Fár til að fífla fólk.

 

Tillögur stjórnlagaráðs hafa aðeins einn og aðeins einn tilgang.

Að fífla þjóðina. 

Að taka athygli hennar frá brýnum málum sem snerta framtíð hennar og lífsgrundvöll  og fá hana í stað þess að rífast um eitthvað sem ekki er. 

 

Tillögurnar eru illa ígrundaðar, þær byggjast mikið á lýðskrumi og bábiljum sem endurspegla stjórnmálaumræðu dagsins í dag og eru ætlaðar sem innlegg inní þá umræðu þó yfirskynið sé einhver meint þörf á að þjóðin þurfi nýja stjórnarskrá.

Þær eru því á sviði stjórnmála, ekki stjórnlaga.

 

Og það vita þeir alveg sem að fárinu standa, þeir hafa ekki nokkurn áhuga að endurskoða stjórnarskrána, vita alveg eins og er að þeir hafa ekki fylgi til þess.

Þjóðaratkvæði þeirra er liður í valdabaráttu þeirra við gömlu borgarastéttina sem að einhverjum ástæðum virðist ekki fylkja sér nógu vel um hina nýju auðstétt og það markmið hennar að koma þjóðinni í Evrópusambandið.

Fórnarlambið er síðan þjóðin og framtíð hennar.

 

En það sorglega í öllu þessu máli er blind fylgispekt margra í svokölluðum Andófi við fárið eins og að það sjái ekki hvaða hagsmunir búi að baki eða hver rauntilgangur þessa skrípaleiks er.  

Hvers vegna vinnur það með ríkisstjórn Jóhönnu Sigurðardóttur????  

Ríkisstjórnar sem reyndi að þrælsetja þjóðina í ICEsave vegna hagsmuna Evrópusambandsins, ríkisstjórnar sem kom skellinum af Hruni sýndarhagkerfis útrásarinnar alfarið yfir á almenning, ríkisstjórnar Alþjóðagjaldeyrissjóðsins, ríkisstjórnar hins dauða fjármagns sýndarhagkerfisins.

Og sér það ekki sömu fingraförin á baráttu stjórnarskráarfélagsins eða hvað sem þetta kostaða skoffín heitir og eru á samtökunum Já Ísland.  Fingraför Evrópusambandsins.  Sem með fjármunum sínum reynir að hafa áhrif á ákvarðanatöku þjóðarinnar í brýnustu hagsmunamálum hennar.

Sér það ekki að þegar allt hjómið og málskrúðið er tekið út úr tillögum stjórnlagaráðs þá stendur aðeins eitt eftir.  Atlaga að sjálfstæði þjóðarinnar.  Að lærdómur valdklíkunnar af ICEsave óförum sínum er að afnema það ákvæði stjórnarskráarinnar sem gerði þjóðinni kleyft að grípa framí ákvarðanir hennar.

Til hvers þessi blindi stuðningur við Óvininn eina????

Allavega veit ég að loksins þegar hinn almenni gyðingur Varsjárgetthósins reis upp, þá var það ekki til að knýja á hraðari flutning í útrýmingarbúðirnar, svo mikið er víst.  

 

Og eins sorglegur og þessi stuðningur er, þá er siðferðisgjaldþrot Andófsins ennþá alvarlegri.

Hvað voru menn að gagnrýna eftir Hrunið 2008??

Var það ekki spilling, gerrræðisleg vinnubrögð, nánast alræði framkvæmdarvaldsins???  Og það með réttu því íslenskur efnahagur var orðinn einn allsherjar vogunarsjóður og ríkisstjórn landsins dyggur stjórnandi hans.

 

En hvað eru menn að styðja í dag????

Aðför gjörspilltrar valdklíku að dómsvaldinu???  Sniðgöngun stjórnarskráarinnar???

Byggðist gagnrýnin sem sagt á þeirri lógík að "þeir" máttu ekki en "við" megum því tilgangur okkar er svo göfugur???  Hin klassíska réttlæting ofríkis og kúgunar.

 

Og hvernig vinnubrögð leggur Andófið lag sitt við???

Eru þessi drög stjórnlagaráðs tækar til efnislegrar umræðu, eða hvað þá ákvarðanatöku???

