"Pólitískar árásir og dylgjur".

 

Eftirmæli stjórnmálaferils Vigdísar Hauksdóttur, að setja ný viðmið í lágkúru stjórnmálaskítkastsins.

Erfitt að toppa, nema þá að þau skötuhjú, Vigdís og Guðlaugur setji fram stefnuskrá flokka sinna, sem álit meirihluta fjárlaganefndar, boði til blaðamannafundar, og láti síðan Alþingi kosta prentun og dreifingu hins sama álits.

 

Allt skynsamt fólk sér, að það sem Oddný  Harðardóttir segir hér að ofan, er rétt, burtséð frá því að það er Oddný Harðardóttir sem segir hinn napra sannleik.

Og fólks sem fóðrar pólitískar bombur sínar með því að vitna í þessa skýrslu meirihluta fjárlaganefndar, það setur ofan, því þá er það hluti af lágkúru sem á sér fá fordæmi.

 

Alþingi hefur ákveðnu hlutverki að gegna í stjórnskipan landsins, nefndir þess hafa ákveðnu hlutverki að gegna, og það er ekkert annað apparat í stjórnkerfinu sem gegnir þessu hlutverki.

Að veikja þegar veikt Alþingi með svona vinnubrögðum, er bæði viðkomandi þingmönnum til vansa, sem og þeim flokkum og ráðherrum sem bera ábyrgð á þessu fólki.

 

Svona gerir maður ekki, sagði góður maður einu sinni þegar hann nennti ekki að taka rökræðuna við skriffinnanna sem vildu ná samræmi í skattlagningu, og ákváðu því að skattleggja blaðburðarfólk, og það þurfti ekki að ræða málið frekar.

Svona gerir maður ekki heldur, og þeir sem það ekki skilja, þeir eru komnir fram á hengibrún lýðræðisins og eiga á hættu að falla ofaní hyldýpi skrílræðisins, þar sem það eina er sagt sem talið er að skili völdum og áhrifum, óháð staðreyndu, eðlilegum vinnubrögðum, og eðlilegum samskiptaháttum.

Svona líkt og forsetaframboð Repúblikana er í dag.

 

Og er það sem við viljum?

Kveðja að austan.

Nefndin notuð í pólitískum tilgangi

Athugasemdir

[Dr. Símon Jónsson (IP-tala skráð) 13.9.2016 kl. 13:56]

Sæll sértu Ómar Geirsson

Þennan pistil þinn á ég erfitt með að skilja.

Virðingarfyllst 

Dr. Símon Jónsson

[Ómar Geirsson, 13.9.2016 kl. 16:24]

Það er svona dr. Símon, það er ekki öllu gefið að skilja einfalda hluti, meðal annars þess vegna eru íslensk pólitík eins og hún er.

Ég fullyrði að svona vinnubrögð yrðu hvergi liðin í nágrannalöndum okkar, þar hafa menn þá lágmarksskynsemi að ef menn ætla sér að nýta þjóðþing til að afhjúpa pólitíska andstæðinga, þá láta menn þar til bera aðila sjá um framkvæmdina.

Til dæmis opinberar stofnanir eins og ríkisendurskoðun, eða skipa óháða eftirlitsnefnd. 

Slíkt getur til dæmis gerst eftir að þingnefnd, til dæmis eftirlitsnefndir, komast að einhverju sem þeim þykir ekki eðlileg stjórnsýsla, eða eitthvað sem fer á svig við lög.

En fólk sem hagar sér svona, eins og Vigdís og Guðlaugur, myndu ekki lifa af daginn án þess að þurfa að segja af sér.

Ég held dr. Símon að spurning þín stafi af því að þú teljir réttmætt að ráðast á pólitíska andstæðinga þína, óháð hvaða meðulum er beitt.  Íhugir aldrei að sá dagur geti komið að þitt fólk geti lent í þessu sama.

Eða að sjálft fórnarlambið er lýðræðið og stofnanir þess.

Þú leiðréttir mig ef ég hef rangt fyrir mér.  Og útskýrir þá hvað þú skilur ekki í mjög skiljanlegum pistli.

Hvað mig varðar, þá virði ég ákveðnar grundvallarreglur, og ég ber virðingu fyrir lýðræðinu og stofnunum þess. Og ég er ekki í neinni vinsældarkeppni, og ég ítreka að mér finnst það fólk í andstæðingahópi Steingríms Joð, sem sér ekkert athugavert við þessi vinnubrögð, sama hvað gott kemur ef það má höggi á pólitískan andstæðing, að það setji niður við þá afstöðu.

Það sé í raun orðið eins og það fólk sem það hefur gagnrýnt ákaft. 

Til dæmis ættu sjálfstæðismenn, sem sáu margt athugavert við misnotkun Landsdóms í málaferlunum gegn Geir Harde, þeir ættu núna að líta í spegil og sjá hvernig þeir sjálfir eru orðnir.

Rétt og rangt fer nefnilega ekki eftir því í hvaða flokki menn eru, eða pólitískir andstæðingar þeirra.

Heldur hvað er rétt, og hvað er rangt.

