Hvenær tekur þjóðin í taumana???

Hvenær losar þjóðin sig við ríkisstjórn Alþjóðagjaldeyrissjóðsins úr landi?

Ríkisstjórn sem er ekki að endurreisa efnahagslífið fyrir íslenskan almenning.  Ríkisstjórn sem er ekki að takast á vanda skuldsettra heimila á forsendum þjóðarinnar?

Hvenær áttar félagshyggjufólk sig á því að stuðningur þess við Óbermi Alþjóðagjaldeyrissjóðsins er svik við þjóðina?  Hvenær áttar það sig á því að stefna ríkisstjórnarinnar er aðeins ein, stefna Alþjóðagjaldeyrissjóðsins sem felst í því að endurreisa efnahagskerfi auðmanna, að endurreisa fyrirtæki auðmanna, eina viðbótin er að gatan er gerð greið fyrir erlenda ómenni, græðgifjárfesta, hrægamma og vogunarsjóði, að hirða eigur þjóðarinnar í samkrulli við okkar gömlu auðmenn.

Hvaða stjórnmálamenn kalla það félagshyggju að ætla að nota 60% af ríkistekjum í vexti og afborganir af lánum, lánum sem að stórum hluta tilheyra auðmönnum og fyrirtækjum þeirra????

Eða eyða stærsta hluta af gjaldeyristekjum þjóðarinnar í að borga af ICEsave og láni AGS?

Svarið er ekki ríkisstjórn félagshyggju og réttlætis.

Hingað til hafa aðeins spilltar auðmannsstjórnir hagað sér svona.

Og núna er komið nóg.

Sættum okkur ekki við þessi skrípi lengur.

Kveðja að austan.

 

 

Nauðungarsölum ekki frestað

Athugasemdir

[Jón Valur Jensson, 14.2.2010 kl. 16:43]

Ég hef algerlega misst trú á þessum Alþjóðagjaldeyrissjóði – taldi haustið 2008, að nauðsynlegt væri að fá hann hingað, en hef fyrir löngu sannfærzt um annað! – Þakka þér pistilinn, félagi!

[Sigurður Haraldsson, 14.2.2010 kl. 20:43]

Ómar Geirsson þú ert ekki einn um að vera svona þenkjandi sem betur fer við verðum að berjast fyrir réttlæti það er orðið ljóst að stjórnvöld gera það ekki!

[Ómar Geirsson, 14.2.2010 kl. 22:49]

Blessaður Jón Valur.

Alþjóðagjaldeyrissjóðurinn hefur villst af leið.  Joseph Stiglietz rökstyður það mjög vel og í raun hefur yfirstjórn AGS viðurkennt gagnrýni hans en tregðan við breytingar er miklar.  Aðallega vegna þess að fólkið þar innanborðs aðhyllist gjaldþrota hugmyndafræði.  Því fyrr sem fólk sem er hlynnt frjálsum markaðsviðskiptum og frjálsu samfélagi, áttar sig á þessum einföldum sannindum, því fyrr tekst mannkyninu að vinna sig út úr núverandi kreppu.  Og þessi kreppa er ekki bara fjárhagsleg, hún er líka félagsleg, og hún er á milli ólíkra menningarheima og milli vesturlanda annars vegar og allra hinna hins vegar.  

Og þessar ábendingar mínar eiga ekkert skylt við sósíalisma, heldur heilbrigða skynsemi.  Og hana hafa fleiri aðhyllst í gegnum tíðina.  Til dæmis þá var rökfærsla Churchils og Bjarna Ben, eldri, mjög svipuð þegar þeir bentu á að það var ekki nóg fyrir þýska þjóðernissósíalista að styðja stórfyrirtæki og berjast gegn bolsvéisma, sjálf stefna væri ill, hún inni gegn mennsku og kristnu siðgæði.

Í dag er nokkurn veginn hægt að taka  ræður þeirra orðrétt upp og skipta út orðum, þá færðu út mjög svipaða gagnrýni og hjá mér á það heimsku og siðleysi sem kennt er við Nýfrjálshyggju (þó mig vanti betra orð).  Kerfið er ómennskt og rústar samfélögum fólks.  Við erum ekki lengur manneskjur, heldur kostnaðartölur, sem helst mega missa sig.  Það vill svo til að þetta kerfi notar frjálsan markað, en í raun á dýrkun þess á alþjóðleg stórfyrirtæki einna helst samleið með dýrkun Stalíns á einu risastóru ríkisfyrirtæki.   Hvorug tveggja jafn mannfjandsamlegt.

