Fyrst rændu bankarnir þjóðina.

 

Núna hirða þeir heimili fólks.

Þeir sýna reyndar þá mennsku að leyfa börnunum að klára skólagönguna, áður en guð og gaddurinn tekur við.  

Segjum svo að bankarnir hafi ekkert lært af Hruninu.

 

Ríkisstjórn og Alþingi lærðu líka.  Það var haldin lesstund þar sem klassískar enskar nítjándu aldar bókmenntir voru meginþemað, sérstaklega hún Dorrit litla eftir Dickens.  Og í framhaldið var Brainstorm eða hugarflugsfundur eins og það heitir á ástkæra ylhýra.

Og nútímaskuldafangelsi þróað, kallað greiðsluaðlögun.  Með greiðsluaðlögunarfulltrúa sem fangaverði.

Talið mun hagkvæmara að hýsa fólk heim hjá sér og láta það vinna fyrir skuldum sínum en að hafa það aðgerðarlaust í einhverjum bröggum eins og gert var á nítjándu öldinni.

Ríkisstjórnin og Alþingi lærðu líka af Hruninu.

 

En eitt lærðu bankarnir ekki, og það er að bera virðingu fyrir samfélagi sínu og axla ábyrgð á gjörðum sínum.  Til dæmis að semja við fórnarlömb sín um mannsæmandi greiðslubyrði og gera börnum þess kleyft að eiga heima heima hjá sér en ekki hjá guði úti á gaddi. 

Eins lærðu þeir ekki að þekkja þá sem rændu þá innan frá, þeir eru allir komnir aftur, þó margir séu með grímu breyttra kennitalna fyrir vitum.  Hinir svokölluðu fjárfestar eru inni en fólk með kunnáttu og þekkingu til að reka fyrirtæki, það er ennþá úti.

Hefur sjálfsagt ekki rænt neinn, eða sett heilt þjóðfélag á hausinn, er eitthvað bara svo púkó.

 

Ríkisstjórnin og alþingismenn hafa ekki þrátt fyrir allan sinn bókmenntalestur, lært að horfa í eigin barm.  Hvað þá að axla ábyrgð.

Þess vegna virkar Alþingi eins og fábjánastofnun á flest venjulegt fólk.  Þar garga menn og öskra um hluti sem skipta ekki máli.

En telja sig þess umkomna að selja þjóð sína erlendum fjárkúgurum og bröskurum vegna þess að að þeir báðu svo fallega.

Hver kannast ekki við frasann, það verður að semja um ICEsave, megum ekki hafa þetta mál hangandi yfir okkur.  Enginn spyr hvort við eigum að borga ICESave.  Enginn spyr hvort réttlætanlegt sé að reka þúsundir ríkisstarfsmanna til að hægt sé að borga vexti af braskaraláni Alþjóðagjaldeyrissjóðsins.

Enginn spyr hvort það sé rétt að börn séu rekin á götuna vegna þess að heimilisfaðirinn lagði of mikið undir í fjármálum fjölskyldunnar.  Börn eiga rétta á umboðsmanni, en þau eiga ekki rétt á friðhelgi heimilisins.

 

Svona er Ísland árið 2011, gargandi alþingismenn ætla að ræða klúður og formsatrið í máli sem engan varðar, en þeir ræða ekki framtíð þjóðarinnar.

Það er þeim ofviða.

Þó er hið eiginlega Hrun að byrja.  

Bankar hirða heimili fólks, fjöldi fyrirtækja stefnir í gjaldþrot.  

Allsstaðar er niðurskurður, ekkert er framkvæmt.

Alþjóðagjaldeyrissjóðurinn kallar það hagvöxt, það gerði hann líka í Argentínu þegar samdrátturinn nálgaðist 30% og yfir 70% af tekjum ríkisins fóru í vexti og afborganir af braskaralánum.  Þó það sé sannað að hann laug og að hann ljúgi, þá er það ekki rætt.

Aðeins vitnað í skýrslur hans um að hagvaxtarskeið sé hafið.   Skattahækkanir og niðurskurður er talið tryggja það.  Og landflótti.

Og svo það sé öruggt, þá eru gömlu auðræningjarnir látnir varða veginn, þeirra er stefnan, þeirra eru hin nýskuldaþvegnu fyrirtæki.

 

Hvað er hægt að segja, hvað er fólk yfir höfuð að segja eitthvað.  

Það er ekki þannig að skriðdrekar tryggi völd þessa fólks.  Það situr í umboði almennings, við gífurlega sátt fjölmiðla auðmanna.