Ef marka má gagnrýni lögspekinga þá er svo ekki.  Og það er mjög alvarlegt mál.  Jafnvel þó tilgangur sé góður, sem hann er ekki því öll aðförin er sjónhverfing til að vega að sjálfstæði þjóðarinnar, þá verða menn að vanda til vinnubragða, komi fram gagnrýni þá verða menn að bregðast við, með rökum.  

En einu viðbrögðin eru skítkast af lægstu sort.  Að það sé verið að verja gömlu stjórnarskrána í þágu hefðbundinnar valdaklíku Sjálfstæðisflokksins.  Að það sé verið að verja kvótakerfið og svo framvegis.  

Jafnvel þó sá hvati lægi að baki hinni efnislegri gagnrýni þá svara menn slíkri gagnrýni með rökum, ekki skítkasti.  Það er jú verið að breyta stjórnarskrá landsins.  Ekki að semja ályktun landsfundar einhvers stjórnmálaflokks.

Síðan má efast alvarlega um dómgreind þess fólks sem trúir að forsenda valda Sjálfstæðisflokksins sé stjórnarskrá landsins, ekki kjörfylgi hans.

 

Ríkisstjórnin hefur það sér til afsökunar á dómsdagsvitleysunni að hún þjónar húsbændum sínum sem vilja landið inní ESB.

Þá afsökun hefur íslenska Andófið ekki.  

Samt hefur enginn flokkur Andófsins ályktaði gegn vitleysunni og þar með sýnt að hann á eitthvað erindi á Alþingi Íslendinga.  Sá sem þorir ekki að bregðast gegn lýðskrumi í grundvallarmáli eða samþykkir gerræðisleg vinnubrögð hugsanlega meirihluta gegn minnihluta í jafn mikilvægu máli og endurskoðun stjórnarskráarinnar er, hann mun brotna þegar raunveruleg baráttan fyrir framtíð landsins byrjar.  Hann hefur ekki nokkuð það sem þarf að hafa til að fjármálamafían láti undan í skuldamálum heimilanna.  Eða annað það sem skiptir þjóð þessa máli.

Og ef grunnhyggnin er svo mikil að hann sér ekki ógnaröflin sem að baki búa, ógnaröflin sem hann þykist ætla berjast gegn, hvernig þykist hann þá geta barist við þau þegar útí alvöruna er komið ef það dugar Valdinu að henda beini út í móa og segja, "Sjáðu Snati, sjáðu!"

 

Þetta er ofsalega sorglegt, sorglegra en nokkur orð fá lýst.

Því hver berst fyrir framtíð barna okkar ef við bregðumst????

 

Ég ætla samt að vitna í orð framkvæmdarstjóra hins kostaða stjórnarskráaráhugamannafélags eða hvað sem ESB kostunin kallar áróðurstæki sín þessa dagana, og hafa þau sem lokaorð þessa pistils.

Það er hugsanlegt að einhver sæi að sér, að einhver hætti að elta beinið út í móa.

 

"Stjórnarskráin er grundvallarsáttmáli þjóðarinnar".

Gleymum því aldrei. 

Slíkur sáttmáli er aldrei settur í ófriði.

 

Ekki einu sinni "Við" höfum rétt til þess.

Kveðja að austan.

 

 

 

 

 

Yfir 8.600 búnir að kjósa

Athugasemdir

[Bent (IP-tala skráð) 18.10.2012 kl. 16:10]

Sæll Ómar.

Þessi kosning er með öllu ómarktæk, og ólýðræðisleg. Ég, ásamt öðrum áhafnarmeðlimum ætlaði að kjósa á miðvikudaginn 17. Okt. En nei, það er bara opið á fimmtudögum frá 15 - 17. Við gátum því ekki kosið, þar sem við fórum á sjó í dag fimmtudaginn 18. Okt.

Þetta hlýtur að vera ólögleg kosning.

[Ómar Geirsson, 18.10.2012 kl. 16:29]

Blessaður Bent.

Ég reikna með að þetta sé samkvæmt lögum og ætlast til að fólk kynnir sér svona reglur um utankjörstaðaatkvæðagreiðslu.  

En svona þröngur tímaramma segir mikið um hvaða augum stjórnvöld líta svona kosningu, það má næstum því tala um kosningahindrun.

Málið er hins vegar að Alþingi ætlar sér ekki að gera neitt um niðurstöðu kosninganna, þetta er show til að taka athygli fólks frá hinni hægu yfirtöku fjármagns á þjóðinni og eignum hennar.

