The final countdown.

 

Jæja, þá er niðurtalningaferlið formlega hafið.

Við höfum haft um 2000 ár til að undirbúa okkur undir það, að læra þann sið sem er eina von okkar til að mannkynið lifi af.

Við munum lesa margar greinar, hlusta á fullt af fólki, sem mun tjá sig um þessa ákvörðun Trumps, þar sem allt verður sagt, nema það sem skiptir öllu.

Að mannkynið á í stríði við ógnaröfl sem af einhverjum ástæðum vilja koma því til helvítis.  Það er að segja ef menn gefa sér ekki þá forsendu að þeir sem að baki búa, og hugmyndafræði þeirra, séu ættuð frá neðra, og það standi til að fjölga mjög þar um slóðir.

 

Ákvörðun Trumps sem slík er enginn heimsendir, og ef kallinn væri bara slysaskot, þá mun hinn frjálsborni maður leiðrétta fljótt kúrsinn.

Við erum fæst svo miklir einfeldningar að trúa keyptum vísindum loftslagsafneitara, við vitum að fyrir pening segja menn allt sem þeim er borgað fyrir að segja.

Og jarðefnaeldsneytisiðnaðurinn á nóg af peningum.

 

Það er aðeins þegar heildarmyndin er skoðuð, að atlaga Trumps að mannkyninu er sett í samhengi við áður þekktar atlögur að mennskunni, og við blasir kostun, hverjir svo sem kostunaraðilarnir eru, að þá blasir algjör hryllingur við.

Þegar ég var ungur, og náði að upplifa upprisu frjálshyggjunnar, þá fannst mér ljóst að svona bábiljur og vitleysa gæti ekki náð slíku flugi á svona stuttum tíma nema eitthvað fjármagn stæði að baki.  Eitthvað sem skipti ekki máli, þetta var bara svona.

En þegar árin bættust við, og tækifærið til að lesa sér til fróðleiks, þá fór ég að spá í þessa hluti, það er kostunina, og hvort eitthvað skítafjármagn hefði komið að fleiri hörmungum aldarinnar, af hverju urðu bolsévikar þetta afl í Rússlandi?, bláfátækir byltingarmenn sem framfleyttu sér á sníkjum og sváfu hjá til að lifa af. Og hver var Hitler eiginlega, og hvernig gat hann náð völdum, með þetta líka bjánalega yfirvaraskegg?

Svarið var auðvitað peningar, það sá sér einhver hag í að fjármagna þá sem voru líklegastir til að valda sem mestum óskunda.  Því fyrir suma er ringulreið og upplausn góður bissness, hvað þá ef hægt sé að magna slíkt uppí styrjöld.

 

Og auðvitað hafa miklu fleiri hugsað þetta orsakasamhengi.

Um hagfræðinginn, sagnfræðinginn og rithöfundinn Antony Cyril Sutton má lesa um í Wikipediu, og þar er minnst á lykilrit hans um einmitt þessa kostun; "Wall Street and the Bolshevik Revolution" og "Wall Street and the Rise of Hitler", og án þess að ég ætli nokkuð að fjalla um þær bækur, þá er ljóst að þræðir voru raktir frá hinu svarta fjármagni, til flokka sem líklegir voru til að koma heiminum í bál og brand.

Atburðarásinni var ekki stýrt, en þetta er eins og að grafa undan stíflu, hún gefur sig alltaf að lokum.

Það var gróði í mannslífum, og sá gróði var mikill, en tala fórnarlambanna var líka ansi há þegar allt var talið.

Menn gleyma því oft, að það gerist fátt af sjálfu sér, og ef menn vilja skýringarnar, þá er annars vegar gott að rekja gróðann, og síðan sjá hver flýtur ofaná.

 

Þetta er kaldrifjuð illmennska, og ef hún væri stök þá væri það kannski sök sér.

En mikið vill meira, og alltí einu spratt upp hagtrú, reyndar uppvakningur frá 19. öldinni, sem yfirtók hagstjórn og stjórnmál vestrænna landa.  Og þetta gerðist bara einn tveir og þrír, svona líkt og það tók 3 ár að breyta Hitler úr óþekktum manni í leiðtoga þjóðar.

