Hvenær fáum við ICExit?

 

Og losum okkur endanlega úr skrifræðisfjötrum þessa frjálshyggjuskrímslisins sem ESB varð fyrir svo mörgum árum síðan.

Eða eftir að fjórfrelsið og evran lamaði allt atvinnulíf álfunnar.

 

EES samningurinn var bein afglöp, svarti bletturinn á stjórnmálaferli Davíðs Oddssonar, og kuskið á hvítflibbanum sem gleypti jafnaðarmenn.

Hann gaf okkur skrifræði, fjármálamafíu, þjófótta auðmenn.

Og jólasveininn eina, það er fyrir auð og auðmenn, hið frjálsa flæði krónunnar sem hefur kostað samfélagið hundruð milljarða, svo hægt er að telja í þúsundum.

Hefur einhver kortlagt þjófnaðinn, froðukrónurnar sem voru fluttar úr landi í beinhörðum gjaldmiðli, en mega mega skuldir skildar eftir á eignalausum kennitölum??

 

Núna þegar þetta skrifræðisskrímsli gerir endurtekna tilraun til að gefa fjölskyldufyrirtækinu, kennt við ríkisstjórn Íslands, átyllu til að setja Landsvirkjun á markað, svo hægt sé að margfalda raforkuverð til almennings, þá eigum við að segja hingað og ekki lengra.

Og stinga EES samningnum í poka og drekkja honum í næsta vatni eins og sjálfráðir menn gerðu við illa þokkaða embættismenn konungs hér á öldum áður.

 

Hættum að láta telja okkur í trú um að ekki sé hægt að eiga samskipti við þjóðir án þess að vera í skrifræðisfjötrum frjálshyggjunnar.

Munum að hið frjálsa flæði hefur aðeins fært velmegandi þjóðum ógæfu en eflt þrælabúðir þriðja heimsins og ágóðinn runnið í vasa hins alþjóðlega auðmagns sem á hvergi heimilisfesti.

 

Heimurinn er fullur af þjóðum sem stunda frjáls viðskipti sín á milli, því viðskipti eru forsenda tilveru þeirra.

Höft og múrar gera ekkert annað en að skerða þá lífæð.

 

Endurheimtum frelsi okkar.

Krefjumst ICExit.

 

Strax í dag.

Kveðja að austan.

 

 

 

ESA skoðar ríkisábyrgð Landsvirkjunar

Ráðherra deilir við undirmenn.

 

Opinberlega þar sem báðir aðilar bera uppá hinn að fara með rangt mál.

Í raun stórskrýtið því ef ríkistofnun fer með rangt mál, á mannamáli, lýgur uppá ráðherra, þá ætti einhver í þeirri stofnun að þurfa að sæta ábyrgð.

Menn ljúga jú ekki uppá yfirboðara sína opinberlega, og standa svo fast við þær lygar.

 

Sér fólk ekki hvað þetta er absúrd staða, að í stað þess að ráðherra láti setja teppi á skrifstofu sína, til að geta tekið menn á teppið, að þá munnhöggvast hann í fjölmiðlum.

Ber af sér sakir, og ber sakir uppá þá sem bera sakir á hann.

Hann er jú með boðvaldið, hann er yfirmaðurinn.

Hann er sá sem þjóðin fól að gæta fjármuna sinna.

 

Það er ekki þannig að það sé afstæði þegar tölur eru annars vegar.

Þær lúta ekki lögmálum lygavaðalins, hafa ekkert með stjórnmál að gera.

Reikningsdæmi gefur alltaf eina niðurstöðu.

Og þegar forsendurnar liggja fyrir, þá er einfaldlega hægt að leggja á þær mat.

 

Hafi ráðherra ekki talnaglögga menn í vinnu í ráðuneyti sínu, að það hafi óvart verið búið að fylla alla stöður með flokkshestum sem fá ekki breik á hinum frjálsa markaði, að þá hlýtur hann, sem yfirmaður fjármála ríkisins, hafa einhver tök á að ráða óháða endurskoðunarstofu í vinnu við að vega og meta þær forsendur sem hann annars vegar gefur sér, og telur réttar, og hins vegar þær sem hinir ósvífnu undirmenn sem bera uppá hann lygar, nota.

