Viðamestu skulda hvað????????????

29.3.2010 | 11:47

Viðamestu skulda hvað????????????

Er fólkið á lyfjum hjá Hagsmunasamtökum heimilanna?????

Í morgunfréttum var haft eftir formanni samtakanna að nú þegar vantaði um milljón upp á að vísitölufjölskyldan næði endum saman.

Mestu munaði þar um hinn sligandi skuldavanda heimilanna.

Fattar maðurinn ekki hvað mikið hefur verið gert, hið mesta í sögunni?

Einna helst má finna svipaðar aðgerðir hjá hinum ástæla leiðtoga Norður Kóreu, Kim il Sung (eftir minni) þegar hann með röggsemi sinni hvað niður hungursneyðina miklu. Mestu munaði þegar hann lét embættismenn sína lesa ljóð sín yfir rísplöntun sem biðu útsáningar. Eins setti hann mjög stífa reglugerð sem bannaði hungursneyð.

Allt mjög þarfar og árangursríkar ráðstafanir, svipað eins og þær að fresta nauðungaruppboðum, eða skattleggja afskriftir skuldara.

Enda dó enginn úr hungri í Norður Kóreu eftir inngrip leiðtogans mikla, fólk bara dó, af því bara, en ekki úr hungri, enda höfðu yfir 50 einstaka markvissar aðgerðir séð til þess.

Aðeins illar tungur sögðu að til þess að leysa vanda, þá þyrftir þú gera eitthvað sem leysti hann. Allt sanngjarnt fólk sér að vilji til að leysa vanda, hvað þá orð þar um, eða markvissar aðgerðir, sem eru markvissar aðgerðir, að það er það sem skilur á milli feigs og ófeigs í miklum vanda.

Allt sanngjarnt fólk sér að íslenska leiðin, sú að skoða málin, að skipa nefnd, að skoða aftur til að athuga hvort vandinn hafi ekki horfið, frá því að hann var síðast skoðaður, að sú leið er okkar framlag til lausnar hins mikla skuldavanda heimsins. Enda ætlar Jóhann Sigurðardóttir að leggja niður sjávar og landbúnaðarráðuneyti, og stofna nýtt ráðuneyti, ráðuneyti skoðunar, og hinn nýi ráðherra mun heita skoðunarmálaráðherra, og Dagur B. Eggertsson ku vera kanditatinn í það embætti, enda mjög þekktur fyrir að tjá skoðanir sínar, eða hafa skoðanir, en það er stutt leið til baka, að hætta að hafa skoðanir, og skoða, skoða til dæmis vanda heimilanna, eða lyfjanotkun þeirra sem alltaf eru að kveina. Er það skýringin á hækkun lyfjakostnaðarins, má ekki skoða það.

"Við erum að skoða málin" sagði Jóhanna. Skoða, skoða, skoða.

Og á meðan gefst fólk upp á skuldavanda sínum, hægt og hljótt eins og þau fórnarlömb 55 aðgerðapakkans í Norður Kóreu gáfust upp á matarleysi sínu. Það er nefnilega ekki langt á milli feigs og ófeigs þegar bjánar fara með völdin.

Og ekkert hefur verið gert til að leysa skuldavandamál heimilanna, það hefur aðeins verið framlengt í skuldahengingaról fólks, svo það haldi áfram að þræla fyrir ameríska vogunarsjóði, hina nýju stjórnendur Íslands.

Í Norður Kóreu fannst fólk, margt fólk, sem gaf upp öndina í þeirri vissu að ljóðalestur foringjans hefði allt að segja um afkomu þess. Á Íslandi eru mjög margir sem trúa leiðsögn félagshyggjunnar út úr skuldavanda heimilanna.

Kannski erum við þrátt fyrir allt orðin að Norður Kóreu norðursins.

Kannski trúum við öllu sem okkur er sagt.

Raunveruleikinn hljóti bara að vera misskilningur.

Einhver skýring er að þetta fólk fer ennþá með völd.

Kveðja að austan.