Víglundur vaknar upp við vondann draum.

Víglundur Þorsteinsson skrifar athyglisverða grein í Morgunblaðið í dag.  Og það er full ástæða til að vekja athygli á henni, því þar er bent á afleiðingar ICEsave ríkisábyrgðarinnar auk annarrar lántöku ríkissjóðs í erlendum gjaldeyri.

Gjaldeyrinn þarf nefnilega að borga til baka, og það er ekki gert nema með því að halda lífskjörum fólks niðri.  Allt að 40% kaupmáttarrýrnun spáir Víglundur. 

En við þessu var varað þegar Alþjóðagjaldeyrissjóðurinn var fenginn til að leiða Helreið þjóðarinnar í þágu auðmann og fjárbraskara.  En á þær raddir var ekki hlustað, og vó þar þyngst stuðningur aðila atvinnulífsins, bæði atvinnurekanda og verkalýðshreyfingarinnar við aðkomu sjóðsins.

Það er eins og menn séu að vakna upp við vondan draum.  En við hverju bjuggust menn????? 

Heilbrigðri skynsemi og raunhæfri aðstoð við að endurreisa efnahagslíf landsins???  Síðan hvenær hefur slíkt verið kennt við Alþjóðagjaldeyrissjóðsins.

Og það má einnig hafa í huga að þegar skynsamir þingmenn VinstriGrænna beittu sér fyrir samstöðu á Alþingi til að lágmarka skaða ICEsave samnings Svavars við breta og Hollendinga, þá voru það menn eins og Víglundur Þorsteinsson sem beittu sér fyrir múgæsingu meðal atvinnurekanda og aumra verkalýðsleiðtoga til að hindra það starf. 

Og þeirra helstu rök voru að gengið myndi styrkjast ef Ísland tæki á sig þessa ábyrgð.  Sem sagt auknar erlendar lántökur áttu að styrkja gengið.  Og á sama tíma átti að kenna í eðlisfræði að vatn rynni upp á móti og jörðin væri flöt. 

Og núna er Víglundur svo ómerkilegur að kannast ekki við sína eigin ábyrgð, heldur kennir alfarið stjórnvöldum um það sem gera þarf til að hægt sé að standa í skilum með öll þessi erlend lán.  Það er sem sagt byssan sem drepur, ekki maðurinn sem gaf upp miðið.

En batnandi manni er best að lifa, og það sem Víglundur segir í grein sinni á vissulega erindi til allra.  Því það erum við, ég og þú lesandi góður sem eru fólkið sem þarf að greiða ICEsave með alltaf 40% kaupmáttarskerðingu auk mikils niðurskurðar á heilbrigðis og menntakerfinu.  Því læt ég greinina fljóta hér með og skora á alla að íhuga efni hennar. 

Það er aðeins eftir dauðann sem er of seint að iðrast.  Látum ekki heimsku mannanna drepa okkar litla þjóðfélag.

Kveðja að austan.

 

Á nú að láta kné fylgja kviði? 

 

Í FREGNUM í dag má lesa að Seðlabankinn er að yfirbjóða gjaldeyrinn með því að bjóða vildarkjör á bundnum gjaldeyrisreikningum í bankanum til að hindra innstreymi gjaldeyris til krónustyrkingar.

Á sama tíma lesum við fregnir af baráttu bankans við undanskot og brot á reglum um gjaldeyrishöftin til að koma í veg fyrir að undanskotin veiki krónuna.

Hvert stefnir seðlabanki í gjaldeyrismálum þegar hann rær áfram á annað borðið og andæfir á hitt?

Allir sem einhverja róðrarreynslu hafa vita að slíkt leiðir bara til þess að skektan snýst í hringi.

Það skyldi þó ekki vera að nú skuli láta kné fylgja kviði og treysta enn frekar kreppufangelsi þjóðarinnar til viðbótar boðuðum skattahækkunum með því að skerða kaupmáttinn enn frekar við lággengi og verðbólgu?

 

Er þetta leiðin sem ríkisstjórn og seðlabanki hafa valið til að raungera excel-skjal bankans og IMF um afgang á vöruskiptum næstu árin?

Icesave, skattahækkanir og áframhaldandi verðbólga við lággengi þýðir kaupmáttarsamdrátt á árunum 2009 og 2010 í kringum 40%. Fyrr má rota en dauðrota.

 

Er það svona sem treysta skal kreppufangelsi þjóðarinnar?

Eru Jóhanna og Steingrímur og seðlabanki Más búin að leggja frá sér allar tilraunir til endurreisnar með uppbyggingu og hagvexti?

Eru þau öll búin að gefast upp?