Ráðherra þarf bara að passa sig á að ráða ekki til verksins sitt eigið fyrirtæki, eða eitthvað sem Bjarni frændi á ítök í.  Þau hljóta að finnast.

Og málið er dautt.

Steindautt.

 

Þetta er ekki flókið.

Og þetta gera allir sem hafa rétt fyrir sér, þeir fá hlutlausa til að vega og meta gjörðir sínar.

Þeir fara ekki í blaðaviðtöl til að bera af sér sakir.

 

Eitthvað svo augljóst.

Að það hljóta margir þræðir hafa verið teygðir og togaðir til að blaðamaður Morgunblaðsins spyrji fjármálaráðherra ekki um af hverju hann fari ekki þessa leið.

Af hverju hann umberi undirmönnum sínum þessar sífelldu ásakanir?

Því ekki skulum við ætla að blaðamaðurinn gangi út frá að það sé fjármálaráðherra sem er að ljúga. 

Sjálfur trúnaðarmaður þjóðarinnar.

 

En hver dagur sem líður.

Hvert viðtal sem er tekið.

Með stanslausum orðahnippingum.

 

Sáir efa í huga fólks.

Landsspítalanum í vil.

Kveðja að austan.

Segir staðhæfingar spítalans rangar

Er kerfiskallinum ekki viðbjargandi??

 

Lífsnauðsynlegt lyf fæst ekki vegna þess að það er verið að skipta út fylgiseðli!!

Var sá gamli svo bráðdrepandi að það megi ekki afhenda lyf með honum þar til sá nýi er tilbúinn? 

Eða redda sér á alheimstungunni, það er ekki þannig að allt hafi verið á íslensku hér áður fyrr.

 

Nei skriffinnaískan þekkir ekki mannlegar þjáningar eða mannleg óþægindi,.

Ekki vegna þess að hún er tilfinningalaus.

Hún þekkir bara ekki menn yfir höfuð.

 

Hún þekkir aðeins pappír með óteljandi orðum.

Sem mynda reglur og reglugerðir, formast í eyðublöð og ennþá fleiri eyðublöð.

Til að flækja, til að tefja, til að gera allt yfir höfuð óskiljanlegt.

 

Kerfiskallinn er bara svona.

Spurningin er bara, hvenær tók hann yfir samfélagið.

Hver leyfði honum það?

Var hann einhvern tímann kosinn??

 

Eða er það hann sem er að halda uppá afmæli sitt þessa dagana??

Skyldi þó ekki vera.

Kveðja að austan.

Lífsnauðsynlegt lyf ófáanlegt

Kona heldur ræðuna!!

 

Í heimi á hverfandi hveli, þar sem sótt er að almenningi úr öllum áttum, þá skiptir öllu máli að kona haldi ræðu.

En ekki maður sem hefur eitthvað að segja.

 

Viðkomandi maður getur verið kona, getur verið karl, skiptir ekki máli, aðalatriðið er að eitthvað sé sagt sem eftir er tekið.

Sem þjappar fólki saman, nær því úr skotgröfum tuðsins, og fær það til að mynda afl sem hefur styrk og þor.

Til að berjast, til að bæta.

 

Nei, maðurinn hafði ekki farið í kynleiðréttingu, og kom því ekki til greina.

Hann var karl, ekki kona.

 

Hefur pólitísk rétthugsun náð lægri lægðum??

Kveðja að austan.

Stjórnin fylgdi ekki formanninum

"Al­menn­ing­ur nái sín­um eign­um til baka"

 

Sem er ekki líklegt meðan fólk lætur handbendi auðmanns glepja umræðuna.

Og ef útí það er farið, er það líklegt að vanda þjóðarinnar megi rekja til þess að atvinnurekendur komi að stjórn lífeyrissjóða??