Er einhver að ræða snjóhengjuna í dag, eða af hverju vaxtaþjófarnir fengu sjálfdæmi um að reikna vexti á hin ólöglegu gengislán????

Það er verið að spila með fólk.

Kveðja að austan.

[Jónas Kr (IP-tala skráð) 18.10.2012 kl. 16:36]

Spurningar:

Hvernig getur þú blandað saman EU, Icesve og stjórnarskrármálinu?

Var ekki öllum gefin kostur á að bjóða sig fram og kjósa i Stjórnlagaráð? og hafa þannig áhrif útkomuna?

[Ómar Geirsson, 18.10.2012 kl. 17:48]

Blessaður Jónas.

Almennt er svarið við spurningu þinni að ég get það vegna sérstakra hæfileika að sjóða saman svona kokteila, eiginlega sérhæfi mig í slíkum hristingum.

Nú og svo er það vegna þess að það er svo augljóst., maður þarf aðeins að hafa smá minni, örlitla sögulega þekkingu á vinnubrögðum atburðarhönnuða, og nota augun til að sjá það sem er, en ekki það sem er látið virðast vera.

Tökum sem dæmi úr sögunni, þegar nokkrir ribbaldar klæddir pólskum hermannabúningum, réðust inní útvarpsstöð í Þýskalandi, í ágúst 1939, fluttu þar æsingarræðu um heilagan rétt Pólverja til að drottna yfir heiminum, þá var til fólk sem trúði Göbbels að hér hefði Pólverjar enn einu sinni sýnt sitt rétta eðli, ef þeir yrðu ekki stöðvaðir í tíma, þá myndu þeir ráðast á þýsku þjóðina og þrælka hana.  Flestir notuðu samt guðsvitið og sáu ekkert samhengi í að Pólverjar, sem óttuðust mjög hervæðingu Þýskalands, færu að ögra nasistum með þessum hætti.  Og höfðu rétt fyrir sér, Göbbels sjálfur skipulagði hina meintu árás.  Og þýsk úrhrök sáu um að framkvæma hana.

Hagsmunir láta oft eitthvað virðast vera í ákveðnum tilgangi, til að ná markmiðum, til að skapa upplausn og svo framvegis.

Víkjum þá að hinu augljósa í sambandi við kosningarnar á laugardaginn.

Þegar ICEsave 2 kom í þjóðaratkvæði þá heyrðust raddir að hjá mörgum nágrannaþjóðum okkar væri ákvæði  í stjórnarskrá að ekki mætti senda fjárlög eða ákvarðanir sem væru teknar vegna alþjóðlegra samninga, í þjóðaratkvæði.  Sem skipti engu máli því þjóðaratkvæði hér fór eftir íslensku stjórnarskránni, ekki þeim sem hefðu bannað að þjóðin hefði greitt atkvæði um ICEsave.

Þegar Hæstiréttur ákvað að ógilda kosningarnar til stjórnlagaráðs en ríkisstjórnin ákvað samt að halda áfram með ráðið án þess að kjósa aftur, þá var ljóst að eitthvað annarlegt bjó að baki allri málsmeðferðinni, enda rök og aðferðafræði sótt í smiðju Göbbels.  

Og fyrir einhverja skrítna tilviljun dúkkar upp ákvæði sem er orðað þannig.

"Á grundvelli þeirra er hvorki hægt að krefjast atkvæðagreiðslu um fjárlög, fjáraukalög, lög sem sett eru til að framfylgja þjóðréttarskuldbindingum né heldur um skattamálefni eða ríkisborgararétt."

Sem girðir fyrir að þjóðin geti risið upp gegn ICEsave framtíðarinnar eða öðru því sem stjórnmálamenn okkar geta gert í framtíðinni undir skálkaskjóli alþjóðlegra samninga. 

Svona er ekki tilviljanir og þegar allt málskrúðið er tekið burt úr tillögum stjórnlagaráðs, þá er þetta eina raunverulega breytingin frá núverandi stjórnarskrá.  Og þjónar því valdi vel sem vill koma landinu inní Evrópusambandið, með illu ef fólk lætur ekki segjast með góðu.

