Fordæmi fyrir forherta.

 

Hvernig væri að rassskella vaxtaþjófa???

Opinberlega fyrir framan fórnarlömb sín.

Löggjafinn höndlar hvort sem er ekki stórþjófa, ekki ef þeir eru í hvítum skyrtum með flibba og stela meira en milljón.  Það er eins og það sé innbyggt í tölvuforrit dómsstóla ef hærri tala en milljón er slegin inn þá heyrist píp og skruðningur og síðan blikkandi skjár.

Saklaus.

 

En menn eru ekki saklausir þegar þeir ræna samborgara sína um tugi milljarða, vísvitandi gegn aðvörunarorðum lögspekinga.

Þeir eru þjófar og þjófar eiga ekki að sleppa við refsingu.

Og vitorðsmenn þjófanna eins og blaðamenn sem skrifa um löngu liðna sögu Guernseyjar þegar samfélag þeirra og samborgarar eru rúnir inn að skinni, þeir eiga líka að taka út sína refsingu.

Það á enginn að komast upp með að hjálpa þjófum að hylma yfir glæpi sína.

Samsekt varðar líka við lög.

 

En þó rassskelling sé þjóðarsiður i Simbabve þá er hún aflögð hér í siðmenningunni sem telur rán hvítglæpamanna  ekki varða við lög og reglur.  Heldur sé um viðskipti að ræða.

Það er því ljóst að upptaka rassskellinga má ekki vera afturvirk, svona að gefnu tilefni.

En þjóðin getur krafist þess að þeir sem sjá ekki að sér, eins og ríkisstjórnin og bankamafína, og ætla að túlka dóm Hæstaréttar það þröngt að bókstaflega engir fái endurgreitt til fulls af því sem frá þeim var stolið, að þeir verði flengdir fyrir sinn einbeitta brotavilja.

Það gengur ekki að samfélaginu sé stjórnað af þjófum sem segja í hvert skipti sem þeim dettur í hug nýtt þjófaplan, "stefnið okkur, þið hafið þann rétt".  Vitandi það að skattgreiðendur borga lögfræðikostnað þeirra og ákæruvaldið horfir á þjófnað þeirra með blinda auganu.

Vitandi að þeir þurfa aldrei að sæta minnstu ábyrgð gjörða sinna.

 

Það mætti til dæmis hugsa sér að Íslendingar fengju þróunaraðstoð frá Simbabve sem myndi kenna okkar gjörspillta ákæruvaldi til verka.

Kenna þeim að þekkja stórþjófa, dæma þá og rassskella.

 

Eitthvað verður að gera.

 

Bankaþjófarnir hóta núna þeim fórnarlömbum sínum sem þeir sköðuðu mest, að þeir fái ekki krónu endurgreitt.

Þeir hafi nefnilega lent í vanskilum, hafi ekki geta staðið skil á öllu sem bankarnir tóku af þeim á ólöglegan hátt.

Þetta er eins og að fórnarlömb mafíunnar á Sikiley, fengju ekki bætur fyrir að stjórnvöld leyfðu mafíunni að innheimta verndargjald, ef mafían gæti sannað að hún hafi þurft að brenna verslanir þess og fyrirtæki því fórnarlömbin gátu ekki kríað út pening fyrir "verndinni".

 

Jafnvel Ítalir með sína víðtæku spillingu leggðust ekki svo lágt.

En íslenska þjóðin virðist ætla að kyngja viðbjóðsdrykknum án þess að verða bumbult.

 

Alla vega þá segir enginn neitt.

Og á meðan ganga þjófar lausir.

 

Óflengdir.

Kveðja að austan.

 

 

Rassskelltur vegna facebookfærslu