Hvaða máli skiptir það???

30.12.2009 | 08:39

Íslenska þjóðin á ekki að borga ICEsave.

Þau kjör sem glæpamenn setja á fjárkúgun sína skipta ekki máli.

Í dag halda samstarfsmenn þeirra þjóðinni í gíslingu og skrifa upp á skuldabréf breta.

En á morgun verða þessir samstarfsmenn hraktir frá völdum og þá mun þjóðin rifta þessum gjörningum eins og henni er fullkomlega heimilt samkvæmt öllum alþjóðalögum.

Vegna þess að alþjóðlög afneita kúgun og ofbeldi sem samskiptaformi á milli þjóða. Sá tími er liðinn.

Vissulega mun riftun kosta átök við breska heimsveldið en hvaða heimsveldi er það???

Bretar eru í dag ekki annað en þjóð smámenna með ljótt nef sem upphefja sjálfa sig með því að níðast á minnstu nágrannþjóð sinni, þegar hún lá vel við höggi.

Og máttur þeirra er ekki meiri en sá að til þess að þetta níðingshögg heppnaðist, þá þurfti öflugt samstarf við innlendan stjórnmálaflokk sem taldi sínum pólitískum draumamálum best borgið ef þetta níðhögg heppnaðist.

Sumt fólk er þannig gert að það vill frekar ríkja yfir þrælum og fá þá drauma sína uppfyllta, en að deila völdum með öðrum í frjálsu lýðræðisríki.

En hefði þjóðin losað sig við sína landlægur minniháttarkennd, og ekki sjálfkrafa tekið undir þær ávirðingar að hún væri sek um allt sem á hana væri borið, jafnvel morðið á Kennedy líka, þá hefði þetta landsölufólk verið sent með næsta gám til Bretlands, merkt sem þorskar.

Og þjóðin hefði varist þessari atlögum smámennanna með ljóta nefið.

En þjóðin mun taka sig á og hrista af sér sektardrungann.

Og þá mun hún ekki ræða um vexti og vaxtavexti við breta, hún mun ekki ræða við þá nema sem sakborninga í réttarhöldum hins alþjóðlega dómskerfis, því það gilda lög í Evrópu sem þarf að virða.

Til dæmis lögin um innstæðutryggingar sem taka það skýrt fram að einstök aðildarríki séu ekki í ábyrgð fyrir innstæðutryggingakerfi sitt.

En það er eðlilegt að Morgunblaðið sé ekki ennþá búið að fatta slíkar staðreyndir. Það eru ekki nema örfáir mánuðir síðan að áróðursdeild breta á Íslandi stjórnaði blaðinu, og ennþá eimir af húsbóndahollustu við hina gömlu herra.

En Morgunblaðið var stofnað á sínum tíma til að standa vörð um sjálfstæði landsins. Og á örlagatímum þá á sagan til að lifna við og grípa inn i gang mála þegar holtaþoka kjarkleysis og lítilmennsku ræður ríkjum.

Og það mun gerast á Morgunblaðinu. Kannski í dag, kannski á morgun.

"Gjör rétt, þol ei órétt".

Íslenska þjóðin mun ekki borga ICEsave, sú skuld er ekki hennar

Og það mun standa á forsíðu Morgunblaðsins.

Kveðja að austan.