Tengingin við ESB er síðan angi þess ásamt því að það er ekki hægt að horfa framhjá líkindinum á störfum stjórnarskráarfélagsins og samtakanna Já, Ísland, fyrir síðustu þjóðaratkvæðagreiðslu.  Ef Brussel verður einhvern tímann lögð í rúst eins og Berlín á sínum tíma, þá munu skjalasöfn upplýsa um þessa þræði.

En almennt vinnur stórveldi svona, það hlutast til um málefni annarra þjóða og reynir að hafa áhrif á ákvarðantöku í þágu hagsmuna sinna.  Evrópusambandið er með menn í vinnu við þessa hluti og ráðstafar til þess miklum fjármunum.  Og má eiga, að það gerir það fyrir opnum tjöldum.

Varðandi seinni spurningu þína, þá er henni auðsvarað, Jú, og það var kosið.

En hún var dæmd ógild.  Þar með var ljóst að eitthvað annað bjó að baki en umhyggja fyrir stjórnarskránni þegar menn héldu áfram villuferð sinni.

Sem kom á daginn.

Kveðja að austan. 

[Haraldur Haraldsson, 18.10.2012 kl. 22:07]

Eins og svo oftar en ekki,er þetta það sem ég hefði viljað segja,en kem ekki nógu vel frá mér,en þaað grir þú einstaklega vel!!!/kveðja að sunnan

[kutepaster (IP-tala skráð) 19.10.2012 kl. 05:46]

Jóhanna Sigurðardóttir forsætisráðherra segir að þó að kjósendur hafni því að leggja tillögur stjórnlagaráðs til grundvallar endurskoðun stjórnarskrárinnar útiloki það ekki að gerðar verði afmarkaðar breytingar á stjórnarskránni fyrir næstu þingkosningar. Krossi fólk við já sé einnig hugsanlegt að efnislegar breytingar verði gerðar á tillögunum.

Þetta kom fram í sérstakri umræðu um stjórnarskrármálið sem fór fram á Alþingi í dag. Málshefjandi var Bjarni Benediktsson, formaður Sjálfstæðisflokksins, og til andsvara var Jóhanna Sigurðardóttir forsætisráðherra. Þjóðaratkvæðagreiðslan fer fram um næstu helgi, en í henni er spurt hvort kjósendur vilji leggja tillögur stjórnlagaráðs til grundvallar við gerð nýrrar stjórnarskrá. Einnig er spurt um fimm tiltekin atriði sem er að finna í tillögum ráðsins.

[Ómar Geirsson, 19.10.2012 kl. 09:34]

Takk Haraldur, þetta eru eðalmæli með pistlinum.

kutepaster, Jóhanna virðir hvorki lög, enda margdæmd, dómsstóla, enda ítrekað sniðgengið þá, hvað þá að hún taki mark á þjóðinni, þegar búin að tapa 2 þjóðaratkvæðagreiðslum.

Það eina sem hún virðir er hagsmunir hins dauða fjármagns sem öllu ræður.  Hvort sem það er AGS eða amerísku vogunarsjóðirnir.

Og fyrir það er hún dáð og dýrkuð af íslenskum jafnaðarmönnum.

Kveðja að austan.

[Rakel Sigurgeirsdóttir, 20.10.2012 kl. 06:18]

Það verður svo sannarlega ekki af þér tekið að þú hvikar ekki undan því að hafa skoðun, koma henni á framfæri og standa við hana. Oft hef ég dáðst að þessum eiginleikum þínum. Þakkað fyrir að við, lesendur þínir, skulum eiga þig að og fundið kraftinn sem orð þín gefa oft og tíðum. Ég hef líka fagnað því hvernig þú hefur orðað skoðanir þínar og komið þeim á framfæri með kraftmiklum orðum og andlegum styrk.

Því miður get ég ekki annað en tekið undir það sem þú segir um andófið hér að ofan þó ég reikni með að einhverjum kunni að renna það þannig til rifja að honum finnist þú óþarflega grimmur í garð þess. Það vita það hins vegar flestir sem hafa lesið bloggið þitt að það sem þú hefur sett fram reynist oftar en ekki réttara en virðist í fyrstu. Ég sem lifði og hræðist í reykvískri grasrót í rúmlega eitt og hálft ár finnst þess vegna sanngjarnt að vekja athygli á því að enn og aftur greinir þú hlutina rétt. Ég kann ekki skýringuna á því hvers vegna þetta fór svona þó ég hafi vissulega velt þessu lengi fyrir mér en það var strax í Tunnubyltingunni sem ég fór að efast og setja upp spurningarmerki.