Um uppgang frjálshyggjunnar í Frakklandi, hvernig hún breyttist úr bábilju í stefnu sem bæði hægri og vinstri flokkar landsins framfylgdu dyggilega, má lesa í merkri bók Einars Más Jónssonar sagnfræðings og prófessors við Sorbonne háskóla, Bréf til Maríu.  En einmitt í þeirri bók furðar Einar sig á hinni snöggu útbreiðslu, og spáir í kostun, en fer ekki nánar út slíkar pælingar.  Örugglega þarna úti hefur einhver gert það, en ég þekki ekki til þess.

Frjálshyggjan er aðför að siðmenningunni, því hún er ekki bara verkfæri fámennar auðstéttar til að stórauka hlut sinn af heimshagkerfinu, hún gerir það á þann hátt að hún ræðst að samfélagssáttinni, velferðarkerfinu sem er sáttinni milli borgarastéttarinnar og verkalýðsstéttarinnar, og batt enda á um 100 ára stéttarstríð í hinum vestræna heimi.

Hún er aðför að siðmenningunni, ekki bara vegna þeirrar hugmyndafræði sinnar að menn beri engar skyldur gagnvart neinum nema sjálfum sér (andstæða kristinnar siðfræði sem kveður einmitt á um þessa skyldu) heldur líka vegna þess að komandi stríð verða háð með gereyðingarvopnum, þar sem jafnvel milljarðarnir munu falla, og fátt eftir sem minnir á mannlegt samfélag að loknum þeim hildarleik. 

 

Einu sinni kannski tilviljun, tvisvar ákaflega hæpið, en þriðja skiptið, gleymið því.

Þetta er stýrður vilji.

Og hann er ennþá að.

 

Hvenær fór allt í loft upp í Mið-Austurlöndum?

Það var þegar aðför var gerð að veraldlegum einræðisherrum, og miðaldaöflum var sleppt lausum. 

Sem höfðu allt, fjármögnun, vopn, þjálfun.

 

Og er Evrópa í dag ekki að leysast upp í svipaðan deilufarveg og var fyrir síðasta heimsstríð??

Og er að yfirfyllast af flóttamönnum sem flýja hina kostuðu óöld Mið-Austurlanda.

Og kynnt er undir raddir sundrungar og ofbeldis til að stigmagna upplausnina.  Þetta er ekki einu sinni frumlegt, aðeins eftiröpun frá fjórða áratug síðustu aldar.

 

En eins og það sé ekki nóg að maðurinn útrými sjálfum sér með vopnum, þá er líka barist gegn aðgerðum af völdum loftslagsváarinnar.

Í myndinni Fyrir flóðið sagði yfirmaður baráttunnar gegn vánni í Bandaríkjunum að það væri ekki til meira siðleysi eða hrein mannvonska, að kosta gervivísindi gegn vísindalegum staðreyndum, svo hægt væri að hindra að mannkynið gripi til aðgerða gegn þeim þætti hlýnunarinnar sem er af mannvöldum.  Og valda þar með ómældum hörmungum.

Sem er náttúrulega rangt, því hann sér ekki heildarmyndina.

Það er til miklu meira siðleysi, til miklu meiri mannvonska, það er hin tæra illska sem hefur vegið að manninum síðustu 100 árin eða svo, og ætlar sér hreinlega að knésetja það.

 

Til hvers??

Það má hreinlega guð vita, líklegast væri best að spyrja þann í neðra að því.

En þetta er raunveruleikinn sem blasir við.

 

Ógnaröfl kynda undir aðför að mennskunni, undir aðför að mannkyni öllu.

Yfirlýsing Trump er aðeins upphafið af lokaferlinu.

Það er beinn vilji að verki sem stigmagnar alla átakaferla, og Trump er aðeins peð í því viljaverki.

 

Það getur verið hafin styrjöld á Kóreuskaganum á morgun, sem gæti stigmagnast í átök milli stórvelda.

Og íslamskir öfgamenn eru aðeins rétt að byrja í Evrópu.  Fólki verður snúið gegn innflytjendum, en áttar sig ekki á að frjálshyggjan er búin að fjársvelta svo allt innra öryggi, að það er ekkert afl til staðar að hreinsa þá út.  Snúist þeir til varnar, þá má guð vita hvað gerist.

Og alltaf vofir sú hætta yfir að hinir heilögu stríðsmenn Alla komist yfir gjöreyðingarvopn, og þeir hafa alveg innræti til að breyta þeim.

Eða réttara sagt, það verður séð til þess að þeir geri það.