Á maður bara ekki að þakka að mannúðin er komin á það stig að börn fái að klára skólaönnina áður en þau eru svipt heimilum sínum.  Þakka fyrir að þau skyldu ekki líka verið seld í þrældóm líkt og í Rómarveldi forðum.  Ríkisstjórnin hefði getað lesið Virgil í stað þess að lesa Dickens.

Samt finnst manni þetta eitthvað skrítið, en ennþá skrítnara er að hamast gegn þessu.  Að vera kallinn á kassanum sem allir glotta að.  Ef ríkisstjórninni hefði borið gæfu til að gleyma ICEsave, þá væri enginn neisti eftir til að gagnrýna alsæluna eða fetta fingur út í gargandi alþingismenn.

 

ICEsave er grundvallarglæpur sem enginn siðaður maður lætur óátalinn.  Viðbrögðin þjóðarinnar við þeim svikum segir mikið til um siðferðisstyrk hennar.

Og þau viðbrögð eiga eftir að koma í ljós.  Í dag eiga vinnumenn breta umræðuna, fjölmiðlar Jóns Ásgeirs og ESB sjá til þess. 

En þjóðin hugsar sitt, sér rangindin en er langþreytt.

 

En þjóðin er ekki dáin, hún mun rísa upp gegn bankaræningjum, ræningjum banka, auðræningjum, fjárkúgurum.

Hvenær????

Það mun gerast, ef ekki í þessu lífi, þá í því næsta.

Því við erum fólk, manneskjur, við látum ekki bjóða okkur hvað sem er.

 

Við erum ekki fórnarlömb ræningja.

Kveðja að austan.

 

 

 

2.000 fasteignir banka og ÍLS

Athugasemdir

[Elle_, 27.1.2011 kl. 11:01]

Börn eiga rétta á umboðsmanni, en þau eiga ekki rétt á friðhelgi heimilisins.

En eitt lærðu bankarnir ekki, og það er að bera virðingu fyrir samfélagi sínu og axla ábyrgð á gjörðum sínum.  Til dæmis að semja við fórnarlömb sín um mannsæmandi greiðslubyrði og gera börnum þess kleyft að eiga heima heima hjá sér en ekki hjá guði úti á gaddi.

Og svo það sé öruggt, þá eru gömlu auðræningjarnir látnir varða veginn, þeirra er stefnan, þeirra eru hin nýskuldaþvegnu fyrirtæki.

Hinir svokölluðu fjárfestar eru inni en fólk með kunnáttu og þekkingu til að reka fyrirtæki, það er ennþá úti. Hefur sjálfsagt ekki rænt neinn, eða sett heilt þjóðfélag á hausinn, er eitthvað bara svo púkó.

Já, mikil er heimska og ömurleiki stjórnar sem lætur þetta ógeð viðgangast.  Ómar, þú orðaðir heimsku stjórnarinnar og glæpabankastefnuna í landinu snilldarlega og væri nær að ríkisstjórnin, ICESAVE-STJÓRNIN, læsi mannlegu pistlana sem þú skrifar.  Óttast samt að þau skilji ekki slíka mennsku þó hún væri lamin inn í höfuðið á þeim.  Ómennsk stjórn sem er nákvæmlega sama um andlega eyðileggingu og kvalir barna og foreldra og allra manna sem missa heimili sín og hafa ekki lengur öruggt þak yfir höfuðið.  Nei, allt snýst um peningaöflin og ICESAVE.  

[Ómar Geirsson, 27.1.2011 kl. 12:32]

"Það er ekki þannig að skriðdrekar tryggi völd þessa fólks.  Það situr í umboði almennings, við gífurlega sátt fjölmiðla auðmanna."

Blessuð Elle, það er nú þannig að stjórnvöld eru ekki orsök, þau eru afleiðing.

Takk fyrir jákvæð orð og vissulega er mér léttir að einhver les þau og spáir í þá hugsun sem að baki liggur.  Ég fékk mjög gott innslag frá Jóni Lárussyni á pistil hér á undan.  Hann er á svipaðri línu.

Við erum þannig séð báðir í hópi skrítnu kallanna á kassanum.  

En uppklappið er ekki að yfirgnæfa okkur frekar en aðra sem ofbíður ómennskuna sem stjórnar þessu landi.  

"ICEsave er grundvallarglæpur sem enginn siðaður maður lætur óátalinn.  Viðbrögðin þjóðarinnar við þeim svikum segir mikið til um siðferðisstyrk hennar."