Skýrir það síránið eða að auðklíkan sem Gunnar Smári hefur þjónað svo dyggilega frá Hruni ráði öllu hér á landi?

Og hvað skyldi tryggja betur völd hennar, að fólk sameinist ekki gegn henni, en Ruglandi umræðunnar??

 

En samt á Gunnar Smári mikla þökk fyrir eitt.

Og það er að þetta síðasta flipp hans afhjúpar ansi marga.

Annað hvort sem erkisauði eða það sem verra er, fólk sem hefur selt auðnum sálu sina, eða þráir að komast í þá stöðu.

 

Hvort sem er, þá er gott að vita hverjum það þjónar.

Kveðja að austan.

Almenningur nái sínum eignum til baka

Alvöru maður mælir á mannamáli.

 

Ekki á stofnanísku, ekki á kerfisísku, ekki á skriffinnaísku.

Þess vegna skilja allir orð hans, þess vegna er þöggun beitt svo orð hans fái ekki vængi.

Það er einkahlutafélagið ASÍ í eigu helstu skrifborðsstarfsmanna sambandsins sem gerði slíkt svo klappa á axlir væri tryggt á næsta fundi með höfðingjunum.

 

En ef byssum er ekki beitt, eða dýflissur ekki nýttar, þá þagga vinnumenn auðsins ekki í manninum sem mannamál mælir.

Og á meðan er til frjáls fjölmiðill, þá fá orð hans vængi.

Í þessari frétt Morgunblaðsins má margt lesa, ræðu Ragnars í heild má lesa á netinu  til dæmis í vefritinu Kvennablaðið (linkur í fyrstu athugasemd).

 

Margt af þessu hefur verið sagt áður, til dæmis þegar forysta ASÍ fer í larfana, rifjar upp rótækni æskunnar með því að syngja nallann, og fer með frasa á tyllidögum. 

Og margur gasprarinn mun nýta þessi orð til að kasta umræðunni á dreif í þágu húsbænda sinna.  Meðal annars nýfæddir sósíalistar, gamlir sósíalistar í regnhlífasamtökunum kennd við VG, sjóræningjar og fleiri.

Það er liðið sem sér til þess að ekkert breytist, að völd auðsins verði ekki skert, heldur bætt í þar til alræði hans verður algjört.

 

En þetta fólk er allt falskt, rammfalskt, löngu berstrípað í augum hins venjulega manns.

Sem hefur búið við það ömurlega hlutskipti að hafa aldrei haft valkost gegn auðnum, sem hefur séð á eftir lýðveldinu í vasa Örfárra auðmanna.

Séð vinnumenn þeirra nauðga lýðræðinu aftur og aftur.

 

Þetta fólk skilur mannamál þegar er mælt.

Og það hefur tóneyra til að þekkja fagran söng frá rammfölsku ýlfri.

 

Það er ekki lengur vopnlaust.

Kveðja að austan.

 

 

Berjast vopnlausir gegn leigurisum

Harðnandi átök.

 

Er spádómur formanns BSRB.

Þar sem jafnvel hinir gleggstu hafa ekki numið merki þessara átaka þrátt fyrir sírán hinna Örfáu, þá hlýtur að vakna sú spurning hvort formaður BSRB sé að vísa í þróun öreindatækja, að þar sé að vænta mælitækja sem geta numið eitthvað þar sem ekkert er að nema.

Því það vita allir að núverandi verklýðsforysta ógnar ekki auðræðinu, í besta falli er hún samdauna, í versta falli meðreiðarsveinn.

 

Nema, nema að formaður BSRB nemi veðrabrigði, að kjör alvöru manns í formannsstól VR sé forboði umbyltingar í verkalýðshreyfingunni, og síðan þjóðfélaginu öllu.

Að hún sé spámaður þeirra byltingar fólksins sem í vændum er.

 

Því líf leitar alltaf leiða til að lifa af.

Því maðurinn er í eðli sínu frjálsborinn og leitast alltaf við að losna við hlekki kúgunar og arðráns hinna Örfáu.