 

Fáráð vitleysunnar er svo mikið að fólk trúði Trump þegar hann sagðist ætla að berjast við hryðjuverkamenn, en eitt af hans fyrstu verkum var að gera 100 milljarða dollar vopnasölusamning við rótina sem fjármagnar þá, það er miðaldaríkin við Persaflóa.

Orðin eru eitt, gjörðirnar annað, og það þveröfugar.

Og núna ætlar hann í stríð við náttúruna.

 

Er hægt að toppa svona vitleysu.

Er hægt að gera heiðarlegri tilraun til að koma heiminum fram af heljarbrúninni?

 

Við vitum það ekki.

En við vitum að það verður reynt.

Það eina sem ekki er vitað, það er endirinn á þessari setningu; "Heimsendir í boði XXX".

 

Svona er þetta bara, ágætt að enda þessa blogglotu um íslenska stjórnsýsluspillingu á léttu spjalli um komandi Ragnarrök.

En auðvitað sagði Snorri betur frá þessu öllu saman.

Og eitthvað má lesa um þetta í Opinberunarbókinni líka.

Antikristnin er allavega ráðandi stjórnmálaafl á Vesturlöndum í dag, og höfin eru að súrna og hitna svo lífríkið er í dauðateygjum. 

Meira man ég ekki úr myndinni Ends of days nema mér fannst Gabriel Byrne vera flottur í hlutverki kölska, en Schwarcenegger fór samt létt með hann þó hann væri ber að ofan.

 

En án gríns, það er ekki verra að halda inní sumarið á þessum nótum.

Það er hvort sem er bölvuð rigning, hefur rignt, og á að rigna, endalaust.

 

Það verður sem verður, en hér verður örugglega bloggað aftur með hækkandi sól, eða þá þegar hún lækkar aftur.  Ef þá sést til hennar í þessari bölvaðri rigningu svo ég bölvi henni aftur.

Nóg eru tilefnin, sum skemmtilegri en önnur.

 

Alþingi er farið í frí.

Ég í smáfrí.

 

Á meðan er það kveðjan,

að austan.

 

 

 

Draga sig út úr Parísarsamkomulaginu

Athugasemdir

[Pétur Örn Björnsson (IP-tala skráð) 2.6.2017 kl. 08:54]

Mikill og góður pistill, eða eins og Einstein sagði:  "Veit ekki með hverju verði barist í þeirri þriðju, en með lurkum og grjóti í þeirri fjórðu."

[Pétur Örn Björnsson (IP-tala skráð) 2.6.2017 kl. 09:15]

En ég held að Einstein hafi samt alveg vitað með hverju yrði barist í þeirri þriðju, enda skrifaði hann margt þar sem hann hvatti mannkynið til samhygðar og vakningar, í stað sundrungar og illsku.

[Ómar Geirsson, 2.6.2017 kl. 10:01]

Og hann rignir Pétur.

Ætli það sé eitthvað táknrænt??

En svona er þetta, loksins kominn hvað mig varðar punkturinn yfir i-ið varðandi þá gráglettni örlaganna sem hrakti mig suður á sínum tíma.  Hef aldrei skilið það almennilega, svona í ljósi allrar tregðunnar sem var strax í upphafi, en þetta varð samt til þess að ég setti fram kenningu, fyrir hvað 5 árum síðan??

Og samkvæmt henni átti þetta að gerast, og þess vegna var ég algjörlega viss um að Trump myndi sigra Clinton, þó vissulega hafði ég gert ráð fyrir því að fólskan biði fram einhvern sjarmerandi djöful með englaásjónu úr Teboðshreyfingunni.

Þetta hefur legið í loftinu lengi, löngu áður en Trump kom fram á sjónarsviðið.

Rétt fram að þessu, hví ætti svo ekki að vera áfram?

En við fengum enga Samstöðu um lífið Pétur, alvöru góða fólkið var ekki tilbúið að feisa örlög sín.

En núna er hlutverki mínu á kassanum lokið, þó ég játa bæði nennuskort sem og þá tilhneigingu að sækja í smiðju Beeteljuice í frábærri túlkun Tim Burtons um efnisnálgun, það er ekki alveg hægt að drepa sjálfan sig í leiðindum þarna uppá kassanum.

Ég veit ekki alveg hvað verður, kveðjan að austan mun allavega lifa áfram. Ef ég hefði hugsað mér að fara í langt frí, þá hefði ég ekki hent þessu inn í fljótheitum í gærkveldi, eftir að ég var búinn með vikubirgðirnar af Mogganum sem ég átti eftir ólesna. Hef frekar tekið kaffikönnuna á þetta núna í morgunsárið.

