Satt hjá Guðlaugi, en hver er hans Sýn??

 

Ætlar ekki að hækka skatta, hann ætlar að skera niður, og skera niður.  

Sem vissulega er ekki verðbólguhvetjandi, en mun hafa sömu áhrif og út í Evrópu, samdrátt, samdrátt, og enn þá meiri samdrátt.

Ofaná þann samdrátt mun bætast mikið útstreymi gjaldeyris til að borga út bestu vini Nýfrjálshyggjunnar í Sjálfstæðisflokknum, amerísku vogunarsjóðina, þessa vini sem formaður flokksins kallaði að væru eitthvað sem þyrfti ekki að hafa áhyggjur af í ágætu viðtali við Sigurjón Egilsson á Bylgjunni.  

 

Þetta útstreymi mun fella gengið, gengisfelling mun hækka vöruverð, jafnvel þó Guðlaugur vilji stöðugleika atvinnuleysisins.

Og lánin munu hækka því verðtryggingin er guðanna verk sem ekki má hrófla við að mati forystu Sjálfstæðisflokksins.

Guðlaugi finnst slæmt að tóbaksfíkn hækki lán heimilanna um 3 milljarða, sem ég er alveg sammála honum um, en hann sér ekkert athugavert við hækkun þeirra vegna góðmennsku flokksins við amerísku vogunarsjóðina, enda lærður mjög í fræðum Friedmans og Hannesar sem kveða á um að góðsemd við auðmenn sé ávísun á himnasælu í himnaríki.

Hækkun sem verður talin í hundruðum milljörðum króna.

 

Þessi Sýn, að  tala aðeins um það sem ekkert er, en ræða aldrei það sem er og er gerandi í ógæfu þjóðarinnar, er stefna Sjálfstæðisflokksins í hnotskurn.

Stefna sem menn lítilla sanda þora ekki að tala gegn því það er ávísun á hrakfarir í prófkjörum flokksins.  Fjármálamafían og ESB armurinn sér til þess.

Stefna sem vælir um krónur og aura á meðan milljarðar falla á þjóðina, á meðan milljarðar falla á kjósendur flokksins.

 

Því stefna Sjálfstæðisflokksins er stefna fjármálamafíunnar og stefna Evrópusinna. 

Sem er bæði sorglegt fyrir þjóðina sem og kjósendur flokksins.

 

Helstefna sem öllu mun í Hel koma.

Kveðja að austan.

Hækkar lán heimilanna um 3 milljarða

Athugasemdir

[Nói (IP-tala skráð) 5.12.2012 kl. 18:10]

Best er að flýja sökkvandi skip sem maður getur ekki bjargað sjálfur.

[Haraldur Haraldsson, 5.12.2012 kl. 18:28]

Nei Ómar nú ertu að verða eins og Jónas rtitstjóri farin að vera á móti öllu,og sjálfum þér einnig,þessi frasi um stefnu sjáfsæðisflokks,ef rétt er með hana farið er ekki svona eins þú lísir henni ef öllu er frmfylgt þar!!!þó svo menn hafi farið framm úr sér oft/Kveðja að sunnan

[Ómar Geirsson, 5.12.2012 kl. 22:01]

"Don´t give up" söng Kate Bush með Peter Gabriel Nói, höldum það í heiðri.

Kveðja að austan.

[Ómar Geirsson, 5.12.2012 kl. 22:16]

Blessaður Haraldur.

Finnst þér líklegt að ég sé á móti öllu???

Hvaða frasa er ég að fara með um stefnu Sjálfstæðisflokksins???

Ef þú ætlar að ná jafnvægi á ríkisfjármálum, og útilokar peningaprentun, þá eru til tvær leiðir, hækka skatta eða skera niður. 

Ég reikna með að formaður flokksins tjái stefnu hans og var að hlusta á viðtalið við hann á Sprengisandi, viðtali sem Halldór Jónsson vakti athygli á.

Þar sagði Bjarni næstum því orðrétt, "hvað gerðu þeir í Evrópu Sigurjón???, .... þeir ætla ná niður halla ríkissjóðs með öllum ráðum".  Það er allt að hrynja í Evrópu vegna þessarar heimsku Haraldur, og það sama mun gerast hér.  

Ímyndaðu þér ástandið í dag ef þú hefðir skorið niður um 90 milljarða í viðbót???