Það hefði mátt bæta því við að þjóð sem horfir kaldlynd á útburð nágranna sinna, að hún er ekki alveg að slá í gegn á siðmælikvarðanum.

Ekki það að ég trúi á það sem er inn við beinið, hef orð útlendinga fyrir því, þeir þekkja það margir á eigin skinni.  Sem og allt fólk sem ég þekki, og ég þekki fullt af fólki sem segir það sama.

Þess vegna skil ég ekki alveg að skrípi stjórna landinu í umboði auðmanna, fatta það ekki alveg.

En ég ætla að hugsa mitt mál, kannski fatta það ég eitthvað að lokum.

Heyrumst Elle.

Kveðja að austan.

[Atlinn (IP-tala skráð) 27.1.2011 kl. 12:35]

Heil og sæl,

Halldór okkar heitinn Laxnes var búinn að sjá þetta allt fyrir í góðan tíma og ritaði hann hina ágætu bók Sjálfstætt fólk okkur til viðvörunar sem að flest okkar hafa líklega lesið eða haft einhver kynni af.  Með það í huga er lítið sem að við getum sagt, það er ekki eins og það var ekki búið að vara okkur við.

Lifið heil,

Atlinn

[Ómar Geirsson, 27.1.2011 kl. 13:12]

Blessaður Atlinn.

Sjálfstætt fólk er BÓKIN en samt sé ég ekki alveg samhengið.

Les frekar leiðina út úr kreppunni, ómælda þrjósku og hvika ekki frá lífskoðunum sínum.

Og sjálfstæði, sjálfstæði gegn ofríki og yfirgangi höfðingjanna.

En ég held að Laxnes hafi ekki séð fyrir hin sögulegu svik íslenskra vinstrimanna.

Eymdin í dag er í þeirra boði, þeir sviku umbyltinguna þegar þeim bauðst sæti við háborg auðróna og leppa þeirra.  

Ekki það að Halldór skrifaði af guðlegum innblæstri um mennsku og mannúð, um fólk og hlutskipti þess, en sjálfur sveik hann mennskuna með þjónkun sinni við harðsvíruðustu morðingja sinnar kynslóðar.

Persónulega tel ég að hann hafi þurft langt og strangt samtal við ömmu sína þarna hinum megin, og ekki veitt af.  

En hann skrifaði BÆKURNAR, Heimsljós og Sjálfstætt fólk, og það verður ekki betur gert.

Kveðja að austan.

[Atlinn (IP-tala skráð) 27.1.2011 kl. 15:33]

Sæll,

Takk fyrir, þema sögunnar skv. mínum skilningi í Sjálfstætt fólk er einfaldlega ekki taka lán til að eitthvað ef að þú átt ekki fyrir því viljir þú halda sjálfstæði þínu og vera vera frjáls maður.  Sögupersónan í Sjálfstætt fólk Guðbjartur Jónsson "Bjartur í sumarhúsum" sagði nei við öllum þeim gylliboðunum sem fyrir hann voru lögð til að halda og berjast fyrir sjálfstæði sínu skv. minni túlkun á sögunni, hann fórnaði m.a. hjónabandi.

Með þessu er ég ekki að segja að það sem er að gerast sé réttlát, rétt eða eins og lífið eigi að vera svona en til þess að svona ástand myndist þarf að vera gerandi og fórnarlamb - orsök, afleyðing - og með það í huga verða þeir sem stanslaust eru að kúa okkur að hljóta hrós fyrir vegna þess hversu ginkeypt við ávallt erum þegar gylliboðin eru lögð fyrir okkur og við stígum ávallt í gildruna, hvað getur maður sagt?

Það skiptir ekki máli hvort þú ert vinstri, hægri, grænn, fasisti, kommi, nazisti, zion eða hvað má nefna það, pólitík gengur út á eitt og það eru völd og þegar þú ert kominn til valda þá gerir þú allt sem að í valdi er að halda völdum og besta aðferðin við það að halda völdum er að gera ekki neitt vegna þess að segja nei fylgir engin ábyrgð.  Gunnar Dal hefur ritað nokkrar mjög góðar greinar er fjalla um völd og pólitík.

