Ekkert mál að skulda 75 milljarða segir Gylfi forseti.

Jón Daníelsson var spurður í sjónvarpsviðtali af hverju hann talaði um 600 milljarða skuld vegna ICEsave þegar ljóst væri að eignir kæmu á móti.  Jón svaraði því til að Íslensk stjórnvöld ætluðu að taka lán hjá Hollendingum og Bretum að upphæð 600 milljarða og því skuldum við þessa peninga.  Af þessari upphæð greiðum við vexti.  Tíminn myndi svo leiða í ljós hvernig okkur tækist að vinna úr eignunum sem á móti kæmu.

Helstu uppklapparar Alþjóðagjaldeyrissjóðsins eins og Gylfi forseti Alþýðusambands Íslands gripu það fegins hendi að skilanefnd Landbankans áætlaði greiðslur vegna ICEsave aðeins 75 milljarða.   Þó hagfræðingur sé þá virðist Gylfi forseti ekki átta sig á þessu einfalda orsakasamhengi sem Jón benti á.  Þegar maður tekur lán uppá ákveðna upphæð þá skuldar maður þá upphæð og borgar vexti af henni.  Bankastjóri tæki lítið mark á MATI Á EIGNUM  til frádráttar skuldinni og hann myndi vísa manni á dyr ef maður ætlaði aðeins að greiða vexti af mismun MATS og þeirrar upphæðar sem maður skuldar honum.  Hinsvegar gæti hann bent manni á reyna selja eignirnar og borga þannig inná andvirði skuldarinnar.  Þá lækkar skuldin.  

Ef hægt er að segja með réttu að þjóðin skuldi aðeins 75 milljarða vegna ICEsave þá þarf skuldabréfið að hljóða uppá 75 milljarða.  Hljóði það uppá 600 milljarða, þá skuldar þjóðin 600 milljarða.  Fólk þarf að vera mjög hámenntað í hagfræði til að halda öðru fram eða samsekt í glæpnum að gera Ísland gjaldþrota.

En við eigum eignir á móti er sagt.  Má vera og þá seljum við þær og lækkum skuldirnar.  En á meðan skuldum við þessa upphæð.  Jón Ásgeir Jóhannsson sagðist ekki skulda 900 milljarða því hann ætti eigur á móti uppá 1.350 milljarða og ætti í raun 450 milljarða nettó.  Samt er Baugur gjaldþrota í dag því á krepputímum falla eigur í verði en að skuldum er gengið.  Tími endurfjármögnunar  er liðinn.  Hvernig spilast úr eigum Landsbankans mun tíminn leiða í ljós.  Á meðan skuldum við Bretum og Hollendingum 600 milljarða.

En hvernig getur skilanefndin fullyrt að skuldirnar verði aðeins 75 milljarðar?  Tvennt skal hafa í huga. 

Skilanefndin ætlar ekki að losa um eignirnar strax.  Talað er um brunaútsölur.  Bíða á betri tíma.  Talað er um 4-5 ár.  Hugsandi fólk sér strax að þarna er farið fínt í að segja að við fáum ekki alla þessa peninga ef við seljum eigur Landsbankans í dag, en við vonumst til að fá sannvirði fyrir þær með því að bíða af okkur kreppuna.  Og þar stendur hnífurinn í kúnni og hún segir MMUUUHHhhhhhhhhhhhhh. 

Eina sem vitað er um þessa kreppu að allar spár fram að þessu hafa verið of bjartsýnar og það er stöðugt verið að spá meiri samdrætti.    En raunveruleikinn er alltaf verri en spárnar segja.  Það veit í raun enginn hvar þessi kreppa endar.  Eina sem er ljóst að hún er mjög djúp og hún mun standa lengi yfir.  Hvað fyrirtæki lifa hana af getur enginn sagt til um.  Sá, sem er öruggur greiðandi skuldar í dag, getur verið hættur rekstri eftir 2 ár. 

Eina, sem er öruggt, er sú vissa að ekkert er öruggt.  Nema skilanefnd Landsbankann getur fullyrt um framtíðargreiðsluflæði skuldabréfa sinna.  Að þessu leytinu er hún einstök í heiminum og ætti í raun að geta haft óhemjutekjur af því  að taka að sér að spá um framtíð fyrirtækja gegn greiðslu.  Miðað við hvernig henni er trúað á Íslandi þá ætti hún að eiga framtíðina fyrir sér í þessum bransa. 