Ég er sannfærður um Upprisu mannsins og að Lífið muni finni sér leið til að lifa af.

Ég held að fólk sé loksins að átta sig á að það verði að grafa sína skotgrafir sjálft, ekki láta pótintáta auðsins sjá um það verk. 

Fólk mun sameinast um lífið, það er öruggt.

Og við gömlu skæruliðarnir munu vera þarna einhvers staðar potandi í þá sem leið eiga framhjá.  Því styrkur lífsins er samnefnari allra þeirra sem reyna að verja það. 

Ekki styrkur hvers og eins.

Heyrumst Pétur, núna er kominn tími til að láta Engey ehf í friði í smástund.  Hún er fullfær um að skapa sinn ófrið sjálf.

Og það hættir að rigna einhvern tímann.

Kveðja, Ómar.

[Pétur Örn Björnsson (IP-tala skráð) 2.6.2017 kl. 10:31]

Já, það flýtur meðan ekki sekkur :-)

Já, og heyrumst Ómar minn og minnumst þess að stríð eru ekki alslæm,

þau skerpa á vitundinni um það hverjir eru sannir vinir ... og sannir vinir lífsins.

Með kveðju að sunnan, fer þó væntanlega um helgina til norðvesturs,

að leiði foreldra minna á Króknum að koma þar fyrir blómakeri framan við legsteininn.

Þinn vinur, Pétur. 

Ps.  Læt fylgja með ljóð mitt um mömmu og "the final countdown", það heyrir einhvern veginn efninu til:

„SVONA FLEKKÓTTUR“

 

Fjórum mánuðum fyrir 97 ára afmælisdag mömmu, sem er álíka blind og vitur og argentínska skáldið Borges var, spurði ég mömmu sem barn væri hvort hún gæti séð einhverja leið út úr öllu völundarhúsi ógangnanna sem heimsbyggðin virtist nú stefna í og þar sem stríð og óáran virtust á næsta leiti og svo svakalega erfitt um það að spá að meira að segja Einstein hefði ekki vitað með hverju yrði barist í þeirri þriðju – en hann hefði talið að í þeirri fjórðu myndu eftirlifendur berjast með kylfum og grjóti sem steinaldarmenn.

Mamma hugsaði sig ekki lengi um heldur sagði sem snimhend væri á tungu að heimurinn væri og hefði alltaf verið „svona flekkóttur.“  Hún sagði reyndar fyrst „röndóttur“ og þegar ég hváði þá leiðrétti hún sig strax og sagði „nei, svona flekkóttur.“

Ég gat bara sagt „ætli það ekki bara“ og fór svo óvart að hugsa um íslenska sauðaliti og mynstur og dropótt, bíldótt, flikrótt, höttótt, leistótt, krónótt, sokkótt og var þá hugur minn allur orðinn flekkóttur og fannst mér ég þá vera farinn að leika mér með leggi og skel eins og mamma gerði þegar hún var barn, sem „þagalt og hugalt / skyldi þjóðans barn“ vera, svo sem segir í Hávamálum.

 

Vítt yfir séð var svar mömmu sem hinna fornu taóísku vitringa.  Þeir reyndu að gára yfirborðið hæfilega svo flekkleysi þeirra sæist ekki og yrði ekki eyðilagt af þeim sem þekkja ekki far-veginn eilífa; svo viðkvæmir voru þeir í tærleika sínum en þeir báru hann í sér og voru þannig séð fyrirmynd fyrir þá sem vildu skynja hann og sjá sem eitt í öllu – í far-veginum hreina og tæra – til dyggðarinnar. 

[Pétur Örn Björnsson (IP-tala skráð) 2.6.2017 kl. 10:37]

Fyrirgefðu stærðina á stöfum ljóðsins, veit ekki af hverju þeir komu svona boldangsstórir þegar ég setti ljóðið inn.

Með kveðju sem fyrr, Pétur

[Grímur (IP-tala skráð) 2.6.2017 kl. 17:41]

Hvaðan kemur þessi bjargfasta trú á að hörmungar muni dynja yfir mannkynið?

Biblían lýsir nokkrum, vísindamenn hafa í gegnum tíðina fundið upp á sínu eigin hörmungarspá sem HollyWood hefur stundum gert trúverðugt á hvíta tjaldinu. Obama veifaði einhverju pappír í París og minnti á Chamberlain þegar hann lofaði friði á okkar tímum vegna undirritunar á pappírsörk.