Skoðun mín er sú að til að geta sigrast á auðvaldinu/núverandi efnahagsmódeli þá þarf fólk að hætta að væla og grenja yfir því að það langi að njóta sömu kjara og auðvaldið, sem að mun náttúrlega aldrei gerast vegna þess að það eru eingöngu útvaldir sem fá að koma í teitið hjá auðvaldinu.  Það sem að fólk þarf að gera er að standa saman með kærleik og jákvæðni að leiðarljósi og taka völdin á friðsælan hátt og halda völdunum á friðsælan og kærleiksríkan hátt.  Byrjum á því að gera fjármuni óvirka og þá er auðvaldið búið að vera, rétt eins og USA gerði til þess að fella CCCP - sigrum þá á eigin bragði.  Þangað til að við almúginn getum ekki staðið saman og hætt að stinga hvort annað í bakið þá mun þetta ástand ekki breytast neitt og kannski er það málið?  Við erum svona gerð frá náttúrunnar hendi, rétt eins og maurarnir, þ.e. yfirstétt, miðstétt og svo lágstétt, við ráðum ekkert við þetta og kannski hefur náttúran ákveðið að svona skuli þetta vera hjá okkur rétt eins og maurunum?  Hver veit vegna þess að þetta er ekkert í fyrsta skipti sem að þetta gerist og við sem að eigum alltaf að vera að læra af mistökum okkar og með það í huga eigum við að fara varlega í að dæma menn byggt á sögunni vegna þess að kannski ert þú meðtakandi í miklu meiri harmleik heldur en Nazisminn og frændi okkar Adolf nokkur Hitler olli?  Hverjir eru ábyrgir fyrir harmi miðausturlanda sem hafa logað síðan zíonistar komust þar til valda, var það af ástæðulausu að frændur okkar Germanir skyldu bregðast svona við oki zíonistanna?

Læt þessa hugleiðingu duga í bili vegna þess að því fleiri svör sem að við fáum því fleiri spurningar koma upp og þá er best að hafa hugfast að því meira sem að ég veit því sannfærðari verð ég um það hversu lítið ég veit ;-)

 Lifið heil,

Atlinn

[Runar Gudmundsson (IP-tala skráð) 27.1.2011 kl. 21:30]

Eg var að fylgjast með Alþingi i dag það var ekki talað um skuldir heimila eða skuldir alment hja folki nei það for langur timi i að ræða um utflutnings hross og það var EKG a hann mikið af hrossakjöti

[Ómar Geirsson, 27.1.2011 kl. 22:41]

Blessaður Atlinn.

Þetta var mikil drápa hjá þér.  

Ég á pistil hér að framan, "Fleiri en Íslendingar glíma við auðræningja"  þar sem umræða, ekki ósvipaðri þessi, dafnaði í athugasemdum.  Held að við séum að lýsa sama fílnum.

En hvort hinum siðaða manni tekst að breyta hugmyndafræði sinni í tíma, það er eins og það er, kannski ekki það líklegasta í þessum heimi.  En það er ekkert val á þessari öld, slíkar aðstæður hafa aldrei verið fyrr á tímum.

Og það er þetta með harmleikina, ég fært rök fyrir í mörgum pistlum, að núverandi óvinur, sem ég kallaði alltaf Nýfrjálshyggju, en viðurkenni að það er ónákvæmt, kannski ætti hann að kallast Draumaheimur siðblindingjans eða eitthvað annað, er allavega ekki minna mannfjandsamlegri en helstefnur 20. aldar þar sem menn slátruðu milljónum í nafni hugmyndafræði.  Og að mínum dómi er þetta sjálfur óvinurinn með horn og hala, hitt var þá hugmyndafræði, en í dag er það villimennska sjálftökunnar og siðlausrar græðgi, samkvæmt mottóinu að allt er leyfilegt ef einhver getur grætt á því.

Þannig að ég er ekki parhrifinn að þessu liði, og þess gæta víða merki í pistlum mínum og athugasemdum.

En viðurkenni að ég þarf ekki að hafa rétt fyrir mér.

Að lokum þetta, Sjálfstætt fólk er bók sem menn upplifa á mismunandi hátt.  Vissulega skynjaði Bjartur hætturnar við lántökur, en þær felldu hann að lokum ef ég man rétt.

En hann hélt áfram, lengra upp á heiðina með tengdamóður sína og Ástu Sóllilju, ásamt barnabarni sínu.  Uppgjöf var ekki til í hans huga.

Það er dýpri þráður verksins, að halda haus gagnvar áföllum lífsins, og gagnvart höfðingjunum.

Og það er eitthvað sem menn mættu hafa á bak við eyrað.

Kveðja að austan.

[Ómar Geirsson, 27.1.2011 kl. 22:52]

Blessaður Runar.

Það er allt rætt nema það sem skiptir máli.  

