Kjarklaus Þórólfur.

 

Mætir ekki ógnaröflunum sem vega að lýð og heilsu þjóðarinnar.

Hann bendir á að vörnin við landamærin hafi náð og greina tíföld smit við landamærin síðan reglur um tvöfalda skimun með fimm daga sóttkví á milli tóku gildi 19. ágúst síðastliðinn.

En hann hefur ekki kjark til að benda á afleiðingar þess að hafa ekki gripið til þessa varna.

 

Hve ill þarf manneskjan að vera til að ljúga til um þessa staðreynd??

Og svo ég spyrji hreint út, hvað er að Guðbjörgu og Þorsteini að leyfa nýráðnum hægri öfgamanni að vinna gegn sóttvörnum þjóðarinnar með því að setja lygar, blekkingar og rangfærslur í forgrunn ritstjórnarstefnu Morgunblaðsins??

Án athugasemda er illskan þeirra.

 

Eins og kvótakerfið snúist um illsku og mannvonsku.

Mannhatur og eitthvað þaðan af verra.

 

Liðin er sú tíð að Morgunblaðið stóð með borgarlegum öflum.

Liðin er sú tíð að Morgunblaðið tók hag þjóðar fram yfir sérhagsmuni sem vega að tilveru hennar og framtíð.

Eftir stendur grímulaus illska, sem réttlætir sig með tilvísan í eitthvað sem stjórnvöld fá engu um breytt, eins og ríkisstjórn Katrínar Jakobsdóttir beri ábyrgð  á farsóttinni sem hefur slökkt á ferðalögum milli landa.

Með tilheyrandi afleiðingum á ferðamannaiðnað heimsbyggðarinnar.

 

Aukaatriði fyrir þá illsku er að markhópur hennar er fólkið sem sýndi Morgunblaðinu tryggð þegar pappír fór yfir í rafeindir netheima.

Það vantar bara aðeins að ritstjórinn skrifi leiðara, með yfirskriftinni; "Leyfum veirunni að drepa". líkt og það sé orðin óbærileg þjáning að halda úti blaði sem gætir borgarlegra gilda, sem heldur sig við þekktar staðreyndir, sem og ber virðingu fyrir öllum þeim sem urðu undir, en áttu sögu að segja.

Eða gerir aðeins þá einföldu kröfu að sóttvarnir þjóðarinnar verndi lesendahóp blaðsins.

 

Æpandi er samt þögnin.

Þögn þeirra sem tilheyrðu Morgunblaðinu, og sjá í dag illskuna taka yfir.

Þegja svo enn og aftur.

Eins og þögn þeirra sé stuðningur við eina alvöru leiðtoga þjóðarinnar.

Manninn sem hélt haus, og heldur haus.

 

 

Hægri öfginn, mannvonskan, illskan eða hvað sem við köllum þessa atlögu að sóttvörnum þjóðarinnar, er um leið atlaga að þessum manni.

Magnar upp drýslahjörðina sem réðst á hann fyrir, sameinar Pírata, Samfylkinguna og hægri öfganna sem við kennum við Viðreisn, en á sér ekki síður stuðning innan raða Sjálfstæðisflokksins.

"Ég veit ekki neitt, það er ekkert vitað", sagði fyrsti þingmaður Suðurlands, enginn er svona heimskur, en ef þú þarft að vega að formanninum sem veitti þér ekki brautargengi í ráðherrastól, þá ertu þvílík smásál að vega að kjarna stuðningsmanna flokksins.

Atlagan að Bjarna var víst mikilvægari en samstaðan um vörnina gegn vágestinum sem ógnar.

 

Eiginlega vorkenni ég Bjarna að vera formaður í flokki með slíkum smásálum.

Fólks sem lætur þjóðarvá víkja fyrir persónulegum metnaði og framagirni.

Fólks sem leggst svo lágt að virkja heimskuna sem vegur að kjarna fylgi þess, eldra og lífsreyndara fólki.

Þetta er eins og hið nýja gyðingaríki hefði fengið nasista á flótta, nýsloppna frá útrýmingarbúðunum, til að móta hið nýja Ísraelsríkis.

 

En Bjarna er reyndar ekki vorkunn.

Leiðtogar hafa áður risið upp af minna tilefni.

 

Fyrir hann er sú upprisa ekki val.

Kveðja að austan.