Ef FÓLK trúi á hlýnun jarðar sé af mannvöldum þá þarf það fyrst og fremst að taka til í eigin ranni en ekki ætlast til að einhverjir lýðskrums þjóðarleiðtogar reddi málunm með að setja takmarkanir á AÐRA.

[Ómar Geirsson, 2.6.2017 kl. 18:31]

Jamm Grímur, það er nú það, þú lætur eins og ég sé einhver spurningavél.

Samt reikna ég með að þú hafir komið hér inn vegna þess að þú last bloggpistilinn, varla bjó einhver úllindúllindoff regla að baki?

Pistill minn er aldrei þessu vant, línulaga, og hvert lag rökfærslunnar hvílir á þeirri fyrri.  Og síðan í lokin, þá bendi ég á fornar lýsingar sem fitta óhugnanlega við það sem er að gerast í dag, og hefur gerst undanfarin ár og áratugi.

Svo við víkjum að fornum lýsingum, þá eru þær ekki heimsendaspár, þvert á móti, þær benda á leiðina, á siðinn sem sigrar að lokum.

Lýsing mín á kostuninni, sem er staðreynd líkt og sú staðreynd að mest allt berg á Íslandi er blágrýti, er hins vegar mun nöturlegri, því það eina sem er ekki vitað, er hver kostar harmageddon mannsins.  Enda set ég það fram með XXX, og svo sem vísa ég þar í þekkt tákn.  En tákn engu að síður.

En það blasir við Grímur að þú hefur ekki lesið orð af því sem ég sagði, og ég held reyndar að þú hafir ekki notað úllenddúllen doff aðferðina, líklegast er að þú hafir verið látinn elta fréttina og koma inn með þínar meitluðu athugasemdir í bloggpistla sem fyrirfram voru taldir neikvæðir gagnvart kolefnaiðnaðinum.

Eða hvað annað getur útskýrt þessa guðdómlegu setningu þína; "Ef FÓLK trúi á hlýnun jarðar sé af mannvöldum þá þarf það fyrst og fremst að taka til í eigin ranni en ekki ætlast til að einhverjir lýðskrums þjóðarleiðtogar reddi málunm með að setja takmarkanir á AÐRA."

Það þarf jú mikla upphafningu andans til að tengja loftslagsvána við trú.  Eitthvað sem jarðar við að vera guðdómlegt.

Að jafnvel frasarnir sem látnir eru fylgja með, virka sem hjóm eitt.

Þetta er kannski öfugsnúin trú Grímur, en samt enga vegin jarðbundin.

Það er gott að vera trúmaður, njóttu þess.

Kveðja að austan.

[Merry (IP-tala skráð) 3.6.2017 kl. 19:59]

Sæll Ómar

Það er slæmt að gera vopnasamning við Saudi Arabíu, en ég held að það hafi verið vegna þess að SA er gegn Íran , og við veit hvað Iran vilja gera. Fyrst selja SA vopn - sem er gott fyrir Bandaríkin og síðan snúa öðru Mið-Austurlöndum gegn Íran.

Um Parísarsamninginn - Hnattræn hlýnun og síðan kæling hefur átt sér stað í hundruð þúsunda ára. Ekkert getur komið í veg fyrir þetta - en það er að gerast hraðari núna vegna þess að CO2 sem við erum að gefa út og olíu sem við brenna. Trump er að setja Ameríku fyrst - eins og hann sagði að hann myndi. Aðrir lönd ættu að vera miklu betra í stað þess að kvarta yfir Trump.

[Ómar Geirsson, 3.6.2017 kl. 22:07]

Blessaður Merry.

Stundum setur mig hljóðan þegar ég les innslög, veit ekki alveg hvernig ég á að höndla þau.

Nafnleysingi pirrar mig reyndar alltaf, réttlæting þó fín sé, á því sem ég skrifa gegn, ýtir alltaf á andsvar, síðan hefur tímapunktur alltaf eitthvað að segja.

Til dæmis hefði sá mæti maður Eggert Guðmundsson, með sínar pælingar í miðri Sigríðarorrahríðinni fengið miklu rólegra svar, ef hann hefði ekki mætt inní miðri orrahríðinni.  Því það er þannig að þegar maður ögrar og mörgum langar til að svara, en gera samt ekki því þeir finna ekki flötinn, en voma svona yfir ef ske kynni, að þá gefur maður ekki afslátt, þegar farið er gegn því sem maður er að höggva í.  En í lok lesturs, þá er í raun hin málefnalega umræða það eina sem er eftir, og þá höggva menn ekki, heldur finna flöt og spjalla út frá.

