Er hægt að bjóða fólki upp á þennan þætting sí og æ.

Ábyrgðarmenn hrunsins á Íslandi fengu til sín Kreppuprófessor frá Barcelóna til að halda yfir sér hughreystingartölu.  Í Kastljósi kvöldsins fékk sá maður að tjá sig á besta tíma og síðan sá Bláskjár ástæðu til að slá upp orðum hans sem stórfrétt.  Engin ástæða til að refsa frjálshyggjunni því kreppan á Íslandi er ekki svo slæm, bara svona pinku pons vond eins og börnin segja. 

Hvort á maður að hlæja eða gráta yfir þessi liði.  Ég veit það ekki.  En kíkjum á helstu blekkingarnar.

Það versta við þetta viðtal var það að það kom margt gott fram í því.  T.d sú leið sem nokkrir gamlir menn hafa mælt með að hækka skatta stórlega mun leiða til landauðnar.  Og þekking prófessorsins á fyrri kreppum er ekki dregin í efa.  Þetta er allt gott og blessað en þessar nokkuð óumdeildar staðreyndir og þekking voru  notaðar til að blekkja og afvegleiða.  Ástandið er ekki svo slæmt á Íslandi, kannski betra en í meðalkreppum og meðalkreppan er svona samdráttur uppá 6-9% af landsframleiðslu, í svona 2,5-2,7 ár.  Kannski aðeins verra vegna heimskreppunnar en hún lagast á næsta ári eða þannig.

Þegar hlutirnir eru settir svona upp þá myndast ekki sú samstaða sem þarf að myndast hjá þjóðinni til að kreppan sé tekin alvarlega og tekin réttum tökum.  Þegar eitt þjóðfélag er það skuldugt að 60-70% fyrirtækja hennar er gjaldþrota, bankakerfið hrunið og erlendar skuldir hennar fara hríðhækkandi en á sama tíma útflutningstekjur hennar hríðlækkandi, þá er ekki verið að ræða um neina meðalkreppu.   Síðan bætist það við að allt að 40% heimila landsins er með neikvæða eiginfjárstöðu og stór hluti þessa fólks á í vandræðum með að standa við skuldbindingar sínar.

Það er það ljóta við þessa blekkingu.  Það er borið saman epli og appelsína, kreppa sem er viðráðanleg og kreppa sem er kolsvört.  Og þjóðinni mun ekki takast að ráða við sína kreppu án þess að hér fari allt í kaldakol nema hún horfist í augun á vandanum.

Atvinnuleysi er þegar orðið 10% (samdrátturinn er miklu meiri ef tekið er tillit til brottflutnings erlendra  farandverkamanna) og gjaldþrotahrinan er þegar ekki hafin.  Mikill samdráttur og gjaldþrot eru framundan í sjávarútveginum.  Og verslun og þjónustu.   Niðurskurður ríkisútgjalda er ekki hafinn.  Hann verður mikill því að kröfu Alþjóðagjaldeyrisjóðsins munu allt að þriðjungur tekna ríkisins fara í vexti á næsta ári.  Ríkið mun ekki geta mætt skilyrðum þessa sama sjóðs nema með fjöldauppsögnum og þær verða taldar í þúsunda tali.  Genginu er haldið uppi með erlendu lánsfé.  Það er óhjákvæmilegt að það falli  þegar sú geðveiki verður stöðvuð.

Að láta sér detta  í hug að samdrátturinn verði aðeins 6-9% er óráðshjal og maður verður að spyrja sig að því hvað er í heilabúinu á fólki sem slær svona vitleysu upp í stríðsfyrirsögnum í fréttatíma sínum.  

Það hljóta að vera hundruðir manna sem núna ganga atvinnulausir sem eru hæfari en fólkið á Bláskjá til að flytja fréttir af ástandinu.  Við megum ekki gleyma því að þó stór hluti af þessu fólki fékk vinnu vegna pólitískra skoðana sinna þá er það ekki flokkurinn sem greiðir því laun.  Það eru skattgreiðendur þessa lands.

Og þjóðin á betra skilið en þessa skrumskælingu.

Kveðja að austan.

 

 

Athugasemdir

[Arinbjörn Kúld, 14.3.2009 kl. 17:21]

Ég missti andlitið í gólfið þegar ég horfði á þessa frétt. Síðan hef ég mikið velt því fyrir mér hvort IMf sé að aðstoða við einhverja kosningablekkingu.

[Ómar Geirsson, 14.3.2009 kl. 22:34]

Blessaður Arinbjörn.

IFM er að því, það er ljóst.  Þeir vita t.d mætavel að genginu er haldið uppi með handafli.  Slíkt gengur aðeins í stuttan tíma.  Og allt þetta tal að núna fari hlutirnir að batna.  Af hverju ættu þeir að gera það?  Eina sem hefur verið gert er að setja á gjaldeyrishöft og hækka vextina.  Síðan er vaxtahækkuninni þökkuð styrking gengisins þegar gjaldeyrishöftin og lán IFM eru skýringin.  Vextirnir sjá aftur á móti til þess að verðlag er hærra en ella því fyrirtæki leytast við að koma þeim út í verðlagið.  Það er t.d. stóra skýringin á hækkun innlendra vara umfram þess sem hækkun aðfanga gaf tilefni til.

En aldrei þessu vant þá er ég ekki að argast út í IFM, þeir fá bara að fljóta með af gömlum vana.  Bláskjár er skotmarkið og fréttastefna hans sem er veruleikafirrt.  Á meðan ekkert hefur verið gert til að greiða úr vanda heimila og fyrirtækja, þá versnar ástandið.  Og þegar vandinn er í 50-70% fyrirtækja og 30-50 % heimila þá þýðir aðgerðarleysi hrun, ekki innan við 10% samdrátt.  Það á ekki að finnast sá fáráður í fjölmiðla stétt sem ekki skilur þessa einfalda jöfnu sem er byggð á opinberum gögnum.   Því hlýtur tilgangurinn að vera annarlegur, hver sem hann er.

Kveðja, Ómar