstjórn sem ætlaði að afleggja þjóðfélagið í þeirri mynd sem við þekkjum og gera það að bláfátæku ölmusaríki komið undir náð og miskunn Evrópusambandsins.

Og fyrir hvað???? Nýja stjórnarskrá sem engin augljós þörf var á og öruggt að engin samstaða næðist um.

Það reyndi ekki á undirgefni Hreyfingarinnar því landráðafólk var í fleiri flokkum, Framsókn og íhald kom með þann stuðning sem uppá vantaði og Ögmundur gat því ekki fylkt liði gegn óhæfuverkum ríkisstjórnarinnar og kaus að vinna gegn þeim innan frá sem hann hefur síðan gert svikalaust.

En í haust var ríkisstjórnin búin með öll sín líf, hún hafði ekki afl í ráðherrakapalinn svokallaða, tími Ögmundar og uppreisnar hans var kominn.

Skeiðaði þá ekki Hreyfingin til hjálpar og bjargaði þeim Jóhönnu og Steingrími. Þau með allt niðrum sig og þá dugði að lofa Þór Saari upphefð, og hann tryggði stuðning þeirra Birgittu og Margrétar.

Og upphefðin, ein sú lægsta sem skráð hefur verið á söguspjöld, hann fékk að halda framsöguræðu um stjórnlagaeitthvað. Gjaldið, óvinur heimilanna, margdæmd ríkisstjórn í Hæstarétti, hún hélt völdum sínum.

Það er eins og Þór Saari hafi aldrei séð James Bond, hvað gerði Blofeld alltaf við þá sem sviku allt fyrir lítið?????

Þór upplifði það núna í vikunni hvað gert er við þá sem mega missa sig.

Það má deila um hve smekklegt það er að blogga um rætur svona voðverka eins og átti sér stað í Lágmúlanum á meðan fórnarlambið berst fyrir lífi sínu. En það þarf að ræða þessi mál, annað er ekki bara heimskt, heldur líka mun strútsaðferðin, að láta eins og ekkert sé að í þjóðfélaginu, aðeins uppskera eitt, og aðeins eitt.

Fleiri voðverk, hvort sem það er gegn eigin lífi eða annarra. Og það er siðleysi, það er hugleysi.

Já, og heimskt.

Hver var hinn meinti glæpur Þórs og Margrétar???

Þau hófu ekki þessa umræðu. Það voru ekki þau sem tengdu atburðinn við ástandið í þjóðfélaginu.

Til dæmis á MBl.is, móðurstöð okkar Moggabloggara birtist frétt klukkan 13.42, daginn sem voðverkið var framið, undir fyrirsögninni, "Fordæma árásina" þar sem þetta mátti lesa; "Við fordæmum þessa árás líkt og aðrar þar sem ráðist er gegn lífi og limum fólks,“ segir Guðmundur Andri Skúlason, talsmaður Samtaka lánþega, um árásina á lögmannsstofuna Lagastoð í morgun."

Af hverju skyldi talsmaður Samtaka lánþega sjá sig knúinn til að lýsa þessu yfir???

Í viðtali við formann Lögfræðingafélagsins komu fram áhyggur um öryggi lögmanna og starfsmanna þeirra, var það ekki vegna þess að hún óttaðist að þetta væri ekki einstakur atburður og hann ætti sér rætur í ástandinu í þjóðfélaginu??

Þessi umræða var komin á fullt þegar þau Margrét og Þór blogguðu og lýstu yfir áhyggjum sínum yfir hvernig komið væri fyrir þjóðinni. Það var það eina sem þau gerðu, þau voru ekki að hvetja til svona atburða, þau voru ekki að afsaka hann á neinn hátt. Það að segja að eitthvað komi sér ekki á óvart er ekki það sama og segja að maður skilji viðkomandi voðverk. Þetta er almenn rökleiðsla, að vísa í eitthvað ástand sem leiðir til annars.

Þú ert ekki að hvetja til íkveikja þó þú bendir á að hætta sé á skógareldum vegna langvarandi þurrka. Og bendir á að það þurfi að fara varlega með eld.

Og í hvað miðlum voru þau að tjá hugrenningar sínar???