Og sem dæmi um veruleikafirringuna þá man ég sumarið haustið sem seinni svikasamningurinn, kenndur við Svavar, var í deiglunni, þá lýsti Guðmundur Steingrímsson því yfir að þetta væri mál sem yrði að klára, og þá væntanlega með samningum.  Hann eins og aðrir samþykktu samning uppá lágmarksgreiðslur uppá 500 milljarða, en gat léttilega farið í 1.000 milljarða ef illa áraði, en á sama tíma sá ég hann í þingsal ræða búsetuúrræði fatlaðra, og fór mikinn í gagnrýni og krafðist úrbóta.

En með hvað peningum???

ICEsave peningunum????

Lítið dæmi sem segir svo mikið, þeir láta eins og ekkert hafi gerst, og ef raunveruleikinn, til dæmis í formi tunnusláttar neyðir þá til að horfast í augun á skuldaerfiðleikum landsmanna, þá gráta þeir og segja að það sé ekkert hægt að gera.  

En hvað gerist ef fólk gefst upp í þúsunda tali???

Hver greiðir þá skuldir ríkisins???

Af hverju getur bankakerfið afskrifað milljarða, tugi milljarða hjá fyrirtækjum, en má ekki til þess hugsa að koma til móts við almenning???

Það er svo margt sem þetta vesalings fólk hefur á samviskunni, að ekkert orð annað en heimska nær að lýsa hugsanagangi þess.

Það er ekki starfi sínu vaxið.

Það sýndi það þegar brandarinn sem kallaðist Aðgerðir vegna skuldavanda heimilanna voru kynntar í lok síðasta árs, aðeins 2 milljarðar í hendi, 6 hjá lífeyrissjóðunum, hugsanlega.

En 14 milljarðar handa Sjóvá svo dæmi sé tekið.

En þjóðin vill þetta og er ligeglad með ástandið.  Aðeins nöldrarar malda í móinn, enda eðli nöldrara að gera slíkt.

Það breytist ekkert fyrr en fólkið sjálft vill breytingar.

Svo einfalt er það.

Kveðja að austan. 

[Elle_, 29.1.2011 kl. 21:01]

Ómar, þú ætlaðir að hugsa þitt mál um hví skrípi stjórni landinu og nú hef ég hugsað mál þitt, bara pínulítið samt.  Leyfi þér sjálfum að hugsa það sem er eftir af málinu. -_- 

Getur verið að það sé pólitíska kerfinu að kenna?  Lögunum sem pólitíkusar sjálfir hafa sett til að halda völdum?  Hafa þeir ekki gert nýjum flokkum nánast ókleift að komast í alþingi og í stjórn?  Hefur ekki verið of mikill klíkuskapur í embættum og pólitískum stöðum? 

Og vegna götóttra laga kannski eða óformfestu eins og Rannsóknarskýrslan benti á að yrði að laga og hefur ekkert verið lagað.  EKki farið eftir stjórnarskránni eins og í Evrópufáráðsumsókninni og í ICESAVE, lög enn ekki virt viðlits eins og í ICESAVE og vaðið yfir Hæstaréttardómara. 

Og núna hefur sjálfur dómsmálaráðherrann bættst í hópinn í 2 málum þar sem hann virðir ekki dóm Hæstaréttar í stjórnarskrármálinu og ætlar líklega að sættast á lögleysuna ICESAVE gegn eigin þjóð.  Samkvæmt honum sjálfum. 

Og við sem héldum að hann væri okkar klettur, allavega í ICESAVE.  Sorglegt. 

[Ómar Geirsson, 30.1.2011 kl. 10:03]

Blessuð félagi Elle.

Er búinn að lesa það helsta í bloggheiminum (á Mbl nenni ekki á auðmannsíðuna eða samfylkingarsíðuna) og laga mér kaffi, sit núna með fyrsta kaffibolla dagsins, nenni ekki að blogga neitt, en langar aðeins að fabúlera um hugsanir mínar, og festa á blað rafeindanna.

Svona í það fyrsta þá er orðið skrípi gildishlaðið, sett fram af pirring vegna fólks, sem þverbrotið hefur öll sín loforð, styður mannfjandsamlega stefnu, og kórónar allt með stöðugum afbökun raunveruleikans.  Ætli aðildarviðræðurnar séu ekki besta núverandi dæmið um það, af hverju má ekki segja satt um lög og reglur ESB, að eitthvað sem heitir aðildarviðræður eru löngu fyrir bí, enda tæki það nú ekki nema nokkra mánuði að fá botn í það mál.