 

Það skyldi þó ekki vera.

Kveðja að austan.

Misskipting leiðir til harðnandi átaka

"Almannahagsmunir fram yfir sérhagsmuni".

 

Segir fjármálaráðherra þegar hann réttlætir kommúnískar skattahækkanir Engeyingastjórnarinnar.

Eins og það séu almannahagsmunir að slátra mjólkurkú þjóðarinnar.

Það má reyndar vel vera að kýrin sé ofalin og mætti við megrun, en náðarskot er hvergi talið til megrunarmeðala.

Það er endanleg, finító.

 

Nú skal spurt, hvað hefðu allir sjálfstæðispennar landsins sagt ef Steingrímur Joð Sigfússon hefði staðið fyrir þessari aðför að ferðaþjónustu landsins??

Hefðu þeir til dæmis básúnað út ágæta grein Óla Björns Kárasonar sem sýndi kurteislega fram á að þessi boðaða hækkun virðisaukaskatt væri heimskuleg, og myndi örugglega leiða til tekjutaps ríkissjóðs þegar heildarmyndin væri skoðuð?

Og hefðu þeir í kjölfarið fordæmt heimskuna, og þá skattaóðu sem að baki stæðu??

Eða hefðu þeir þagað eins og þeir gera í dag, blessaðir.

 

Um það er ekki gott að segja.

Kannski eru hinir flokkshollu allra flokka skattasinnar þegar á reynir, varla skyldi maður ætla að afstaða þeirra sé háð hvort þeirra menn sitji að kjötkötlum valdsins, eða sitji í gaspurstólum stjórnarandstöðunnar.

Allavega er skrýtið að aldrei skuli geta náðst sátt um sanngjarna og hóflega skatta hér á landi.  Og að slíkt skuli aðeins vera mært úr gaspursstólum.

 

Og gleymum ekki að þó þessi skattavitleysa verði dregin til baka, að þá er margur skaðinn skeður.

"Neikvæðni eykst, ímynd og orðspor versnar", svo vitnað sé í hina skeleggu konu sem afklæddi Benna frænda í beinni útsendingu, svo hann var ekki einu sinni í ímynduðu fötum eins og keisarinn forðum.

Eitthvað sem þjóðin má ekki við þegar útflutningsatvinnuvegir hennar þjást vegna ofurhækkunar krónunnar.

 

Ofurhækkunar sem á sér aðeins eina raunskýringu, froðukrónurnar skulu út á ofurgengi, allt í þágu innlendra sem erlendra hrægamma.

Og ruglandi umræðunnar á að sjá til þess að fólk sjái ekki ránið fyrir opnum tjöldum.

Hinar kommúnísku skattahækkanir er ein hlið þessa ruglanda, fyrirhuguð stofnun kommúnistaflokksins 1. mai er önnur.

Handbendi auðsins rugla umræðuna útí eitt, og sjá til þess að þjóðin snúist ekki til varnar gegn glæpaklíkunni sem rænir öllu hér og ruplar.

Vaxtaokur verðtryggingarinnar er ekki bara af því bara, Gjöfin eina til hrægammanna var ekki gefin af því bara, og ofurkrónan varð ekki til úr engu.

 

Allt á sér skýringar.

Líka tómir vasar almennings og almannasjóða.

Og ofsagróði og ofureignir hinna Örfáu urðu ekki til úr engu.

 

Það er tími til kominn að tengja.

Kveðja að austan.

„Þetta getur haft alvarlegar afleiðingar“

Líkur sækir líkan.

 

Og það er eftir þeim að spjalla saman í vinsemd, hvorugur hefur siðferði til að skilja bresti hins.

Annar siðblindur morðingi, hinn svag fyrir endalokum mannkyns.

Báðir eiga vísa vist í frægðarhöll lýðskrumsins eftir að ferli þeirra lýkur.

 

Og það að hinn vestræni heimur skuli ekki titra að réttmætri hneykslun yfir hinni nýtilkominni vinsemd skrumaranna sýnir í hnotskurn tvöfeldni okkar og hræsni.

