Íslendingar ættu að hríðfalla.

 

Samkvæmt þessum rökum, núna en ekki eftir 20 ár.

Því það er um hálf öld síðan klukkunni var breytt, og lítill svefn unglinga er ekki nýtilkomið vandamál.

Samt erum við með elstu körlum og kerlingum, og værum elst ef við hefðum ekki fallið í gryfju þeirra kostuðu gervivísinda sem lögðust eins og faraldur á vestræn samfélög uppúr 1970, sem var að henda úti hollustunni, feitu kjöti, smjöri og rjóma, og taka upp neyslu á transfitu smjörlíkisins og sykurbættum fituskertu matvörum.

 

Á þriðja áratug barðist háskólaakademían, læknar, næringarráðgjafar og aðrir sem áttu að vita betur, gegn fitu og létu það á sama tíma gott heita að staðgengill hennar var viðbættur sykur.

Fyrir vikið dó margur fyrir aldur fram og líklegast eru þetta stærstu skiplöguðu fjöldamorð sögunnar.

Þó í harðri samkeppni við ótímabær hjartaáfalla vegna bólgueyðandi lyfja, og núna síðast faraldur morfín lyfja.

 

Enginn læknir hefur beðist afsökunar á þessu, enginn næringarfræðingur hefur beðist afsökunar á þessu,.

Bara hægt og rólega viðurkennt sín mistök með því að breyta ráðleggingum sínum. 

 

Og núna kemur enn einn fræðingurinn með dómsdagsspár sínar.

Spáir faraldri vegna þess að rannsókn sem hann eða kollegar hans gerður í gær eða fyrradag segja til um hann.

En fattar ekki þá einföldu staðreynd, að þó rannsóknin sé ný, þá er ástandið sem er verið að rannsaka ekki nýtilkomið.

 

Maðurinn er ekki gerður til að vaka í myrkri.

Hann er gerður til að sofa í myrkri.

 

Í guðanna bænum látið dagsbirtuna okkar í friði.

Í stað þess að fikta í klukkunni, þá er hægt að byrja vinnudaginn klukkutíma seinna í svartasta skammdeginu, eða nýta birtulýsingu sem vinnur mjög á vandanum.

Eða margt annað.

 

Eiginlega allt annað en að láta fólk lifa í myrkri.

Kveðja að austan.

Nauðsynlegt að breyta klukkunni

Athugasemdir

[B.N. (IP-tala skráð) 28.1.2019 kl. 07:23]

Afhverju byrja danir sem dæmi dagvinnuna kl. 07.00 þar á bæ. Það er tveggja tíma munur á veturnar á milli landanna og myrkrið er lengra á Íslandi og birtan þegar sumar er. Meðalaldur dana er lakari um 10 ár er það tímamunurinn sem veldur eða mun meðalaldurinn á Íslandi hækka ef við breyttum klukkunni úr 84 ár í um ja veit ekki 90 ár kanski??

Baldvin Nielsen

[Arnar Guðmundsson (IP-tala skráð) 28.1.2019 kl. 08:12]

Vísindablinda!

Segi ekki meir í bili.

[Gunnar Heiðarsson, 28.1.2019 kl. 11:08]

Sæll Ómar

Það er erfitt að fylgjast með boðskap vísindamanna, stundum ganga þeir í takt þegar skipt er um skoðun, en stundum tala þeir þvert á hvern annan.

Í þeirri viðtengdu frétt sem blogg þitt hengist, er rætt um klukkuna, líkamsklukkuna og sólargang. Má þar skilja að nauðsynlegt sé að vakna í birtu. Það hafi svo óskaplega mikil áhrif á líkamsklukkuna. Gleðilegt fyrir Siglfirðingar, sem geta nú loks vaknað, eftir 74 daga svefn.