Og þetta með gengishrunið vegna krónueignar útlendinga getur þú lesið um í stórgóðri úttekt Morgunblaðsins um hvað muni gerast ef gjaldeyrishöftunum verði aflétt án nokkurra annarra ráðstafana.  Tryggvi Þór tala um mikla vá, formaður þinn segir að menn eigi ekki að gera of mikið úr einstökum málum.

Illugi gerir sér grein fyrir þessu en hann var flengdur í prófkjörinu af manneskju sem sagði ekkert um helstu vandamál þjóðarinnar.  

Guðlaugur Þór hefur líka reynt að koma þessu máli í umræðuna, honum gekk líka illa í prófkjörinu.  

Þeim sem gekk vel í prófkjörinu, sögðu ekkert um hina miklu vá.

Ertu ekki farinn að kveikja Haraldur???

Það er mikil vá framundan ef allir stinga hausnum í sandinn og Keynisminn er eina ráðið til að bjarga okkur og eina ráðið til að bjarga Evrópu.

En það þarf meira til, miklu meira.

Það þarf að fella frjálshyggjuna í eitt skipti fyrir öll.  Og þeir sem eiga líf sem þarf að vernda, munu gera það.

Kveðja að austan.

[Haraldur Haraldsson, 6.12.2012 kl. 00:46]

Æi Ómar þú gleymir þriðju leiðini framleislu aukningu og nýtingu auðlindana vinur vor sennilega viljandi/Kveðja að sunnan!!!

[Ómar Geirsson, 6.12.2012 kl. 08:57]

Blessaður Haraldur.

Ég gleymi engu en get eðli málsins ekki sagt allt í svona pistlum sem eru ekki ritgerðir.  Og þó ég segi aðeins sumt, þá eru þeir í lengri kantinum miðað við það sem gerist í bloggheimi.  Ítarlegri pistlar eru munaður sem maður hendir aðeins inn þegar maður hefur byggt upp lesendatryggð.

Og þú munt fá þá um stefnu eða réttar sagt stefnuleysi forystu Sjálfstæðisflokksins.

Hér fyrir ofan er ég aðeins að vekja athygli á stóra málinu og hvaða afleiðingu það hefur fyrir þjóðina ef það er hundsað.  

Þriðja leiðin sem þú kallar kæmi ef ég færi að dunda mér við að tæta í mig stefnuleysi forystu flokksins.  Ég hef látið það eiga sig því það eru raddir innan flokksins sem sjá hvað er að gerast og koma með skynsamlegar tillögur til úrbóta.  Ég hef hinkrað við og beðið hvort flokkurinn ætli virkilega ekki að henda frjálshyggjuheimskunni fyrir borð og taka upp sína hefðbundna íhaldsstefnu sem hann fylgdi undir forystu stóru leiðtoga sinna, þeirra Ólafs, Bjarna og Geirs.

Þriðja leiðin er svona lýðskrumsleið í anda Perónismans í Argentínu.  Falleg orð en ekki í nokkrum takt við raunveruleikann.  Það er raunveruleikinn sem ákveður hvað þarf að gera, og það eru alvarleg vandamál sem þarf að takast á við, hafa skoðun á.  Til dæmis snjóhengjan og skuldamál heimilanna.   Skoðanaleysi er í raun stuðningur við ríkjandi ástand, við verðtrygginguna, við yfirtöku amerísku vogunarsjóðanna á íslenskum efnahag.  Þar með er fyrirfram búið að útiloka þær forsendur sem þurfa að vera fyrir hinni svokölluðu þriðju leið.  

Það er aldrei gróska í ofurskuldsettu þjóðfélagi.

Þetta er svona einföld staðreynd sem ekki er hægt að rífast um.

Það er líka staðreynd að fjárhagur orkufyrirtækja okkar leyfa ekki nýjar stórframkvæmdir, komi ekki til nýtt fjármagn þá verður ekkert af þeim.  Og Haraldur, við erum að tala um að skapa hér þenslu í miðri heimskreppu sem ekki sér endann á.  Það er óraunhæft, og enginn borgarlegur íhaldsmaður hefði tekið undir svona vitleysu hér á árum áður.  Þá vissu menn að þeir yrðu að sjá til lands í fjárfestingum sínum.  Þetta að ætla sér að rífa allt upp með stórframkvæmdum er skrum að ómerkilegustu gerð, sett fram til að blekkja ykkur heiðarlegu flokksmennina, til að gefa ykkur dúsu eða von, á meðan ríkjandi ástand er stutt.

