"Ég hafnaði þessum löglausum kröfum"

 

Sagði Bjarni Benediktsson við Helga Seljan í Kastljósi í gær.  

Og bætti við: "Og með því að gera það var hægt að skapa algjöran nýjan samningsgrundvöll í viðræðunum við ríkin."

Svar Helga Seljan var meitlað: "Hvernig geta þingmenn á Alþingi Íslendinga ákveðið að láta kúga sig til að samþykkja, hver sem gerir það, kúga sig til að taka löglausar ákvarðanir og skuldsetja þjóðina".

Og þar með tók Helgi Seljan skýra afstöðu með þjóð sinni, fyrstur starfsmanna Ríkisútvarpsins.  Já, hver gefur dauðlegum mönnum þann rétt að skuldsetja þjóð sína án þess að spyrja hana álits.

Og svar Bjarna segir mikið til um hans málstað.

"Helgi hvað á það að þýða að tala svona um þá samningsniðurstöðu sem hér er fengin fram, hvað á það að þýða að bera það hér undir mig að hafa látið undan kröfum, löglausum kröfum og þannig látið kúga mig til niðurstöðu".

Hvað felst í þessum orðum Bjarna, að kröfurnar séu ekki lengur löglausar því þær séu ásættanlegri en þær gömlu.  Er það sem sagt upphæð fjárkúgunarinnar sem ræður því hvort hún sé lögleg, eða löglaus???

Finnst Bjarna Benediktssyni núverandi samningur við breta vera löglegur???

 

Nú er það staðreynd að tvennar meginbreytingar voru gerða á samningnum frá þeim sem þjóðin felldi.  

Það á að byrja að borga strax, eitthvað sem menn treystu sér ekki til fyrr en væntanlegur hagvöxtur myndi auðvelda greiðslurnar, og vextirnir eru sannanlega lægri, um það er ekki deilt.

Eru þessar breytingar nægar til að löghelga núverandi samkomulag???

 

Allt skynsamt fólk sér að svo er ekki, hafi fyrri samningur verið ólöglegur þá er þessi það líka.  Þeir sem segja núverandi samning löglegan þeir segja það sama um þann fyrri.  

En núverandi getur verið hagstæðari, og þess vegna samþykkja menn hann.  Leggja á hann kalt hagsmunamat eins og Bjarni orðaði það.

En þá er hann um leið kominn í mótsögn við sjálfan sig þegar hann segir fyrri kröfur breta löglausar.   

Og þar með er hann í raun að segja að ályktun landsfundar Sjálfstæðisflokksins hafi verið marklaus.

Og þau Steingrímur og Jóhanna hafi haft rétt fyrir sér allan tímann, en þau hafi hinsvegar ekki náð ásættanlegum samning. 

 

Margir vilja segja Nei við ICEsave vegna þess að þeir álíta kröfur breta löglausar, þeir vitni ekki í skýran lagtexta, og þeir hafa ekki úrskurð dómsstóla vegna þeirra álitamála sem uppi eru.  Ég er einn af þeim, og hef ekki farið leynt með þá skoðun mína.

Og ég tel að skattheimtan vegna þeirra verði dæmd ólögleg og miklar líkur á að þeir þingmenn sem samþykktu hana verði ákærðir fyrir brot á stjórnarskrá, og brot á lögum Evrópubandalagsins sem banna ólöglega ríkisábyrgð.

 

En aðrir eru ósammála, og vilja leggja kalt hagsmunamat á málið.  

Um þetta kristallast deilan.

 

Og Bjarni Benediktsson má þó eiga að loksins hafði hann kjark til að standa á skoðunum sínum.  Það var miður í viðtalinu hvað hann gerði lítið úr áhættunni, samkvæmt Gamma greiningunni þá er hún umtalsverð.

Og stafar það aðallega af tvennu.

Dómsstólar geta fryst eignir þrotabúsins á meðan dómsmál eru í gangi, bæði hér og erlendis.  Á meðan tifar vaxtaklukkan í það minnsta og hugsanlega getur forgangur innlána verið hnekktur.

En alvarlegasta áhættan er að hið meinta lán til breta er í pundum, en Tryggingasjóður innlána fær aðeins greiddar 650 milljarða í íslenskum krónum.  Falli krónan, þá þarf þrotabúið að greiða TIF færri pund, sem aftur þýðir að gengismunurinn fellur á ábyrgðaraðilann sem er ríkissjóður.