Þú nærð þessu Merry, en það eru fáir að lesa, reyndar upplifði ég teljara núllstilltan, frá því ég henti inn þessum pistli, og þegar ég vaknaði daginn eftir, hvað svo sem það þýðir, líklegast oftaldi teljarinn alltaf lestur og innlit.

Þú nærð alveg að framkalla viðbrögð, en hvort sem það var fótboltaleikurinn áðan, eða sáttin sem ég finn við að vera hættur að vera á kassanum, að þá nenni ég ekki að höggva.

Svo við víkjum að því seinna, þá væru það klén vísindi sem ekki reiknuðu með náttúrulegum sveiflum, og vísindin eru ennþá í árdaga að skilja hinar dýpri orsakir þeirra.  En þetta eru ekki mannapar, sem ráða í mesta lagi við 200-300 táknorð, á táknmáli, þetta er elíta hinnar mannlegu þekkingar.

Og þeir bæði vita um loftslagspendúl jarðarinnar, sem og að þeir meta áhrif brennslu jarðeldsneytisiðnaðarins.  Ef við ætlum að finna göt í þekkingu þeirra, þá er það vanmat á stigmögnuninni, það er hvað gerist í náttúrunni þegar það hlýnar, þá verða til sjálfstæð ferli sem magna upp gróðurhúsáhrif.

Þeir ná ekki að spá rétt, þeir draga alltof mikið úr, mannkynið hefur ekki áratugi til að bregðast við, eða aðlagast, hvað mig varðar, þá vona ég að næstum 13 ára strákar mínir fái spilað fótboltaleik eftir 10 ár.  Bjartsýni mín nær ekki lengra.

Upplausn og síðan hrun siðmenningarinnar blasir við Merry, og vonandi verður þú búinn að læra að skrifa nafn þitt áður en til þess kemur.

En ég er ekki að böggast út af þessu, held mig við spjótin sem beinast að hinu svarta fjármagni, en munurinn er kannski sá að ég hafði vissa trú, en ég hef hana ekki lengur.  Ég trúði því alltaf að það væri hægt að breyta forspánni, en ég hef ekki þá trú lengur.

Það er ekki beint að falla með lífinu þessa dagana.

Varðandi fyrri málsgrein þína, þá verð ég að segja eins og er, hún hefði gengið á níunda áratug síðustu aldar, og jafnvel fram á þann tíunda, en eftir 11. september, þá gerir hún það ekki.

Það er ekki lengur hægt að loka augum fyrir því hvar rótin er, og í dag finnst enginn með þekkingu eða lágmarks viti sem tengir Islamista við Iran.  Hugmyndafræðin og fjármagnið kemur allt frá miðaldaríkjum Arabíuskagans.

Churchil benti utanríkisráðherra sínum, Halifax ráðherra, þegar hann lagði til uppgjafaraviðræður við Þjóðverja, að í stríði við illskuna, þá semdu menn ekki við illskuna, annað hvort næðu menn að sigra hana eða ekki.  Illskan stæði aldrei við samninga, ef hún semdi, þá væri það alltaf til þess eins að hún fengi tíma til að endurskipuleggja sig áður en hún ræðist aftur til atlögu. 

Sá sem vinnur með Saudum, hann vinnur með Islamistum, það er ekki flóknara en það.

En menn geta blekkt sig, og það er þeim frjálst, allavega hvað mig varðar.

Ég hef lokið mínu verki Merry og er því líka laus frá þrasinu.  Það fór saman að þú snérir mér ekki með rökum þínum, og að ég svaraði einhverju sem snéri þér ekki heldur.

Við ættum að gera verið sáttir við það.

Kveðja að austan.

[Helgi (IP-tala skráð) 7.6.2017 kl. 14:24]

Sæll.

Það virðist allt vera frjálshyggjunni að kenna skv. Ómari jafnvel þó Ómar geti ómögulega haft fyrir því að kynna sér hugtakið. Kannski vill Ómar sósíalisma?

Erum við s.s. alveg viss um að menn hafi áhrif á loftslag? Það er vitað að hitastig jarðar hefur sveiflast til frá því jörðin varð til. Bera menn ábyrgð á því? Þegar Ísland var að byggjast var hlýtt í veðri hér. Hvað olli? Var það bruni olíu? Var Ingólfur að rúnta um að jeppa?

