Verður grátandi faðmlag í beinni útsendingu í kvöld???

 

Saman falla í faðma, hring faðm að hætti íþróttajaxla, þau Steingrímur, Jóhanna, Vilmundur og Villi og Gylfi, biðja hvort öðru að fyrirgefa þetta upphlaup með sjávarútveginn, allir hafi hlaupið á sig, það verði að tryggja friðinn.

"Við munum semja um frið og við munum semja um kaup og kjör, EF ÞIÐ SAMÞYKKIÐ ICEsave".

Og fyrsta frétt Áfram fjölmiðlanna, "Við sögðum ykkur, það verður ekki samið um kauphækkanir nema launafólk styðji Áfram Ísland".  og svo kemur hópeflið, "Og ..... BORGA SVO".

 

Þessir kjarasamningar eru skrípaleikur frá A til Ö.

Kvótakerfinu verður ekki breytt, veðin þar eru skilyrði stöðugleika bankakerfisins og fyrr myndi páfinn í Róm leyfa prestum að nota smokka en að Alþjóðagjaldeyrissjóðurinn leyfi stjórnvöldum að breyta kvótakerfinu.

Alþjóðagjaldeyrissjóðurinn er með uppá skrifaðan samning um að hann ráði Íslandi, samþykktan af öllum stjórnmálaflokkum Vinstri Grænum ef ég man rétt.  Sem hafa skipt um skoðun.

 

Og í samningnum við Alþjóðagjaldeyrissjóðinn er skýrt ákvæði, sem lán sjóðsins eru skilyrt við, um hver hallinn á ríkissjóð megi vera á þessu ári og þeim næstu.

Í stuttu máli þá náum við ekki því markmiði á þessu ári, Steingrímur þarf að skera niður og hækka skatta til að standa við samkomulagið.

Steingrímur, eða hvaða ríkisstjórn sem er, er ekki að fara að liðka fyrir kjarasamningum með því að lækka skatta og dæla fé inní framkvæmdir.

Þetta vita aðilar vinnumarkaðarins, það voru jú þeir sem vildu hina styrku efnahagsstjórn Alþjóðagjaldeyrissjóðsins ásamt láninu handa krónubröskurum, að þeir meina ekki baun í bala með þessum kröfum sínum á hendur ríkissjóði.

Þeir lærðu aðeins þá list ungir að þvo hendur sínar af verkum sínum og kenna öðrum um.

 

Þeir kenna ríkisstjórninni um stefnu Alþjóðagjaldeyrissjóðsins og þeir kenna ekki Alþjóðagjaldeyrissjóðnum um þá stöðnun og hnignun sem hér er á öllum sviðum.

Það er þjóðinni að kenna, að hún skuli ekki hafa tekið á sig viðbótar skattbyrði uppá um 500 milljarða svo hægt væri að koma hjólum efnahagslífsins að stað.

Og núna á að tryggja að þjóðin geri ekki aftur sömu mistökin og síðast, núna á að skilyrða kjarasamninga samþykki hennar á ICESave.

 

"Forsenda þess að menn nái saman er þjóðin samþykki ICEsave" sagði Vilhjálmur Egilsson í viðtali á Stöð 2.

Um það snýst þessi sýning.

Út úr hinu grátandi faðmlagi kemur sáttin og samningurinn um ICESave.

Það verður ekki samið nema þjóðin samþykki ICESave.  

 

Nema að ef þjóðin samþykkir ICEsave, þá verða engar kjarabætur í mörg ár, því þær fara út í gengið, og ef gengið sígur þá er ICEsave samningurinn sprunginn með látum.

Með hvelli.

Og þá munu skattgreiðendur þessa lands gráta.

 

Ég legg til að við leyfum aðilum vinnumarkaðarins að halda áfram að gráta.

Látum þá hágráta.

Og segjum Nei við ICEsave.

 

Við erum fólk, ekki þrælar.

Kveðja að austan.

 

 

 

 

 

Reyna að tryggja frið