Vissulega var staðan erfið haustið 2008, og við þurftum aðstoð.  En það er betra að svelta en að fórna hluta af þjóðinni á altari græðginnar, rústa velferðinni og afhenda eigur þjóðarinnar hrægömmum á silfurfati.  

Það er ekki kapítalismi, og það er ekki þjóðfrelsisstefna.  Og þjóð sem lætur allt sitt af hendi í krumlur alþjóðlegs auðmagns, það er ekki frjáls þjóð.  Þess vegna skil ég ekki baráttu Heimsýnar.  Ógnin gegn sjálfstæði landsins er mun augljósari í aðkomu AGS, en nokkurn tímann í ESB draumi Samfylkingarinnar. 

En það fyrra mun örugglega leiða til þess seinna.  Til dæmis ótrúlegt að jafn vel gefinn maður og Styrmir skuli vera það fastur í úreltu hægri/vinstri skilgreiningum á AGS, að hann skuli ekki sjá hættuna fyrir sjálfstæði landsins þegar flokkur hans bauð AGS velkomna.  

Það gerði þó Davíð Oddsson, enda rægður mjög, ekki hvað síst af sínum eigin flokksmönnum, sem eiga þann draum heitastan að hér ríki óheftur græðgikapítalismi undir pilsfaldi ESB.

En ég er glaður að þú skulir, jafn sannfærður hægri maður og þú ert, skilja þá ógn sem þetta skrímsli er þjóðum í neyð.  Einn daginn mun vera réttað yfir þessari hugmyndafræði eins og var gert í Nurnberg yfir öðrum ógeðum.

Ógeð eru ógeð, óháð því hvort þau þykjast sósíalískir mannvinir, eða frjálsir markaðsmenn.  

Þetta skilja allir sem eitthvað hafa kynnt sér orð Meistarans mikla frá Nazaret.  Þetta heitir kristilegt siðgæði, sem er stærsta afl minnar gagnrýni, jafnt á kommúnískt alræði eða alræði hins alþjóðlega auðmagns.  Það kerfi sem þjónar ekki manneskjunni og samfélagi hennar, það á aldrei rétt á sér.

Þetta er ekki flókið, það þarf aðeins að þekkja muninn á réttu og röngu.

Kveðja að austan. 

[Ómar Geirsson, 14.2.2010 kl. 23:07]

Blessaður Sigurður.

Svona fyrirfram þá hélt að allt vinstri og félagshyggjufólk væri svona þenkjandi, og ég hef þá skoðun að stærsti hluti hins venjulega íhaldsmanns hugsi svona líka.  

Við viljum öll gott samfélag, og okkur ber skylda til að byggja það upp eftir Hrun gamla gatslitna kerfisins, sem við öll vorum búin að fá upp í kok af.

En svo byrjaði valdapólitíkin, og fyrir völd sviku forystumenn vinstri og félagshyggjufólks, þjóðina.  Og stærsti hluti hjarðar þeirra gerðist baráttmenn óheftrar Nýfrjálshyggju (mig vantar betra orð, því frjálshyggjumenn eru ekki sáttir við aðkomu AGS).  Það eru hin söguleg svik, þess vegna er verið að endurreisa hið gamla kerfi ennþá siðlausara og spilltar en það var fyrir Hrun.  Núna mega þeir sem höllum fæti standa, éta það sem úti frýs, og eignarhald þjóðarinnar á auðlyndum sínum virðist engu máli skipta.  Villtustu draumar, heimskasta hluta Viðskiptaráðs, hafa ræst, eða eru við það að rætast.

Allt í boð þeirra sem sviku.

Já, ég veit að ég er ekki einn.  En flestir sem vilja ekki þessa Helstefnu, berjast ekki gegn henni, þeim finnst það mikilvægara að gera upp við dauða menn út í kirkjugarði, eða eru þeir í London, hverjum er ekki sama. Þess vegna er öll andstaða í skötulíki og auðvaldið fer sínu fram, grímulaust.

Við erum nefnilega sorglega fá sem viljum berjast við þá sem ógna framtíð okkar, glæpamennina sem eru að fremja glæpi sína í þessum skrifuðum orðum.  Flestir telja það nóg að bölva þeim sem hafa þegar framið glæpi sína.  Þetta er eins og ef þjófur hefur einu sinni náð til að brjótast inn hjá þér, þá hugsir þú um það eitt að klófesta hann, og lætur allar eigur þínar óvarðar á meðan, og nýtt glæpgengi, sem er nýkomið í hverfið, getur hirt allt sem þú þó átt ennþá.  Og það sem meira er, það rænir börnunum þínum líka, og selur þau í ánauð.  

