Fyrirheit án forsenda er alltaf dæmt til að mistakast.

 

Aðgerðir AGS í Grikklandi hafa alltaf miðast við ímyndaðan jafnvægispunkt og út frá því hafa útgjöld ríkis verið lækkuð og skattar hækkaðir.  

Aðferðarfræði sem gengur upp ef niðurskurður og skatthækkanir hafa engin áhrif á hið meinta jafnvægi, en það er ekki svo á tímum efnahagsslaka því niðurskurður og skattahækkanir hafa víðtæk samdráttaráhrif í hagkerfinu.

Hagfræði AGS er því eins og hagfræði hundsins, sífelldur eltingarleikur  við jafnvægi sem aldrei næst eins og hjá hundinum sem nær aldrei skottinu á sjálfum sér.

 

Þetta vita bændur, þeir vita að ef þeir mæta samdrætti og kreppu með því að fækka líflömbum, þá vissulega auka þeir tekjur sínar í núinu en hjörðin sem kemur að fjalli næsta haust er ekki eins stór.

Og ef þeir bregðast þá við með því að fækka líflömbum enn meir, þá eru þeir fastir í vítahring þar sem stundargróði beinlínis eyðir framtíðartekjum.

 

Þetta einfalda röksamhengi virðist vera íhaldmönnum þessa heims ofviða.  Þeir æpa alls staðar eftir blóðugum niðurskurði ríkisútgjalda og skilja svo ekkert í að fyrirtæki þeirra verða gjaldþrota því þau þola ekki meiri samdrátt.

Þeir skilja ekki að á krepputímum er ríkisvaldið viðskiptavaki sem með peningaprentun sinni heldur framleiðsluþáttum gangandi.

Það er aðeins tvennt sem þarf að gæta að, að ríkið hækki ekki skatta, mætti lækka þá á sumum sviðum til að auka eftirspurn, og að laun hækki ekki meðan samdrátturinn gengur yfir.  Ef það gerist þá er komin önnur útgáfa af hundahagfræði.

 

Nóbelshagfræðingurinn Paul Krugman sagði nýlega að bandarískir íhaldsmenn væru gegnir af vitinu, tillögur þeirra myndu ganga af bandarískum kapítalismanum dauðum.  Er hann þá að vísa í fávitahjörðina sem nýtur mesta fylgis hjá Rebúblikum og að stuðningsmenn fáviskunnar myndu tapa mest á lýðskrumsheimsku þeirra.

Og því miður er vitskerðingin ekki bara bundin við Bandaríkin.

Spírall niðurskurðar er að grafa um sig í hagkerfum Vesturlanda.  Vissulega eru peningar prentaðir en þeir eru eingöngu notaðir til að halda lífi í dauðadæmdu fjármálakerfi, vonlaust verk því það er verið að vernda eignabólur sem aldrei var nein innistæða fyrir.

 

Og það eru engar líkur á að þróuninni verði snúið við.

Ráðamenn okkar hafa hvorki vitið eða snerpuna sem þarf til.

En fyrst og fremst er hugmyndafræði Nýfrjálshyggjunnar röng og hún er að eyða sjálfri sér. 

 

Forheimska  græðginnar var hennar vopn og þeir sem höfðu vit og þekkingu í viðskiptalífinu, þeim var skipt út á fyrstu stigum græðgisvæðingarnnar því þeir "græddu" ekki nógu mikið.  Því sköpun raunverulegra verðmæta er alltaf hægari en stigaukning sýndargróðans.

Markaðurinn er því naut, nautheimskur i dag, fólkið sem þar er kann vissulega að stafa nafnið sitt og reima skóna sína en ekki mikið meir.  Vissulega eru til "öldungar" eins og Buffett sem reyna að hamla á móti og til dæmis að koma vitinu fyrir samlanda sína í viðskiptalífinu en ennþá virðist það skila litlu.

 

Þessi litla frétt um lækkun hlutabréfa í Evrópu i kjölfar þess að hið augljósa var sagt, er lítið dæmi um dilemmu viðskiptalífsins.

Það var vitað strax þegar AGS greip til hundahagfræði sinnar, að hún hefði þessi áhrif.  Samt var látið eins og það væri verið að gera eitthvað vitrænt, og markmiðin myndu ganga eftir.  Svo þegar ekki var lengur hægt að fela raunveruleikann, þá koma menn af fjöllum og fella hlutbréf.  

Og herða þar með henginarólina sem liggur um háls markaðarins.

Markaðurinn átti að sjálfsögðu að fella hlutbréfins strax og ljóst væri að fíflin stjórnuðu ennþá AGS, markaðurinn á að þekkja afleiðingar hundahagfræðarinnar og hann á að kalla eftir vitrænni leiðsögn.

En hann gerir það ekki.    Hann lætur AGS komast upp með bullið, hann lægur Eurokrata komast upp með bullið.

 

Og þegar fyrirheit án forsenda steyta á skerum raunveruleikans þá bregst markaðurinn við með panikráðstöfunum sem í reynd flýta fyrir falli hans.

Margir nota þessa sjálfseyðingarhvöt markaðarins sem rök fyrir þvi að Marx hafi haft rétt fyrir sér allan tímann, að kapítalisminn sé með innibyggða sjálfstortímingu.

En það er rangt, það er mannleg heimska sem eyðir alltaf sjálfri sér.

Yfirtaka Nýfrjálshyggjunnar á Vesturlöndum, jafnt í viðskiptalífinu sem og stjórnmálum, leiddi til þess ástands sem við upplifum í dag.  Það er hún sem er í dauðateygjunum, ekki markaðurinn.

 

Og markaðurinn mun verða lykiltæki mannsvitsins þá og þegar almenningur gerir það upp við sig að hann vilji lifa sem fólk en ekki þrælar auðmagns.  

Það gerist alltaf að lokum að fólk veðjar á skynsemina og þá mun birta til á ný.

Eina ógnin er að dauðateygjur hinnar siðlausu græðgi nái að starta átakaferlum sem munu enda með ósköpum.  

Þar er efinn, náum við hinn venjulegi maður að bregðast við í tíma??

 

Eitt svarið við þeirri spurningu er hvað margir mæta með rauða spjaldið í kvöld á Austurvöll.

Hvað margir eiga líf sem þeir vilja vernda??

Því ein af forsendum lífsins er að leppum auðmagns á Alþingi Íslendinga sé skipt út og að vitiborið fólk taki sæti þeirra.

Þannig störtum við Íslendingar eitt ferli lífsins og gefum öðrum þjóðum leiðsögn um það sem þarf að gera.

 

Því sigur lífsins felst í ótal jákvæðum ferlum gegn sjálfseyðingu forheimskunnar og að lokum munu þeir ferla ná að snúa á tregðuna og koma lífsfleyjinu út úr brimgarðinum.

Það er ekkert eitt sem skapar mannkyninu framtíð, það er svo margt, en allt þetta marga hefst á okkur sjálfum.

Að við hættum að láta ljúga að okkur, notum okkar heilbrigðu skynsemi og tökum sjálf af skarið.

Það er forsendan og markmiðið er lífvænlegur heimur fyrir börnin okkar.

 

Mætum því með rauða spjaldið á Austurvöll.

Og notum það.

 

Við eigum öll líf sem þarf að vernda.

Kveðja að austan.

 

 

 

 

 

 

 

 

 

 

Hlutabréf lækka mikið