En skrípi er nú samt ekki mjög málefnalegt, þó það sé lýsandi.

Elle, ég held að vandinn tengist ekkert löggjöf eða framkvæmd laga.  Þetta er svipað hér og annars staðar, vissulega erum við óöguð þjóð hvað viðkemur formlegheitum, enda þurfti aðra eiginleika til að lifa af í harðbýlu landi.  Svo erum við með öll einkenni ættbálkasamfélags, þar er ríkari hefð að "öldungarnir" eða höfðinginn hafi valdið, lögin eru þarna, en hið raunverulega vald fer eftir status, ekki formi.

Þessi strúktúr gæti skýrt til dæmis stjórnlagaþingsklúðrið, formlegheit svona la la, og ICEsave afgreiðslan er þekkt í hugarfarinu "mitt er valdið".  Frægast þegar Davíð lagði niður heila opinbera stofnun þegar hann geðjaðist ekki að forsvarsmanni hennar.

Spurningin um af hverju þetta fólk skuli komst upp með að stjórna gegn þjóð sinni, út frá hagsmunum kerfis og auðmanna, svona í ljósi þess bruna sem fólk varð fyrir í Hruninu, og ætti samkvæmt spekinni að brennt barn forðast eldinn að vera eiginlega óhugsandi, henni er ekki svarað nema út frá mannlegu eðli.

Það er ekkert formlegheit, eða einhver ytri kúgun sem skýrir þetta.

Sumir hafa fært rök fyrir að almenningur hafi það betra en margur svartsýnismaðurinn heldur fram, og það er ljóst að eitthvað er til í því.  Munar þar um allar greiðsluaðlaganirnar sem hafa fært greiðslubyrði fólks í átt að því sem hún var fyrir Hrun.  Vissulega eignast fólk aldrei neitt, en það getur lifað sínu lífi.  Og það að mörgu ágætislífi, sérstaklega hjá þeim sem hafa ekki lent í áföllum, atvinnumissi, launaskerðingu eða einhverju slíku.

Annar faktur er að hinir óánægðu hafa leitað annað, flutt úr landi, eða eru uppteknir við að finna sér nýjan grundvöll, til dæmis skipt um vinnu, jafnvel farið út í rekstur (nýskráning fyrirtækja benda ekki til uppgjafar) eða eitthvað sem tekur hug þess.

En þetta tvennt útskýrir aðeins af hverju fólk er ekki niður á torgi að mótmæla, bruni þess er ekki nægur til að það finni sig sjálft knúið til aðgerða, en óánægjan kraumar undir, allar kannanir benda til þess, það er mikið vantraust mælt út í flokka og stofnanir stjórnsýslunnar, og svo framvegis.

Ég held, og hef haldið lengi að það sé aðeins ein skýring á að kerfið kemst upp með að endurskapa sig, og það er skortur á forystu í Andófinu.  Það vantar skýran raunhæfan valkost, sem nær að sameina fólk með ólíkar lífsskoðanir, og ólíkan bakgrunn.  Og aðeins sterk forysta mótar slíkt, almenn umræða og hugmyndaátök er jarðvegur, en einhver þarf að yrkja þann jarðveg, og uppskera hann.

Borgarahreyfingin gat hugsanlega þróast sem valkostur, hún féll á fyrsta prófinu sem var ESB umsóknin, og það var fyrst og fremst vegna þess að hún hafði ekki skýra sýn, skorti hugljómunina um eitthvað betra sem framtíðin fæli í sér, og væri þess virði að fólk beitti sig aga og þyldi náungann og samherjann í stríðinu um þessa framtíð.

Annaðhvort var fólk ekki nógu brunnið, skynjaði ekki lífsháskann í núverandi kerfi, eða það hafði ekki nógu sterka trú.

Og við vitum Elle að önnur Andófssamtök hafa gengið í gegnum það sama, fólk er ekki tilbúið að gera það sem þarf að gera, á þann hátt sem þarf að gera það.  Eitthvað persónulegt tekur alltaf yfir, við endum í að vega samherja, í stað þess að spjóta þursann sem rænir okkur framtíðinni.

Og ef fólk hefur ekki skýran valkost, heldur mismikið framboð manna sem eru í engu betri en þeir sem sitja, og hafa það sér eitt til mannkosta, að geta gagnrýnt, en munu reynast í valdastól í engu betri en þeir sem hraktir voru burt, af hverju ætti það fylla götur og torg með mótmælum og látum.