En það er allt í góðu því þú hefur frétt af þjófnum hinum fyrsta út í London, og ætlar að ná í skottið á honum við fyrsta tækifæri.  Sem nota bene er hlutverk lögreglunnar, og þitt hlutverk er að sjá til þess að nýja gengið fái ekki að ræna og rupla á miklu skelfilegri og siðlausari hátt en það gamla..

Tilbúið dæmi Sigurður, en skýrir margt af því sem ég er að benda á.  

Það þarf ekki að gera upp sakir við gamla þjóðfélagið.  Það að byggja upp nýtt þjóðfélag á forsendum 97% þjóðarinnar (hin þrjú eru þeir ofurríku sem mega alveg missa sig), það leysir sjálfkrafa vandann við það gamla.  

Það verður sko ekki lengur til.

Enginn breytir því liðna, en það er hægt að læra og nota þann lærdóm til að hafa áhrif á framtíð sína, og fyrst og fremst þá framtíð sem við arfleiðum börnum okkar að.

Kveðja að austan.

[Númi (IP-tala skráð) 15.2.2010 kl. 00:05]

Verum dugleg að mæta á Austurvöll á Laugardögum,það fjölgar þar sem betur fer,stóra byltingin virðist vera framundan.Það er með ólíkindum að sjá að það líður ekki sá dagur að ný spillingarmál líta dagsins ljós.

[Sigurður Haraldsson, 15.2.2010 kl. 00:57]

Ég er á leiðinni suður ekki í fyrsta skipti gefst ekki upp og það má enginn sem er ósáttur við ástandið ef við gefum eftir þá sér hver heilvita maður hvað gerist!

[Ómar Geirsson, 15.2.2010 kl. 10:35]

Blessaðir Númi..

Það er engin frétt að ný spillingarmál komi í dagsljósið.  Myrkrið sem huldi þau var aðallega í okkar huga.  Aðeins gjörspillt kerfi, þar sem almenningur notar blinda augað, sættir sig við ofurlaun upp á tugi eða hundruða milljóna á ári eins og ekkert sé eðlilegra.  Og aðeins gjörspillt kerfi lætur auðmenn kaupa upp öll fyrirtæki landsins upp á krít.  Aðeins gjörspillt kerfi lætur einstaklinga selja óveiddan fisk og labba til London með milljarða í seðlaveskinu.

Þetta hefur alltaf blasað við þeim sem eiga ekki þetta blinda auga til að horfa með.  

Það sem við blasir er að það er verið að endurreisa þetta siðspillta kerfi á ennþá grófari og hryllilegri hátt en var, og í leiðinni eru öll ráð, og allar eigur þjóðarinnar teknar af henni.  

Það er stóri glæpurinn, ekki fréttirnar að blinda augað sé hægt að virka.

Þjóðin þarf að taka málin í sínar hendur og losa sig við þetta lið sem þjónar auðmönnum og leppum þeirra.  

Fyrsta skrefið er að skipta út ríkisstjórn, setja gömlu ráðgjafa auðmannanna í kassa og bjóða þá sem lokagreiðslu ICEsave,  og henda Alþjóðagjaldeyrissjóðnum úr landi.

Eftirleikurinn er síðan bara handavinna.   

Kveðja að austan.

[Ómar Geirsson, 15.2.2010 kl. 10:36]

Blessaður Sigurður.

Það þarf ekki mjög marga í viðbót í hóp ódrepandi baráttujaxla, og þá mun björninn falla.

Og það mun gerast.

Kveðja að austan.

[Jón Valur Jensson, 15.2.2010 kl. 12:54]

Nú ætlar ríkisstjórnin að láta Lagastofnun HÍ taka saman 10 bls. bækling til að dreifa fyrir þjóðaratkvæðagreiðsluna til að fólk skilji hvað það sé að gera með því að kjósa! Eins og menn hafi ekki fylgzt með baráttunni og viti ekki, að það hefur fulla ástæðu og margfaldar ástæður til að hafna þessum hábölvuðu ólögum Icesave-stjórnarinnar.

Menn vita það líka allflestir, að þar sem Bretar og Hollendingar samþykkja ekki fyrirvarana (ALLA!) við hin ólögin, frá 28. ágúst, þá hafa þau ekkert gildi og við því lagalega óbundin að borga þeim eitt penny.