 

 

 

Tífalt fleiri smit greind hlutfallslega

Athugasemdir

[Þorsteinn Siglaugsson, 3.9.2020 kl. 20:08]

Þetta er farið að minna á eldræður prestanna gegn vélum djöfulsins og galdranornum á 17. öld. Enda nákvæmlega sama gerð af brenglun á ferðinni.

[Ómar Geirsson, 3.9.2020 kl. 20:44]

Bíddu nú við Þorsteinn, ekki að ég kunni ekki vel að meta athugasemd þína um eldræður, enda kominn af eldprestinum sjálfum í beinan kvennlegg, en ertu að glíma við sama vandamál og tvífeis sem Tommi Lí gerði svo góð skil, í ekki alveg eins góðri mynd??

Ég er ennþá með hellu í vinstri hlust,  uhh hu ahh eða ekki alveg hellu, eftir síðasta hurðarskell þinn.

En eins og ég sagði þá, og sagði áður, og mun örugglega segja aftur, pínu pons var frekar dauf tjáning um söknuð minn, eða þannig.

En eldræða er þetta, vissulega, vélabrögðum andskotans, lygum hans og blekkingum þarf að mæta.

Frá því að slökkt var á ofnunum í Auschwitz hefur mennskan ekki mætt annarri eins illsku og þeirri sem grefur undir sóttvörnum gegn kórónuveirunni.

Efinn er aðeins um hvað gengur þessu fólki til.

Gyðingahatur, kynþáttahatur með allri sinni birtingarmynd, trúarhatur bókstafsinna, allt á sér svo sem sínar rætur og sínar forsendur, þó erfitt sé fyrir aðra en innvígða að skilja.

En þetta hatur og illska út í náungann, með þeirri afsökun að hann sé hvort sem er að deyja sökum aldurs, eða undirliggjandi sjúkdóma, þetta er fyrir ofan og yfir allt sem áður er þekkt í þessum kreðsum.

Og þegar fólk sem þykist vera trúað, tengir sig við guðfræði, biblíulestur eða annað sem á að vera vitnisburður þar um, peistar falsi um aðeins 6% af þeim sem féllu, hafi fallið vegna veirunnar, en hitt hefði dáið hvort sem er, þá ertu að upplifa eitthvað Þorsteinn, sem var spáð, en enginn tók mark á, um vélabrögð þess í neðra og afskræmingu trúarinnar.

Brenglun, vissulega, réttilega.

Hvaða annað orð er hægt að nota yfir þá sem afneita drepsótt, sem afskræma staðreyndir, sem ljúga og blekkja??

En til hvers Þorsteinn, til hvers??

Þar getur þú svarað, þarna hef ég ekki þá vitneskju sem þú hefur.

Kveðja að austan.

[Símon Pétur frá Hákoti (IP-tala skráð) 3.9.2020 kl. 21:59]

Magnaður pistill Ómar.

Já, svo sannarlega ert þú sem besti eldklerkur.

Það er ekki eldspúandi hraunbreiðuna sem þarf núna að stöðva. 

Það þarf að flytja eldmessu yfir þeim sem vilja gera allt til að gefa veirunni svigrúm til að drepa sem flesta.

Þorsteinn tók í upphafi faraldursins hér samlíkingu við herfræði hins kínverska Sun Tsu.

Af henni getum við lært að við skulum aldrei vera svo barnalegit að halda að andstæðingur okkar hafi sama gildismat og við.  Sumir kjósa sér að ganga veg illskunnar, meðan aðrir berjast gegn henni.

[Símon Pétur frá Hákoti (IP-tala skráð) 3.9.2020 kl. 22:19]

En um það máttu vera viss Ómar, að þrátt fyrir eldmessu þína, mun ritstjórinn þegja þunnu hljóði, áfram.  Hann man ekkert eftir ömmu sinni lengur.

[Ómar Geirsson, 3.9.2020 kl. 23:02]

Eru eldmessur ekki eins og hvert annað hobbý á þessum síðustu og verstu kæri Símon??

En fyrst að Páll gaf eftir og fór að telja líkin, þá varð einhver að taka við og halda uppi vörnum á þessum afkima veraldarvefsins.

Samt alveg óvart Símon minn, alveg óvart.

Hins vegar veit ég að amma ritstjórans man eftir honum, og það eitt skiptir máli.

Kveðja að austan.

[Þorsteinn Siglaugsson, 3.9.2020 kl. 23:34]

Ekki reyna að snúa hlutunum á haus.