Eftir allt saman er ástandið í dag, akkúrat núna, ekki svo slæmt, þannig séð.  Ógnirnar eru allar handan sjóndeildarhringsins, og þegar andstöðunni tekst að hindra verstu afglöpin, sbr ICEsave, frestun uppboða á heimilum fólks, frestun niðurskurðar í heilbrigðiskerfinu, frestun og aftur frestun, en ekki afturköllun, þá virkar þetta allt eins og tröllasögur. 

Sagði ekki Steingrímur að aukning skattheimtunnar væri það lítil að ekki væri hægt að tala um ofurskattheimtu.  Sem svar við þeirri gagnrýni að hækkun skatta minnkaði skattstofna, gagnrýni sem rættist, en þá notuð sem búmmerang til að sýna að ekki væri um ofurskattheimtu að ræða.

Er ekki gengið stöðugt því ekki hefur komið til útgreiðslu erlendra lána, sem meðal annars hefur verið frestað vegna ICEsave andstöðunnar.

Og svo framvegis, og svo framvegis, um hvert þessara atriða má skrifa langt mál, en ég er aðeins að reyna kasta fram myndum um hvernig að sá sem er hindraður í voðaverkum, getur síðan notað það sem sönnun þess að ekkert gerðist, og hví þá þennan hávaða????

Einnig verður að hafa í huga, að allt fræðasamfélagið er hlynnt viðteknum hugsanahátt.  AGS/ICESave er dæmi um kerfisbundna leið og menn hugsa ekki út fyrir rammann.  Eins er það með skuldir sem lenda á almenning, fyrir því er jú löng hefð að almenningur hafi elítuna og höfðingjanna á herðum sér, og af hverju á að breyta því????

Á þetta bara ekki að vera svona???

Vissulega finnst fólki það ekki, en allt sem það heyrir í fjölmiðlum er samt aðeins stuðningur við ríkjandi kerfi, þó í blæbrigðum sé.  Til dæmis er stór hluti Framsóknarflokksins, og eiginlega allur Sjálfstæðisflokkurinn fylgjandi aðgerðum ríkisstjórnarinnar, samstarfið við AGS er hornsteinn kerfisins.  

Deilurnar sem við upplifum eru aðeins valdabarátta, ekki hugmyndabarátta.

Það er því mjög skiljanlegt að fólk sé ráðvillt.  Það vill þetta ekki, en hefur ekki valkostinn.

Það held ég að sé svarið, það skýrir að gott fólk hafi vonda stjórn.

Það þarf meiri reiði til að fólk haldi í óvissuleiðangur stjórnleysisins, þar hræða sporin vissulega.  Það er frekar að fólk segi Nei við verstu ósvinnunni, líkt og með IcEsave.  Mótmælin við Austurvöll frestuðu líka uppboðum, og versta niðurskurðinum í heilbrigðiskerfinu.

Og ég skil þessa afstöðu mjög vel.  Ég sé sjálfur engan valkost, mín mótmæli eru mótmæli við ógnirnar, tel þær það alvarlegar að það þurfi að fella stjórnvald sem beitir sér fyrir þeim.  En ég geri mér alveg grein fyrir, að það er aðeins gráglettni örlaganna sem valda því að núverandi flokkar eru skotspónn minn, þeir sem eru á varamannabekknum eru engu betri, hugsa það sama.

Hugsa hefðbundið, og skilja ekki fyrir sinn litla fingur hvað stefna þeirra hefur gert þjóðinni, og eyðilagt framtíð barna okkar.

Það er engin framtíð í skuldaþrældómi, og þeir sem beita sér ekki gegn þeirri ógn, þeir eru ekki valkostur.

Það er enginn sem segir hreint út, almenningur á ekki að líða fyrir gjörðir elítunnar.  Þeir sem lánuðu auðmönnum, þeir eiga að sitja uppi með tap sitt.  Það er aldrei réttlætanlegt að nýta skattfé almennings í annað en það sem það á að fara í, að veita almannaþjónustu.

Mennta og hjúkra börnum okkar, ala önn fyrir sjúkum og öldruðum, viðhalda innviðum samfélagsins.

Og ekkert mannannaverk eins og verðtrygging, getur gert fólk að skuldaþrælum.  

Fólk er æðra kerfinu.  Samfélag okkar er ekkert annað en fólkið sem það byggir.  Það er ekki fjárfestar eða hagsmunir þeirra, það er ekki auðmenn og auðfyrirtæki, kerfi eins og verðtrygging, það er ekkert annað en við sjálf.