Af hverju gera stjórnvöld ráð fyrir því, að fólk sé svo heimskt að það skilji ekki neitt? Eða er tilgangurinn að kasta ryki í augu almennings og rugla hann í ríminu?

[Jón Valur Jensson, 15.2.2010 kl. 12:59]

Þakka þér svo þína baráttu, Ómar, og þín góðu svör til mín um AGS og fleira.

Þú þarft að verða með okkur í 100%-félaginu, þeirra sem hafna algerlega gjaldskyldu okkar Íslendinga (almennings og ríkissjóðs) í Icesave-málinu. Það félag þarf að láta sína rödd heyrast strax í þessari viku – það er ekki vansalaust, að enginn félagsskapur hefur verið til að þessu tagi hingað til, því að eins og allir eiga að vita, gengur InDefence-hópuinn allt of skammt í kröfum sínum rétt eins og velflestir stjórnmálaflokkarnir. Við höfum lögin með okkur, þeir ekki!

[Jón Valur Jensson, 15.2.2010 kl. 13:00]

... AF þessu tagi ..., vitaskud

[Ómar Geirsson, 15.2.2010 kl. 14:15]

Blessaður Jón Valur.

Við skulum bíða og sjá til með Lagastofnun.  Þrátt fyrir allt þá eru það lögfræðingar, einir háskólastétta sem vörðu þjóð sína.  Og ég hef trú á hlutlausa fræðimenn, eða þar til annað kemur í ljós.  Spurningin er kannski sú hvorir hafi meiri áhrif, Stefán eða Eiríkur stjórnarmaður.  Eins gæti Eiríkur stjórnarmaður verið búinn að reikna það út að ICEsave stjórnin sé fallin, og því þurfi hann að skipta um lið í tíma, ef hann vill viðhalda orðspori sínu sem stjórnarmaður.  Þetta er samt það illskásta því Hagfræðistofnun er Leppur sem enginn treystir.

Það er svo með þennan félagsskap, þið 100% menn eruð gott fólk.  Hér fyrir austan var mikið til af 100% mönnum í gamla daga.  Gott að eitthvað lifir af þeim þarna fyrir sunnan.  En austan og sunnan er illa samrýmanlegt, ég er með ykkur í anda, en veit ekki um gagnið þar sem ég er ekki í aðstöðu til að mæta á fundi. 

Hef hugsað mér meira að fara fjalla um byltingu mannsins gegn ógnaröflunum.  Andsvar mitt var dálitið á þeim nótum.  Þýðir ekkert að blogga um það því enginn hefur áhuga á slíku í dag, en ég nota svona innslög meira til að orða hugsanir mínar.   Kallast það ekki að víkka út umræðuna óumbeðinn. 

En hugurinn í dag er samt 100% sammála ykkur, og núna hef ég verið að íhuga nýtt sjónarmið á ICEsave deilunni, sem ég ætlaði reyndar vera búinn að koma frá mér, en hef þurft að sinna öðru.  Þú kommentar kannski á grein mína um "meinta stríðsglæpi" breta þegar hún er tilbúinn.  Vissulega dálítið súrt, en það var sagan um Lísu í Undralandi líka.  En það mátti margt læra af henni.

Eins er það með þau sjónarmið sem mér finnst að megi fá meira vægi í umræðunni, en það er sú einfalda staðreynd að framferði breta brýtur gegn samþykktum Sameinuðu þjóðanna um viðurkennda hegðun ríkja sem eiga í deilum.  Spurningin snýst raunverulega um hvort efnahagsstríð séu líka stríð, hvort megi drepa fólk óbeint með því að ræna samfélög þeirra skatttekjum, þannig að grunnþjónusta samfélagsins skerðist í því mæli að ekki sé hægt að sinna sjúkum og öldruðum á fullnægjandi hátt.  Og ennþá stærri spurning er hvort það megi kúga fullveldi þjóða og láta þær greiða þvílíkar klyfjar ólöglega að þær missi efnahagslegt sjálfstæði sitt.

Við lifum á 21. öldinni en lögin taka mið á úreltum stríðsaðgerðum þeirrar 20.  Öll lög þróast í takt við breytta tíma, og við ættum að flýta þeirri þróun með því að kæra bretana til allar sem hægt er kæra þá fyrir.

Svona hegðun á ekki að líðast.  Ef hún gerir það þá ert þú kominn með sama ástand og var upphaf tveggja megin styrjalda á 20 öldinni.

Sagan er til að læra af.  Og lögin til að nýta þau.

Kveðja að austan.