Og skilningur á þessu er ein af grunnstoðum lýðræðisins.

Svarta plágan sem hefur herjað á vestræn samfélög, hefur vissulega brenglað alla skynjun fólks, og stórskaða þau gildi sem eru undirstöðu hinna vestrænu velferðarsamfélaga, en samt, það geta ekki allir verið smitaðir.

Eða ég vona ekki dr. Símon.

Kveðja að austan.

[thin (IP-tala skráð) 13.9.2016 kl. 16:28]

Það sem mér finnst verra er að með þessari hrákasmíð þeirra VH og GÞÞ er kannski búið að loka fyrir þann möguleika að það verði rannsakað á hlutlausan hátt þessi mál.

[Ómar Geirsson, 13.9.2016 kl. 16:55]

Blessaður thin.

Gaman að heyra í þér eftir langt hlé.

Ég held reyndar að ef eitthvað er, þá ýtir þetta undir hlutlausa rannsókn, því Alþingi á fáa kosti til að lenda þessu máli.

Vissulega má færa fyrir því rök að þingmenn eigi að sjá sóma sinn og krefjast tafalausrar afsagnar formanns og varaformanns fjárlaganefndar, en það yrði enn einn skotgrafarhernaðurinn í viðbót, engum til skemmtunar.

En að halda áfram, eins og ekkert hafi gerst, er líka ekki boðlegt, hvorki þjóð eða þeirri stofnun sem Alþingi er.  Það gera aðeins þeir sem hafa það beint á stefnuskrá sinni að gjaldfella Alþingi algjörlega þannig að enginn taki mark á því.

Eftir stendur sú eina færa leið til að lægja öldurnar á þingi og út í þjóðfélaginu, er að skipa óháða rannsóknarnefnd sem fer í gegnum einkavæðingu bankanna, bæði þeirri fyrri og þeirri seinni.

Það er í raun eina leiðin til að stöðva þessi brigsl.

Og gæti verið nauðsynlegur lærdómur áður en menn fara í þriðja gjafavæðinguna, vildarvinavæðinguna eða hvað sem á að kalla þessar fyrri einkavæðingar.

Veit ekki thin, en það gæti alveg gerst að þingmenn snéru bökum saman til að bjarga því sem ennþá er bjargandi af virðingu Alþingis.

Annað eins hefur gerst.

Kveðja að austan.

[Dr. Símon Jónsson (IP-tala skráð) 13.9.2016 kl. 17:11]

Sæll sem fyrr Ómar Geirsson

Í rauninni svarar þú spurningu minni með svari þínu til thin.

"Ég held reyndar að ef eitthvað er, þá ýtir þetta undir hlutlausa rannsókn, því Alþingi á fáa kosti til að lenda þessu máli."

Er það þá ekki jákvætt að Vigdís og Guðlaugur Þór hafi ruggað bátnum?

Virðingarfyllst

Dr. Símon Jónsson 

[Ómar Geirsson, 13.9.2016 kl. 17:20]

Nei, dr. Símon, það er ekkert jákvætt við það.

Það er ekki sama hvernig hlutir eru framkvæmdir.

Kveðja að austan.

[Hrólfur Þ Hraundal, 13.9.2016 kl. 23:03]

 Þú lagðir á flótta undan spurningu minni þarna í þættinum þínum um Skara Skrípó, en látum það kurt liggja, en hversvegna á að reka formann og vara formann fjárlaganefndar?

[Ómar Geirsson, 14.9.2016 kl. 07:42]

Já Hrólfur, ég lagði á flótta í faðm eiginkonu minnar, flótti sem ég veit að þú þekkir ágætlega til.

En þegar ég er við tölvuna, þá held ég að margt sé hægt að segja um mig annað en það að ég svari ekki þeim sem koma inná þræði mína, ég hef nú þegar svarað þér undir pistli mínum um Skara Skrípó, og þar sem þessi spurning er annars eðlis en sú sem þú barst þar upp, þá er sjálfsagt að gefa þér rétt svar við þessari.

Formaður og varaformaður fjárlaganefndar gerðu ekki greinarmun á persónu sinni og hinni opinberu stöðu sinni sem formaður og varaformaður fjárlaganefndar.  Þau boðuðu einkablaðamannafund og kynntu sig þar sem formann og varaformann fjárlaganefndar, og kynntu síðan einkaskýrslu sína, sem Guðlaugur hefur viðurkennt að hafa borgað úr eigin vasa, sem skýrslu meirihluta fjárlaganefndar.

Þau með öðrum orðum skrökvuðu, og misnotuðu opinbera stöðu sína.

Það út af fyrir sig krefst tafarlausrar brotvikningar, en kannski er það alvarlegast að ef þetta er látið viðgangast, þá er sett fordæmi um misnotkun þingnefnda, og þær eiga á hættu að verða vettvangur sama pólitíska argaþrassins og gert hafa þingsali Alþingis því sem næst óstarfhæfa.

Og þá er ekkert eftir, hvorki af störfum eða virðingu Alþingis.

Kveðja að austan.