Ætli Ómar geti kannski sagt okkur hvaða kolaorkuver og hvaða bílar ollu Litlu-Ísöld í Evrópu frá 1645-1715? Veit Ómar hvað er rangt við þetta svokalla "hockey stick" graf sem menn hafa veifað framan í þá sem dirfast að efast um áhrif manna á veðurfar jarðar?

Er ekki málið að það er sama hvað Trump gerir, þú finnur því allt til foráttu?

[Ómar Geirsson, 8.6.2017 kl. 21:26]

Blessaður Helgi minn.

Er ekki alveg að fylgjast með, en sá góðan bloggpistil eftir nafna minn Ragnarsson og henti inn athugasemd, sem aftur leiddi mig á spor athugarsemdar þinnar. það er ég skoðaði stjórnborðið.  Var eiginlega búinn að gleyma því að ég ætti hér bloggpistil, sá síðast var eitthvað svo Final countdown.

En hér er ég og enn einu sinni þarf ég að benda þér á að ég skilgreini frjálshyggjuna eftir þeim stjórnmálamönnum sem nýt sér hugtakaheim hennar, og tengi hana svo við kostunaraðila hennar, sem ég hallast alltaf meir að sá í neðra verði eins og hvítþveginn kórdrengur miðað við svertu þeirra. 

Annað sem ég hef bent þér mjög kurteislega á Helgi, að þú ert ekki Lúðvík 14., þú þarft ekki að tala um mig í þriðju persónu, það er ekki nokkur maður að lesa lengur þennan þráð.

Síðan það sem þú segir um global warning að þú mátt alveg hafa það í huga, að þeir sem hafa alla sína þekkingu með lestri á bjánasíðum, að þeir virka alltaf bjánar þegar þeir vitna í þær.  Og síðast þegar ég vissi, að þá var þetta með Ingólf og jeppann, ekki reyndar 2007 eitthvað, heldur meir svona 2014 eitthvað, svo marg hrakin þvæla að ég hélt að ekki nokkur maður notaði þetta lengur.  Það er jú eitt af einkennum kostaðra bjánavísinda og keyptra bjánavísindamana, að þeir uppfæra bullið sitt reglulega, í traust þess að það taki lengri tíma að svara þeim á málefnalegan hátt, og þar með afsanna bullið í þeim, en hjá þeim að skálda upp nýjan hálfsannleik, eða ósannleik, eftir því hvað hráefnið leyfir þeim hverju sinni. 

Og þar sem ég veit Helgi að þú telur þig ekki í þeim hópi, það er bjánahópnum, að þá ætla ég að leyfa þér sjálfum að fletta uppá staðreyndum málsins, en þú þarft ekkert að láta mig vita að þú vitir þá betur, því ég er ekki í bjánahópnum, og veit betur.

Varðandi Litlu ísöldina Helgi, þá er hún eins og hún er, alveg ágæt til síns brúks, kenndi til dæmis Londonbúum að renna sér á skautum, en sé samt ekki alveg samhengið við hana og þess sem er að gerast í lofslagsmálum jarðar í dag. Og ég held Helgi að þú vitir það ekki heldur svo við skulum skauta fram hjá því.

Hvað meira??, jú það efast ekki nokkur maður um áhrif manna á veðurfar jarðar en hins vegar eru nokkrir sem þiggja laun fyrir að spila sig bjána, svo eru jú nokkrir bjánar, eins og Trump kallinn.  En hann má eiga að hann er hreinræktaður, ekki vott af blendingi í honum, svo í raun er ekki hægt að skammast út í hann.  Enda geri ég það ekki, skil ekki hvar þú færð þá firru.

Jú, það er rétt að hitastig jarðar hefur sveiflast til frá því jörðin var til, vandinn er sá að mannkynið þolir ekki of mikinn kulda eða of mikinn hita, það er í dag, þó forfeður okkar hafi bæði lifað af ísöld, og örfáir lifað af síðustu hitabylgju, en tæpt var það. 

Svo að Helgi að þeir sem eru ekki í liði með þeim ógnaröflum sem vilja komu mannlífi öllu til helvítis, ættu ekki að hafa þessar sveiflur í flimtingum.