Og hið ríkjandi ástand er yfirtaka fjármagns á öllu þjóðlífinu.

Og eftir þá yfirtöku mun fjármagnið krefjast að landið gangi í ESB.

Nei, Haraldur þú ættir ekki að vera svona fljótur að rjúka upp þegar þú lest skrif mín, þú veist að ég þori í rökræðinu og ef þér finnst ég skensa flokk þinn, þá ættir þú að íhuga af hverju þessi höggstaður er á honum.  Það vill svo til að hagfræðiskólinn sem ég byggi á, kenndur við frægasta borgarlega hagfræðing síðustu aldar, Keyne, John Meynard Keynes, er sá skóli sem gagnsókn borgarstéttarinn byggðist á þegar stríðið við sósíalista stóð sem hæst á fyrri hluta 20. aldar um hver ætti að vera framtíðarskipun vestrænna þjóðfélaga.

Bandarísku hagfræðingarnir sem benda á heimsku niðurskurðarins eru frjálslyndir hægrimenn, væri svona á miðjunni í Sjálfstæðisflokknum.

Það voru líka kristilegir íhaldsmenn sem hröktu frjálshyggju 19. aldar í skúmaskot sín, skúmaskot sem hún kom ekki út úr fyrr en gagnsókn auðmanna í bandaríkjunum gegn velferðarkerfinu hófst uppúr 1970.  Þó frjálshyggjan hafi yfirtekið sálir hægri flokka þá hafa andstæðingar hennar alltaf komið úr röðum hægri manna, íhaldsmanna sem hafa þá siðvitund að þér ber að gæta bróður þíns, og það sem þú gerir þínum minnsta bróður, það gerir þú og mér.  

Það eru þið í grasrót flokksins sem gangið um með hauspoka svo þið sjáið ekki hvað er í raun að gerast.  

Það er eins og enginn ykkar eigi líf sem þarf að verja.

Kveðja að austan. 

[Haraldur Haraldsson, 6.12.2012 kl. 16:38]

En og aftur dámar mér þínar yfirlýsingar Ómar en lengi skal manin reyna,ég held að þú sér fariin að slá Steingrími og Jóhönnu við í hatri á Sálfstæðisflokkin,við höfum jú setið uppi með offrjálshyggjumenn en það er mein sem alavega ég bert á móti!! og míni líkar!!!,þetta er stór flokkur og margar skoðanir þar uppi,en eg sé ekki annað en þú sért að verja þessa vinstri stefnu og ekkert annað,eða hvað???þú veður áfram i fræðingum sem eg er ekki að gefa neitt í þessi fræðingar sem hafa sagt þetta og hitt eru bara foðusnakkar!!! eins og allstaðar í okkar lífiu eru þeir,við lostnum ekki við þá, Að segja að þennsla megi ekki vera í kreppu er bara tóm vitleysa ,bara mátuleg ekki um of þar í lyggur þetta að við verðum að gera eitthvað ,en ekki bara skita allt og alla út,komdu með leiðir!!!!!Kveðja að sunnan

[Ómar Geirsson, 6.12.2012 kl. 18:21]

Blessaður Haraldur.

Þú ert farinn að minna mig á Loft þegar hann skammaði mig blóðugum skömmum eftir fyrra þjóðaratkvæðið um ICEsave þegar ég benti á í blogggrein aðeins eitt gæti skýrt samstarf Bjarna Ben við ríkisstjórnina, væri að hann myndi samþykkja slíkan samning að lokum.  Færði rök fyrir máli mínu, sem Loftur taldi fráleit, en annað kom á daginn og þegar yfir lauk þá var hann mun harðari við Bjarna en ég nokkurn tímann.  

En inntak skamma Lofts var ekki málefnalegur ágreiningur heldur að ég skyldi voga mér að gagnrýna formann flokksins.  Eins og Þjóðarheiður væri félagsskapur sjálfstæðismanna, og það að við skyldum vera sammála í ICEsave, gerði mig sjálfkrafa að þegnhollum sjálfstæðismanni.

