Háð í stuðningsmanni fjárkúgunar.

 

Blommberg fréttastofan gerir það ekki endasleppt í stuðningi sínum við meintum þjófnað breta á  skattfé íslensks almennings.  Ef það þarf að ljúga í ICEsave deilunni, þá hefur Blommberg yfirleitt séð um skítverkið.  Mætti halda að fréttaveitan væri útibú spunakokka Samfylkingarinnar.

Og Mbl.is á þökk fyrir að vekja athygli á nýjustu lygaafurð fréttaveitunnar.  Lúmsk og ófyrirleitin tilraun til mannorðsmorðs á íslensku þjóðinni, sem aðeins ákaflegar svartar sálir græðiginnar og siðblindu geta látið frá sér fara.  

Undir yfirskyni þess að um stuðning við málstað íslensku þjóðarinnar þá hamrar Lynn á hinni stóru lygi, hann talar um skuld íslensku þjóðarinnar.

 

"Vissulega séu viss rök fyrir því að greiða skuldina.  Það sé almennt góð regla að greiða skuldir sínar og það muni reynast Íslandi dýrkeypt að gera það ekki." 

 

Þetta er kjarni greinarinnar, það er þetta sem eftir situr þegar fólk hefur lesið pistil Lynn, "jæja svo greyin ætla ekki að borga það sem þeim ber, þvílíkir aumingjar".  Allt hitt er bara froða og yfirskyn, sett fram svo grunlaus lesandi haldi að um stuðning við málstað Íslands sé að ræða.

 

En glæpurinn stendur eftir, þeir ætla ekki að greiða skuldir sínar.

 

Þetta er þekkt tækni úr bandarískum réttarsölum.  Þegar sækjandi sér að gögn hans eru vafasöm, og kviðdómur hefur samúð með þeim góða gegna manni sem hann ákærir, þá hefur sækjandinn vit á að rífast ekki við þá samúð, heldur tekur hann undir hana, "það er ljót að sjá svona vammlausan fjölskyldumann, sem framið hefur morð, sitja undir svona ákæru, sem erfitt er að sanna vegna tæknilegra örðugleika.  Þetta annálaða góðmenni og faðir ungra barna, sem varð það á að drepa, hann á miskunn okkar skilið .. ......".   Og eftir stendur að ákæran fjallaði um morð, ekki hið vammlausa líf fram að þessu, eða erfiðleika  lögreglunnar til að sanna glæpinn.  Og þess vegna var úrskurður kviðdómsins sekur, því í nafni samúðar var glæpnum klínt á ákærða, en ekki sannaður, því gögnin voru ekki til staðar.

 

Þar sem lygaveitan mun starfa á fullum afköstum við að koma glæpnum á íslensku þjóðina, þó sönnunin sé engin, þá verðum við að vera á verði, og sjá í gegnum svona skrípaleik.

 

Matthew Lynn er aumkunarverður maður.  Og hann og hans líkar skulu ekki komast upp með að níða niður okkar mannorð. 

Við borgum ekki ICEsave vegna þess að það er ekki skuld okkar.  Íslenskir skattgreiðendur bera ekki ábyrgð á gjörðum breskra innlánseiganda á breskum fjármálamarkaði.  

Forsenda markaðshagkerfisins er að sjálfstæðir einstaklingar bera ábyrgð á sínum eigin viðskiptum, tapi þeir á viðskiptum við aðra þá senda þeir ekki samlöndum hans reikninginn.  Það er ekki einu sinni kommúnismi, það er absúrd þvæla sem þarf mikið ímyndunarafl til að láta sér detta í hug, og óendanlega trúgirni til að trúa.

Segjum Nei við ICEsave.

Kveðja að austan.

 

Sendi skýr skilaboð með þjóðaratkvæðagreiðslu