Siðblinda

Siðblinda á sér margar birtingarmyndir.

Einna frægust er gagnrýnislaus fylgispekt Þjóðverja við kenningar þriðja ríkisins um hið svokallaða "lífsrými" handa hinni göfugu þýsku þjóð.  Þegar sigursælar þýskar hersveitir fóru eins og stormsveipur um nágrannaríki Þjóðverja til að gera íbúa þeirra að þjónum eða þrælum hinnar þýsku þjóðar, þá fagnaði almenningur Þýskalands.  Honum virtist vera það ókleyft að setja sig inn í þær þjáningar og hörmungar sem meðbræður þeirra urðu vegna siðleysis nasismans.

Þýska þjóðin var siðblind hvað þetta varðar.

Það myndi enginn deila um að það væri siðblinda hjá íslenskri þjóð ef hún myndi sætta sig aftur við svipað mannfall meðal sjómanna og var fyrir 50 árum eða svo.  Þá þótti það ekki tiltökumál að fara ófærar rastir á lekum spýtubátum og koma hraktir í höfn, eða þá koma alls ekki í höfn.  Það var þá en ef nokkur legði það til að öryggismál og aðbúnaður sjómanna yrði sá sami og þá var, þá yrði hann talinn siðleysingi og þeir sem sæju ekkert athugavert við gjörðir hans, siðblindir.

Eins er það með hinn mikla árangur sem náðst hefur í heilbrigðismálum þjóðarinnar.  Í dag er þjóðin í fremstu röð í eftirliti og bráðaþjónustu og mjög margir eiga líf sitt því að þakka.  Líf sem hefðu glatast eða ekki orðið til ef ástandið væri eins og það var fyrir 50 árum síðan.  Kreppan ógnar þessum lífum.  Nái Alþjóðagjaldeyrissjóðurinn að rústa hinni íslensku velferð, þá munu margir deyja, sem ella hefði lifað.  Blóðfórnir eru alltaf fylgifiskur einkavæðingarbrjálæði hans. 

Eina ráð þjóðarinnar að lenda ekki í þessum klóm siðblindunnar er að stöðva allar frekari lántökur, og semja um þau lán sem hún getur ekki staðið skil á.  Að missa efnahagslegt sjálfstæði þjóðarinnar í skuldaklær Alþjóðagjaldeyrissjóðsins er ávísun á ótímabæran dauða hundruð Íslendinga.  Og það er siðblinda að láta það gerast.

Önnur birtingarmynd þessarar siðblindu er fylgispekt núverandi ráðamanna við ICEsave Nauðungina.  Þegar tugir milljarðar verða árlega teknir úr velferðinni, árlega í mörg, mörg ár, þá mun það kosta blóðfórnir, blóðfórnir Breiðubaka þjóðarinnar.  Aldraðir, sjúkir, öryrkjar og barnafólk og fátækir munu upplifa þjónustuskerðingu sem er ávísun á hörmungar og sára fátækt.  Burtséð frá því að landið muni glata sjálfstæði sínu, þá mun verri heilbrigðisþjónusta leiða til þess að fólk, sem annar hefði lifað, deyr.  Svoleiðis verður það bara, á bak við hina góðu tölfræði dagsins í dag er peningar og þjónusta, sem núverandi ráðamenn vilja fórna fyrir undanlátssemi við illviljaðar nágrannaþjóðir.  

En þeir sem telja sig ekki munu bera byrðarnar, þeir mæla nauðunginni bót.  Og það er siðblinda.

Tveir hagfræðingar sögðu í grein í Morgunblaðinu að töluvert væri á sig leggjandi fyrir þjóðina ef hún hefði skriffinna ESB góða.  En þeir minntust ekki á hvað þetta "töluverða" væri.  Hvað mikil aukning á ungbarnadauða er ásættanleg, eða bráðatilvika heilahimnubólgu í ungum börnum sem er ekki greind vegna skorts á neyðarþjónustu?  Eða fólk á besta aldri sem greinist of seint með krabbamein, eða öryrkja og sjúkir sem þjást vegna þess að ekki er hægt að veita þeim nauðsynlega endurhæfingu???

Hver er ásættanlegur fórnarkostnaður þess að virða ekki lög og reglur EES og láta að ólöglegum fjárkröfum breta og Hollendinga????  Við megum aldrei gleyma því að þær eftirlitsstofnanir EES sem eiga að fylgjast með framkvæmd tilskipana ESB, að þær hafa aldrei gert athugasemdir við íslensku lögin eða framkvæmd þeirra.  Fyrir því er aðeins ein ástæða og hún er sú að í tilskipun ESB um innlánstryggingar stendur það skýrum stöfum, öllum þeim sem eru læsir á annað borð, að aðildarríki eru ekki í ábyrgð.  Þess vegna hefur engin lögbær stofnun gert athugasemdir við íslenska tryggingasjóðinn.