Sem ég er ekki, öll mín gagnrýni kemur frá miðjunni, og það vinstra megin við miðju.

Ég tók harkalega á móti Loft að gefnu tilefni, en ég hef ekki gert það við þig Haraldur því ég virði skoðanir þínar, sem oft fara saman við mínar, en alls ekki alltaf.

En það er ekki góð latína á þessari síðu að tengja mig við Steingrím og Jóhönnu, og ég hef takmarkað umburðarlyndi gagnvart því.  Reyndar held ég að þú sért sá eini sem hefur komist upp með það án þess að byssur fari á loft.

Víkjum þá að efnislegum svörum þínum.

Ofsafrjálshyggjan var ekkert mein á flokknum, hún eyðilagði þessa þjóð.  Og sé hún ekki barin til hlýðni, þá mun hún gera það aftur.  Ég dreg það ekki í efa að þú og þínir líkar berjist gegn henni, það hafa hægri menn gert á öllum tímum.

John Meynard  Keyne var ekki froðusnakkari, hann var svar borgarastéttarinnar við Marx og Lenín, og foringjarnir sem gerðu þig að sjálfstæðismanni, Ólafur, Bjarni eldri og Geir, þeir voru undir áhrifum hans. 

Keynisminn tryggði hagsæld Vesturlanda í rúm 50 ár, dæmi um best heppnuðu aðgerð hans er Marshal aðstoðin sem reisti Evrópu uppúr rústum stríðsins.

Keynismanum má lýsa á marga vegu en ein sú besta er þessi setning, "þensla er leiðin út úr kreppu", grunnatriði hagfræðinnar sem reynslan hefur margsannað.

Það er lykilatriðið að framleiða sig út úr kreppum.  

Vissulega hefur formaður ykkar sagt það, en hann hefur ekki áttað sig á mótsögninni í sínum málflutningi.  Jafnvægi í ríkisfjármálum á krepputímum er banabiti hagkerfa, og það er þetta jafnvægi sem Bjarni ætlar að ná fyrst, áður en það kemur að hinu seinna.  

Og það er ógæfa ykkar sjálfstæðismanna að elta þessa vitleysu í honum.

Því raunveruleikinn sigrar alltaf góð áform.  Þess vegna er samdráttur í Evrópu, menn ætla að bæta í, en byrja fyrst að skera niður.  Menn hafa ekkert lært að mistökunum frá Kreppunni miklu.

Annað sem Bjarni áttar sig ekki á er að forsenda vaxtar er að skapa til þess ytri skilyrði.  Það er ekki nóg að lækka skatta ef vaxtastig og skuldsetning vinna gegn fjárfestingum. 

Þriðja, það er ekki nóg að tala um stórframkvæmdir ef öll orkufyrirtæki eru annað hvort gjaldþrota líkt og HS Orka eða Orkuveita Reykjavíkur, eða hálf gjaldþrota eins og Landsvirkjun, og koma ekki með lausn á fjármögnun viðkomandi virkjana.  Frekari skuldsetning á slík fyrirtæki er óðs manns æði, og það er ekki froðusnakk að benda á það, þessi einfalda skynsemi er rauður þráður borgarlegs hugsunarháttur allt frá því á 17. öld.  Menn gerðu ekki sjálfa sig gjaldþrota að gamni sínu, þetta vita allir sem leggja sitt eigið fé undir.

Og það gildir sama þó menn séu að leggja fé almennings undir.

Jafnframt er það staðreynd að það er heimskreppa og það er engin eftirspurn eftir nýjum verksmiðjum á meðan vita ekki hvernig fjármálakerfi heimsins reiðir af.  Að vísa í slíka lausn, með öllum þeim fyrirvörum sem er á henni, og nota hana sem afsökun fyrir því að ekki er tekist á við aðsteðjandi vanda eins og snjóhengjuna eða skuldavanda heimilanna, það er froðusnakk og hefði verið fyrir neðan virðingu þeirra manna sem leiddu Sjálfstæðisflokkinn á árum áður.  Allavega kann ég engin dæmi um slíkan málflutning hjá þeim.

Einnig fullyrði ég að þeir hefðu tekist á við þann vanda sem Tryggvi Þór Herbertsson lýsir svo ágætlega í grein sinni, Að steðjar vá.  