En aftur að vísindamönnum. Þar sem ég hef alla mína tíð unnið vaktavinnu, nú síðastliðin 10 ár á tólf tíma vöktum sjö daga í senn, hef ég leitað mér gagna vísindamanna um hvað ég geti gert til að auka langlífi mitt, þrátt fyrir slíka misnotkun á líkama mínum. Það kennir svo sem ekki margra grasa um það efni á alvefnum, en þó er eitt sem flestar rannsóknir segja að geti orðið mér til hjálpar. Það er svokallað blátt ljós, að það geti bjargað geði mínu frá skaðsemi þess að missa af sólinni á stundum. Þar sem vinna mín felst í því að góna á tölvuskjái, viðstöðulaust þá tólf tíma sem ég er á vakt og að svokallað blátt ljós er sama birta og slík tæki gefa frá sér, lét ég gott heita, líf mitt væri bara í ágætum höndum skjánna.

Í gær kom síðan frétt,nátengd þeirri frétt sem þú hengir þitt blogg við, um að svokallað blátt ljós væri stór skaðlegt og að öllum líkindum væri ég nú orðinn stórlega skertur á geði, eða einhverju öðru mun skuggalegra. Auðvitað get ég ekki dæmt um slíkt, líður bara ágætlega.

Þarna kom sem sagt sérfræðingur sem talaði í algerri andstöðu við þann sem þú leggur út frá og reyndar líka í andstöðu við það sem ég hafði áður lesið. Mér er því vandi á höndum. Hverjum skal trúa, taugasérfræðingnum, stjörnufræðingnum nú eða þeim fjölmörgu svefnfræðingum sem skrifa á netið, reyndar ekki allir alltaf sammála en þó má þar finna samhengi.

Því hef ég nú tekið þá ákvörðun að hætta að hlusta á boðskap klukkumanna, hvort sem þeir vilja flýta henni eða seinka. Ætla bara að lifa mínu ágæta lífi og meðan ég ekki sjálfur kenni mér meins og nánir aðstandendur kvarta ekki yfir háttum mínum, tel ég geð mitt bara í ágætu lagi. Klukkan er góð eins og hún er. Þegar ég er á frítörn hef ég ágætis birtu seinni part dags með fjölskyldunni og engu skiptir mig hvort bjart er eða dimmt er ég vakna.

Meðan vísindamenn geta ekki orðið sammála og rökstutt sitt mál með áþreifanlegum rökum, er engin ástæða til að breyta klukkunni. Leikmenn skipta minna máli í þessari umræðu, enda skoða allir málið út frá sinni eigin persónu, rétt eins og ég geri.

Kveðja

[Ómar Geirsson, 28.1.2019 kl. 11:35]

Blessaðir félagar og takk fyrir innlitið.

Gunnar, það er mikið til í þessu sem þú ert að segja, það er með þversagnir vísindanna. Nærtækt dæmið er hjartalæknirinn sem kom ungur úr námi uppúr 1970, gleypti þar hráum keyptum rannsóknum smjörlíkisframleiðanda í Bandaríkjunum sem breiddust um heiminn eins og faraldur, og ráðlagði mataræði eftir því.

Í dag þegar hann nálgast eftirlaunaaldurinn, þá gladdi hann marga með því að segja þeim að fara heim og segja konum sínum að þeir ættu að borða fitu, rjóma og smjör.

Auðvita eru menn að ráðleggja eftir bestu vitund en þetta er oft spurning um heildarmyndina, sem og þversagnirnar, að ráðleggingarnar virðast oft ganga gegn hvor annarri.

Við hérna í svartasta skammdeginu höfum svo sem ekki orðið minna langlífari en sólarþjóðirnar, og ég tek hóflega mark á þessari sjúkdómaniðurstöðu fyrr en það er gerð rannsókn á fólki sem hefur sloppið við eitranir matvælaiðnaðarins, það er viðbættan sykur og allskonar ónáttúruleg aukaefni, og eina breytan er að vakna við sólarupprás eður ei.