Að halda því fram að ábyrgðin verði á bilinu 47-60 milljarða er jafn fáránlegt eins og að halda því fram að hún verði 200-250 milljarðar.  

Sannleikurinn er sá að enginn veit það, þetta er allt óvissu háð.  Og þeir sem þykjast vita annað, eru einfaldlega að blekkja.

 

Hitt er staðreynd að öll óvissa málsins fellur á íslenska skattgreiðendur og það er grafalvarlegt mál, hjá þjóð sem ætlaði að reka 960 heilbrigðisstarfsmenn vegna meints 4 milljarða króna sparnaðar.

Það er ekki þannig að 60 milljarðar sé einhver smáupphæð, ekki fyrir þjóð sem þegar er í alvarlegum greiðsluvandræðum.

 

Kjarni ICEsave deilunnar, fyrir utan það grunnprinsipp að aldrei á að ganga að kröfum fjárkúgara er nefnilega sá sem kom fram í minnisblaði Seðlabankans þegar Svavars samningurinn var í umræðunni sumarið 2009.

" 1. Getu ríkissjóðs til þess að afla tekna og draga úr útgjöldum í því skyni að standa undir vaxtabyrði sem af samningunum hlýst.

2. Getu þjóðarbúsins til þess að afla afgangs af vöru- og þjónustuviðskiptum til þess að greiða vexti og afborganir á endurgreiðslutíma samningsins án þess að það leiði til umtalsverðrar lækkunar á gengi krónunnar. "

 

ICEsave samningar borga sig nefnilega ekki sjálfir, það þarf einhver að blæða.

Og almenningur mun þekkja litinn á blóðinu þegar þar að kemur.

 

Það verður ekki blátt.

Kveðja að austan.

Athugasemdir

[Kristján Hilmarsson, 4.2.2011 kl. 20:01]

Skýrmæltur og skorinortur að vanda Ómar ! vildi gjarnan hafa eitthvað af þessum hæfileika þínum að komast svona að kjarnanum, sá ekki þetta viðtal (ekki ennþá) en las aftur tilkynningu/viðtal við Bjarna í pappírsmogganum í gær og reyndi að syngja um það með "mínu nefi" HÉR.

 "ICEsave samningar borga sig nefnilega ekki sjálfir, það þarf einhver að blæða.

Og almenningur mun þekkja litinn á blóðinu þegar þar að kemur."

Snilldarlega að orði komist Ómar !

MBKV að utan en með hugann heima

KH

[Ómar Geirsson, 4.2.2011 kl. 23:14]

Blessaður Kristján.

Það er eiginlega þannig að núna situr maður á hliðarlínunni, og horfir á, ekki þungbrýnn.

Það er unun að fylgjast með staðfestu fótgönguliðsins, tek einnig eftir að þeir sem styðja formann sinn, þeim tekst ekki að koma með önnur rök en að hann hafi verið málefnalegur og rökfastur, og ef því er fylgt eftir, þá koma sömu mótsagnirnar, og blekkingarnar.

Það þótti aldrei gáfulegt hjá skaftfellskum forfeðrum mínum að skipta um vað í miðri á, endaði oftast með miklum buslugangi, ef menn urðu þá til frásagnar á eftir.

En ICEsave dýkið ætlar margan góðan manninn að gleypa, og þeir sem á horfa, skilja ekkert í feigðarförinni.

Já, íhaldið er ekki sömu lefsurnar og VG liðar.

Kveðja að austan.

[Elle_, 4.2.2011 kl. 23:29]

Já, Ómar, ég verð að játa að hinn almenni flokksmaður Sjálfstæðismanna kemur gleðilega á óvart og styður almennt ekki alþingismennina og formanninn í kúguninni með ICESAVE-STJÓRNINNI.  Nema nokkrir sem ekki þora eða eru jafn harðsvíraðir. 

[Ómar Geirsson, 5.2.2011 kl. 22:56]

Já, Elle, það eru ekki allir dauðir.

Sem betur fer.

Þetta lið fer kannski bráðum að standa varðstöðina með Sigurði baráttujaxli.

Kveðja að austan.