Þess vegna er ekki hægt að segja annað málflutning hagfræðinganna tveggja að hann er siðblinda á háu stigi.  Hafi þeir hinn minnsta áhuga á "siðferðislegum" forsendum að greiða þessar skuldir, þá hefði fylgt grein þeirra yfirlýsing um eignartilfærsla þeirra  til hins íslenska tryggingasjóðs til að hjálpa honum að greiða út innlánstryggingar sínar.   En þeir sem vilja láta aðra greiða sitt siðferði eru ekki merkilegir pappírar og ég vona það þessir mætu menn biðji þjóð sína afsökunar á blekkingarskrifum sínum.  Annars eru þeir siðblindir.

Sama siðblinda hrjáir ráðherra viðskipta þegar hann segir að það sé ekki mikið mál fyrir íslensku þjóðina að greiða alltaf 3,5% af heildartekjum sínum í ICEsave Nauðungina.  Þessi sami maður mætti í sjónvarpssal og sagði þjóð sinni að hún væri svo blönk að hún gæti aðeins hjálpað ungu barnafólki í fjárhagsvandræðum þess, fjárhagsvandræðum sem stjórnvöld bera megin ábyrgð á, um 2 milljarða króna í vaxtabætur, meira væri ekki hægt að gera.  Það væru ekki til peningar.

En til að greiða ICEsave nauðungina finnst þessum sama manni allt í lagi að greiða tugi milljarða árlega, svo hann geti komist í klúbb rauðvínsdrykkjumanna Brussel.  Þegar maður ber saman annars vegar líf og hag þúsunda íslenskra húseiganda og hins vegar ólöglega Nauðung ESB í ICesavedeilunni, þá er ljóst að allir með lágmarks siðferðisþroska eiga ekkert val í þessu dæmi.  

Ef við getum ekki hjálpað okkar eigin þjóð, þá hjálpum við ekki skriffinnunum.  Þeir verða bera ábyrgð á sínu gallaða regluverki, ekki íslenska þjóðin sem var neydd til að setja þau lög sem hún setti um tryggingasjóð innlána, á þann hátt sem regluverkið kvað á um, annars hlaut hún kárínur og háar sektir fyrir.  Henni ber ekki skylda til að greiða fyrir mistök Brussel. Brussel sjálft verður að æxla sína ábyrgð.

En ef maður er siðblindur þá heldur maður með Brussel, en illa siðblindur þarf maður að vera til þess.

Og svo má ekki gleyma mjög vitgrönnum fjölmiðlamönnum.  Þeir eru ekki siðblindir.  Til þess þarf lágmarks vit.

Kveðja að austan.

Athugasemdir

[ElleE (IP-tala skráð) 18.11.2009 kl. 22:37]

Ómar, voru hagfræði-siðblingingarnir 2 sem þú skrifar um ekki Þorvaldur Gylfason og Þórólfur Matthíasson?   Skömm þeirra er allavega óendanleg. 

[ElleE (IP-tala skráð) 18.11.2009 kl. 22:38]

Átti nú að vera siðblindingarnir 2. 

[ElleE (IP-tala skráð) 18.11.2009 kl. 22:40]

Get ekki skrifað þetta orð    : Siðblindingjarnir.

[Ómar Geirsson, 18.11.2009 kl. 23:08]

Blessuð Elle.

Þessi pistill minn er gamall, ásamt nokkrum öðrum sem ég birti í gær.  Vildi nota tækifærið til að koma því að, að ICEsave er ekki bara spurning um aura og lög, þessi "dýpri" rök skipta ekki síður máli.  

Og fyrst ég var búinn að vinna upp lestur, þá var allt í lagi að kynna efni þeirra aftur, þetta eru svona "alvöru" pistlar mínir, ekki þessir beinu stríðspistlar, sem ég er frekar þekktur fyrir.

Og svo ég svari spurningu þinni, þá voru þetta þeir mætu menn, Jónas Haralz og Gylfi Zoega, sem skrifuðu grein í Morgunblaðið þar sem þeir töldu endurreisnina byggjast á ICEsave sátt við breta.  Og ég kaus að svara þeim á þennan hátt, en reiðin í pistlinum beinist gegn "heimspekingnum" á Akureyri sem hafði skrifað grein í Morgunblaðið um hve við værum sek sem þjóð.

Þá vissi ég ekki hvað blessuðum manninum gekk til, núna veit ég að hann var að vinna fyrir salti í grautinn og þjóðin galt þess, því svona vinkil vildi verkkaupinn, sem þú mátt alveg geta þér til hver er.

En ég er ánægður með þessa grein.  Finnst hún vera góð, og mun betri en margt annað sem ég les á Netinu um ICEsave.  Eins gott að ég hrósi henni núna, því í bæði skiptin sem ég birti hana, þá gerði enginn annar það.

En takk fyrir innlitið Elle.

Kveðja, Ómar.