Samtök atvinnurekenda hafa ekkert lært.

Ekkert.

Það er eins og þessum hugmyndafræðingum Hrunsins, líði illa nema að allt sé lagt undir, og við minnsta mótbyr hrynji allt aftur.

Við megum aldrei gleyma að það var ekki tilviljun að efnahagslífið hrundi, það var óhjákvæmilega afleiðing af því viðhorfi sem hrjáði helstu forkólfa okkar í viðskiptalífinu.

Í græðgivímu þá misstu þeir sjónar á forsendum heilbrigðs rekstrar, gleymdu þeirri heilbrigðu skynsemi að það þarf alltaf að vera borð fyrir báru  þannig að fyrirtæki þoli áföll, og að afrakstur er eitthvað sem fæst með elju og natni, líkt og þegar bóndi sáir í akur sinn, og þarf að hlúa að honum, vernda hann fyrir áföllum, og hafa þolinmæði til að bíða þar til uppskeran er komin í hús.

Heilbrigð íhaldssemi vék fyrir skyndihugsun þar sem menn ætluðu sér ofsagróða helst í gær, og meðulin voru skuldsetningar langt fram yfir getu, oft í kjölfar sameiningar eininga í "hagræðingarskyni".

Heilbrigt atvinnulíf vék fyrir stórkapítalisma þar sem enginn átti neitt nema skuldirnar.  Og vonina um ofsagróða.

 

Þessi skortur á skynsemi kristallast í stóriðjustefnu okkar.  

Allt á að virkja, strax, fyrir lánsfé.

Afleiðingin er að orkufyrirtæki okkar þola engin áföll.  Og öll virkjanleg orka er að vera uppurin. 

Og hvað þá????

 

Sjá menn ekki hver er arfur stóriðjuáratugarins???

Nokkrum mánuðum eftir Hrun, voru allflest verktakafyrirtæki okkar gjaldþrota eða í gjörgæslu bankanna.   Hvað atvinnugrein er það sem getur ekki einu sinni staðið í lappirnar eftir tíu ára góðæri?????

Eins er það með orkufyrirtækin okkar.  Hvernig standa þau??

Er einhver búinn að gleyma að ein helstu rök ICEsave áhangenda fyrir þjóðníði sínu var að við yrðum að semja svo hægt yrði að endurfjármagna orkufyrirtækin, þau fengju hvergi lán.

Af hverju þurfa þau lán, eru þau ekki búin að fjármagna sig???

Svarið er Nei, fjármögnun þeirra var skammtímafjármögnun, sem þýðir á mannamáli, að þau eru komin undir náð og miskunn lánardrottna sinna.

Það eru engin rök að segja að við verðum skuldlausir eftir svo og svo langan tíma, ef þú tekjur duga ekki fyrir afborgunum ársins.

Að ætla slíkum fyrirtækjum að ráðast í risaframkvæmdir til að púkka upp á gjaldþrota verktakaiðnað, svo hann geti haldið áfram að vera gjaldþrota, það er ekkert annað en fáviska á hæsta stigi.  

Það er eins gott að gefa fyrirtækin frá sér strax, þau eru hvort sem er alfarið komin undir náð  lánardrottna sinna.  Og þau þola engin óvænt áföll.

Eins og til dæmis eitt stykki eldgos á viðkvæmu svæði.

Það er ekkert borð fyrir báru.

 

Og í hvað fer rafmagnið???  

Allt í sömu atvinnugreina, sem þarf gífurlega mikla orku, en skilar litlum virðisauka í staðinn.  

Vissulega kannski skynsamlegt þegar ævintýrið hófst, en að halda sér við slíka stefnu um aldur og ævi er eins og að Kínverjar hefðu það sem sina höfuðstefnu að framleiða skyrtur eftir 50 ár, ekki nútíma hátækni búnað, sem er stefna þeirra.

Það er virðisauki af vinnu sem skapar velmegun, ekki vinnan sem slík.  

Og sama gildir um orkuna, þegar hún er takmörkuð auðlind, þá er það virðisaukinn af henni sem skilur á milli feigs og ófeigs, ekki að hún sé virkjuð.

 

Þessir blessaðir menn hjá samtökum atvinnurekenda vita þetta allt saman, þeir urðu að læra um forsendur heilbrigðs reksturs, á meðan þeir voru í skóla.  Þetta til dæmis um ofurskuldsetningu er kennt á blaðsíðu 2, í öðrum tíma hjá öllum í fjármálafræði.  Eins er það með framlegð, heimsku og svo framvegis.  Allt þekkt.

En þeir hafa hag af heimskunni, því henni fylgir umsvif, og þeir ætla sér  að græða á henni.  Að vera búnir að finna sína Tortillu áður en næsta Hrun verður.  Og skilja svo almenning eftir í súpunni eins og venjulega.

 

Þeir vita alveg að Magma fyrirtækið er leppfyrirtæki íslenskra auðmanna sem eru að koma sér fyrir á íslenskum orkumarkaði líkt og þeir voru langt komnir með áður en Hrunið varð.

Þeir vita alveg að Magma hefur ekki komið með krónu inn í landið, heldur ætlar sér að borga lán sín með Manchester United aðferðinni, það er að láta reksturinn borga kaupverðið.

Þeir vita líka að orðaleppurinn "erlend fjárfesting" sviptir góða íhaldsdrengi bæði vit og skynsemi, og þeir geysast fram á orðavígvöllinn, skammandi ríkisstjórnina.

Þeir kunna þetta allt saman, þeir náðu að blekkja íhaldssálir fyrir Hrun, og treysta á að hún hafi ekkert lært.  Jafnvel þó flest fórnarlömb Hrunsins séu hrekklausir kjósendur Sjálfstæðisflokksins.

 

Og þeir hafa rétt fyrir sér.  

Því fyrirsögn mín er röng, Samtök atvinnurekenda vilja ekki læra, þau eru ánægð með núverandi ástand.  

 

Það eru stuðningsmenn Sjálfstæðisflokksins sem hafa ekkert lært.

Kveðja að austan.

 

 

 

 

 

 

Vögguvísur yfir atvinnulífinu