Það er ekki sama hvort Jón auðmaður eða Jón almenni eigi í hlut.

Jón auðmaður bað vin sinn á Bessastöðum að stoppa atlöguna að fjölmiðlaveldi hans.  Og við þeirri beiðni varð Ólafur enda hreinn dónaskapur að þiggja far með mönnum og neita þeim síðan um smá viðvik í staðinn.

Jón almenni bað forsetann um tækifæri til að segja álit sitt á þeim skuldaklyfjum auðmanna sem ríkisstjórn félagshyggjunnar hyggst leggja á bak hans.  En Jón almenni á enga hönk upp í erminni hans Ólafs og því er ekki hægt að bera þessi tvö ólíku mál saman.  

Ótrúlegt raunar að Ólafur skuli yfir höfðuð hafa reynt að útskýra hið augljósa.  Enda er það svo að þegar reynt er að útskýra hið augljósa, þá vill rökstuðningurinn oft flækjast fyrir mönnum.  Ólafur hefði til dæmis betur ekki borið það upp á Jón almenna að hann væri í einhverjum flokkspólitískum skotgröfum.  Fáránlegt því það er bakverkurinn vegna skuldaklyfjanna sem þjáir almenna Jón og fólk með bakverk bregst oft illa við þegar því er núið um nasir annarlegar hvatir fyrir kvörtunum sínum.  Þetta vita allir sem á annað borð hafa fengið alvöru bakverk. 

Því uppsker Ólafur aðeins háð og spott sem hann hefði örugglega losnað við ef hann hefði snapað far með einkaþotu Björgúlfs og haldið á vit glamúrins og látið handhafa forsetavaldsins um að skrifa upp á drápsklyfjarnar.  Fólk er hvort sem er vant því að hann sé aldrei heima hjá sér.

En sumum mönnum er ekki gefin mikil stjórnviska.

Kveðja að austan.

 

 

 

 

Yfirlýsingin hefur ekkert lagalegt gildi

Athugasemdir

[Elvar (IP-tala skráð) 3.9.2009 kl. 10:51]

Snilldar færsla, Ómar.

[Ómar Geirsson, 3.9.2009 kl. 12:17]

Takk Elvar.

Kveðja að austan.