Leppur miðaldaöfgamanna við Persaflóa.

7.12.2023 | 16:45

Leppur miðaldaöfgamanna við Persaflóa.

Leitun er að annarri eins háðung eins og meintu lokaákalli Antonio Guterres á síðustu loftslagsráðsstefnu Sameinuðu þjóðanna, þar sem hann talaði um lokasénsinn, annars væri bjargbrúnin ein eftir.

Í ljósi þess að Cop 28 var haldið í olíuflóanum kenndan við Persa.

Sjaldan eða aldrei hefur mútuþægni þriðja heimsins, þess atkvæða sem skýra jólasveininn sem stýrir Sameinuðu þjóðunum í dag, komið berlegra í ljós en hvernig jarðeldsneytaiðnaðurinn keypti upp meint andóf mannkyns gegn loftslagshörmungum sem má rekja beint til ofnotkunar á jarðeldsneyti.

Aðeins ein háðung er stærri í sögu mannkyns, og það er örverpið sem spillingin og mútuþegarnir náðu að fæða og kenndu við Loftslagssjóð sem átti að aðstoða fátæk fórnarríki loftslagshörmunganna við að styrkja innviði sem óhjákvæmilega skemmast við hamfarirnar.

Heildarupphæðin er þrjár F-eitthvað orrustuþotur, mánuður í fjárstuðningi Vesturlanda til Úkraínu, eða kvart hlutur í meðal ensku fótboltaliði sem miðaldaríkin við Persaflóa fjárfesti í.

Ekki að leikbrúða olíuríkjanna sé ábyrgur, þar væri hlutverk Antonio Guterras mjög ofaukið, sökin er allra sem komu nálægt stofnun þessa skrípasjóðs, en hann er jú andlit mannkyns sem spilar með, undirliggjandi eru feit eftirlaun framkvæmdarstjórans, skítt með heiminn sem hann á starfsins vegna að berjast fyrir og vernda.

Núna segir Mogginn að leppurinn hafi tekið óvenjulegt skref.

Hann varar við yfirvofandi mannúðarslysi á Gasaströndinni, án þess að rétta fram litla fingur til að hjálpa íbúum þar.

Því ef hann gerði það, það er kæmi íbúum Gasa til bjargar, þá væri hann ekki lengur leppur sem á von á feitum eftirlaunatékka.

Fyrir Guterres var valið einfalt.

Öryggisráðið á vissulega að bregðast við ástandinu á Gasa.

Sameinuðu þjóðirnar sem stofnun átti að gera það strax um leið og ljóst var að miðaldaskrímsli Hamas hefðu efnt til þess ófriðarbáls sem myndu kosta þúsundir, og síðan tugþúsundir lífið, ef ekki yrði brugðist við strax í tíma.

Að voðaverk Hamas yrðu fordæmd, að einbeittur ásetningur þeirra að neyða stjórnvöld í Ísrael til að ráðast á Gasaströndina yrði talinn óréttlætanlegur stríðsglæpur, og Sameinuðu þjóðirnar myndu rétta íbúum Gasa hjálparhönd til að losna við þessa miðaldaöfgamenn sem höfðu bál og brand sem sitt eina markmið með voðaverkum sínum í Ísrael.

Ísraelsmenn hefðu haldið að sér höndum, þó miðaldaöfgamennirnir í ríkisstjórn Ísraels vildu fegnir hafa þegið boð Hamas um bál og brand, þá hefðu þeir orðið undir því ennþá eru þeir minnihlutahópur í landinu.

Friðargæslulið Sameinuðu þjóðanna hefði sett Hamas af og framselt það stríðsæsingarhyski sem skipulagði voðaárásirnar á Ísrael, og þeir sem hafa dáið á Gasa, væru lifandi í dag.

Engar byggingar sprengdar, íbúarnir loksins frjálsir til að takast á við 21. öldina í stað þess að vera fastir í hugmyndaheim miðaldaöfgamanna.

Svo augljóst nema fyrir leppa olíuauðsins við Persaflóa.

Með bakstuðningi Góða fólksins á Vesturlöndum, þess fólks sem veit ekki einu sinni hvernig börn verða til.

Og þegar þú veist ekki hvernig börn verða til, þá er alltí lagi að fórna þeim.

Alltí lagi að láta miðaldaöfga og stríðsbrjálæði stjórna heiminum.

Þetta er svo sorglegt að engin orð ná að lýsa.

Hörmungar af mannavöldum hafa sjaldnast verið augljósari.

Undirliggjandi er svart gímald auðróna sem samviskusamlega hafa fjárfest í stríði og stríðsæsingum, komið í veg raunverulegt andóf mannkyns gegn loftslagsvánni, bera að megninu til ábyrgð á stærstum hluta flóttamannastreymi heimsbyggðarinnar.

Því það er engin skynsemi að baki átökunum sem hrekja fólk á flótta, eða andvaraleysið gagnvart loftslagsvánni.

Aðeins bláköld, miskunnarlaus gróðahyggja hinna Örfáu auðróna sem stjórna heiminum í dag.

Og við dönsum með.

Hrunadansinn.

Eins og enginn sé morgundagurinn.

Að við höfum ekki alið líf sem við sórum að vernda.

Svei attan.

Kveðja að austan.