"Það er með miklum þunga sem ég skrifa þessi orð. Undanfarnar vikur hafa komið fram trúverðugir aðilar sem bent hafa á þá miklu hættu sem felst í að við Íslendingar undirgöngumst að fullu þær kröfur sem erlendir aðilar eiga á þjóð okkar". 

Og hver er þessi vandi??

"Vandamálið sem við Íslendingar stöndum frammi fyrir er að landið framleiðir ekki nægan gjaldeyri til að standa undir skuldbindingum gagnvart erlendum kröfuhöfum og jöklabréfaeigendum. Skuldbindingarnar nema í dag um 1.200 milljörðum króna og við eigum ekki gjaldeyri til að mæta þeim. Gjaldeyrisforðinn (sem er tekinn að láni) og jákvæður viðskiptajöfnuður standa sennilega undir greiðslum sem tengjast afborgunum af erlendum lánum atvinnulífsins og opinberra aðila næstu ár – en rétt svo. Til að borga kröfuhöfum þyrftum við að hafa í handraðanum á næstu árum um 1.200 milljarða króna aukalega í erlendum gjaldeyri. Við þá upphæð bætast síðan árlega um 70 milljarða vextir og arður af hlutbréfum í bönkunum. Upphæðin fer því hækkandi eftir því sem tíminn líður bak við gjaldeyrishöft. "

En það sem mest er vert, Tryggvi viðurkennir að hann hafi vanmetið vandann, að það þurfi róttækari aðgerðir en hann taldi upphaflega.

"Fram til þess hafa stjórnvöld að mestu litið á vandamálið sem hér er lýst sem endurfjármögnunarvanda. Við þyrftum einfaldlega að fá lánað fé erlendis, losa erlenda aðila út og síðan yrðu lánin greidd til baka á næstu árum og áratugum. Sú leið gengur hinsvegar ekki upp. Jafnframt eru hugmyndir, m.a. ég hef lagt þær fram, sem byggjast á að ríkið skipti á krónum og skuldabréfum í erlendri mynt óráð – gleymum þeim."

Þessi leið sem hann leggur til að við gleymum er leið forystu Sjálfstæðisflokksins, hún dugar ekki, hún er ógn við samfélagið.  Tryggvi er sjálfstæðismaður, góður sjálfstæðismaður, alveg eins og þú Haraldur, og hann er ekki sammála formanni þínum sem telur að menn séu að gera of mikið úr vandamálinu (sbr viðtalið á Sprengisandi).

Að vanmeta þennan vanda er dauðadómur yfir sjálfstæðu íslensku atvinnulífi, það mun allt enda í erlendri eigu, tekið uppi skuld.

Þá er það skuldavandi heimilanna þar sem opinber stefna forystu Sjálfstæðisflokksins er að láta hagvöxt og aukna framleiðslu leysa hann, við verðtryggingunni má ekki hrófla.

Ég hef bloggað um og vakið athygli á mjög góðum greinum eftir 2 þingmenn Sjálfstæðisflokksins, þá Tryggva Þór og Kristján Þór,  um þennan vanda og ætla ekki að endurtaka hann.  Þeir urðu undir í flokknum haustið 2010, fyrir fólki sem til dæmis var sigurvegarar prófkjörsins í Reykjavík og í Kraganum.  

En vandinn hefur ekkert lagast þrátt fyrir að Sjálfstæðisflokkurinn studdi allar tillögur ríkisstjórnar Jóhönnu Sigurðardóttur, og hefur sjálfur ekki komið með eina, ekki eina, sjálfstæða tillögu um hvernig á að takast á við þennan skuldavanda.  

Um þennan vanda segir miðstjórnarmaður í Sjálfstæðisflokknum, Halldór Gunnarsson.

 "Þegar 60-70% heimila hafa misst allt sitt og um 5.000 heimili, sem skulda Íbúðalánasjóði, eru hætt að greiða af lánum og þær skuldir áætlaðar frá hruni um 7,5 milljarðar og almenningur treystir sér ekki til að taka verðtryggð lán hjá sjóðnum, hlýtur að vera ljóst hver vandi heimilanna er. Smáskammtalækningar duga ekki lengur. Áætlað nýtt fé til sjóðsins upp á 12 milljarða nægir ekki. Færa verður höfuðstól lánanna niður eða lengja þau til 80 ára með föstum vöxtum, þannig að eigendum, sem hafa misst allt sitt, verði gert kleift að búa áfram á heimilum sínum með viðráðanlegri leigu. Innantóm orð duga ekki eða aðdróttun um sjálfhverft fólk."