Brenglunin liggur í viðhorfum á borð við það, að það eina sem skipti máli sé að útrýma galdranornum, eða að það eina sem skipti máli sé að enginn smitist af veiru. Og afleiðingar allrar brjálseminnar skipti engu. Þetta gerist þegar fólk hefur fest sig í einhverri firru og öll hugsun þess hverfist um hana. 

[Halldór Egill Guðnason, 3.9.2020 kl. 23:39]

 Mikinn þykir mér þú fara Ómar, er þú setur þá sem leyfa sér að efast um aðgerðir gegn veirunni á sama stall og böðlana í Auschwitz. Að önnur eins mannvonska hafi hreinlega ekki sést síðan þá. Manstu Rauðu Kmerana, manstu Rwuanda, manstu, manstu, manstu, eða ertu hættur að muna alla þá mannvonsku sem ennþá þrífst um heim allan og lætur þessa veiru blikna í samanburði?

 Það er gott og blessað að hafa skoðanir og geta haldið þrumuræður, hvort sem er í riti eða ræðu, en fyrir alla muni gíraðu þig nú aðeins niður ljúfurinn og gættu að orðavali þínu, ef þú vilt að fólk taki mark á annars í flestum tilfellum ágætis pistlum þínum.

 Góðar stundir, með kveðju að sunnan.

[Ómar Geirsson, 4.9.2020 kl. 08:23]

Blessaður Halldór.

Mér er það ljúft og mikill heiður að þú skulir í senn lesa pistla mína og stauta þig í gegnum athugasemdarkerfið, en þá er lágmarkið að þú sleppir þeim leik að bera saman appelsínu og tunnu fulla af úldnum eplum.

Ég er hvergi að tala um fólk sem leyfir sér að efast um aðgerðir gegn veirunni, vík ekki að því einu orði, þú finnur hvergi fullyrðingu þinni stað í pistlum mínum eða í athugasemdum.

Ég er að tala um fólkið eða aflið að baki sem vísvitandi grefur undan sóttvörnum með lygum og blekkingum, en efasemdir geta aldrei byggst á rangfærslum eða áróðri sem er hugsaður til að blekkja trúgjarna.

Sjálfsagt geta menn haft mismunandi smekk á illvirkjum, ég fyrir mitt leiti sagðist geta skilið ódæðin þannig séð þar sem ytri réttlæting er trú, kynþáttahatur, pólitík eða annað þar sem siðblindingjarnir eða illmennin nota einhver tákn eða hugmyndafræði sem réttlætingu gjörða sinna. 

En mér er fyrirmunað að skilja flokkunina "aldraðir og undirliggjandi" og að það fólk megi kafna lifandi þegar það er hægt að hindra það.  Og þegar menn vísvitandi stuðla að slíkum dauðdaga þó menn láti eitthvað smágert kvikindi um verknaðinn, þá ítreka ég það að slíkt er mannvonska sem við höfum ekki áður litið frá því að ofnar voru kynntir með lifandi fólki.

En eins og hverjum finnst sinn fugl fagur eða bastarðarnir misskítugir þá geta menn örugglega líka þrasað um óhæfuna, þú þarft ekki að biðja mig um leyfi Halldór til að setja eitthvað annað á toppinn á  topptíu listanum yfir mannvonsku og illvirki.  Ekki frekar en sá sem gerir lítið úr þeim glæp að kynda ofna með fólki með því að segja að sú óhæfa hafi ekki átt sér stað.

Við höfum bara okkar skoðanir Halldór, en það er samt óþarfi að gera fólki upp skoðanir til að geta rifist við þær.

Ég hef litlar áhyggjur af orðvali mínu, tel mig búa yfir hæfninni að tjá mig skýrt á mannamáli, ég hef kannski meiri áhyggjur af því að þegar þar að kemur muni amma mín segja við mig; "þú lést ekki ómennin heyra það nógu mikið vinur", því ef ömmum var í nöp við eitthvað, þá voru það ómenni.

Það held ég nú.

Kveðja að austan.

[Ómar Geirsson, 4.9.2020 kl. 08:26]

Engu nær Þorsteinn, engu nær;

"Brenglun, vissulega, réttilega.

Hvaða annað orð er hægt að nota yfir þá sem afneita drepsótt, sem afskræma staðreyndir, sem ljúga og blekkja??

En til hvers Þorsteinn, til hvers??

Þar getur þú svarað, þarna hef ég ekki þá vitneskju sem þú hefur.".

Þú ert ekki sérstaklega góður upplýsari.

Kveðja að austan.