Og réttur barna okkar til lífs og gæfu.

Þá hugsýn hefur ekki Andstaðan.

Þess vegna ríkir ríkjandi kerfi.  Það felst í orðinu "ríkjandi" að það ríkir.  Og hinn venjulegi maður fær því ekki breytt, ekki ef hann upplifir sig einan og varnarlausan.  Þá reynir hann aðeins að bjarga sér og sínum.

Að bjarga sér og sínum, það er það sem skýrir viðbrögð Íslendinga, hver reynir að gera sitt besta úr því sem hann hefur.

Og á meðan heldur heljarferð þjóðarinnar áfram.

Svona er þetta Elle, svona er þetta.

Kveðja, Ómar.

[Elle_, 31.1.2011 kl. 18:47]

Félagi Ómar, takk fyrir svarið sem þú hefur lagt mikið í.  Já, þú kemur með góða punkta og líka hinir mennirnir að ofan. 

Skattatröllasagan hans Steingríms segir nú margt um hvað honum er tamt að blekkja og beint og óbeint ljúga.  Enda bliknaði hann ekki við að ætla að pína yfir okkur ICESAVE1 eins óséðu og hann gat.  Já, 2 dögum eftir að hann laug í alþingi að það væru engir samningar í gangi, bara þreifingar. 

Nei, það gengur auðvitað alls ekki að félagar í andófi vegi aðra félaga, Ómar.  Og ætti ekki að vera erfitt fyrir venjulega menn að skilja að það gerir maður bara ekki og ekki verður endilega aftur snúið.  Foringjavald í núinu með meðfylgjandi fælingarmætti bætir engan veginn upp skemmdina.  Æ, þú veist hvað ég meina, Ómar.  

[Ómar Geirsson, 31.1.2011 kl. 21:24]

Blessuð Elle.

Fæst andófssamtök hafa náð því að mynda foringjaræði, vígaferlin byrja áður vegna þess að hver fyrir sig segir, ég, ég ég , mér finnst.  Þú, þú, þú, ert bara bjáni, vilt ekki minn hátt.

Og svo framvegis.

En foringjaræði er andstæða styrkrar leiðsagnar, sá sem leiðir, hann skapar sáttina um hugsýnina, á þátt í að skapa þá hugljómun sem knýr fólk áfram, og fær það til að sætta sig við náungann.

Mandela, King, Churchil eru dæmi um slíka menn.  Og margir aðrir ónefndir sem hafa náð að laða fram það besta í fólki í þágu ákveðins málefnis eða málsstaðar.

Hrafn Jökulsson, skákhugsjónamaður er dæmi um slíkan talent.

En það eru ekki margir þarna úti, eðli málsins vegna.  

Og enginn tilbúinn að stíga fram, því miður.

Þess vegna þarf meiri bruna til að kalla fram andóf fólks.

Á meðan held ég áfram með mína títuprjóna, hrekkjandi saklausa vinstri sálir.

ICEsave er byrjað, og ég sem er kominn með heilsu til að labba, á ný.  Verð því mismikið við fram að næstu sprautu, enda sé ég á aðsóknartölum undanfarna daga, að fastakúnnar eru orðnir leiðir, lesturinn minnkaði með hverjum deginum, líkt og áhugi minn.  Því ágætt að hvíla þetta aðeins.  Framsóknarmenn eiga þó eftir að fá pílu, aumingja Höskuldur, svo ég segi ekki annað.

Heyrumst félagi Elle, við munum finna okkur farveg.

Kveðja, Ómar.

[Elle_, 4.2.2011 kl. 12:58]

Ómar, hef verið að hugsa um það sem við skrifuðum að ofan + +  Og góður punkturinn þinn að ofan (30.1.2011 kl. 10:03) um menn sem hafa það helst til mannkosta að geta gagnrýnt.  Nei, það gerir engan að alvöru forystumanni þó líklega blekkist fólk oft af gagnrýnihæfninni.  Og kemur forystuhæfninni bara ekkert við.  Hví lætur fólk það villa sig? 

Og skrýtið að þeir sem mest vilja foringavald, gagnrýni það oft hart í stjórnmálamönnum.  Sama með lýðræði, það er brotið og þar með frelsið og viljinn.  Las eftirfarandi pistil um ófrelsi og ósjálfstæði sem ég segi að drepi andann og letji og set inn linkinn:

http://tilveran-i-esb.blog.is/blog/tilveran-i-esb/entry/1138387/ 

En við heyrumst, Ómar.