Verst að þessir einstaklingar skyldu ekki vera búnir að uppgötva þessa duldu hæfileika sína fyrir ári síðan, þá hefði allavega ICEsave í Hollandi ekki komist á koppinn.  En betur er seint en aldrei.  En því miður er ég ekki auðtrúa fífl og vinn ekki á Bláskjá.  Ég tek meira mark á Jóni Daníelssyni.

En segjum að allt gangi eftir og eignirnar fari langt með að duga fyrir skuldum.  Heimskreppunni verði t.d. aflýst fram yfir 2015.  Eigur Landsbankans í Bretlandi geta samt lent í hremmingum málaferla og kyrrsetningar.  Íslenska ríkið getur ekki stöðvað slíkt með neyðarlögum því málsóknir yrðu fyrir breskum dómstólum og dómar þeirra eru aðfarahæfir í Evrópu.  Að forgangsraða innlán fram yfir aðrar kröfur í þrotabú bankanna er í eðli sínu pólitísk ákvörðun og spurning hvort hún stenst lög.  Og meðan einhver vill láta reyna á þann vafa þá greiðum við ekki 600 milljarða skuldabréfið með peningum Landsbankans.  Með hvaða peningum ætlum við að greiða á meðan? 

En af hverju eigum við að greiða bretum 75 milljarða?  Svo við fáum að ganga í Evrópusambandið segir Gylfi forseti.  Hann má eiga það að hann hefur aldrei reynt að ljúga að þjóðinni að lög og reglur EES samningsins krefjist þess.  Hann má þó eiga það sem hann má eiga kallinn.  En eru 75 milljarðar smápeningar, að ég tali ekki um vaxtagreiðslur uppá 100-120 milljarða í það minnsta (þó gætum við fengið mjög hagstæða vexti sökum þess að allir vita að þetta er ólögleg kúgun að láta Íslendinga greiða þessi innlán)?

Fór ekki Landsbankinn á 11-15 milljarða eftir því hvernig er reiknað.  Landssíminn á 60 milljarða.  Þessir smápeningar eru sem sagt andvirði sölu Landssímans og Landsbankans.  Og samt eigum við vextina eftir.  

Vegna tekjusamdráttar ríkissjóðs þarf að skera niður miðað við núverandi fjárlög, þriðjung útgjalda ríkissjóðs.  Annars uppfyllum við ekki skilyrði Alþjóðagjaldeyrissjóðsins og lendum í skammarkróknum.  Hvernig ætlar Gylfi forseti að bæta við vaxtagreiðslum af ICEsave ofaná þennan þriðjung niðurskurð.  Maðurinn var brjálæður útí Jóhönnu fyrir að geta ekki tryggt öryrkjum fullar verðbætur.  Niðurskurði uppá 2,6 milljarða hjá Landsspítalanum þarf að mæta með uppsögnum og lokunar deilda.  Hvernig verður ástandið þegar að það þarf að skera niður um 10 milljarða á Landsspítalanum?  Hvað segir Gylfi forseti þá.  Samt þykir honum bjart yfir framtíðarhorfum Íslensks efnahagslífs þegar þjóðin þarf aðeins að inna af hendi á ólöglegan hátt 75 milljarða svo hann geti útrýmt Íslenskum landbúnaði og Íslenskri útgerð.  

Er allt gott og bjart á meðan hægt er að senda reikninginn til sjúkra barna?  Að hætta að borga fyrir endurhæfingu fórnarlamba umferðarslysa?  Að hætta að láta landsbyggðina njóta lágmarks læknisþjónustu?  Að kjör öryrkja verði skert niður fyrir sultarmörk?  Að þúsundir manna missi vinnuna hjá hinu opinbera?  Er allt bjart á meðan hann kemst erlendis á ráðstefnu?.  Er tollurinn svona mikils virði?

En ég spyr á móti.  Hvernig gat svona maður orðið forseti Alþýðusambands Íslands.  Áttum við ekki til verkalýðssinna í þetta embætti?  Einhvern sem hugsar um fólk en ekki peninga? 

Alþýðusambandið með svona forystu gæti alveg eins verið deild í skúffu hjá hagdeild Vinnuveitendasambandsins.  Það sér enginn muninn.

Kveðja að austan. 