Þá held ég að þetta sé allt komið, búinn að ítreka að ég er ekkert að bögga Trump, hann er eins og hann er og hefur ekki á nokkurn hátt leynt því, hvorki áður en hann var kosinn, eða eftir.  Einna helst að það lá ekki alveg í loftinu að hann væri ekki bara bjáni, heldur væri hann hreinræktaður einfeldningur, en það var ljóst eftir tíst hans um árangurinn eftir heimsókn hans til Saudana.

Einna helst að ég þurfi að taka fram að þessi þriðja persóna þarna er ekki að biðja um sósíalisma, því það er ákaflega stutt frá honum í Stalínisma, sem er aðeins önnur birtingarmynd frjálshyggjunnar, það er afleiðingin.

En gangi þér vel að uppfæra þig Helgi.

Kveðja að austan.

[Helgi (IP-tala skráð) 16.6.2017 kl. 12:55]

Sæll.

Það er gaman að sjá hve laust við öll svör þitt innlegg er og ég gef mér þá að þú getir ekki hrakið það sem ég er að segja.

Þú ert búinn að hafa mörg ár til að átta þig á því hvað frjálshyggja er en sleppir því alveg að kynna þér hugtakið. Ef Steingrímur J segir Bjarna Ben vera frjálshyggjumann er þá Bjarni Ben frjálshyggjumaður?

Þú þarft alltaf að fara í manninn en ekki málefnið. Hvernig stendur á því? Getur þú ómögulega svarað málefnalega? Þú gætir í það minnsta reynt og þá er hægt að tala um skoðanaskipti en þetta er í raun óttalegt skítkast hjá þér, það er ekki málefnalegt að tala um "bjánasíður" og slíkt.

Það er verra að þú skulir ekki átta þig á mikilvægi hinnar svokölluðu litlu ísaldar en hún tengist einmitt verulega umræðuefninu. Ég þakka þér fyrir að vera svona heiðarlegur að viðurkenna vanþekkingu þína - þú ert maður meiri fyrir vikið. Tengslin eru s.s. þau að veðurfar getur breyst án þess að mannkynið hafi nokkuð með það að segja með sínum athöfnum.

Það er til heilmikið efni um loftslagsmál og þú ættir að prófa að kynna þér báðar hliðar. Hefur t.d. eitthvað af því sem Al Gore talaði um fyrir ca. 20 árum ræst?

[Ómar Geirsson, 17.6.2017 kl. 09:04]

Ussum suss og svei Helgi minn, það er ljótt að halda því fram að hér sé farið í manninn, hugsanlega, fræðilega dettur mér það einna helst í hug að þú hafir tekið það eitthvað inná þig að ég benti þér á að þeir sem hefðu sína þekkingu með lestri bjánasíða, að þeir óhjákvæmilega héldu einhverju bjánalegu fram.

Bað þig því mjög kurteislega að allavega uppfæra þína þekkingu, svona ef ske kynni að þú værir ekki búinn að átta þig á að lífið fyrir hina keyptu gervivísindamenn væri ekki alveg svo einfalt að þeim dygði að tala um Ingólf og jeppa, eða þá miklu speki að loftslag sveiflist til og frá.

Í raun þyrfti kolefnisiðnaðurinn ekki að hafa neinn á launum ef svo væri.

Lítill bissness í því.

Og þú sem einlægur aðdáandi bissnessmanna ættir að skilja það.

Svo betur má gera, og betur áttu að gera.

Þá kemstu kannski að því einn daginn að það eru ekki tvær hliðar eða fleiri á vísindalegri niðurstöðu, þá væri hún ekki vísindaleg.

Síðan enn og aftur, þó margtuggið sé, það er orðræðan sem skilgreinir menn, þess vegna var til dæmis Stalín kommúnisti, ekki vegna þess að Churchill sagði að hann væri kommúnisti.  En Churchill sem lesinn maður vissi alveg að Stalín var ekki kommúnisti, ef miðað var við fræðin, en hann notaði samt þá skilgreiningu út frá hinni hefðbundinni skilgreiningu, og lét ekki nokkurn mann komast upp með að réttlæta óhæfuverk kommúnismans með þeim rökum að óhæfumennirnir væru ekki kommúnistar heldur eitthvað allt annað.

Og vitnuðu í rit Marx og Engels því til sönnunar.

Þess vegna dó kommúnisminn, menn nenntu ekki að hlusta á afsakanir.

Og þannig er það nú bara.

Hafðu það sem best Helgi.

Kveðja að austan.