Tímamótin þar sem sá klofningur, sem hefur e.t.v. verið í grasrótinni frá upphafi, verður að veruleika er e.t.v. runninn upp. Það er a.m.k. ljóst að þegar stór hluti þeirrar grasrótar sem varð til haustið 2008 undir „leikstjórn“ Harðar Torfasonar hefur gert stjórnarskrá sjálfskipaðrar samfylkingarelítu að aðalatriðinu þá er eitthvað mikið að! Það er líka ljóst að þegar þessi sami hópur gerir allt til að gera þau að óvinum sínum sem setja leiðréttingu lífskjaranna í gegnum nauðsynlegar efnahagsaðgerðir þá liggja leiðir ekki lengur saman. Því miður er líka útlit fyrir að þessi stjórnarskrárblinda grasrót  hafi gert þá sem mæla fyrir skynsamlegum lausnum bundnar sjálfstæðum þjóðargjaldmiðli að höfuðóvinum sínum.

Það er nákvæmlega hér sem ein meginskýringanna er að finna fyrir því að stjórnmálaöflin sem sumum finnst að ætti að vera eitt eru tvö. Þeir sem vilja sjá og skilja eru væntanlega búnir að átta sig á því að að skýringin liggur ekki í persónulegum ágreiningi, eins og sumir hafa kosið að halda fram, heldur gerólíkum málefnaáherslum og hugmyndafræði. Á meðan Dögun gerir stjórnarskrárdrög stjórnlagaráðsins að slíku meginatriði að einhverjir þar hafa reynt að halda því fram að ný stjórnarskrá hafi verið krafa búsáhaldabyltingarinnar þá liggur megináherslan hjá SAMSTÖÐU á lífskjörin og fjármálastefnuna.

Þeir sem sjá og skilja vita að Ómar er að benda á að þingmennirnir sem eru í Dögun svo og aðrir Dögunarfélagar hafa sett allan sinn kraft í það að verja stjórnarskrána sem Samfylkingin sagði strax í upphafi árs 2009 að þyrfti að aðlaga að því að Ísland kæmist inn í ESB. Skoðun SAMSTÖÐU er hins vegar sú að hagsmunum Íslands sé best borgið utan ESB. Landsfundur SAMSTÖÐU sem var haldinn dagana 6. til 7. október sendi frá sér ályktun hvað þetta varðar en frá honum fóru líka fimm ályktanir þar sem stefna flokksins í lífskjara- og efnahagsmálum er dregin fram á skýran og afdráttarlausan hátt.

Hér er yfirlit yfir heiti þeirra með krækjum í greinarnar á heimasíðu SAMSTÖÐU þar sem um þær er fjallað

• Ályktun um verðtryggingu, framfærsluvanda og skuldamál heimilanna
• Ályktun um stöðu bótaþega og annarra sem þurfa á stuðningi velferðarkerfisins að halda
• Ályktun um gjaldmiðilskreppuna
• Ályktun um aðskilnað peningaprentunar og útlánastarfsemi bankakerfisins
• Ályktun um gjaldeyrislán til bjargar fjármagnseigendum á kostnað skattgreiðenda

Einhverjir kunna að sakna þess að engin ályktun var gefin út varðandi stjórnarskrármálið. Ástæðu þess að slíkt var ekki gert má sennilega rekja til þess að þeir samstöðufélagar sem sóttu fundinn fannst önnur mál meira aðkallandi og þess vegna ekki viturlegt að kalla yfir sig fyrirsjáanlegar skærur þeirra sem hafa gert stjórnarskrármálið að oddamáli sínu. Hins vegar má benda á að Lilja Mósesdóttir, sem stofnaði og starfar með SAMSTÖÐU, flutti afar kjarnyrta og afdráttarlausa ræðu í umræðum um stjórnarskrána sem fram fóru á Alþingi sama dag og þú skrifaðir þennan pistil. Niðurlag hennar er hér:

