Það verður enginn endir á lífskjaraskerðingunni á meðan Leppar Alþjóðagjaldeyrissjóðsins svívirða stjórnarráð Íslands.

 

Alþjóðagjaldeyrissjóðurinn hefur aðeins einn tilgang, og hann er að vernda hið siðlausa alþjóða fjármagn sem hefur farið eins og engisprettufaraldur um lönd þriðja heimsins en hefur núna tekið kúrsinn á lönd Vesturlanda með siðleysi sínu og græðgi.

Tilbúin bóla var blásin upp, ódýru fjármagni dælt yfir, og búmm, allt sprengt í loft upp.  

Áður var sjálftökuliðið búið að koma öllu sínu á þurrt.  Og lét síðan almannavaldið taka yfir skuldir sínar.  Og þessar skuldir eiga að leggja drög af skuldaþrældómi heillar kynslóðar á Vesturlöndum.  

Þetta er hin síðbúna hefnd hins siðlausa fjármagns gagnvart velferðarkerfum sósíaldemókratanna.  Að drekkja þeim í skuldum.

 

Hér á Íslandi á að sjúga allan þjóðarauðinn í þessa skuldarhít.  Og aðeins þeir sterkustu eiga að fá lifa, lifa sem skuldaþrælar við láglaunastörf verksmiðjufarbikanna.  Hinir verða bornir út á guð og gaddinn. 

Hverja sprænu á að virkja, hvern hver að nýta.  

Og orkan fer síðan í fabrikkur erlendra auðhringa.  Og fyrir þá mun þjóðin vinna.  

Alþjóðagjaldeyrissjóðurinn neitar því ekki einu sinni að hann ætlar að leggja niður þjónustu hagkerfið, og slátra velferðinni.  Hægt og rólega hefur hann egnt skuldagildruna, vissulega smá bakslag í ICEsave, en á meðan Lepparnir svívirða, þá mun sá skuldabaggi enda á þjóðinni.

Og hálfgjaldþrota almannafyrirtæki verða látin skuldsetja fram yfir það mögulega, til að fjármagna fyrstu virkjanirnar.  Síðan verða þær yfirteknar líkt og mun verða gert við hin stórskuldugu sjávarútvegsfyrirtæki.  

Allt mun þetta enda í vasa erlendra lánardrottna.

Og þeir eru ekki meðlimir í neinu góðgerðarfélagi.

 

Þetta liggur allt fyrir skjalfest í efnahagsáætlun sjóðsins.  En þjóðin neitar að trúa, eða hún er svo andlega löt að hún nennir ekki kynna sér plöggin. Vælir aðeins um Landsdóm og stjórnlagaþing.

Eins og slíkt verði í askana látið.

 

Í dag eru það Þingeyingar og Suðurnesjamenn, á morgun Vestfirðingar og Austfirðingar, loks restin af þeim sem einhverja þjónustu fá.  Óhjákvæmileg afleiðing þegar hlutfall skulda af tekjum ríkisins hækkar sífellt.  

Og ICEsave og hin erlendu gjaldeyrislán munu sjá til þess. 

 

Okkar eina von er að henda út svívirðunni, og hrekja illþýðið úr landi.  Allt sem varað var við, er að ganga eftir.  Það er enginn bati í sjónmáli, lífskjörin versna með hverjum deginum, og brátt mun gengið láta undan með nýju verðbólguskoti.  Því er aðeins haldið uppi á meðan skuldagildrunni er lokað.

Af hverju látum við aflífa þjóð okkar án þess að snúast til varnar???

Við  erum þjóðin, ekki auðræningjar.  Eða Lepparnir sem svívirða stjórnarráðið.  Það eru ekki nema örfáir einstaklingar sem vilja útburð fólks, það er þeir sem ætla sér að græða á neyð annarra með því að sölsa undir sig eigur þess fyrir hrakvirði.  

Látum ekki bjóða okkur þetta.

Verjumst.

Mætum við Austurvöll og berum þetta lið út.

Kveðja að austan.

Kaupmáttur 15,5% minni

Athugasemdir

[Haraldur Baldursson, 4.10.2010 kl. 13:10]

Heyr heyr !

Ég mæli með versluninni Tiger....þar keypti ég í kær trommu fyrir 800 kr.....

[Jón Snæbjörnsson, 4.10.2010 kl. 15:04]

fyrir nákvæmlega 16 mánuðum síðan var ekki dýrara í Tiger en kr 500 sem kostar nú Kr 800 - þarna sjáið þið jafnvel það lélegasta tekur kipp og það vel yfir 50%