Og þá er það fyrsta sem mér dettur í hug hvort þunglyndi aukist ekki við fækkun sólarstunda seinni partinn.  Rannsóknir segja að sú birta skiptir engu máli segir sérfræðingurinn, en ég hélt að geð fólk skipti máli, og ég get ekki að því gert, að mér finnst léttara yfir fólki þegar það á frí í birtu en dimmu.

Við aðlögum okkur að birtunni en með því að vakna seinna en til dæmis Skandínavar, og ég hélt að við værum allavega á pari við þá í lýðheilsu.

Allavega, ég vill ekki lifa í myrkri.

Jafnvel þó árunum sem verður skipt á bleyju á mér á hjúkrunarheimilum fækki.

Kveðja að austan.

[Þorsteinn Siglaugsson, 28.1.2019 kl. 15:17]

Það er svo mikið af villum að koma frá þessum vísindamönnum að maður nennir varla að standa í að pirra sig á þeim.

Í fyrsta lagi merkir það, að fólk veikist meira skömmu eftir að skipt er yfir í sumartíma, alls ekki að sumartíminn sé eitthvað óheilsusamlegri. Nei, eina ástæðan er auðvitað sú að fólk sefur skemur meðan það er að laga sig að breytingunni. Svo er það auðvitað búið. Þarna eru einfaldlega engin röktengsl til staðar. Maðurinn hugsar bara ekki nægilega skýrt.

Í öðru lagi, ef líkamsklukkan núllstillist við sólarupprás eins og þessi náungi heldur fram, nú þá ættu Íslendingar að vakna klukkan ellefu á veturna og um miðnætti á sumrin, ekki satt? Maðurinn virðist nefnilega ekki gera sér grein fyrir að það skiptir kannski smá máli að hér er meira og minna myrkur allan veturinn og dagur allt sumarið. Ef hann skildi hvað hann er að segja sjálfur myndi hann vitanlega leggja þetta til.

Og að lokum, eins og Sævar Helgi stjörnufræðingur var nú að benda á fyrir skemmstu, þá hefur breyting klukkutíma til eða frá í rauninni engin áhrif á það hvort fólk vaknar í dagsbirtu nema kannski einn mánuð af tólf samtals. Það eru nú öll ósköpin.

Það væri nú ákaflega gaman ef einhverjir blaðamenn væru til hér sem hefðu vit til að spyrja þessa sérfræðinga réttra spurninga í stað þess að lepja bara allt hrátt upp eftir þeim, sér í lagi í ljósi þess að það virðist algengara en hitt að þessir menn einblíni bara á eitthvað eitt, það sem tilheyrir þeirra eigin fræðum, jafnvel bara þeirra eigin doktorsritgerð, en sé alveg fyrirmunað að sjá hlutina í samhengi.

[Ómar Geirsson, 28.1.2019 kl. 15:47]

Blessaður Þorsteinn.

Virkilega takk fyrir þitt góða innlegg í umræðuna.

Þú hnykkir vel á því sem bæði ég og Gunnar erum að reyna að segja hér fyrir ofan.

Svona punkturinn yfir y-ið að gera þessar hugleiðingar mínar ásamt athugasemdum að innleggi í umræðuna.

Kveðja a austan.

[Þorsteinn Gíslason (IP-tala skráð) 28.1.2019 kl. 15:48]

Þarna tekur vísindamaðurinn og prófessorinn full mikið uppí sig og gjaldfellir þetta allt um leið. Á vitlausri klukku með of litlum svefni lifa íslendingar lengur en flestar þjóðir. Það er líka athyglisvert að ræða alltaf um margar rannsóknir án frekari útlistana. Ef við viljum fara eftir melatonin magni í blóði hjá íslendingum og nota það sem rök fyrir að breyta klukkunni þá þarf að mæla melatoninmagnið hjá marktækum hópi tvisvar á dag í eitt ár. Svona dómsdags spár eiga ekki heima í vísindum.

[Ómar Geirsson, 28.1.2019 kl. 21:13]

Já, ég er sammála því Þorsteinn.

Takk fyrir innlitið.

Kveðja að austan.