Hvernig ætlar Már að borga skammtímalánin???

 

Að ljúga með tölfræðinni er þekkt.  Þá gefur þú þér rangar eða  vafasamar forsendur til að fá út fyrirfram ákveðna niðurstöðu.

Þetta er aðferðafræðin á bak við þá fullyrðingu ASÍ að ICEsave verði 29 milljónir jafnvel minna.  Forsendan er sú ranga fullyrðing að þrotabú LÍ greiði vexti samningsins.  Vitna í Gamma greiningu;

 

"Rétthæð krafna, samkvæmt lögum um gjaldþrotaskipti o.fl. nr. 21/1991, á hendur þrotabúi er þannig uppsett að mjög litlar líkur eru á að TIF fái greidda vexti og gengismun á kröfu sína á hendur þrotabúinu."

 

En það var rétt reiknað.

Sama gildir þegar Seðlabankinn mat samninginn upp á 47 milljarða hann gaf sér þær forsendur að gengið myndi styrkjast þrátt fyrir æpandi þörf á innflutningi til dæmis vegna endurnýjun bílaflotans, hækkunar aðfanga eins og eldsneytis eða þeirrar staðreyndar að gífurlegir fjármunir fara úr landi vegna þess að erlendir bankar vilja fá borgað, ekki endurfjármagna.

Gamma greining mat samninginn á 67 milljarða, miðað við óbreytt gengi, og sagði að aflandsgengið væri lægra þannig að líkur væri á að það væri þegar of hátt skráð.

 

En á ársfundi Seðlabankans tók Már nýtt risastökk í áróðri, hann kaus að ljúga með lyginni.

Hann er búinn að koma í veg fyrir greiðsluþrot ríkissjóðs, hann á svo mikinn gjaldeyrisforða.

Hann lét þess alveg ógetið að hinn meinti forði væri allur upp á krít, og það til skamms tíma.  

Um það segir Gamma greining.

 

 "Helsti vandinn við fjármögnun ríkissjóðs í krónum er hversu framhlaðnar skuldirnar eru og stórt hlutfall erlendra eigenda að skammtímaskuldunum. Að auki eru erlendar skuldir einnig framhlaðnar."

 

Á mannamáli þýðir þetta að við erum algjörlega háð erlendum lánardrottnum um endurfjármögnun.  Hin góða staða Más er eins og hjá  manninum sem reddaði Visa reikningnum með Euro kotinu sínu eins og aldrei kæmi að skuldadögum.

Þetta er líka nákvæm lýsing á fjármögnun bankanna, og þegar að endurfjármögnun brást, þá féllu þeir eins og spilaborg.

 

Skuldastaða ríkisins er því tifandi tímasprengja út þessum stóra gjaldeyrissjóði sem Már ætlar að nota til að borga út krónur.  En hann endurgreiðir ekki gjaldeyrislánin með krónum, hann borgar þau ekki með Visa.

Aðeins gulli eða ígildi þess.

Með beinni lygi er því Már að búa til fagra stöðu um skelfilegan hlut.

Og það i þeim tilgangi að bæta á skammtímaskuldir ríkisins i erlendri mynt.  

 

Vinnubrögð Seðlabankastjóra eru uppskrift að nýju Hruni og það er glæpsamlegt, því fyrir haustið 2008 gátu menn borið fyrir sig vanþekkingu, í dag vita menn afleiðingar þessarar heimsku.

Í dag er ráðamenn Írlands og Grikklands vælandi í þjóðum sínum um að þær verði að samþykkja sölu á eignum þjóðanna til að borga svona skammtímagjaldeyrisskuldir.

Og á morgun byrjar vælið um einkavæðingu almannaþjónustu til einkavina.

Og það er þetta sem mun gerast, ICEsave er síðasti hnykkur valdelítunnar í að festa okkur í skuldabönd svo tekjur okkar og samfélagsins fari allar í vasa varúlfa fjármagnsins.

 

ICEsave er yfirlýsing um að fjármagn skipti öllu en fólk engu.

En fjármagn er dautt, fólk er lifandi.  

Og fjármagn fær því aðeins gildi ef fólk og fyrirtæki eru viljug til að vinna fyrir það.  

En við erum ekki viljug að vinna fyrir það sem skuldaþrælar, við viljum líka lifa mannsæmandi lífi.

Þess vegna mun þjóðin  segja Nei við ICEsave, Nei við dautt fjármagn, Nei við þau Óbermi sem vilja skuldaþrælka samlanda sína.

 

Við erum fólk, ekki þrælar.

Kveðja að austan. 

 

 

 

 

Raddir um greiðsluþrot þagna