Trú án siðar.

12.12.2023 | 17:03

Er ekki trú heldur gildishlaðin lífsskoðun þar sem greinarmunur er gerður á þeim sem veita og þeim sem þola.

"Drepið þá, myrðið, pínið" þó vissulega sé leitun í herhvatningu þeirra sem kenna sig við Jahve, Alla eða hinn þríeina guð kristinna manna, að hvatt sé til kynlimlestinga eða raðnauðgana jafnt lifanda sem dauðra, jafnt ungra sem aldna.

Á öllu ógeði í nafni trúar eru jú mörk.

Vel meinandi yfirlýsing meintra trú og lífsskoðunarfélaga sem kannast ekki við sið, um það sem má og má ekki, er á mannamáli eiginlega prump út í loftið, réttlæting skinheilagra manna sem þekkja ekki muninn á réttu eða röngu, hafa ekki þann innri styrk að fordæma óréttlætanleg voðaverk.

Það mega þó alvöru femínistar eiga, sem hafa helgað baráttu sinni gegn kynbundnu ofbeldi, og þar með ekki hvað síst þegar nauðganir og kynfæralimlestingar kvenna eru vopn í stríði, að þær hafa hafið baráttu á heimsvísu um að óverjanlegur glæpur sé óverjanlegur glæpur, óháð kyni, kynþætti, þjóðerni, trú eða stjórnmáladeilum höfðingjanna, slíkt beri alltaf að fordæma, hver sem á í hlut.

Sú barátta, barátta mennskunnar gegn illskunni hefur ekki skilað sér á Íslandsstrendur, hér upphefja femínistar voðaverk Hamas, og réttlæta þau með meintri kúgun stjórnvalda í Ísrael, í þeirra augun virðast konur ekki vera konur, það er ef þær eru gyðingar eða svo óheppnar að vera staddar á friðar og kærleikstónleikum í Ísrael.

Þar með má líka nauðga þeim, limlesta, svívirða, þær gátu sjálfum sér um kennt að trúa á frið og ást í Ísrael.

Yfirlýsing meintra trú og lífsskoðunarfélaga á Íslandi er sama marki brennd, undir hana skrifar fólk sem þekkir ekki til siðar og er því ófært um að fordæma þau voðaverk sem hófu hörmungarnar og ófriðinn fyrir botni Miðjarðahafs.

Í því siðleysi, því þessi yfirlýsing er ekkert annað en siðleysi skinheilagra sem gera mannamun, er sárast að sjá að Kaþólska kirkjan á Íslandi skrifar undir hana.

Réttlætir þar með nauðganir og voðarverk miðaldahyskisins sem heldur Mið-Austurlöndum í heljargreipum sínum.

Eins og kaþólska kirkjan hafi ekkert lært.

Með slóða nauðgana og barnaníðs á eftir sér, jafnt hér á Íslandi sem og út í hinum stóra heimi.

Það liggur við að maður heyrir Yessið, þarna voru einhverjir sem slógu okkur út, eins og það sé einhver stigagjöf um nauðganir og voðaverk, við skoruðum aðeins 6 á ómennskuskalanum, Hamas náði næstum að sprengja skalann, verða okkar ódæði ekki hvítþegin á eftir??

Á meðan deyja börnin á Gasa.

Í gíslingu öfga og voðamanna.

Hinn skinheilagi bregst ekki við þeim til bjargar.

Það var ekki að ástæðulausu sem Dante skrifaði sína lýsingu um hlutskipti þessa fólks á æðsta degi.

Því alveg eins og aurinn verður ekki fluttur í gegnum nálaraugað, þá fer sálin án klæða, skinhelgi og hræsni yfir í það tilverustig þar sem dómur er felldur, og afleiðingar verða ekki umflúnar.

En eins og góð femínísk baráttukona sagði, sjálf þurft að upplifa kynbundna nauðgun 16 ára, hvað er svo erfitt við að fordæma voðaverk??

Eða nauðganir sem vopn í stríði??

Svarið við því veit trúað fólk.

Svarið við því veit Guð, þessi þarna sem lætur ekki draga sig í dilka, eða kalla sig ýmsum nöfnum, því það sem er þarf ekki nafn.

En hræsnin og skinhelgin geta ekki svarað, skortir til þess grunnelementið sem kennt er við sið.

Á meðan deyja börnin á Gasa.

Og sá skinheilagi sefur rótt, enda nýbúinn að þvo hendur sínar líkt og Pílatus forðum.

Sæll.

En á meðan deyja börnin á Gasa.

Kveðja að austan.