Var það ekki í eigin miðlum sem fáir lesa??? Ég man þegar spjótin stóðu sem mest á stjórnvöldum haustið 2010 og eldar kviknuðu á Austurvelli, að þá var Þór með um 60 ip tölur á grein um skuldamál heimilanna og forsendubrest verðtryggingarinnar, góð grein og rökföst, þegar Ómar Ragnarsson var með um 600 Ip tölur á grein sem fjallaði um skallann á honum eða eitthvað álika navý þegar Samfó stuðningsmenn þurftu að láta líta út eins og ekkert væri í gangi út í þjóðfélaginu,.

Staðreyndin er sú að bloggsíðu þingmanna eru ekki lesnar, þær ná ekki til almennings.

Þeim sem fannst skrif Þórs og Margrétar ósmekkleg, þeir fóru einfaldlega ekki inná síður þeirra aftur. Og enginn hefði vitað um þau, Enginn.

Af hverju eru þau þá að biðjast afsökunar í dag???

Jú, andstæðingar skuldaleiðréttingar heimilanna sáu tækifærið og skipulögðu í snarhasti áróðursherferð gegn Þór og Margréti og einnig var ötulasti baráttumaður landsins, Marínó G. Njálsson dreginn inn í skítinn.

Það voru þeir sem komu skrifum sem enginn las, inní fjölmiðlanna og bar þar hæst misnotkunin á Ruv. Það er langur vegur frá meintri smekkleysu yfir í þessa fullyrðingu sem var útgangspunktur fréttar Ruv; "Að réttlæta voðaverk sem útrás fyrir reiði eða örvæntingu, getur boðið hættunni heim að mati afbrotafræðings. ;".

Hver var að réttlæta voðaverk???? Hvernig er hægt að slá svona fram án þess að sína fram á að viðkomandi aðilar hafi gert slíkt??? Vísa þá beint í orð þar sem slík réttlæting kemur fram.

Að sjálfsögðu var það ekki gert því slík orð voru aldrei sögð.

En andstæðingar skuldaleiðréttingar heimila landsins nýttu sér voðaverkin til að koma höggi á andstæðinga sína. Það eru þeir sem eru siðlausir, það er þeir sem upphefja glæpinn, og það á meðan fórnarlambið berst fyrir lífi sínu.

Lægra hefur íslenskur áróður aldrei lagst.

Og fólk kokgleypti hann.

Það er ekki nema von þó stjórnvöld komist um með endalaus svik og bein lögbrot eins og lögin um afturvirka vaxtatöku voru því andstæðingar stjórnvalda eru sundraður hópur sem hægt er endalaust að spila með.

Jafnvel voðverk eru nýtt í því skítuga stríði.

Og fólk sem sjálft hefur orðið fyrir barðinu á þessari misnotkun Ruv í þágu Eurosamfó, féll í gildruna, það tók þátt í upphrópunum og fordæmingu á uppdiktuðum glæp..

Búið að steingleyma þegar það sjálft eða samstarfsmenn þess fékk sömu meðferð.

Það eru skýringar á því að fámenn klíka rændi okkur og er ennþá að.

Skýringar sem liggja hjá okkur.

Fyrirsögn þessa pistils er sótt í þá staðreynd að þingflokkur Borgarahreyfingarinnar var brothættur frá fyrsta degi og aldrei trú þeim hugsjónum sem hann átti að verja.

Þetta fólk brotnaði undan þrýstingnum.

Það baðst afsökunar á því sem það hafði ekki gert.

Afsökunar átti það vissulega að biðjast ef orð þeirra höfðu átt þátt í að skapa umræðu sem særðu þá sem eiga um sárt að binda, en þeirri afsökunarbeiðni átti að fylgja eftir með kæru á hendur Ríkisútvarpinu fyrir mannorðsmeiðingar og beina misnotkun í pólitískri umræðu.

Enginn fjölmiðill, allra síst fjölmiðill kostaður af skattfé almennings, á að komast upp með að ljúga upp sakir á fólk, jafnvel þó viðkomandi leiði baráttu sem er stjórnvöldum lítt þóknaleg, og úthrópa svo viðkomandi vegna þeirra saka.

Þau áttu að láta hart mæta hörðu.

Að taka slaginn því það er svo mikið undir að vaxtaþjófarnir komist ekki upp með þessi vinnubrögð.

Undir er sjálf framtíðin.

Hvort við verðum rænd þjóð eða frjáls þjóð.

Og allt vel meinandi fólk þarf að fara að skilja það.

Við erum að falla á tíma.

Kveðja að austan.