Og hans leið er ekki leið forystu Sjálfstæðisflokksins, að gera ekki neitt annað en Jóhanna Sigurðardóttir hefur gert, Halldór leggur þetta til.

"Það verður að taka vexti og verðtryggingu nýjum tökum. Við sjáum núna nákvæmlega það sama og áður, hækkandi stýrivexti, rýrnandi gengi, viðvarandi verðbólgu, sem á aðeins eftir að hækka og auknar skuldir heimila. Breyta verður verðtryggingunni þannig að hún rýri krónuna ekki stöðugt, heldur taki t.d. mið af meðalverðbólgu viðskiptalanda og meðalverði gjaldmiðla þeirra. Þetta yrði ný verðtrygging, sem þýddi að allir stæðu vörð um gengi krónunnar. Með lækkun vaxta mundi fjármagnið síðan leita úr skjóli áhættulausra hárra verðtryggðra vaxta í geymslum Seðlabankans, út til ávöxtunar í arðbærar framkvæmdir, sem kæmu hjólum atvinnulífsins af stað, hækkuðu laun og ykju verðmæti eigna, sem nú seljast á hrakvirði. " .

Það er ekki þannig að það séu allir sjálfstæðismenn sammála um að gera ekki neitt, en það hefur skelfilegar afleiðingar að gera ekki neitt.

Og Haraldur, gífuryrði um mig eru ekki rök, ef ég hef Bjarna fyrir rangri sök, að hann hafi lagt eitthvað konkret til, annað en almennt blaður í anda Evu Peron, þá getur þú vitnað í grein, eða annað sem ég get skoðað, og þá skal ég vera fyrstur til að leiðrétta þessi orð.

Það er nefnilega þannig að ég á nokkur jákvæð blogg um Bjarna Benediktsson og get alveg bætt einu við.

Vegna þess að ég berst fyrir ákveðnum málstað, framtíð barna minna, en ekki ákveðnum flokki.

Ef þú telur rök mín Haraldur vera hatur í garð Sjálfstæðisflokksins, þá verður svo að vera, slíkt hatur er þá innan flokksins líka.

En þetta er akkúrat það sem stuðningsmenn VinstriGrænan gera, þeir verja flokkinn og formanninn, ekki málstaðinn, ekki lífsskoðanir sínar og hugsjónir.

Það er aumt hlutskipti Haraldur, og ekki Sjálfstæðisflokknum til sóma.

Hann er betri en það.

Kveðja að austan.

[Haraldur Haraldsson, 6.12.2012 kl. 20:38]

Ómar ég er eiginlega þarna bara mikið sammála mjög mörgu þarna!!! sem þú segir og það sem þar er á bakvið!!serstaklega þetta með það sem séran segir þarna!!!!það er mjög gott,þó svo ég hfi ekki verið honum alltaf sammála,er ég það þarna!!!það er svo að við erum mestmegnis sammála,og það mun koma betur í ljós í skrifum mínum framvegis!!en hafi ég sært þig í skapofsa mínum bið ég þig fyrirgefninar vinur minn/Kveðja að sunnan

[Ómar Geirsson, 6.12.2012 kl. 22:19]

Við erum mikið sammála Haraldur, miklu meira en þig grunar, við erum að draga sama vagninn inní framtíðina.

Við viljum báðir þjóðinni vel, og það þarf samstillt átak allra til þess að svo verði.

Ég veit líka að formaðurinn þinn vill þjóð sinni vel, en það er þessi bölvaða togstreita við hagsmuni fjármagnsins.

Þetta er sama glíman um allan hin vestræna heim, en þegar menn átta sig á að rót vandans er alltaf sú sama, að þetta er í raun glíma milli góðs og ills, þá verðum við allir þrír í sama liði, með sama markmið.

Að vernda líf afkomenda okkar.

Þangað til höldum við áfram að skiptast á skoðunum, jafnt um þær sem við erum á sama máli sem og hinar þar sem lítum ekki hlutina sömu augum.

Bið að heilsa þér "Halli gamli".

Kveðja að austan.