Fjármögnun okkar á innrás erlendra vígamanna í Sýrlandi sem og réttlæting okkar á innrás Nató í Líbýu til að steypa lögmætri ríkisstjórn landsins, var réttlætt með tilvísun í meinta ógnarstjórn sem átti að vera í viðkomandi löndum.

Ógnaröldin á Filippseyjum tekur öllu fram sem heimurinn hefur séð undanfarna áratugina, meira að segja einræðisklíkan í Norður Kóreru viðhefur sýndarréttarhöld áður en hún aflífar fólk.

Eins voru þau svívirðilegu mannréttindabrot að neita fátæku fólki um lágmarksmannréttindi ekki til staðar í Líbýu eða Sýrlandi.

Samt þegjum við, látum hryllinginn viðgangast, hvort sem það er á Filippseyjum eða þjáningar saklausra í Sýrlandi.

 

Það er mikilvægara að efna til nýs ófriðar á Kóreuskaganum.

Koma öllu þar í bál og brand.

Láta milljónir líða svo einhver auðmaður einhver staðar geti orðið ríkari en hann er í dag.

Því á bak við harm heimsins er ætíð fjárhagslegir hagsmunir hins skítuga fjármagns.

 

Það er mein heimsins í dag.

Þó minna mein en hræsni okkar og siðferðisbrestur.

 

Vinsemd þeirra Trump og Duarte er aðeins birtingarmynd þess.

Kveðja að austan.

 

 

Trump býður Duterte í heimsókn

Gjaldþrota sósíalisti.

 

Með mikla reynslu, það er að vera gjaldþrota með sinn fjölmiðlarekstur.

En litla reynslu í að vera sósíalisti.

Enda vandséð hvernig handbendi auðmanns geti verið slíkur.

Nema jú að auðmaðurinn sé jú sósíalisti.

 

Sem reyndar er ekki í þessu tilviki.

 

Eftir stendur sú staðreynd að nú á handbendið að gegna nýju hlutverki.

Að sjá til þess að ekkert ógni Engeyingum, það er hinum vanheilaga bandalagi hluta hinnar gömlu borgarstéttar við hrægammanna sem sáu hér grösugar beitilendur eftir Hrun.

30% stjórnin stendur jú tæpt, og má ekki við miklum óróa út í þjóðfélaginu.

Þess vegna er fjárfest í ruglinu, handbendið á að halda því á floti á meðan síðustu aurarnir eru kreistir út úr þjóðinni.

 

Klikkið var að láta handbendið vera gjaldþrota daginn áður en hin markaðssetta Barbabrella þess sprakk út.

Bendir til áhugaleysis auðmannsins, eða er vísbending um slæmt árferði í viðskiptum hans.

 

Hvort sem er þá er það ekki trúverðugt að illa fengnir fjármunir hafi horfið í vonlausa útgáfuhít. 

Því hvað sem sagt eru handbendið, þá er vitskortur ekki orð sem dúkkar oft upp í þeirri lýsingu, eiginlega dúkkar það aldrei upp.

 

Spurningin er hinsvegar, hvar liggja hagsmunir hinna nýju eiganda Morgunblaðsins.

Hvar eru þeirra leyndarþræðir ofnir?

Mun Davíð enda á ÍNN?

 

Allavega þarf mikið til að púðri sé eytt í slíka sjálfsréttlætingu eins og má lesa í þessu eintali sem fært er í búning fréttar.

Og skýringanna er ekki að leita í nýtilkominn kommúnistaáhuga ritstjórnar Morgunblaðsins.

Fnykurinn af ýldu væri þá ekki að leita um alnetið, eins og að klár forritari hafi náð að kóða hinn sænska þjóðarrétt sem kennt er við úldna síld.

 

Það eina sem er ljóst að milljarðar eru í húfi.

Og þeir eru á kostnað þjóðarinnar.

 

Það er ennþá eitthvað til að ræna.

Kveðja að austan.

Fór með spariféð í að greiða laun