Sorglegur dagur fyrir Morgunblaðið.

Það er sorglegt að blað sem taldi sig vera alvöru fréttamiðill, geti ekki sagt satt og rétt frá ICEsave málinu, nema þegar ellilífeyrisþegi tjáir sig.

Virtir lagaprófessorar, þau Stefán Már Stefánsson (í félagi við Lárus Blöndal, hæstaréttarlögmann), Björg Thorarensen og Herdís Þorgeirsdóttir, hafa öll tjáð sig um ICEsave deiluna og bent þjóðinni á að fjárkröfur breta og Hollendinga byggja ekki á lögum og reglum sambandsins, enda sé um kúgun að ræða eins og Björg benti á.

En þetta fólk er í fullri vinnu sem fræðimenn og kennarar.  Kannski þess vegna hafa blaðamenn Morgunblaðsins veigrað  sér við að banka upp hjá þeim og fá hjá þeim frekari rök.  En samt, þetta mál varðar líka blaðamenn Morgunblaðsins, þeir tilheyra jú þjóð okkar líka.  

Eða var þeim bannað að taka viðtöl við þessa einstaklinga, eða þá vinna að vandaðri fréttaskýringu um lagaóvissur ICEsave deilunnar.  Aðeins viðkomandi blaðamenn og ritstjóri þeirra vita svarið en aumt er blað sem þagar yfir lykilupplýsingum í stærsta hagsmunamáli íslensks almennings frá stríðslokum.  Og enn aumari er ritstjóri sem vísvitandi fullyrðir í ritstjóragrein að íslenskur almenningur þurfi að sætta sig við þrengingar og þjáningar því samkvæmt EES samningnum hafi íslensk stjórnvöld skuldbundið þjóðina til að ábyrgjast skuldir Björgólfs og Björgólfs.  Þetta er sorgleg fullyrðing því ritstjórinn vissi betur.

En þegar ellilífeyrisþegi tjáir sig, þá titrar Mogginn.  Og fer að segja satt.

Ellilífeyrisþegar eru bara ágætir eftir allt samann.

Kveðja að austan.

Engin ríkisábyrgð á Icesave

Athugasemdir

[Sigurður Sigurðsson, 13.7.2009 kl. 23:43]

Er það ekki bara ESB ástríða ritstjórarns og fyrri eigenda (útrásarfuglanna) sem hefur þetta í för með sér.   Reyndar sýnist mér stefna blaðsins vera að breytast og ekki kæmi mér á óvart þótt stórbreytingar yrðu á ritstjórnarstefnunni innan tíðar !!! 

[Hrafna (IP-tala skráð) 14.7.2009 kl. 00:29]

Ég veðja á að blaðið verði komið aftur í fyrra horf innan skamms.  Amk virðist það vera að hreyfast eitthvað í áttina þangað.

En ritstjórinn er ansi ESB litaður og hikar ekki við að nota blaðið í áróðri sínum.

[Ómar Geirsson, 14.7.2009 kl. 00:30]

Blessaður SISI.

Ekki veit ég hvað veldur en fréttamat blaðsins hefur verið stórfurðulegt í ICEsave málinu frá upphafi.  En það er rétt að breyting virðist vera á stefnu blaðsins.  Það er hætt að vera einhliða páfagaukur ríkisstjórnarinnar.  

En á meðan alvöru umræða um lögmæti ICEsave á sér ekki stað í fréttaskýringum blaðsins, þá er kaliber blaðsins á svipuð plani og Fréttablaðsins, og þá er bleik brugðið.

Kveðja að austan.

[Ómar Geirsson, 14.7.2009 kl. 00:35]

Blessuð Hrafna.

Það vantaði ekki að Styrmir kunni að breiða út boðskap sinn, en hann vissi betur en það að nota fréttir blaðsins til þess.  Það er til lítils að vera með áróður í blaði, sem enginn les.  Og á sinn hátt hafði Morgunblaðið trúverðugleika undir stjórn Styrmis.  

Ég hélt að Ólafur hefði líka vit til að greina þar á milli.   En það er kannski ofmat hjá mér.

Kveðja að austan.

[Hrafna (IP-tala skráð) 14.7.2009 kl. 00:42]

Já, ég er sammála þér þar.  Fréttamat blaðsins hefur verið stórskrítið og þá sérstaklega umræður og fréttir af Icesave málinu. 

En ég leyfi mér að vona að blaðið fari brátt að horfa til fyrri tíma sérstaklega eftir að hafa lesið pistil Óskars Magnússonar eins eiganda blaðsins fyrir ekki svo löngu síðan.  Það virtist amk benda til þess að honum þætti blaðið vera notað óhóflega mikið til að koma skoðunum ritsjórans til skila og einnig ákveðnum fréttamönnum sem hvergi dylja hlutdrægni sína í fréttaumfjöllunum.

[Ómar Geirsson, 14.7.2009 kl. 00:56]

Blessuð aftur Hrafna.

Ég hef reyndar séð margt jákvætt við Ólaf en eftir að hann tók við þá hefur blaðið misst þunga sinn í umræðunni, kannski er það vel því ég er mjög ósáttur við ICEsave.  En blaðið á að vera alvöru blað og verður að vera alvörublað.  Skoðanir fólks innan ritstjórnar Morgunblaðsins eiga ekki að skipta máli þegar kemur að grundvallarumfjöllun um jafn mikilvægt mál og ICEsave er.

En hinsvegar fyrst flestir eru farnir að sofa þá ætla ég að lauma því út úr mér fyrir svefninn að ég sakna Styrmis.  Rökfesta hans og skýrleiki í framsetningu er eitthvað sem vantar í þjóðmálaumræðuna í dag.  Samanber þessa frétt í orð Davíðs.  Þetta hefði verið frétt í október í fyrra en ekki núna.  Okkar virtustu fræðimenn hafa tjáð sig um ICEsave skuldbindingarnar og þeir eru einróma í afstöðu sinni.  Engin lög skuldbinda þjóðina til að greiða þessar ábyrgðir. 

Og Styrmir hefði haldið því til haga.   Hefði hann verið ósammála þeim eða talið það pólitískt rétt að semja við bretana, þá hefði hann týnt til rök í því máli án þess að nota bull eða blekkingar til að létta sér róðurinn.  Og það kallast að skiptast á skoðunum, ekki skiptast á bulli eins og stærsti hluti fjölmiðlafólks á Íslandi hefur gert í þessu mikilvæga máli.

En ég vona að ég verði ekki hengdur fyrir þessa skoðun mína.  Ég er víst í Andstöðunni.

Kveðja að austan.