Athugasemdir

[Toni (IP-tala skráð) 21.2.2009 kl. 22:46]

Góður pistill hjá þér. Samson fékk sirka 47% í landsbankanum á tæpa 13 milljarða króna, sem gerir að núvirði kringum 19 milljarða króna. Bankinn allur er þá liðlega 40 milljarðar á núvirði. Búnaðarbankinn og síminn voru seldir á svipuðum tíma. Það má áætla að þessi einkavæðing hafi skilað í ríkissjóð á bilinu 150-200 milljörðum uppreiknað á núvirði. Þetta er samt frekar gróflega áætlað.

Var það kannski eftir sölu ríkisins á þessum fyrirtækjum sem Geir H kláraði að greiða skuldir ríkissjóðs?

Hvað ætli við eigum eftir að tapa miklu af söluverði þessara fyrirtækja vegna hrunsins?

Ef krafa vegna icesave verður "aðeins" 72 milljarðar þá er það 80% meira en ríkissjóður fékk fyrir bankann á sínum tíma.

Það er leitun að jafn bjartsýnum mönnum í heiminum og þeim er starfa starfa í Íslensku viðskiptalífi.

Flestir kollegar Íslenskra viðskiptamanna og efnahagsráðgjafa út í heimi telja að efnahagslægðin sem þjóðir heims eru að ganga í gegnum eigi enn eftir að dýpka verulega, og menn eins og Georg Soros segja einfaldlega að efnahagskerfið sé hrunið.

Hvernig skilanefnd Landbankans fær það út að aðeins 72 milljarðar falli á ríkið þegar þarf að selja á markaði þar sem fáir eru kaupendur og margir að selja, og innistæðukröfurnar sem um ræðir eru rúmlega 1300 milljarðar króna er ráðgáta.        

[Ómar Geirsson, 21.2.2009 kl. 23:07]

Blessaður Toni og takk fyrir upplýsingarnar. 

Ef við leggjum saman þessa 72 milljarða og 120 milljarða vaxtagreiðslur þá erum við komnir með andvirði þeirra almenningseigna sem voru einkavæddar.  

En dæmið er verra en ég hélt.  Skilanefndin reiknar með allt að 7 árum í endurheimtur.  Þetta eru kúl menn að þora þessu í upphafi dýpstu kreppu heimskapítalismans. 

Og ég endurtek það.  Ef þeir þora að spá þessu og fá einhverjar vitleysinga til að trúa sínu mati, þá eiga þeir að leggja fagið fyrir sig.  Hver þarf stjörnuspámenn þegar svona snillingar eru í boði.  Seljum þá út dýrt og kannski fást þessir 72 milljarðar sem uppá vantar. 

En finnast menn í öðrum löndum sem trúa svona spádómum.  Mér er það til efs en ég er líka vantrúaður.

Alþýðusambandið gæti hinsvegar reynt að markaðssetja þessa menn.  Þeir trúa.

Kveðja að austan.

[Jakobína Ingunn Ólafsdóttir, 21.2.2009 kl. 23:49]

Þarf ekkert að núvirða þessar eignir spyr ég bara eins og sá sem lítð veit.

Annars er eins og þessar upplýsingar bíti lítið á almenningi. Fólk heldur að þetta lagist bara.

[Ómar Geirsson, 22.2.2009 kl. 00:40]

Blessuð Jakobína.

Ætli þeir kunni nokkuð að núvirða.  Þegar ég las laugardags Moggann í kvöld, þá var mér öllu lokið.  Það er langt síðan ég fór að trúa Jónasi Kristjánssyni um "hæfni" fjölmiðlafólks, að undanskildum Speglinum og Víðsjá, en mig grunaði ekki að það léti þennan þætting sleppa gagnrýnislaust í gegn.  Það er talað um 7 ár í uppgjör og það veit enginn hvað heimskreppan á eftir að verða djúp.  

En hvað getur maður sagt.  Ég nota kaldhæðnina í bland við skammir því það hlustar enginn á mig eðli málsins vegna.  En mig langar helst til að grenja.  Þetta eru landráð í boði fjölmiðlamanna og Alþingis.  Því allir geta stoppað þessa vitleysu af með því einu að benda á fataleysi keisarans. 

En sjáum til.   Þú ert að gera virkilega góða hluti og svo er það hann Egill okkar.  Það er langt síðan að hann tók afstöðu með þjóðinni.  Spurning hvort hann finnur einhvern málsmetandi mann sem er tilbúinn að tæta þessa vitleysu í sig.  

En guð hjálpi þjóðinni hvað margir kvaka með.

Kveðja og góða nótt.  Núna er það Gandálfur grái sem á að kæta geð mitt.

Bið að heilsa suður.