Niðurstaða mín er sú að stjórnarskrártillögurnar verði að leyfa þjóðaratkvæðagreiðslu í öllum málum. Icesave-málinu er ólokið og fleiri sambærileg mál munu koma upp. Samkvæmt tillögum stjórnlagaráðs mun forsetinn geta vísað öllum málum í þjóðaratkvæði. Afar ólíklegt er að forsetinn vísi máli í þjóðaratkvæðagreiðslu sem ný stjórnarskrá bannar að greidd verði þjóðaratkvæði um. Ég mun því hafna stjórnarskrártillögum sem takmarka möguleika kjósenda til að krefjast þjóðaratkvæðagreiðslu. Við lifum á tímum harðnandi átaka um hvernig eigi að verja skattpeningum kjósenda. (sjá hér)

Því má svo við þetta bæta að það var niðurstaða þeirra sem nú mynda stjórn SAMSTÖÐU að skærur um málefni eins og stjórnarskrármálið væru líklegri til að draga athyglina frá oddamálum SAMSTÖÐU sem eru eins og áður sagði lífskjör heimilanna í landinu og um leið grundvöllurinn að því að skapa framtíðinni þá reisn að hún komi sér saman um stjórnarskrá sem verður sett saman með hagsmuni almennings; þ.e. íslensku þjóðarinnar, að leiðarljósi.

[Ómar Geirsson, 20.10.2012 kl. 08:51]

Takk Rakel.

Ég veit ekki hvernig má maður að orða það en það er hægt að hafa skoðun á lykilmálum án þess að setja þau á oddinn.

Það á bara að segja satt.

Lykilmál Samstöðu krefjast þess að það sé snúist til varnar í þessu lýðskrumsmáli því þessi afgreiðsla málsins er sjónhverfingi í þágu þess Valds sem vill almenningi þessa lands mjög illt.

Og það er hægt að segja satt án þess að gera lítið úr því fólki sem hefur þá einlæga skoðun að það þurfi að stokka upp stjórnarskrána, jafnvel semja nýja.

Málið er að gott heiðarlegt fólk, þarf að skilja að það er ekki lengur svo gott og heiðarlegt þegar það styður kúgun og ofríki gagnvart þeim hluta þjóðarinnar sem er ekki sammála honum.

Þú ert til dæmis ekki svo mjög á móti nauðgunum þegar þú grípur gæsina þegar hún gefst.

Og í stríði áttu ekki valkost.

Sama hvað þér finnst núverandi stjórnarskráardrög góð, þá er atkvæði með henni atkvæði með þeim tilgangi  ríkisstjórnar Jóhönnu Sigurðardóttir að leiðrétta ekki skuldir heimilanna.

Því hún mun aðeins gera eitthvað gott, eitthvað ærlegt, þegar hún er króuð upp við vegg, og metur stöðuna svo að hún NEYÐIST til að gefa eftir í lykilmálum.

Og jafnvel þá er ég ekki viss um að hún geri eitthvað ærlegt, það liggur í eðli Óberma.

En þú króar einhvern seint upp að vegg ef þú jafnóðum og þú rekur hann í áttina að veggnum, að þú kastir til hann lyklinum að stóru hurðinni sem er á veggnum fyrir aftan hann.

"Samt hefur enginn flokkur Andófsins ályktaði gegn vitleysunni og þar með sýnt að hann á eitthvað erindi á Alþingi Íslendinga.  Sá sem þorir ekki að bregðast gegn lýðskrumi í grundvallarmáli eða samþykkir gerræðisleg vinnubrögð hugsanlega meirihluta gegn minnihluta í jafn mikilvægu máli og endurskoðun stjórnarskráarinnar er, hann mun brotna þegar raunveruleg baráttan fyrir framtíð landsins byrjar.  Hann hefur ekki nokkuð það sem þarf að hafa til að fjármálamafían láti undan í skuldamálum heimilanna.  Eða annað það sem skiptir þjóð þessa máli.

Og ef grunnhyggnin er svo mikil að hann sér ekki ógnaröflin sem að baki búa, ógnaröflin sem hann þykist ætla berjast gegn, hvernig þykist hann þá geta barist við þau þegar útí alvöruna er komið ef það dugar Valdinu að henda beini út í móa og segja, "Sjáðu Snati, sjáðu!"

Það vinnur enginn Valdið Rakel sem áttar sig ekki á þessu.

Og að lokum, ekkert í skrifum mínum, hvorki þessum eða öðrum snertir raunverulega endurskoðun á stjórnarskránni, eða skoðanir mínar á nauðsyn slíkrar endurskoðunar.

Það er bara ekkert verið að endurskoða hana.

Takk fyrir innlitið Rakel mín.

Kveðja að austan.